Pregunta di Lector

◼ E palabra di Jesús den Mateo 11:24 kier men cu hende cu Jehova Dios a destrui den candela den Sodoma i Gomorra lo ser resusitá?

Contestando e pregunta conciencialmente através dje añanan, nos a considera e palabra di Jesús den Mateo 10:14, 15; 11:20-24; i Lucas 10:13-15. Un repaso reciente di esei ta sugeri cu tal texto no tin cu ser aceptá como declaracion tocante e futuro di hende di Sodoma i Gomorra. Promé cu nos ta examina otro comentario bíblico tocante hende destrui den e dos stad, láganos tuma na cuenta loke Jesús a bisa.

Ora Jesús tabata den Galilea, el a “reprochá stad den locual obra di mas poderoso di dje a wordu hací, pasobra nan no a arrepenti.” El a menciona tres stad: “Ai di bo, Corazín! Ai di bo, Betsaida! pasobra si obra poderoso a sosode den Tiro i Sidón cu a sosode den boso, for di hopi tempo caba nan lo a arrepentí . . . Lo ta mas soportabel pa Tiro i Sidón den e dia di huicio cu pa boso. I abo, Capernaum, tal bez lo bo ser halzá te na cielo? Lo bo baha te na Hades; pasobra si obra poderoso cu a sosode den bo a sosode den Sodoma, e lo a permanece te na dia djawe. . . . Lo ta mas soportabel pe tera di Sodoma riba e dia di huicio cu pa bo.” (Mateo 11:20-24) Jesús a haci declaracion similar ora el a manda e 12 disípel pa predica, i despues a manda 70.—Mateo 10:14, 15; Lucas 10:13-15.

Promé cu 1964, nos a comprende cu tal texto ta nifica cu e pueblo di Corazín, Betsaida, i Capernaum a merece destruccion eterno. Sin embargo, artículo di Watchtower di 1964 i 1965 a haci claro cu tur hende den Hades, of Sheol, (e graf común di humanidad) lo sali den e resureccion i despues lo ser ‘huzgá segun nan obra.’—Revelacion 20:13.

Tal artículo també a razona: Mateo 11:23 i Lucas 10:15 ta bisa cu Capernaum lo no ser halzá te na cielo sino lo ser bahá “te na Hades,” locual, por lo menos, ta sugeri degradacion pe pueblo dje stad. Den e mesun texto, Jesús a menciona Tiro i Sidón di antigua. Segun Ezekiel 32:21, 30, hende di Sidón cu Dios a condená, a baha te na Sheol. (Isaías 23:1-9, 14-18; Ezekiel 27:2-8) Siendo cu Jesús a pone Tiro i Sidón paralelo cu Sodoma, esei a indica cu hende di Sodoma ta den Sheol també.

Sin embargo, un reexaminacion di Mateo 11:20-24, ta lanta duda di cu Jesús tabata considera ei e huicio eterno i resureccion. Su punto tabata ki indiferente hende tabata den Corazín, Betsaida, i Capernaum i lo ta ki improbable cu nan lo arrepenti asta den e dia di huicio. Bisando cu lo ta “mas soportabel” pa Tiro i Sidón i Sodoma i Gomorra “riba e dia di huicio” tabata un forma di exageracion pa enfatizá e punto mustrando cu Jesús no tabatin intencion pa nos acepté literalmente, no mas cu otro comparacion gráfico cu el a usa. Por ehempel:

“Ta mas fácil pa cielo i tera pasa forbij cu pa un pida di letter dje Ley pasa sin cumplimento.” “Cielo i tera lo pasa, pero mi palabra lo no pasa di ningun manera.” (Lucas 16:17; 21:33; Mateo 5:18; compara cu Hebreo 1:10-12.) Nos sa cu cielo i tera literal lo no pasa nunca. (Salmo 78:69; 104:5; Eclesiastés 1:4) Jesús també a bisa: “Ta mas fácil pa camel pasa door di wowo di hangúa cu ta pa un ricu drenta den e reino di Dios.” (Marco 10:25) Siguramente, Jesús no kier men cu ningun hende ricu por hamás bira disípel; algun den e promé siglo a bira cristian ungí. (1 Timoteo 6:17-19) E uso cu Jesús a haci di exageracion tabata pa enfatizá cu ta ki duro pa hende ricu pone Dios promé cu riqueza material i e bon bida.—Lucas 12:15-21.

P’sei, e palabra di Jesús bisando cu ta ‘mas soportabel riba e dia di huicio pa Tiro i Sodoma’ no kier men necesariamente cu tal hende lo ser presente riba e dia di huicio. E simplemente por a enfatiza ki indiferente i culpable tabata e mayor parti di hende den Corazín, Betsaida, i Capernaum. Nos ta bisa e mayor parti pasobra algun hende den Capernaum sí a acepta Cristo. (Marco 1:29-31; Lucas 4:38, 39) No obstante, básicamente e tres stad a rechaza Cristo. Algun habitante di nan, tal como scriba i fariseo, por asta a peca contra e spiritu santo, pa locual pordón ta imposibel asta den e ‘sistema di cosnan cu ta bini.’ Hende asina ta baha den Gehena.—Mateo 12:31, 32; 23:33.

Fuera dje palabra di Jesús riba e punto, Ezekiel 32:21, 30 sí ta bísanos cu hende pagano di Tiro i Sidón di antigua ta den Sheol; pues nan ta candidato pe resureccion. Anto, kico di habitante dje “tera di Sodoma riba e dia di huicio”? E simple echo cu Jesús a pone Sidón na paralelo cu Sodoma no ta establece e prospecto di futuro pa hende malbado cu Dios a destrui cu swafel i candela. Pero, láganos mira kico mas e Bijbel ta bisa tocante e cuestion.

Un comentario di mas directo ta den Hudas 7. Hudas a caba di menciona (1) israelita destruí pa nan falta di fe, i (2) angel cu a peca i ta ‘reserbá den cadena eterno pe huicio dje gran dia.’ Anto Hudas a skirbi: “Asina també Sódoma i Gomorra . . . ta poní dilanti [nos] como un ehempel [spiertador] ora nan a sufri dje castigo hudicial di candela eterno.” E texto a ser aplicá ne destruccion eterno dje dos stad mes, i no ne pueblo. Sin embargo, den bista di Hudas 5 i 6, probablemente casi tur hende ta comprende versículo 7 pa nifica castigo hudicial di hende. (Di igual manera, hende por comprende cu Mateo 11:20-24 ta critica hende, i no piedra of edificio.) Den luz di esei, Hudas 7 por nifica cu hende malbado di Sodoma i Gomorra tabata huzgá i destruí pa semper.a

Buscando mas leu, nos ta haya cu ta notable cu e Bijbel mas cu un biaha ta relaciona e diluvio cu Sodoma i Gomorra. Den cua contexto?

Ora hende a puntra Jesús tocante e “conclusion dje sistema di cosnan,” el a profetiza dje binidero “fin” i un “tribulacion grandi tal como no a sosode desde principio di mundo.” (Mateo 24:3, 14, 21) El a sigi menciona e “dianan di Noé” i loke a “sosode den e dianan di Lot” como ehempel di hende cu no a haci caso dje advertencia tocante e binidero destruccion. Jesús a agrega: “Lo ta mescos riba e dia ora e Yiu di hende lo ser revelá.” (Lucas 17:26-30; compara cu Mateo 24:36-39.) Jesús tabata ilustra simplemente un actitud, of e contexto den locual el a usa tal ehempel ta sugeri cu esei ta toca huicio ­eterno?

Despues, Pedro a skirbi tocante e huicio di Dios i cu E ta castiga hende cu ta merece esei. Anto Pedro a usa tres ehempel: Angel cu a peca, e mundo di antigua dje tempo di Noé, i hende destruí den Sodoma i Gomorra. Segun Pedro, hende di Sodoma i Gomorra ‘ta un modelo di cosnan pa bini pa hende malbado.’ (2 Pedro 2:4-9) Despues, el a compara e destruccion cu hende a recibi den e diluvio cu e binidero “dia di huicio i di destruccion di hende malbado.” Esei ta sosode promé cu e cielo nobo i tera nobo primintí.—2 Pedro 3:5-13.

Di igual manera, ne fin dje sistema malbado actual, hende cu Dios ta ehecuta a recibi nan huicio final? Esei ta ser indicá den 2 Tesalonicense 1:6-9: “Ta husto di parti di Dios pa paga tribulacion na esnan cu ta causa tribulacion pa boso, pero, pa boso cu ta sufri di tribulacion, alivio hunto cu nos ne revelacion di Señor Jesús foi cielo cu su angelnan poderoso den flam di candela, ora e trece vinganza riba hende cu no ta conoce Dios i hende cu no ta obedece e bon nobo tocante nos Señor Jesús. Eseinan mes lo sufri e castigo hudicial di destruccion eterno di dilanti Señor i dje gloria di su poder.”

Tin un fraseología parecido interesante den detaye ei i loke Hudas a bisa a sosode den e caso di Sodoma i Gomorra. Además, Mateo 25:31-46 i Revelacion 19:11-21 ta indica cu “cabrito” cu ta ser cortá den e binidero gera di Dios lo experimenta un “cortamento eterno” den e “tanki di candela,” cu ta simboliza exterminacion eterno.b—Revelacion 20:10, 14.

P’sei, además di loke Hudas 7 ta bisa, e Bijbel ta usa Sodoma i Gomorra i e diluvio como modelo dje fin destructivo dje mal sistema di cosnan actual. Ta bisto, anto, cu hende cu Dios ta ehecuta den tal huicio di pasado a experimenta destruccion incambiable. Naturalmente, cada un di nos por confirma esei door di resulta di ser fiel na Jehova Dios awor. Dje manera ei nos por califica pa ser na bida den e mundo nobo pa mira ken lo e resusita i ken e no ta resusita. Nos sa cu huicio di dje ta perfecto. Eliú a dúnanos e siguranza: “En berdad, Dios mes no ta obra malamente, i e Todopoderoso mes no ta troce huicio.”—Job 34:10, 12.

[Nota]