“Tuma Mi Yugo Riba Boso”
1 Den un mundu yen di preshon i ansiedat, nos a haña berdadero alivio dor ku nos a aseptá Hesus su kaluroso invitashon pa buska refreskamentu bou di su yugo. (Mat. 11:29, 30) Aseptá e yugo komo disipel ta enserá partisipá den un obra ku no ta únikamente interesante sino tambe refreskante. Ademas, e ta enserá prediká e bon nobo di Reino i yuda otro hende haña refreskamentu huntu ku nos bou di Hesus su yugo suave.—Mat. 24:14; 28:19, 20.
2 E Ministerio Ta Refreskante: Hesus no a pidi su siguidónan pa agregá su karga na loke nan tabata kargando kaba. El a invitá nan pa kambia nan karga pisá pa su karga lihé. Nos no ta kargá mas ku ansiedat i desesperashon di e sistema di kosnan aki; ni nos no ta traha pa rikesa insigur. (Luk. 21:34; 1 Tim. 6:17) Maske nos ta okupá i tin ku traha pa gana nos pan di kada dia, adorashon na Dios ta e kos di mas importante den nos bida. (Mat. 6:33) Si nos mantené un punto di bista korekto di kiko ta mas importante, semper nos lo haña e ministerio refreskante, i no un peso.—Fil. 1:10, BPK.
3 Ta natural ku nos gusta papia riba loke tin den nos kurason. (Luk. 6:45) Tur kristian ta stima Yehova i ta atesorá e bendishonnan di Reino ku el a primintí. P’esei, ta masha refreskante pa papia tokante “notisianan alegre di kosnan bon” i laga nos preokupashonnan diario atras miéntras nos ta partisipá den e ministerio! (Rom. 10:15) Klaru ku mas nos hasi un kos, mas bon nos lo bira den dje i mas goso nos lo haña. P’esei, mas tempu nos dediká na e ministerio, si esei ta posibel, mas refreskamentu nos lo haña. I ta masha animante ora hende ta reakshoná faborabel ora nos prediká na nan! (Echo. 15:3) Asta ora nos haña nos ku indiferensia òf oposishon, e ministerio lo duna refreskamentu spiritual si nos tene na mente ku nos esfuerso ta agradá Yehova i ku kada bon resultado ta debí na su bendishon.—Echo. 5:41; 1 Kor. 3:9.
4 Ora nos aseptá Hesus su invitashon, nos ta disfrutá di e privilegio di sirbi huntu kuné komo Testigu di Yehova. (Isa. 43:10; Rev. 1:5) No tin nada mas refreskante ku esei!