E Reino di Dios—Bo Ta Captando e Sentido di Dje?
“En cuanto esun cu a ser sembrá riba tera excelente, esaki ta esun cu ta tende e palabra i ta capta e sentido di dje.”—MATEO 13:23.
1. Cua ta algun creencia comun relacioná cu ‘e reino di cielu’?
BO A “capta e sentido di” loke e Reino di Dios ta? Atrabes dje siglonan conceptonan di ‘e reino di cielu’ a diferenciá mashá for di otro. Un creencia comun entre algun miembro di iglesia awe ta cu e Reino ta algu cu Dios ta pone den curason di un persona ora e combertí. Otronan ta kere cu esei ta un lugá caminda bon hende ta bai despues di morto pa disfrutá di felicidad eterno. Otronan atrobe ta afirmá cu Dios a laga pa hende producí e Reino riba tera pa medio di nan enbolbimentu den inculcá siñansa i custumbernan cristian den asuntunan social i gubernamental.
2. Con Bijbel ta splica e Reino di Dios, i kico lo e logra?
2 Sin embargo, Bijbel ta mustra claramente cu e Reino di Dios no ta un institucion riba tera. Tampoco e ta un condicion di curason ni e combertimentu di sociedad humano na cristianismo. Ta cierto cu un comprendimentu corecto di loke e Reino aki ta, ta producí cambionan grandi den bida di esnan cu ta ehercé fe den dje. Pero e Reino mes ta un gobiernu celestial cu Dios a instituí i cu ta realisá su boluntad, eliminando e efectonan di picá i morto i restorando condicionnan hustu riba tera. Ya caba e Reino aki a tuma poder den cielu, i pronto “lo e machicá i pone fin na tur e reinonan [humano] aki, i e mes lo permanecé pa tempu indefiní.”—Daniel 2:44; Revelacion 11:15; 12:10.
3. Ora Jesus a cuminsá su ministerio, kico a ser habrí pa hende?
3 Historiador H. G. Wells a skirbi: “E doctrina aki dje Reino di Cielu, cu tabata e siñansa principal di Jesus, i cu ta hunga un papel asina chikitu den e credonan cristian, siguramente ta un dje doctrinanan di mas revolucionario cu a yega di sagudí i transformá pensamentu humano.” For di cuminsamentu mes, e tema di Jesus su ministerio tabata: “Boso repentí, pasobra e reino di cielu a yega cerca.” (Mateo 4:17) E tabata aki riba tera como Rey nombrá, i un dje mayor gosonan ta cu e caminda a ser habrí awor pa hende no solamente participá den e bendicionnan dje Reino ei sino tambe pa ser co-gobernante i sacerdote cu Jesus den e Reino ei!—Lucas 22:28-30; Revelacion 1:6; 5:10.
4. Den e promé siglo, con e multitudnan a respondé n’e “bon nobo dje reino,” hibando na ki huicio?
4 Aunke multitudnan a tende e ‘bon nobo emocionante dje reino, algun hende so a kere. Esaki tabata parcialmente debí cu e lidernan religioso a “cera e reino di cielu dilanti hende.” Nan “a kita e yabi di conocimentu” dor di nan siñansanan falsu. Debí cu mayoria hende a rechasá Jesus como e Mesias I e Rey ungí dje Reino di Dios, Jesus a bisa nan: “E reino di Dios lo ser kitá for di boso i lo ser duná na un nacion cu ta producí su frutanan.”—Mateo 4:23; 21:43; 23:13; Lucas 11:52.
5. Con mayoria di esnan cu a tende Jesus su ilustracionnan a mustra cu nan no a tende cu comprendimentu?
5 Na un ocasion ora Jesus tabata siñando un multitud grandi, manera tabata su custumber, el a usa un seri di ilustracion pa pone e multitud na prueba i separá esnan cu tabatin solamente un interes superficial den e Reino. E promé ilustracion a enbolbé un sembrador cu a sembra simia den cuater tipo di tera. E promé tres tiponan tabata desfaborabel pa mata crece ariba, pero e último tabata un “tera excelente” cu a producí bon fruta. E ilustracion corticu a terminá cu e exhortacion: “Laga esun cu tin orea scucha.” (Mateo 13:1-9) Mayoria di esnan presente a tend’é, pero nan no a “scucha.” Nan no tabatin ningun motivacion, ningun berdadero interes pa sa con simia sembrá bou di diferente condicion tabata manera e Reino di cielu. Nan a bai cas bek na nan bida di tur dia, probablemente pensando cu Jesus su ilustracionnan no tabata mas cu bon cuentanan cu temanan moral. Ki un rikesa di comprendimentu, i ki privilegio i oportunidadnan magnífico nan a perde di haña debí cu nan curason tabata insensibel!
6. Pakico comprendimentu di “e secretonan sagrado dje reino” a ser otorgá solamente na Jesus su disipelnan?
6 Jesus a bisa su disipelnan: “Ta duná na boso pa comprendé e secretonan sagrado dje reino di cielu, pero esei no ta duná na e hendenan ei.” Citando Isaías, el a agregá: “‘Pasobra e curason dje pueblo aki a bira indispuesto pa ricibí, i cu nan orea nan a tende sin respondé, i nan a cera nan wowo; pa nan nunca mira cu nan wowo i tende cu nan orea i capta e sentido di dje cu nan curason i bolbe, i ami cura nan.’ Sin embargo, felis boso wowo ta pasobra nan ta contemplá, i boso orea pasobra nan ta tende.”—Mateo 13:10-16; Marco 4:11-13.
‘Captando e Sentido dje’ Reino
7. Pakico ta importante pa “capta e sentido di” e Reino?
7 Jesus a pone dede riba e problema. E tabatin di ber cu “capta e sentido di” e mensahe di Reino. Na su disipelnan el a bisa den privá: “Boso, anto, scucha e ilustracion dje homber cu a sembra. Ora un hende ta tende e palabra dje reino pero no ta capta e sentido di dje, e malbado ta bini i ta ranca loke a ser sembra den su curason.” El a sigui splicando cu e cuater tipo di tera a representá varios condicion di curason den cua “e palabra dje reino” lo a ser sembrá.—Mateo 13:18-23; Lucas 8:9-15.
8. Kico a prevení e “simia” sembrá den e promé tres tipo di tera di producí fruta?
8 Den cada caso e “simia” tabata bon, pero dunamentu di fruta lo a dependé di e condicion dje tera. Si e tera dje curason tabata manera un caminda druk i di pak, hací duru dor di hopi actividad no-spiritual, lo ta fácil pa esun cu a tende e mensahe di Reino excusá su mes, bisando cu e no tabatin tempu p’e Reino. E simia neglishá lo por a ser rancá fácilmente promé cu e por a saca rais. Pero kico si e simia a ser sembrá den un curason cu tabata manera tera yen di baranca? E simia lo por a spruit, pero lo tabata difícil p’e manda su raisnan abou na cualkier profundidad pa alimento i stabilidad. E prospecto di ser un sirbidor obediente di Dios, particularmente den e calor di persecucion, lo a presentá un desafio aplastante, i e individuo lo a trompecá. I di otro banda, si e tera dje curason tabata asina yen di ansiedad manera sumpiña of e deseo materialista pa rikesa, e mata flengue-flengue di Reino lo a ser sofocá. Den e tres situacionnan típico aki den bida, ningun fruta di Reino lo a ser producí.
9. Pakico e simia cu a ser sembrá den bon tera por a producí bon fruta?
9 Sin embargo, kico dje simia di Reino cu a ser sembrá den bon tera? Jesus ta contestá: “En cuanto esun cu a ser sembrá riba e tera excelente, esaki ta esun cu ta tende palabra i ta capta e sentido di dje, cu berdaderamente ta duna fruta i ta producí esun aki cu cien bes, e sesenta, e otro cu trinta.” (Mateo 13:23) ‘Captando e sentido di’ e Reino, nan lo a producí bon fruta segun nan circunstancianan individual.
Comprendimentu Ta Trece Responsabilidad Cuné
10. (a) Con Jesus a mustra cu ‘captando e sentido di’ e Reino ta trece tantu bendicionnan como responsabilidad cuné? (b) Jesus su comision pa bai i haci disipel a aplicá solamente n’e disipelnan di promé siglo?
10 Despues di duna seis ilustracion mas pa splica vários aspecto dje Reino, Jesus a puntra su disipelnan: “Boso a capta e sentido di tur e cosnan aki?” Ora nan a contestá “sí,” el a bisa: “Ya cu esei ta e caso, tur instructor público, ora el a ser siñá tocante e reino di cielu, ta manera un homber, un doño di cas, cu ta saca for di su tesoro cosnan nobo i bieu.” E siñansanan i entrenamentu cu Jesus a percurá lo a combertí su disipelnan den cristiannan maduro cu lo a producí for di nan ‘mangasina’ un suministro interminabel di alimento spiritual ricu. Hopi di esaki ta relacioná cu e Reino di Dios. Jesus a haci cla cu ‘captando e sentido di’ e Reino lo a trece no solamente bendicionnan sino tambe responsabilidad. El a manda: “Bai, pues, i haci disipel di hende di tur nacion, . . . siñando nan pa warda tur loke mi a manda boso. I, mira! mi ta cu boso tur e dianan te n’e conclusion dje sistema di cosnan.”—Mateo 13:51, 52; 28:19, 20.
11. Ora 1914 a yega, ki sucesonan relacioná cu e Reino a tuma lugá?
11 Manera Jesus a primintí, el a sigui ta cu su berdadero disipelnan atrabes dje siglonan te n’e dia djawe. Den e último dianan aki, progresivamente el a duna nan comprendimentu, i tambe el a tene nan responsabel p’e uso dje lus aumentante dje berdad. (Lucas 19:11-15, 26) Na 1914, sucesonan di Reino a cuminsá desaroyá lihé i dramáticamente. Den e aña ei, no solamente e “nacementu” dje Reino tan sperá a tuma lugá sino tambe e “conclusion dje sistema di cosnan” a cuminsá. (Revelacion 11:15; 12:5, 10; Daniel 7:13, 14, 27) Cristiannan berdadero, dicerniendo e nificacion di sucesonan actual, a conducí e campaña di predicacion i siñansa di Reino di mas grandi den historia. Jesus a pronosticá esaki, bisando: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:14.
12. (a) Kico tabata e resultado dje testimonio di Reino extenso di dia moderno? (b) Den e mundu di duda aki, ki peliger tin pa cristiannan?
12 E inmenso testimonio di Reino aki a alcansá mas cu 230 pais. Ya caba, mas cu cincu miyon berdadero disipel ta participando den e trabou aki, i ainda tin otronan cu ta ser recogé. Pero si nos compará e cantidad di disipel cu e 5,6 mil miyon habitantenan dje tera, ta bisto cu mescos cu den e tempu di Jesus, e mayoria inmenso di humanidad no ta “capta e sentido di” e Reino. Manera a ser predecí, hopi ta haci mofa i ta bisa: “Unda e presencia primintí di dje ta?” (2 Pedro 3:3, 4) E peliger pa nos como cristiannan ta cu nan actitud di complaciencia propio, di duda i di materialismo, por afectá gradualmente con nos ta mira nos privilegionan di Reino. Rondoná dor di hende dje mundu aki, nos fácilmente por cuminsá adoptá algun di nan actitudnan i custumbernan. Ta ki vital pa nos “capta e sentido di” e Reino di Dios i tene duru na dje!
Examinando Nos Mes en Relacion cu e Reino
13. En cuanto e comision pa predicá e bon nobo di Reino, con nos por examiná si nos ta sigui ‘tende’ cu dicernimentu?
13 Jesus a bisa dje periodo di cosecha den cua nos ta biba: “E Yu di hende lo manda su angelnan, i nan lo recogé for di su reino tur cos cu ta causa tropieso i personanan cu ta cometé maldad . . . N’e tempu ei e hustunan lo briya mes briyante cu solo den e reino di nan Tata. Laga esun cu tin orea scucha.”(Mateo 13:41, 43) Bo ta sigui ‘tende’ cu un actitud obediente deseoso pa respondé n’e mandamentu pa predicá e Reino i haci disipel? Corda, “esun cu a ser sembrá riba e tera excelente” ‘a tende e palabra i a capta e sentido di dje’ i a producí bon fruta.—Mateo 13:23.
14. Ora instruccion ta ser duná, con nos ta mustra cu nos ta “capta e sentido di” e conseho cu ta ser duná?
14 Ora nos ta haci studio personal i ta asistí na reunionnan cristian, nos tin cu ‘incliná nos curason na dicernimentu.’ (Proverbionan 2:1-4) Ora conseho ta ser duná relacioná cu conducta, bistí, música i entretenimentu, nos mester permitié baha den nos curason i impulsá nos pa haci cualkier ahuste necesario. Nunca hustificá bo mes, duna excuus of nenga di respondé di otro manera. Si e Reino ta algu real den nos bida, nos lo biba conforme su normanan i proclam’é celosamente na otronan. Jesus a bisa: “No tur cu ta bisa mi, ‘Señor, Señor,’lo drenta den e reino di cielu, sino esun cu ta haci e boluntad di mi Tata cu ta den cielu.”—Mateo 7:21-23.
15. Pakico ta importante pa ‘busca promé e reino i Dios su husticia’?
15 E tendencia humano ta pa preocupá tocante cuminda, paña i un dak riba nos cabes, pero Jesus a bisa: “Sigui busca, anto, promé e reino i [Dios] su husticia, i tur e otro cosnan aki lo ser agregá na boso.” (Mateo 6:33, 34) Ora di fiha prioridadnan, pone e Reino na promé lugá den bo bida. Mantené bo bida simpel, kedando satisfecho cu e cosnan necesario. Lo ta un locura pa yena nos bida cu actividadnan i adkisicionnan no-esencial, tal bes hustificando cu haciendo esaki ta aceptabel, ya cu e cosnan aki riba nan mes no ta necesariamente malu. Aunke esei por ta cierto, kico e adkisicion i usamentu di cosnan no-esencial asina lo haci cu nos programa di studio personal, asistencia na reunionnan cristian i participacion den e trabou di predicá? Jesus a bisa cu e Reino ta manera un comerciante cu a haña un “perla di balor haltu [i] el a bai i mesora a bende tur loke e tabatin i a cumpr’é.” (Mateo 13:45, 46) Asina nos mester sinti tocante e Reino di Dios. Nos mester imitá Pablo no Démas, kende a bandoná e ministerio “debí cu el a stima e sistema actual di cosnan.”—2 Timoteo 4:10, 18; Mateo 19:23, 24; Filipensenan 3:7, 8, 13, 14; 1 Timoteo 6:9, 10, 17-19.
“Personanan Inhustu Lo No Heredá e Reino di Dios”
16. Con ‘captando e sentido di’ e Reino di Dios lo yuda nos evitá conducta incorecto?
16 Ora e congregacion corintio tabata tolerando inmoralidad, Pablo a bisa francamente: “Kiko! Boso no sa cu personanan inhustu lo no heredá e Reino di Dios? No sea gañá. Ni fornicador, ni idólatra, ni adúltero, ni homber wardá pa propósito innatural, ni homber cu ta drumi cu homber, ni ladron, ni haragan, ni buraché, ni zundrador, ni rancador di placa lo heredá e reino di Dios.” (1 Corintionan 6:9, 10) Si nos “capta e sentido di” e Reino di Dios, nos lo no gaña nos mes pensando cu Jehove lo tolerá algun forma di inmoralidad tanten cu e ta mira nos ocupá den sirbishi cristian. Impuresa ni sikiera mester ser mencioná entre nos. (Efesionan 5:3-5) Bo ta detectá cu algun dje pensamentu of prácticanan impuru dje mundu aki ta cuminsá sluip drenta bo bida? Corta nan for di bo bida inmediatamente! E Reino ta demasiado precioso pa perde pa causa di cosnan asina.—Marco 9:47.
17. Den ki maneranan aprecio p’e Reino di Dios lo promové humildad i eliminá causa pa tropieso?
17 Jesus su disipelnan a puntra: “Ken realmente ta esun mayor den e reino di cielu?” Jesus a contestá nan poniendo un mucha chikitu meimei di nan i bisa: “Berdaderamente mi ta bisa boso, Aménos cu boso bolbe i bira mescos cu mucha chikitu, boso di ningun manera lo drenta den e reino di cielu. P’esei, ken cu humiyá su mes mescos cu e mucha chikitu aki ta esun cu ta mayor den e reino di cielu.” (Mateo 18:1-6) Esnan cu ta orguyoso, exigente, desinteresá i ingobernabel lo no ta den e Reino di Dios, ni nan lo no ta stúbdito dje Reino. Bo amor pa bo rumannan, bo humildad, bo temor piadoso ta conmové bo pa evitá di trompecá otronan dor di bo conducta? Of bo ta insistí riba bo “derechonan” sin importá con e actitud i conducta aki por afectá otronan?—Romanonan 14:13, 17.
18. Kico lo resultá pa humanidad obediente ora e Reino di Dios ta causa pa Su boluntad tuma lugá “tantu den cielu, como riba tera”?
18 Nos Tata celestial, Jehova, pronto lo contestá completamente e oracion ferviente: “Laga bo reino bini. Laga bo boluntad sosodé, mescos cu den cielu, tambe riba tera.” Masha pronto e Rey gobernante Jesucristo, lo bini den sentido cu e ta sinta riba su trono pa huicio, pa separá “carné” for di “cabritu.” N’e tempu señalá ei, “e rey lo bisa esnan na su man drechi, “Bini, boso cu a ser bendicioná dor di mi Tata, heredá e reino prepará pa boso for di fundamentu dje mundu.’” E cabritunan “lo bai pa cortamentu eterno, pero e hustunan pa bida eterno.” (Mateo 6:10; 25:31-34, 46) “E tribulacion grandi” lo eliminá e sistema bieu i tur esnan cu ta nenga di “capta e sentido di” Reino. Pero e miyones di sobrebibientenan dje “tribulacion grandi” i e miles di miyones di hende cu lo ser resucitá lo heredá e bendicionnan di Reino sin fin den e Paradijs terenal restorá. (Revelacion 7:14) E Reino ta e gobiernu nobo dje tera, gobernando for di cielu. Lo e hiba Jehova su propósito p’e tera i pa humanidad na su realisacion completo, tur p’e santificacion di su nomber santísimo. Esei no ta un herencia cu ta bale la pena traha p’e, haci sacrificio p’e i spera p’e? Esaki ta loke “capta e sentido di” e Reino mester nificá pa nos!
Con Lo Bo Contestá?
◻ Kico ta e Reino di Dios?
◻ Pakico mayoria di Jesus su oyentenan no a “capta e sentido di” e Reino?
◻ Con ‘captando e sentido di’ e Reino lo trece tantu bendicionnan como responsabilidad cuné?
◻ Pa loke ta predicacion, kico ta indicá si nos a “capta e sentido di” e Reino?
Con nos ta mustra mediante nos conducta cu nos a ‘capta e sentido di’ e conseho cu a ser duná?
[Plachi na página 17]
Jesus su disipelnan a “capta e sentido di” e Reino i a producí bon fruta