Nan A Haci e Boluntad di Jehova

Jesus A Dedicá Tempu na Mucha

JESUS su ministerio di tres aña i mei tabata yegando su fin. Pronto e tabata bai drenta Jerusalem i sufri un morto agonisante. E tabata bon conciente di loke tabata bai pasa, pasobra el a bisa su disipelnan: “E Yu di hende tin cu ser entregá na man di hende, i nan lo mat’é.”—Marco 9:31.

Ta sigur cu Jesus lo kier a saca mas tantu posibel di cada dia, cada ora i cada momento cu a keda. Ainda su disipelnan tabatin mester di atencion. Jesus tabata sa cu ainda nan tabatin mester di spiertamentu fuerte tocante e importancia di humildad i e peliger constante di trompecá. (Marco 9:35-37, 42-48) Ademas nan tabatin mester di instruccion tocante matrimonio, divorcio i solteria. (Mateo 19:3-12) Sabiendo cu e tabata cerca di muri, sin duda Jesus lo tabata papia cu su disipelnan na moda breve i al caso, i cu un sentido di urgencia. Tempu tabata primordial—loke ta pone Jesus su siguiente acto bira asta mas remarcabel.

Jesus Ta Ricibí Mucha

E relato di Bijbel ta bisa: “Hende a cuminsá trece muchanan chikitu p’e mishi cu esakinan.” Ora cu e disipelnan a mira esei, nan a expresá nan desaprobacion mesora. Por ta nan a razoná cu Jesus tabata muchu importante of muchu druk p’e ocupá su mes cu mucha. Imaginá e disipelnan su sorpresa ora ta net cu nan Jesus a indigná! El a bisa nan: “Laga e muchanan chikitu bini cerca mi; no purba di stop nan, pasobra e reino di Dios ta pertenecé na esnan asina.” Anto Jesus a agregá: “En berdad mi ta bisa boso: Ken cu no ta ricibí e reino di Dios manera un mucha chikitu, di ningun manera lo drenta den dje.”—Marco 10:13-15.

Jesus a mira cualidadnan admirabel den mucha. Generalmente nan gusta haci pregunta i no ta desconfiá. Nan ta kere palabra di nan mayornan i asta ta defendé nan dilanti otro mucha. Ta bon pa tur cu kier drenta Dios su Reino imitá nan naturalesa receptivo i nan gana di siña. Manera Jesus a bisa: “E reino di Dios ta pertenecé na esnan asina.”—Compará Mateo 18:1-5.

Pero Jesus no a djis usa e muchanan aki pa duna un ilustracion. E relato ta mustra bon cla cu di berdad Jesus tabata gusta nan compania. Marco ta relatá cu Jesus a “tuma e muchanan den su brasanan i a cuminsá bendicioná nan, poniendo su man riba nan.” (Marco 10:16) Ta Marco su relato so ta incluí e detaye caluroso di cu Jesus a “tuma e muchanan den su brasanan.”a Asina Jesus a surpasá expectativa dje mayornan. Nan a trece e muchanan aki cerca Jesus djis pa e “mishi” cu nan.

Ki nificacion e echo cu Jesus a ‘pone su man’ riba e muchanan tabatin? No tin ningun indicacion di cu tabata un ceremonia religioso, por ehempel un bautismo. Miéntras cu na algun ocasion ponementu di man a nificá un nombramentu, na otro ocasion el a nificá djis un dunamentu di bendicion. (Génesis 48:14; Echonan 6:6) Por ta, anto, cu ta djis bendicioná Jesus a bendicioná e muchanan.

En todo caso, Marco ta usa un palabra mas pisá pa “bendicion” (ka·teu·lo·gé·o), cu ta indicá forsa intenso. Esei ta duna di comprendé cu Jesus a bendicioná e muchanan na moda intenso, suave i caluroso. Ta bisto cu e no a mira mucha como un carga, un perdementu di tempu.

Les pa Nos

Jesus su moda di trata tantu mucha como adulto no a intimidá nan ni rebahá nan. Un obra di referencia ta bisa cu “lo e tabata smile lihé i hari cu smak.” Nada straño cu hende di tur edad a sinti nan cómodo cerca dje. Cu Jesus su ehempel na mente, nos por puntra nos mes: ‘Hende ta haña cu mi ta acercabel?’ ‘Mi ta parce muchu druk pa hende molestiá mi cu nan actividadnan i nan preocupacionnan?’ Si nos cultivá interes sincero den hende, esaki lo impulsá nos pa duna di nos mes, manera Jesus. Nan lo sinti nos interes genuino i ser atraí na nos.—Proverbionan 11:25.

Manera Marco su relato ta mustra, Jesus tabata gusta mucha su compania. Evidentemente, el a tuma tempu pa observá nan hunga, pasobra den un di su ilustracionnan el a referí na nan weganan. (Mateo 11:16-19) Por ta cu algun dje muchanan cu Jesus a bendicioná tabata muchu chikitu pa capta ta ken e ta i kico el a siña. Pero esaki no a pon’é sinti cu e tabata perde su tempu. Ta dor cu el a stima mucha el a pasa tempu cu nan. Por ta masha bon cu hopi dje muchanan cu Jesus a topa durante su ministerio lo a ser impulsá mas despues pa respondé na su amor dor di bira su disipel.

Si Jesus a pasa tempu cu mucha durante e último simannan crucial di su bida, nos mester por traha tempu pa nan den nos rutina druk. Ta bon pa nos tene foral esnan cu necesidadnan special na mente, por ehempel mucha sin tata. Pero tur mucha ta bona ora nan haña atencion, i e boluntad di Jehova ta pa nos duna nan tur e amor i yudansa cu nos por.—Salmo 10:14.

[Nota]