Jehova Ta Aprecia Bo Sirbishi di Henter Alma

“Cualkier cos cu boso ta haciendo, traha riba dje cu henter boso alma como pa Jehova, i no pa hende.”—COLOSENSENAN 3:23.

1, 2. (a) Kico ta e mayor privilegio cu nos por tin? (b) Pakico tin biaha nos no por haci tur loke nos lo kier haci den sirbi Dios?

SIRBI Jehova ta e mayor privilegio cu nos por tin. Cu bon motibu, e revista aki a animá cristiannan pa hopi tempu caba pa participá den e ministerio, sí, pa sirbi “mas plenamente” ki ora cu ta posibel. (1 Tesalonicensenan 4:1) Sin embargo, no ta semper nos por haci tur loke nos curason ta anhelá pa haci den sirbi Dios. “Mi circunstancianan ta di tal manera cu mi mester traha tempu completo,” un ruman muher soltera cu a bautisá casi 40 aña pasá a bisa. “E motibu pakico mi ta traha no ta pa cumpra paña caru i di último moda of pa bai cu vakansi riba barcu crusero, sino pa cubri mi necesidadnan, incluyendo gastunan médico i dental. Mi ta sinti como si fuera mi ta dunando Jehova loke mi a sobra.”

² Amor pa Dios ta impulsá nos pa deseá di haci mas tantu posibel den e trabou di predicá. Pero hopi biaha circunstancianan den bida ta limitá loke nos por haci. Percurá pa otro responsabilidadnan cu Bijbel ta pone riba nos, incluyendo obligacionnan di famia, por tuma hopi di nos tempu i energia. (1 Timoteo 5:4, 8) Den e ‘tempu crítico aki, duru pa trata cuné,’ bida ta cada bes mas difícil. (2 Timoteo 3:1) Ora nos no por haci tur loke nos kier den e ministerio, nos curason lo por molestiá nos un poco. Nos lo por puntra nos mes si Dios ta contentu cu nos adoracion.

E Bunitesa di Sirbishi di Henter Alma

3. Kico Jehova ta spera di nos tur?

³ Na Salmo 103:14, Bijbel ta sigurá nos calurosamente cu Jehova “conocé bon e formacion di nos, cordando cu nos ta stof.” Mas cu cualkier otro persona, e ta comprendé nos limitacionnan. E no ta exigí mas di loke nos por duna. Kico e ta verwagt? Algu cu tur hende, sin importá su situacion den bida, por ofrecé: “Cualkier cos cu boso ta haciendo, traha riba dje cu henter boso alma como pa Jehova, i no pa hende.” (Colosensenan 3:23) Sí, Jehova ta spera di nos—di nos tur—pa sirbié cu henter nos alma.

4. Kico kier men sirbi Jehova di henter alma?

⁴ Kico kier men sirbi Jehova di henter alma? E término griego traducí como “henter alma” ta nificá literalmente “for di alma.” E “alma” ta referí na henter e persona, cu tur su abilidadnan físico i mental. Pues sirbi di henter alma ta nificá duna di nos mes, usando tur nos facultadnan i usa nos energia n’e grado mas completo posibel den sirbishi di Dios. Cu poco palabra, e ta nificá haci tur loke nos alma por haci.—Marco 12:29, 30.

5. Con e ehempel dje apostelnan ta mustra cu no ta tur hende mester haci mes tantu den e ministerio?

⁵ Sirbishi di henter alma ta nificá cu nos tur tin cu haci mes tantu den e ministerio? Esei casi no ta posibel, ya cu circunstancia i abilidadnan ta varia di un persona pa otro. Considerá e apostelnan fiel di Jesus. No ta nan tur por a haci mes tantu. Por ehempel, nos sa masha poco di algun dje apostelnan, manera Simon e cananeo i Santiago yu di Alfeo. Tal bes nan actividadnan como apostel tabata mas bien limitá. (Mateo 10:2-4) Na contraste, Pedro tabata por a aceptá hopi responsabilidad pisá—sí, Jesus asta a dun’é “e yabinan dje reino”! (Mateo 16:19) Sin embargo, Pedro no tabata superior cu e otronan. Ora Juan a ricibí e vision di Jerusalem Nobo den e Revelacion (rond di 96 E.C.), el a mira 12 piedra di fundeshi i riba nan tabatin inscribí “e diesdos nombernan dje diesdos apostelnan.”a (Revelacion 21:14) Jehova a duna balor n’e sirbishi di tur e apostelnan, maske evidentemente algun por a haci mas cu otro.

6. Den Jesus su ilustracion dje sembradó, kico ta sosodé cu e simia cu ta ser sembrá riba “e tera excelente,” i ki preguntanan ta lanta?

⁶ Di manera similar, Jehova no ta exigí pa nos tur predicá mésun tantu. Jesus a indicá esaki den e ilustracion dje sembradó, cu a compará e trabou di predicá cu sembramentu di simia. E simia a cai riba diferente tipo di tereno, ilustrando e diferente tipo di condicion di curason cu esnan cu a tende e mensahe a manifestá. “En cuanto esun cu a ser sembrá riba e tera excelente,” Jesus a splica, “esaki ta esun cu ta tende e palabra i ta capta e sentido di dje, cu berdaderamente ta duna fruta i ta producí, esun aki cu shen bes, esun ei cu sesenta, e otro cu trinta.” (Mateo 13:3-8, 18-23) Kico e fruta aki ta, i pakico e ta ser producí den cantidadnan diferente?

7. Kico e fruta dje simia sembrá ta, i pakico e ta ser producí den diferente cantidad?

⁷ Siendo cu e simia cu ta ser sembrá ta “e palabra dje reino,” e dunamentu di fruta ta referí n’e plamamentu dje palabra ei, papia di dje cu otronan. (Mateo 13:19) E cantidad di fruta producí ta varia—for di trinta bes te na shen bes mas tantu—pasobra abilidad i circunstancia di bida ta varia. Un persona cu bon salú i resistencia físico kisas por dedicá mas tempu den predicacion cu un persona cerca ken un malesa crónico of edad avansá a caba cu su fortalesa. Un persona soltero hóben cu no tin responsabilidad di famia kisas por haci mas cu un cu tin cu traha tempu completo pa percurá pa su famia.—Compará cu Proverbionan 20:29.

8. Con Jehova ta mira esnan cu ta duna lo mihó cu nan alma por duna?

⁸ Den bista di Dios, e persona cu di henter alma ta producí trinta bes ta ménos deboto cu esun cu ta producí shen bes mas tantu? Di ningun manera! E cantidad di fruta por varia, pero Jehova ta contentu tanten cu e sirbishi cu nos ta rindi ta lo mihó cu nos alma por duna. Corda, tur e diferente cantidadnan di fruta ta brota for di curason cu ta “tera excelente.” E término griego (ka·losʹ) traducí como “excelente” ta describí algu cu ta “bunita” i cu ta “deleitá curason, i cu ta duna placer n’e wowonan.” Ta ki un consuelo pa sa cu ora nos ta haci nos best, nos curason ta bunita den bista di Dios!

No Compará Un cu Otro

9, 10. (a) Nos curason por hiba na ki forma di razonamentu negativo? (b) Con e ilustracion na 1 Corintionan 12:14-26 ta mustra cu Jehova no ta compará nos cu otronan den loke nos ta haci?

⁹ Sin embargo, nos curason imperfecto por husga cosnan di otro manera. Kisas e ta compará nos sirbishi cu esun di otro hende. E por razoná cu ‘otronan ta haci muchu mas den e ministerio cu ami. Ta con Jehova lo por ta contentu cu mi sirbishi?’—Compará cu 1 Juan 3:19, 20.

¹⁰ Jehova su pensamentu i maneranan ta muchu mas haltu cu di nos mes. (Isaías 55:9) Nos ta haña un comprendimentu penetrante den e manera cu Jehova ta mira nos esfuersonan individual for di 1 Corintionan 12:14-26, caminda e congregacion ta ser compará cu un curpa cu tin hopi miembro—wowo, man, pia, orea, etcétera. Considerá, un ratu, e curpa literal. Lo ta ki ridículo pa compará bo wowonan cu bo mannan of bo pianan cu bo oreanan! Cada miembro tin un funcion diferente, tog tur e miembronan ta útil i ta ser considerá di hopi balor. Mescos tambe, Jehova ta apreciá bo sirbishi di henter alma sea cu otronan ta haci mas of nan ta haci ménos.—Galationan 6:4.

11, 12. (a) Pakico algun por sinti cu nan ta “mas débil” of “ménos onorabel”? (b) Con Jehova ta mira nos sirbishi?

¹¹ Debí na limitacionnan cu enfermedad, edad avansá of otro circunstancianan por imponé riba nos, tin biaha algun di nos por sinti cu nos ta esnan “mas débil” of “ménos onorabel.” Pero Jehova no ta mira cosnan asina. Bijbel ta bisa nos: “E miembronan dje curpa cu ta parce di ta mas débil ta necesario, i e partinan . . . cu nos ta kere ta ménos onorabel, esakinan nos ta rondoná cu onor mas abundante . . . No obstante, Dios a componé e curpa, dunando onor mas abundante n’e parti cu tabatin un falta.” (1 Corintionan 12:22-24) P’esei tur individuo por ta precioso pa Jehova. E ta atesorá nos sirbishi den cuadro di nos limitacionnan. Bo curason no ta impulsá bo pa haci tur loke bo por pa sirbi un Dios amoroso i comprensivo asina?

¹² Loke ta conta pa Jehova, anto, no ta cu bo ta haci mes tantu cu un otro hende, sino cu bo ta haci loke abo—bo alma—personalmente por haci. Cu Jehova ta duna balor na nos esfuersonan individual a keda demostrá den e manera masha conmovedor cu Jesus a trata cu dos hende muher masha diferente durante e dianan final di su bida riba tera.

E Regalo “Masha Costoso” di un Muher Apreciativo

13. (a) Cua tabata e marco di circunstancia ora Maria a basha zeta perfumá riba cabes i pia di Jesus? (b) Kico tabata e balor material dje zeta di Maria?

¹³ Riba diabierne anochi, 8 di nísan, Jesus a yega Betania, un pueblo chikitu na barica di Ceru di Olijfi n’e parti oost, rond di tres kilometer for di Jerusalem. Jesus tabatin amigunan stimá den e pueblo aki—Maria, Marta i nan ruman homber Lázaro. Jesus tabata huésped den nan cas, kisas frecuentemente. Pero diasabra anochi, Jesus i su amigunan tabata cena den cas di Simon, un ex-leproso kende posiblemente Jesus a cura. Ora Jesus tabata di lèn na mesa, Maria a haci un gesto humilde cu a demostrá su amor profundo pa e homber cu a resucitá su ruman homber. El a kibra un botter chikitu cu a contené zeta perfumá, “masha costoso.” Costoso, en berdad! E tabata bal 300 denario, e ekivalente di rond di un aña di salario. El a basha e zeta perfumá aki riba cabes i pia di Jesus. El a asta seca su pianan cu su cabei.—Marco 14:3; Lucas 10:38-42; Juan 11:38-44; 12:1-3.

14. (a) Con e apostelnan a reaccioná riba e gesto di Maria? (b) Con Jesus a sali na defensa di Maria?

¹⁴ E disipelnan tabata indigná! ‘Pakico e malgastamentu aki?’ nan a puntra. Hudas, kende a sconde su deseo di horta tras di un sugerencia pa haci un acto di caridad pa cu esnan den necesidad, a bisa: “Pakico no a bende e zeta perfumá aki pa treshen denario i dun’é na hende pober?” Maria a keda ketu. Pero Jesus a bisa e disipelnan: “Lagu’e ketu. Pakico boso ta purba di causa dificultad p’e? El a haci un obra excelente [un forma di ka·losʹ] pa mi. . . . El a haci loke e tabata por; el a anticipá di hunta mi curpa cu zeta perfumá en bista di mi entiero. Di berdad mi ta bisa boso, na unda cu e bon nobo ser predicá den tur e mundu, loke e muher aki a haci tambe lo ser contá como recuerdo di dje.” Cuantu e calor di Jesus su palabranan mester a calma e curason di Maria!—Marco 14:4-9; Juan 12:4-8.

15. Pakico Jesus tabata asina conmoví pa loke Maria a haci, i kico nos ta siña for di esei tocante sirbishi di henter alma?

¹⁵ Jesus tabata profundamente conmoví pa loke Maria a haci. Den su aprecio, el a efectuá un obra encomendabel. Loke a conta pa Jesus no tabata e balor material dje regalo sino e echo cu “el a haci loke e tabata por a duna.” El a probechá dje oportunidad i a duna loke e tabata por. Otro traduccionnan a traducí e palabranan aki, “El a haci tur loke e tabata por,” of, “El a haci loke tabata den su alcanse.” (An American Translation; The Jerusalem Bible) Maria su dunamentu tabata di henter alma pa motibu cu el a duna lo mihó. Esei ta loke dunamentu di henter alma ta encerá.

‘Dos Cen Pretu’ di un Biuda

16. (a) Con bin Jesus a mira loke un biuda pober a duna como contribucion? (b) Cuantu e monedanan dje biuda tabata bal?

¹⁶ Un par di dia despues, riba 11 di nísan, Jesus a pasa henter un dia den e tempel, caminda su autoridad a ser cuestioná i caminda el a contestá preguntanan problemático tocante belasting, resureccion i otro asuntunan. El a denunciá e escriba i fariseonan, entre otro, di ta “devorá casnan di biuda.” (Marco 12:40) Anto Jesus a tuma asiento, evidentemente den e Corte di Hende Muher, unda, segun tradicion hudiu, tabatin 13 caha di placa. El a sinta un ratu, observando cuidadosamente segun cu hende tabata tira nan contribucion. Hopi hende ricu a bini, algun tal bes cu un aparencia di ta hustu den nan mes bista, asta cu cierto demostracion di grandesa. (Compará cu Mateo 6:2.) Jesus su bista a cai riba un muher en particular. Cualkier hende lo no a mira nada remarcabel den dje of den su regalo. Pero Jesus, cu por a conocé curason di otro hende, tabata sa cu e tabata “un biuda pober.” Tambe e tabata sa e cantidad exacto di su regalo—“dos moneda chikitu, cu tin masha poco balor.”b—Marco 12:41, 42.

17. Con Jesus a balorá e contribucion dje biuda, i p’esei kico nos por siña tocante duna na Dios?

¹⁷ Jesus a yama su disipelnan cerca dje, pasobra e tabata kier pa nan mes mira e les cu e tabata bai siña nan. El “a tira mas cu tur esnan cu a tira placa den e caha di placa,” Jesus a bisa. Segun su opinion, e biuda a tira mas cu tur e otronan huntu. El a duna “tur loke e tabatin”—su último chipichipi. Haciendo esei, el a hinca su mes den Jehova su mannan percurador. E persona cu a ser usá como ehempel den duna na Dios, ta unu kende su regalo casi no tabatin balor den sentido material. Pero den bista di Dios, e tabata preciosísimo!—Marco 12:43, 44; Santiago 1:27.

Siña for dje Manera cu Jehova Ta Mira Sirbishi di Henter Alma

18. Kico nos ta siña for di Jesus su trato cu e dos hende muhernan?

¹⁸ For di Jesus su trato cu e dos hende muhernan aki, nos ta siña lesnan conmovedor tocante con Jehova ta mira sirbishi di henter alma. (Juan 5:19) Jesus no a compará e biuda cu Maria. E no a duna e dos monedanan dje biuda ménos balor cu el a duna e zeta “masha costoso” di Maria. Siendo cu cada muher a duna lo mihó, den bista di Dios tur dos regalo tabatin balor. Pues si bo ta sintí bo sin balor debí cu bo no por haci tur loke bo kier haci pa sirbi Dios, no desesperá. Jehova ta contentu pa aceptá lo mihó cu bo por duna. Corda, Jehova “ta mira loke e curason ta,” pues e ta bon na haltura dje anhelonan di bo curason.—1 Samuel 16:7.

19. Pakico nos no mester ta incliná pa husga loke otronan ta haci den sirbi Dios?

¹⁹ E manera cu Jehova ta mira sirbishi di henter alma mester influenciá e forma cu nos ta mira i trata otro. Ta ki un falta di amor pa criticá e esfuersonan di otronan of pa compará e sirbishi di un persona cu esun di un otro! Ta lamentabel cu cosnan asina sa pasa, pero un cristian a skirbi: “Tin biaha algun hende ta duna e impresion cu sea bo ta un pionero of bo no ta nada. Nos cu ta lucha pa ‘djis’ keda activo como publicadó regular di Reino mester sinti cu nos tambe ta ser apreciá.” Laga nos corda cu no ta na nos pa dicidí kico ta sirbishi di henter alma pa un compañero cristian. (Romanonan 14:10-12) Jehova ta apreciá e sirbishi di henter alma di cada un dje miyones di fiel publicadónan di Reino, i asina nos tambe mester mir’é.

20. Ta generalmente mihó pa asumí kico tocante nos co-adoradónan?

²⁰ Pero kico si algun ta parce di ta haci ménos di loke nan por haci den e ministerio? Ora un compañero creyente bai atras den su actividad di sirbishi, esei lo por ta un indicacion pa ancianonan interesá cu e tin mester di yudansa of animacion. Na mésun tempu, nos no mester lubidá cu pa algun, sirbishi di henter alma por parce mas e dos cen pretu dje biuda cu Maria su zeta costoso. Generalmente ta mihó pa asumí cu nos rumannan ta stima Jehova i cu e amor ei lo impulsá nan pa haci mas tantu posibel i no ménos posibel. Ta sigur cu ningun sirbidó conciencial di Jehova lo scoge pa haci ménos cu e por den sirbi Dios!—1 Corintionan 13:4, 7.

21. Ki carera recompensador hopi ruman ta siguiendo, i ki preguntanan ta lanta?

²¹ Sin embargo, pa hopi sirbidó di Dios, sirbishi di henter alma a nificá sigui un carera sumamente recompensador—e ministerio di pionero. Ki bendicionnan nan ta ricibí? I kico di esnan entre nos cu ainda no por a traha pionero—con nos por mustra e spiritu di pionero? E preguntanan aki lo ser considerá den e siguiente artículo.

[Nota]

Con Lo Bo Contestá?

◻ Kico kier men sirbi Jehova di henter alma?

◻ Con e ilustracion na 1 Corintionan 12:14-26 ta mustra cu Jehova no ta compará nos cu otronan?

◻ Kico nos ta siña tocante duna di henter alma for di Jesus su comentarionan tocante e zeta costoso di Maria i e dos cen pretu dje biuda?

◻ Con e manera cu Jehova ta mira sirbishi di henter alma mester influenciá e forma con nos ta mira otro?

[Plachi na página 15]

Maria a duna lo mihó, perfumando Jesus su curpa cu zeta “masha costoso”

[Plachi na página 16]

E monedanan dje biuda—casi nan no tabatin balor den sentido material, pero nan tabata preciosísimo den bista di Jehova