Hesus A Skohe Diesdos Apòstel

Tabata kasi un aña i mei despues ku Huan Boutista a introdusí Hesus komo e Lamchi di Dios. Tempu ku Hesus a kuminsá ku su trabou di prediká i di hasi disipel, un kantidat di hòmber sinsero a bira su siguidó. Nan tabata, entre otro, Andres, Simon Pedro, Huan, kisas Santiago (ruman di Huan), Felipe i Natanael (kende nan tabata yama tambe Bartolomeo). Ku tempu, hopi hende mas a bira disipel di Kristu.—Huan 1:45-47.

Awor, Hesus tabata kla pa skohe su apòstelnan. Nan mester a bira su kompañeronan di mas yegá i risibí entrenamentu spesial. Pero promé ku el a skohe nan, el a bai riba un seru, kisas serka di Laman di Galilea, no muchu leu for di Kapernaum, i a hasi orashon henter anochi, pidiendo Dios sabiduria i su bendishon. Su manisé, el a reuní su disipelnan i for di nan el a skohe 12 apòstel.

El a skohe e seis disipelnan ku nos a menshoná anteriormente i Mateo, kende tabata traha na ofisina di belasting. E otro sinkunan ku el a skohe tabata Hudas (kende nan tabata yama Tadeo i “yu di Santiago”), Simon e kananeo, Tomas, Santiago yu di Alfeo i Hudas Iskariot.—Mateo 10:2-4; Lukas 6:16.

E 12 apòstelnan akí a yega di biaha huntu ku Hesus, i e tabata konosé nan bon. De echo, algun di nan tabata su famia. Evidentemente, Santiago i Huan (ruman di Santiago) tabata primu di Hesus. Ta parse ku Santiago yu di Alfeo tambe tabata primu di Hesus. Algun hende ta pensa ku Alfeo tabata ruman hòmber di Hose, Hesus su tata di kriansa.

Ta klaru ku Hesus no tabatin problema pa kòrda nòmber di su apòstelnan. Abo ta kòrda nan? Algu ku por yuda bo ta esaki: tabatin dos Simon, dos Santiago i dos Hudas. Simon (Pedro) tabatin un ruman hòmber ku yama Andres, i Santiago (yu di Zebedeo) tabatin un ruman hòmber ku yama Huan. Esei ta un manera fásil pa kòrda ocho apòstel. E otro kuaternan ta un kobradó di belasting (Mateo), esun ku despues a duda (Tomas), esun ku tabata bou di palu ora Hesus a yam’é (Natanael) i Natanael su amigu (Felipe).

Diesun di e apòstelnan tabata di Galilea, e área kaminda Hesus a lanta. Natanael tabata di Kana. Felipe, Pedro i Andres tabata originalmente di Bètsaida. Pero despues, Pedro i Andres a bai biba na Kapernaum, kaminda aparentemente Mateo tabata biba. Santiago i Huan tambe tabata biba na Kapernaum òf den bisindario. I nan tabatin un negoshi di piskamentu den serkania. Ta parse ku Hudas Iskariot, kende a traishoná Hesus despues, tabata e úniko ku tabata di Hudea.