Siña Obedencia Aceptando Disiplina

IMAGINÁBO cu bo ta para riba punta di un ceru halto i ta sintíbo como si en berdad bo ta riba dak di mundo. Ki un sintimento maraviyoso di libertad!

Pero, realmente bo libertad ta mashá limitá. E ley di gravidad ta limita hopi tur movimento di bo; un paso falso so por resulta den desaster. En cambio, bo ta keda agradicido cu e mesun ley di gravidad ta preveníbo di flota inútil den espacio. Ta keda bisto cu e ley ta pa bo mes bienestar. Bo aceptacion di límite cu e ta impone riba bo movimento ayá riba e punta di ceru ta benefi­ciábo i ta salba bo bida.

Sí, tin bez cu ley i obedencia na ley por limita nos libertad, pero esei ta haci obedencia indeseabel?

Con Dios ta Mira Obedencia

Como e “Gran Creador,” Jehova Dios ta e “fuente di bida.” P’sei tur creacion di dje ta debé obedencia hustamente. E salmista a demonstra e actitud correcto ora el a skirbi: “Láganos adora i buig; láganos dobla rudía dilanti Jehova nos Creador. Pasobra e ta nos Dios, i nos ta pueblo di su campo i carné di su man.”—Eclesiastés 12:1; Salmo 36:9; 95:6, 7.

Desde e principio Jehova Dios a exigi obedencia di su creacion. E bida continuo di Adam i Eva den Paradijs a depende di nan obedencia. (Génesis 2:16, 17) E ta spera també obedencia dje angelnan, aunque nan tin un naturaleza superior cu hende. Door cu algun criatura spiritual tabata “desobediente ora e pacenshi di Dios tabata spera den e dianan di Noé,” el a castigánan, entregando nan na “cueba di scuridad diki pa ser reserbá pe huicio.”—1 Pedro 3:19, 20; 2 Pedro 2:4.

Bisá senciyamente, Dios ta considera obedencia como un requisito pa gana su aprobacion. Nos ta leza: “Jehova tin tanto gusto den ofrenda kimá i sacrificio como den obedencia ne boz di Jehova? Mira! Obedencia ta mihor cu sacrificio, prestamento di atencion ta mihor cu cebo di carné.”—1 Samuel 15:22.

E Siñamento di Dje—Pakico i di ki Manera

Obedencia ta resulta den un bon relacion cu Dios, p’sei tin un necesidad urgente pa nos siñé! Mescos cu siñamento di otro idioma, nos por siña e costumber di obedencia ora nos ta chikito. P’sei e Bijbel ta destaca e importancia di entrená yiu desde infancia.—Hosué 8:35.

Algun hende djawe ta contradici e punto di bista bíblico, bisando cu ta violacion mental pa exigi obedencia di yiu. Nan ta debati cu mayornan mester permiti yiu desaroya nan mes idea i norma personal di conducta sin strobacion dje mayornan.

Pero, entre 1960 i 1970 ora hopi mayornan tabatin tal opinion, Wilhelm Hansen, discursante, editor, i profesor di sicología, a condena esei. El a skirbi: “‘Malu’ ta loke mayornan ta taha i ‘bon’ ta loke nan ta recomenda of ta elogia durante infancia di yiu, ne tempo ora nan relacion cu nan mayornan ta decisivo ainda. P’sei, obedencia so ta guia yiu riba camina di moralidad i birtud cardinal riba locual existencia di nan relacion cu ordu moral ta depende.”—Compara cu Proverbio 22:15.

E Palabra di Dios ta enfatiza e necesidad di siña obedencia. Nos ta leza: “Ya mi sa, Señor, cu hende no ta doño di nan camina, cu ningun hende por establece nan mes rumbo.” (Jeremías 10:23, Nueva Biblia Española) E pasado ta yen di caso di hende cu a establece nan mes rumbo den bida segun nan norma personal i p’sei a contra cu dificultad serio. Pakico esei ta sosode tanto bez? Pasobra hende no tin e conocimento, sabiduría, i comprendimento pa establece nan mes rumbo den bida sin yudanza. Pior ainda, nan a hereda tendencia di tuma decision malu. Net despues dje diluvio, Jehova Dios a bisa di hende: “E inclinacion dje curazón di hende ta malu desde hubentud padilanti.”—Génesis 8:21.

P’sei, ningun hende ta hereda e tendencia di obedece Jehova Dios. Nos tin cu inculca esei den nos yiunan i sigi siñé durante nos mes bida. Cada un di nos tin cu cultiva e condicion di curazón di rey David, cu a skirbi: “Hacími conoce bo mes camina, O Jehova; siñámi bo mes berea. Hacími anda den bo berdad i siñámi, pasobra bo ta mi Dios di salbacion. Mi a spera den bo tur e dia largu.”—Salmo 25:4, 5.

Siña Obedencia Siendo Obediente

E mama di Jesús i su tata di crianza a conoce bon e circunstancia di su nacimento. P’sei nan a comprende cu e tabatin cu hunga un papel importante den e cumplimento dje propósito di Jehova. (Compara cu Lucas 1:35, 46, 47.) Den nan caso e palabra “Mira! Yiu ta un herencia di Jehova” tabatin un nificacion singular. (Salmo 127:3) Nan a reconoce cabalmente nan responsabilidad enorme i p’sei a obedece instruccion divino cu prontitud, tal como ora nan tabata mandá pa hui na Egipto of muda na Galilea despues.—Mateo 2:1-23.

E mayornan di Jesús també a reconoce nan responsabilidad tocante disiplina. Ta cierto cu durante su existencia prehumano, Jesús semper tabata obediente. Pero, ora e tabata riba tera, el a siña obedencia den circunstancia completamente nobo. Entre otro cosnan, e tabatin cu obedece mayornan imperfecto pasobra asta yiu perfecto tin mester di disiplina den e forma di instruccion i educacion. Su mayornan a duné esei. En cambio, disiplina den e forma di castigo, no tabata necesario. Jesús semper a obedece; nan nunca tabatin cu bisé dos biaha. Nos ta leza: “Anto el a bolbe cu [su mayornan] na Nazaret, unda el a biba obedeciendo nan den tur cos.”—Lucas 2:51, Versión Popular.

José i María també tabata sa con pa siña Jesús usando ehempel. Nos ta leza, por ehempel, cu “su mayornan tabatin e costumber di bai aña tras aña na Jerusalem pe fiesta di pascu.” (Lucas 2:41) Door di haci arreglo pa hiba su famía cuné, José a mustra cu e tabata interesá den nan bienestar spiritual i cu el a tuma na serio e adoracion di Jehova Dios. Di igual manera, mayornan cu nan mes obedencia den e asunto di adoracion por siña nan yiunan obedencia awendia.

Door cu José i María a duna disiplina excelente den husticia, “Jesús a sigi progresa den sabiduría i crecimento físico i den e fabor di Dios i hende.” Ki un ehempel excelente pa mayornan cristian sigi den e dia djawe!—Lucas 2:52.

“Obediente . . . Den tur Cos”

“Yiunan, sea obediente na boso mayornan den tur cos, pasobra esei ta mashá agradabel den Señor.” (Colosense 3:20) Jesús por a keda obediente na su mayornan den tur cos pasobra nan obedencia na Jehova no a permitínan exigi di Jesús—of di su mitá rumanan homber i muher—cualkier cos contrario cu e boluntad di Jehova.

Hopi mayornan djawe també tin bon éxito den siñamento di nan yiunan di ser obediente den tur cos. Leza experencia di tres tata cu a cria yiu caba, i awor nan ta sirbi den un sucursal dje Sociedad Watch Tower.

Theo a conta con e i su esposa a cria cinco yiu homber. El a bisa: “Ta importante pa laga bo yiunan sa desde e principio mes cu mayornan també sa haci fout. Lamentablemente, nos asta ta repiti nos error i constantemente nos tin cu pidi nos Tata celestial pordonános i yúdanos. Nos expresamente ta laga nos yiunan mira cu mescos cu nan ta lucha cu ansiedad di hubentud, nos ta lucha cu ansiedad di hende grandi.”

Pa yiu siña obedencia, un relacion amoroso entre nan i nan mayornan ta vital. Hermann a bisa tocante su esposa: “E no solamente tabata mama dje muchanan sino també nan amigo. Nan a aprecia esei, di manera cu no tabata difícil pa nan obedece.” Anto el a agrega un conseho práctico tocante con pa mehora e relacion entre tata i yiu: “Nos a sigi expresamente pa varios aña sin un mashín di laba tayó, di manera cu nos mester a laba i sécanan na man. Nos a asigna e yiunan pa sécanan, na turno. No tin un mihor tempo pa comunicacion informal.”

E relacion amoroso entre tata i yiu ta sirbi como modelo dje relacion cu hende cristian mester tene cu Jehova Dios. ­Rudolf a splica con e i su casá a yuda nan dos yiu homber establece tal relacion: “Nos base tabata un estudio di famía regular. Nos a asigna e yiunan varios tópico apropiado pa investigá. Nos també a haci nos lezamento di Bijbel hunto anto a papia riba e informacion. Nos yiunan por a mira cu Jehova ta spera obedencia també dje mayornan i no di yiu so.”

Mayornan cristian ta comprende cu e texto inspirá “reprendimento di disiplina ta e camina di bida” ta aplica tanto na tata como na yiu. Pues, aunque yiu tin e obligacion di keda obediente na nan mayornan den tur cos, mayornan també tin cu keda obediente na tur loke Jehova ta exigi di nan. Además di fortalece e relacion entre tata i yiu, nan tur mester fortalece nan relacion cu Dios.—Proverbio 6:23.

Consideracion Positivo di Obedencia

Ki agradicido nos por keda cu e Palabra di Dios ta duna tal conseho práctico tocante criamento di yiu! (Mira e cuadro.) Yiu cu ta siña obedencia for di nan mayornan cu ta disiplinánan den husticia ta un berdadero fuente di gozo pa tur e hermandad cristian.

Siendo cu obedencia na Dios ta nifica bida, nos mester evita di hunga cu e idea di salta e limitacion cu mandamento di Dios ta pone riba nos libertad personal—ni temporalmente. Por ehempel, imagina cu nos por limita brevemente e ley di gravidad. Ki excitá nos lo keda di flota te na cielo for di punta di ceru sin nada pa stroba nos libertad! Pero, kico lo pasa despues cu cosnan a bolbe na normal? Corda ki duro nos lo cai!

E siñamento di obedencia aceptando disiplina ta contribui ne desaroyo di un personalidad balanzá i ta yúdanos conoce nos limitacion. Esei ta yúdanos evita di ser mucho exigente i tuma mas na cuenta e derecho i necesidad di otro hende i evita insiguridad. En fin, e ta contribui na felicidad.

Pues, sea cu bo ta adulto of mucha, siña obedencia aceptando disiplina di manera cu “lo bo pasa bon” i cu “bo por dura hopi tempo riba tera.” (Efesio 6:1-3) Ken kier pone den peliger nan prospecto di biba pa semper door di no siña obedencia aceptando disiplina?—Juan 11:26.

[Kuadro na página 29]

MAYORNAN, SIÑA BO YIUNAN OBEDENCIA, DISIPLINANDO NAN DEN HUSTICIA

1. Disipliná riba base di ley i principio bíblico.

2. No disipliná exigiendo simplemente obedencia, sino splica pakico obedencia ta e camina sabí.—Mateo 11:19b.

3. No disipliná den rabia ni cu gritamento.—Efesio 4:31, 32.

4. Disipliná cu amor den un relacion di amor i cariño.—Colosense 3:21; 1 Tesalonicense 2:7, 8; Hebreo 12:5-8.

5. Disipliná yiu desde infancia.—2 Timoteo 3:14, 15.

6. Disipliná bez tras bez i consistentemente.—Deuteronomio 6:6-9; 1 Tesalonicense 2:11, 12.

7. Disipliná bo mes promé i asina siña yiu cu bo ehempel.—Juan 13:15; compara cu Mateo 23:2, 3.

8. Disipliná cu plena confianza den Jehova Dios, pidiendo su yudanza den oracion.—Huez 13:8-10.

[Plachi na página 28]

“Reprendimento di disiplina ta e camina di bida”