Pregunta Di Lector

Ki actitud mester manifestá na bautismonan cristian?

Esei ta un pregunta interesante, pasobra aunke hopi di nos lectornan ta bautisá caba, e ta enbolbé nan i tambe esnan cu ta ser bautisá. Promé, laga nos comentá riba esnan cu ta bai bautisá, bayendo completamente bou di awa. Ki actitud nan mester tin?

Na Mateo 28:19, 20, Jesus a bisa su siguidornan pa bai i haci disipel di hende, siñando i bautisando nan. E no a presentá bautismo como un experencia sumamente emocional, un accion cu ta resultá for di excitacion momentáneo. Bautismo ta un paso serio, manera nos ta mira for di Jesus su ehempel. Lucas 3:21 ta bisa: “Jesus tambe a ser bautisá i, segun cu e tabata haciendo oracion, cielu a habri.” Sí, nos Ehempel a considerá bautismo cu seriedad i bou di oracion. Nos no por imaginá Jesus, despues di sali for di awa, haci un gesto di victoria, dal un gritu, of sagudí su brasanan den laira, aunke algun persona recientemente a haci cosnan manera esei. No, cu solamente Juan Bautista presente, Jesus a acudí na su Tata den oracion.

Sin embargo, Bijbel no ta duna di comprendé cu bautismo mester ta un evento tristu of stijf, rekiriendo postura of recitacionnan special durante e acto di bautismo, manera algun iglesia di cristiandad ta rekerí awe. Wel, corda e dia di Pentecoste, ora cu miles di hudiu i prosélito a haña un bautismo cristian. Ya nan a studia Dios su Ley caba i a drenta den un relacion cuné. Pues nan simplemente mester a siña dje Mesías, Jesus, i acept’é. Una bes cu nan a haci esei, nan por a ser bautisá.

Echonan 2:41 ta informá: “Esnan cu a aceptá su palabra di buena gana a ser bautisá.” E version di Bijbel traducí pa Weymouth ta bisa: “Esnan, pues, cu gososamente a ricibí su palabra a ser bautisá.” Nan a haña goso den e noticia excitante tocante e Mesías i siguramente e goso sincero ei a plama n’e bautismo mes, un bautismo efectuá dilanti cientos i cientos di observador contentu. Asta angelnan den cielu tabata observando i alegrando. Corda e palabranan di Jesus: “Mi ta bisa boso, goso ta lanta den e angelnan di Dios pa un pecador cu ta repentí.”—Lucas 15:10.

Tin vários manera den cua cada un di nos por reflehá tantu e seriedad como e goso di un bautismo. Den algun iglesia esnan cu ta bai bautisá ta bisti paña largu blancu of pretu. Simplemente no tin ningun apoyo bíblico pa tal rekisito. Pero tog, trahenan di baño chikitu of sunú lo ta inapropiado, tantu pa hende homber como hende muher. I manera nos a nota, ora di sali for di awa, e cristian nobo no mester haci gestonan special of comport’é na un manera exagerá como si fuera el a gana un gran victoria. E resto dje hermandad cristian ta contentu cu e persona nobo ei a bautisá. E mester sinti cu e demostracion di fe aki, esta su bautismo, ta solamente un paso inicial den e curso largu di integridad pa gana Dios su aprobacion.—Mateo 16:24.

Nos, como observador na un bautismo público, ta compartí e goso dje ocasion, specialmente si esun cu ta bai bautisá ta un famia of un persona cu ken nos a studia Bijbel. Sin embargo, pa compartí e goso plenamente nos mester scucha henter e discurso huntu cu e candidatonan, tende nan contestá públicamente e preguntanan presentá na nan i uni den e oracion. Haciendo esei lo yuda nos tene e bautismo mes den e perspectiva corecto; nos lo tin Dios su punto di bista di dje. Despues dje acto di bautismo, nos goso no ta rekerí un marcha di victoria, un buket di flor of un fiesta na onor di esun bautisá. Pero nos lo por acercá nos ruman homber of ruman muher nobo pa expresá nos goso debí n’e paso maraviyoso cu el a tuma i pa extendé un caluroso bon biní den nos hermandad cristian.

Pues, en resúmen, nos tur, incluyendo esnan cu ta ser bautisá bou di awa, mester trata bautismo cu e seriedad apropiado. E no ta un ocasion pa expresionnan emocional na bos haltu, ni pa haci fiesta of pa haci pret. Pero tampoco e ta un ocasion tristu of stijf. Nos corectamente por ta gososo cu personanan nobo a uni cu nos riba e caminda pa bida eterno. I gososamente nos por yama bon biní na nos rumannan homber i muher nobo.

[Full-page picture na página 31]