Pregunta di Lector

Maria, kende a bira mama di Jesus, tabata embarasá caba ora el a bai bishitá su pariente Elisabet?

Sí, evidentemente e tabata.

Den Lucas capítulo 1, nos ta lesa promé tocante e embaraso di Elisabet, esposa di sacerdote Zacarías, kende a duna lus na Juan (Bautista). Ora Elisabet tabata “den su di seis luna angel Gabriel” a bishitá Maria pa inform’é cu lo e sali na estado i duna lus n’e “Yu dje Haltísimo.” (Lucas 1:26, 30-33) Pero na ki momento Maria a sali na estado?

E relato di Lucas ta pasa na conta cu Maria despues di esei a biaha pa Huda pa bishitá su pariente embarasá Elisabet. Ora e dos muhernan a topa otro, e criatura den matris di Elisabet (Juan) a dal un salto. Elisabet a referí na ‘e fruta di matris di Maria,’ i a yama Maria “mama di mi Señor.” (Lucas 1:39-44) P’esei e conclusion lógico ta cu Maria ya caba a concibí, cu e tabata embarasá ora el a bai pa bishitá Elisabet.

Lucas 1:56 ta bisa: “Anto Maria a keda cerca dje pa rond di tres luna, i a bolbe pa su mes cas.” E versículo aki no ta dunando un calculacion asina precis pa specificá e dia exacto di calender. E ta bisa “rond di tres luna,” locual a pone Elisabet den su di nuebe luna di embaraso.

Despues di tabata di yudansa pa Elisabet durante e último parti di su embaraso, Maria a tumba pa su cas den Názaret. Posiblemente Maria a realisá cu unabes cu Elisabet a duna lus (na Juan), lo por tabatin hopi bishitante, algun di nan asta siendo pariente. Esei lo por tabata embarasoso pa un muher hóben no casá kende e mes tabata na estado. Pa cuantu tempu Maria tabata na estado ora el a sali pa Názaret? Siendo cu e tabata cu Elisabet “rond di tres luna,” Maria probablemente lo tabata den cabamentu di su di tres luna of cuminsamentu di su di cuater luna di embaraso ora el a bolbe bek pa Názaret.