Mira Matrimonio Komo un Regalo di Dios
“P’esei un hòmber lo bandoná su tata i su mama i lo uni ku su esposa. I nan lo bira ún karni.”—GÉN. 2:24.
1. Dikon Yehova meresé nos rèspèt?
YEHOVA DIOS, esun ku a originá matrimonio, sigur meresé nos rèspèt. Ku bon motibu anto Beibel ta bisa ku Yehova, kende ta nos Kreador, Gobernante Supremo i Tata selestial, ta Esun ku ta duna “tur bon regalo i tur don perfekto.” (Sant. 1:17; Rev. 4:11) Sí, komo muestra di su gran amor, Yehova a duna humanidat tur loke nan tin mester. (1 Juan 4:8) Tur loke e ta siña nos, tur loke e ta rekerí di nos i tur loke e ta duna nos ta pa nos bienestar.—Isa. 48:17.
2. Ki instrukshon Yehova a duna e promé pareha kasá?
2 Beibel ta mustra ku matrimonio ta un di e “bon” regalonan ku Yehova a duna nos. (Pro. 19:14, BPK) Despues ku el a uni e promé pareha humano, Adam i Eva, den matrimonio, el a duna nan instrukshon spesífiko pa nan matrimonio por tabata un éksito. (Lesa Mateo 19:4-6.) Si nan a sigui su instrukshonnan, nan lo a biba felis i pa semper. Pero lamentablemente, nan a kometé e bobedat di ignorá e mandamentu di Dios, i e konsekuensianan tabata desastroso.—Gén. 3:6-13, 16-19, 23.
3, 4. (a) Kon hopi hende awe ta menospresiá tantu e regalo di matrimonio komo esun ku a dun’é? (b) Kiko nos ta bai konsiderá den e artíkulo akí?
3 Awe ta meskos; hopi hende no ta hasi kaso di Yehova su prinsipionan ora di tuma desishon relashoná ku matrimonio. Tin hende ta biba huntu sin kasa, miéntras ku otronan ta forma nan propio konsepto di bida i di matrimonio. Otronan ta kasa djis pa satisfasé nan deseonan egoista. (Rom. 1:24-32; 2 Tim. 3:1-5) Nan no ta mira matrimonio komo un regalo di Dios, i ku nan aktitut nan ta menospresiá tantu e regalo ei komo esun ku a dun’é, esta, Yehova Dios.
4 Asta algun sirbidó di Yehova ta neglishá su punto di bista enkuanto matrimonio. Nan ta separá for di otro òf asta ta divorsiá sin base bíbliko. Kon nos por evitá di yega asina leu? Kon loke Dios a bisa na Génesis 2:24 por yuda parehanan kristian fortalesé nan matrimonio? I kon esnan ku tin pensá di kasa por prepará nan mes pa esaki? Laga nos konsiderá e ehèmpel di tres matrimonio eksitoso di tempu bíbliko ku ta ilustrá dikon rèspèt pa Yehova ta e klave pa un matrimonio duradero.
Keda Leal na Bo Kasá
5, 6. Kiko por tabata un prueba pa Zakarias i Elisabèt, i kon Yehova a rekompensá nan pa nan lealtat?
5 Zakarias i Elisabèt semper a hasi loke ta korekto den bista di Dios, i p’esei komo pareha, nan tabatin un bon matrimonio. Na promé lugá, nan a skohe pa kasa ku un persona ku ta stima Yehova. Nan tur dos a hasi nan máksimo esfuerso pa kumpli ku e Lei di Dios. Zakarias, por ehèmpel, a kumpli fielmente ku su responsabilidatnan komo saserdote. Sigur nan tabatin hopi motibu pa ta gradisidu. Ma si bo por a bishitá nan na nan kas na Huda, lo bo a ripará mesora ku tabata falta algu den nan bida. Sí, nan no tabatin yu. Ademas, Elisabèt tabata steril i tantu e komo Zakarias tabata di edat avansá kaba.—Luk. 1:5-7.
6 Den Israel di antigwedat, hañamentu di yu tabata masha importante, i hopi biaha, famianan tabata grandi. (1 Sam. 1:2, 6, 10; Sal. 128:3, 4) Den e tempu ei, si un muhé no por a haña yu, su kasá lo por a usa esei komo preteksto pa divorsi’é; i esei lo tabata un akto di traishon. Pero Zakarias sí a keda leal na Elisabèt. Ni é ni Elisabèt no a buska un manera fásil pa pone fin na nan matrimonio. Maske falta di yu a krea un bashí den nan bida, nan a keda fiel na otro i a sigui sirbi Yehova lealmente. Ku tempu, Yehova a bindishoná nan rikamente. Pa medio di un milager, el a hasi posibel pa Elisabèt haña un yu hòmber maske nan tabata di edat avansá.—Luk. 1:8-14.
7. Den ki otro manera Elisabèt a keda leal na su kasá?
7 Sinembargo, tabatin un aspekto mas den kua Elisabèt a pone un ekselente ehèmpel di lealtat. Dia su yu hòmber Juan a nase, Zakarias no por a papia, pasobra mas promé Dios a hasié muda pa motibu ku el a duda den loke un angel a bis’é. Pero Zakarias mester tabata komuniká ku Elisabèt di un òf otro manera, ya ku ta é a bisa Elisabèt pa yama e yu “Juan,” manera e angel di Yehova a orden’é. Bisiña- i famianan tabata ke pa e yu yama Zakarias, meskos ku su tata. Pero Elisabèt a sigui instrukshon di su kasá fielmente. El a bisa nan: “Nò, e mester yama Juan.”—Luk. 1:59-63.
8, 9. (a) Kon lealtat ta fortalesé matrimonio? (b) Menshoná algun manera spesífiko ku parehanan kasá por demostrá lealtat.
8 Awe tambe, meskos ku Zakarias i Elisabèt, parehanan kasá ta haña nan ku desepshon i difikultat den bida. Si nan no keda leal na otro, nan matrimonio por frakasá. Práktikanan manera flirtmentu, wakmentu di pornografia i adulterio por kibra konfiansa. I ora parehanan no ta konfia otro mas, nan amor pa otro lo fria. Den un sentido anto, lealtat ta manera un tranké rònt di un kas ku ta protehá su habitantenan kontra intruso. Pues, ora esposo i esposa ta leal na otro, bida ta bai bon, nan por papia franko ku otro i nan amor pa otro lo krese. Sí, lealtat ta di vital importansia.
9 Yehova a bisa Adam: “Un hòmber lo bandoná su tata i su mama i lo uni ku su esposa.” (Gén. 2:24) Kiko esei ke men? Unabes ku un persona kasa, e no por sigui dediká mes tantu tempu i atenshon na su famia i amigunan manera e tabata hasi promé. Awor su interes prinsipal mester ta su kasá. Ademas, esposo i esposa no mester permití nan mayornan entremeté den nan asuntunan, esta nan desishon- òf desakuerdonan. Parehanan kasá mester ta uní den tur kos manera Dios a instruí nan.
10. Kiko ta yuda parehanan kasá keda leal na otro?
10 Asta ora ta un partner so ta Testigu, lealtat ta trese benefisio. Un ruman muhé, kende su esposo no ta Testigu, a bisa: “Mi ta masha gradisidu na Yehova, kende a siña mi respetá mi kasá i ser sumiso na dje. Ta lealtat a pone ku nos tin 47 aña kasá, stimando i respetando otro.” (1 Kor. 7:10, 11; 1 Ped. 3:1, 2) Pues, hasi tur bo esfuerso pa laga bo kasá sintié sigur. Ku echo i palabra, laga bo kasá sa, ku pa abo, é ta e persona di mas importante na mundu. Te asina leu ku ta dependé di bo, no laga niun hende ni nada separá bo for di bo kasá. (Lesa Proverbionan 5:15-20.) Ron i Jeannette, kendenan tin mas ku 35 aña felismente kasá, a bisa: “Semper nos a keda leal na otro i a hasi loke Yehova ta rekerí di nos, i p’esei, nos tin un matrimonio felis i eksitoso.”
Union Ta Fortalesé Matrimonio
11, 12. Den ki manera Akila i Prisila a kooperá ku otro (a) na kas, (b) den nan negoshi, i (c) den sirbishi kristian?
11 Ora apòstel Pablo a papia di su bon amigunan Akila i Prisila, semper el a menshoná nan dos huntu. Sí, e pareha uní akí ta un bon ehèmpel di loke Dios tabata ke men ora el a bisa ku un hòmber i un muhé lo bira “ún karni.” (Gén. 2:24) Akila i Prisila semper a traha huntu: na kas, den nan negoshi i den sirbishi kristian. Por ehèmpel, ora Pablo a bishita Korinto pa promé bes, ta nan dos a invit’é bondadosamente pa keda na nan kas, ku aparentemente Pablo a usa pa un tempu komo un sentro pa su aktividatnan. Mas despues, na Efeso, nan a usa nan kas pa tene reunion di kongregashon i tabatin e privilegio di yuda rumannan nobo, manera Apolos, komprondé e bèrdat mihó. (Echo. 18:2, 18-26) Despues, e pareha diligente akí a muda bai Roma. Ei tambe nan a pone nan kas disponibel pa tene reunion kristian. Ku tempu nan a bai bèk Efeso, i aya nan a sigui fortalesé nan rumannan den fe.—Rom. 16:3-5.
12 Pa un tempu, Akila i Prisila huntu ku Pablo tabata gana nan pan di kada dia komo trahadó di tènt. Atrobe e pareha ta huntu, trahando sin kompetí òf pleita ku otro. (Echo. 18:3) Pero un kos ta sigur: ta e tempu ku nan a dediká huntu na aktividatnan kristian a pone ku nan tabatin un matrimonio fuerte i eksitoso. Akila i Prisila tabata bon konosí komo Pablo su ‘kompañeronan di trabou den Kristu Hesus.’ (Rom. 16:3) Unda ku nan a sirbi, sea na Korinto, Efeso òf Roma, nan a traha duru komo pareha uní pa promové interesnan di Reino.
13, 14. (a) Kiko por stroba parehanan kasá di ta uní? (b) Kiko asina parehanan kasá por hasi pa uni mas komo ‘un solo karni’?
13 En bèrdat, ora parehanan kasá tin e mesun metanan i ta hasi kosnan huntu, nan matrimonio lo bira mas fuerte. (Ekl. 4:9, 10) Lamentablemente, awendia hopi pareha kasá ta pasa masha poko tempu huntu. I den vários kaso, kada un di nan tin nan mes trabou, i komo ku nan ta traha hopi ora, kasi nan no ta mira otro. Algun ta biaha hopi pa trabou i tin ta bai biba na otro pais pa traha pa manda sèn pa nan famia. Asta na kas, algun pareha ta apartá nan mes pa sinta wak televishon, práktika hòbi òf deporte, hunga wega elektróniko òf sùrf riba Internet. Esaki ta loke ta pasa den boso kas? Si ta asina, boso por hasi algun kambio pa boso por pasa mas tempu huntu? Pakiko no hasi kos huntu komo pareha, manera trabou di kas, prepará kuminda, laba tayó òf traha den kurá? Boso por hasi esei tambe den lantamentu di yu i den kuido di mayornan di edat?
14 Pero mas importante ainda ta pa adorá Yehova huntu. Famianan ku ta konsiderá e teksto di dia huntu, ku ta pega na nan programa di Adorashon Komo Famia i ku ta traha huntu den sirbishi ta keda uní den pensamentu i akshon. Si ta posibel, purba traha huntu komo pionero, asta si boso sirkunstansia ta permití boso hasié maske ta pa un luna so òf un aña. (Lesa 1 Korintionan 15:58.) Un ruman muhé ku a traha pionero huntu ku su kasá a bisa: “Sirbishi a duna nos oportunidat pa pasa tempu huntu i pa ègt kòmbersá ku otro. Debí ku nos tur dos tin e meta pa yuda hende bira sirbidó di Dios, mi ta haña ku ami ku mi kasá ta forma un bon tim. Awor mi ta mas será kuné, no solamente komo mi kasá sino tambe komo mi bon amigu.” Sí, mas boso traha huntu pa alkansá metanan ku ta bale la pena, mas sinkronisá boso interes-, prioridat- i kustumbernan lo ta, i ku tempu, meskos ku Akila i Prisila, boso lo kuminsá pensa, sinti i aktua komo ‘un solo karni.’
Pone Dios na Promé Lugá den Boso Matrimonio
15. Kiko ta e klave pa un matrimonio eksitoso? Splika dikon.
15 Hesus tabata sa kon importante ta pa pone Dios na promé lugá den matrimonio. El a mira Yehova efektuá e promé matrimonio. El a mira kon felis Adam ku Eva tabata tanten ku nan a sigui instrukshon di Dios, i el a mira tambe ku su mes wowo kuantu problema nan a haña nan kuné ora nan a desobedesé Dios. P’esei, ora Hesus tabata siña hende, el a ripití loke su Tata a bisa na Génesis 2:24. Anto el a agregá: “Loke Dios a uni, no laga ningun hende separá.” (Mat. 19:6) Pues, te awe, e klave pa un matrimonio felis i eksitoso ta rèspèt profundo pa Yehova. Hesus su mayornan, Hosé i Maria, a pone un ekselente ehèmpel den esaki.
16. Kon Hosé i Maria a pone Dios na promé lugá den nan bida di famia?
16 Hosé a trata Maria ku bondat i rèspèt. Ora el a haña sa ku Maria tabata na estado, e tabata dispuesto pa tene miserikòrdia kuné, asta promé ku e angel di Dios a splik’é kiko realmente a pasa ku Maria. (Mat. 1:18-20) Komo pareha, nan a obedesé e dekreto di Cesar i a kumpli fielmente tambe ku e Lei di Moisés. (Luk. 2:1-5, 21, 22) I maske ta hende hòmber so tabatin e deber di asistí na e fiestanan religioso importante ku a tuma lugá na Yerusalèm, tòg, tur aña, Maria tabata kompañá Hosé huntu ku nan respektivo famia. (Deu. 16:16; Luk. 2:41) Semper e pareha deboto akí a hasi esfuerso pa agradá Yehova i a mustra rèspèt profundo pa kosnan spiritual. P’esei, no ta nada straño ku Yehova a skohe nan pa lanta i kuida su Yu durante e promé parti di su bida riba tera.
17, 18. (a) Den ki manera parehanan kasá por pone Yehova na promé lugá den nan matrimonio? (b) Kon esaki lo benefisiá nan?
17 Boso tambe ta pone Dios na promé lugá den boso bida di famia? Por ehèmpel, si boso tin ku tuma un desishon importante, kiko boso lo hasi? Boso ta kuminsá na buska pa sa kiko ta e prinsipionan bíbliko relashoná ku e asuntu, hasi orashon i despues buska konseho serka un kristian maduro? Òf boso tin e tendensia di sigui boso mes ideanan òf bai tras di loke famia i amigunan ta bisa? Boso ta hasi esfuerso pa apliká e tantísimo sugerensianan práktiko ku e esklabo fiel ta publiká enkuanto matrimonio i bida di famia? Òf boso ta djis sigui kustumbernan lokal òf konsehonan di e mundu akí? Boso ta hasi orashon i ta studia huntu regularmente? Boso tin metanan spiritual i ta papia regularmente tokante prioridatnan di e famia?
18 Ray, kende tin 50 aña felismente kasá, a bisa: “Nunka nos a haña nos ku un problema ku nos no por a solushoná, pasobra semper Yehova tabata e parti prinsipal den nos ‘kordon lorá tripel.’” (Lesa Eklesiastés 4:12.) Danny i Trina ta di akuerdo kuné. Nan a bisa: “Komo ku nos ta sirbi Dios huntu, nos matrimonio a bira mas stabil.” I nan tin mas ku 34 aña felismente kasá. Sin duda, si semper boso ta pone Yehova na promé lugá den boso matrimonio, lo e bindishoná boso rikamente i boso lo tin éksito.—Sal. 127:1.
Sigui Mira Matrimonio Komo un Regalo di Dios
19. Pakiko Dios a duna hende e regalo di matrimonio?
19 E úniko kos ku hopi hende ta interesá den dje awe ta nan propio felisidat. Pero un sirbidó di Yehova ta pensa otro. E sa ku matrimonio ta un regalo ku Dios a duna hende pa kumpli ku Su propósito. (Gén. 1:26-28) Si Adam ku Eva a balorá e regalo ei, awe nos tera lo tabata un paradeis, habitá pa hende hustu i felis ku ta sirbi Dios.
20, 21. (a) Dikon nos tin ku mira matrimonio komo algu sagrado? (b) Kiko nos lo bai konsiderá den e siguiente artíkulo?
20 Pero mas importante ainda, kristiannan ta mira matrimonio komo un oportunidat pa duna gloria na Yehova. (Lesa 1 Korintionan 10:31.) Ora parehanan kasá ta uní, leal na otro i ta pone Dios na promé lugá den nan bida, nan ta hasi su kurason kontentu i ta fortalesé nan matrimonio. Pues, sea ku nos tin pensá di kasa òf ta hasi esfuerso pa fortalesé òf salba nos matrimonio, semper nos mester kòrda ku matrimonio ta sagrado pasobra ta Yehova a instituyé. Si nos semper tene esei na mente, nos lo hasi nos bèst pa sigui prinsipionan bíbliko ora di tuma desishon relashoná ku matrimonio. Asina nos ta demostrá ku no solamente nos ta mira matrimonio komo un regalo sino ku nos ta apresiá i respetá tambe esun ku a duna nos e, esta, Yehova Dios.
21 Pero matrimonio no ta e úniko regalo ku Yehova a duna nos ni e úniko medio pa logra felisidat. E siguiente artíkulo ta papia di un otro regalo presioso ku Dios a duna hende—e don di ta soltero.
Kon Lo Bo Kontestá?
• Ki efekto lealtat tin riba matrimonio kristian?
• Ora parehanan ta hasi kos huntu, dikon nan matrimonio ta bira mas fuerte?
• Den ki manera parehanan kasá por pone Yehova na promé lugá den nan matrimonio?
• Kon nos por mustra rèspèt pa Yehova, Esun ku a originá matrimonio?
[Plachi na página 17]
Parehanan kasá ku ta traha huntu ta keda huntu