Ora Generosidad Ta Abundá

SI BO tabatin e oportunidad di duna un rey un regalo, kico lo bo a dun’é? Kico si e tabata e gobernante mas ricu i mas sabí na mundu? Bo por pensa riba un regalo cu lo a agrad’é? Un tres mil aña pasá, e reina di Saba mester a meditá riba e preguntanan ei miéntras e tabata prepará pa bishitá precis un gobernante asina, esta, rey Sálomon di Israel.

Bijbel ta conta nos cu entre su regalonan tabatin 120 talento di oro “i un cantidad masha grandi di zeta di bálsamo i piedra precioso.” Awe, e oro so lo tabatin un balor di 72.000.000 florin. Hende tabata categorisá zeta di bálsamo, un zeta cu aroma i tambe medicinal, como un comodidad costoso. Aunke Bijbel no ta bisa cuantu zeta e reina a duna Sálomon, sí e ta conta nos cu su regalo a keda inigualabel.—1 Reynan 10:10.

Ta bisto cu e reina di Saba tabata un muher ricu i generoso. Es mas, el a haña bek e balor di su generosidad. Segun Bijbel, “rey Sálomon a duna e reina di Saba tur loke tabata su deleite cu el a pidi, ademas dje balor di loke el a trece pa e rey.” (2 Crónicanan 9:12) Ta cierto cu kisas reynan tabatin e custumber di duna otro regalo; pero, Bijbel ta mencioná specíficamente e “generosidad” di Sálomon. (1 Reynan 10:13) Sálomon mes a skirbi: “E alma generoso mes lo ser hací gordo, i esun cu ta muha otronan libremente, e mes tambe lo ser muhá libremente.”—Proverbionan 11:25.

Naturalmente, e reina di Saba tambe a haci un gran sacrificio pa loke ta tempu i energia pa bishitá Sálomon. Ta parce cu Saba tabata situá den e área caminda República di Yemen ta awe; pues e reina i su corteho di kamel a biaha mas cu 1.600 kilometer pa nan yega Jerusalem. Manera Jesus a bisa, “el a bini for dje extremo di tera.” Pakico e reina di Saba a haci asina tantu esfuerso? El a bini principalmente “pa tende e sabiduria di Sálomon.”—Lucas 11:31.

Promé Reynan 10:1 i 2 ta bisa cu e reina di Saba “a bini pa test [Sálomon] cu preguntanan complicá. . . . [El] a cuminsá papia cuné tur loke tabatin na su curason.” Con Sálomon a reaccioná? “Sálomon, na su turno, a cont’é tur e reina su asuntunan. No tabatin ningun asuntu scondí p’e rey cu e no a cont’é.”—1 Reynan 10:3.

Asombrá di loke el tende i mira, e reina a respondé humildemente: “Felis ta bo sirbidónan kendenan ta pará dilanti bo constantemente, scuchando bo sabiduria!” (1 Reynan 10:4-8) Aunke Sálomon su sirbidónan tabata rondoná cu abundancia i luho, no ta p’esei e reina a bisa cu nan ta felis. Mas bien, Sálomon su sirbidónan tabata bendicioná pasobra nan por a tende constantemente Sálomon su sabiduria cu el a ricibí for di Dios. Esta un excelente ehempel reina di Saba ta p’e pueblo di Jehova djawe, kendenan ta disfrutá dje sabiduria dje propio Creador i di su Yu, Jesucristo!

Loke merecé atencion tambe ta loke e reina a sigui bisa Sálomon: “Cu Jehova bo Dios sea bendicioná.” (1 Reynan 10:9) Evidentemente, el a mira cu Jehova tabatin di haber cu Sálomon su sabiduria i prosperidad. Esaki ta na armonia cu loke Jehova a primintí Israel anteriormente. ‘Warda mi reglamentunan,’ el a bisa, “ta sabiduria di boso parti i comprendimentu di boso parti dilanti wowo dje pueblonan cu lo tende tur e reglamentunan aki, i nan sigur lo bisa: ‘E nacion grandi aki sin duda ta un pueblo sabí i huicioso.’”—Deuteronomio 4:5-7.

Hende Ta Bini n’e Dunador di Sabiduria

Den nos tempu, miyones di hende tambe a ser atraé n’e organisacion di Jehova debí cu nan a ripará cu “e Israel di Dios” ta “un pueblo sabí i huicioso,” no di naturalesa, sino dor cu Dios su ley i principionan perfecto ta guia nan. (Galationan 6:16) E cifranan di bautismo ta mustra cu den e último añanan, cientos di miles di disipel nobo a bisa tur aña, eigenlijk na Israel spiritual: “Nos lo bai cu boso, pasobra nos a tende cu Dios ta cu boso.” (Zacarías 8:23) Ora e personanan nobo aki mira e bankete di cuminda spiritual cu Jehova ta pone dilanti su sirbidónan, esta asombrá nan ta keda! Nunca nan no a mira algu asina den nan religionnan anterior.—Isaías 25:6.

Duna e Dunador di Mas Grandi

Debí cu nan a ricibí asina hopi, ta normal cu hende apreciativo ta puntra nan mes kico nan, na nan turno, por duna e Rey i Dunador di mas grandi, Jehova Dios. Bijbel ta revelá cu e mihó regalo cu nos por duna Jehova ta “un sacrificio di alabansa.” (Hebreonan 13:15) Di con? Pasobra e sacrificio aki ta directamente relacioná cu salba bida, i esei ta loke mas ta interesá Jehova den e tempu di fin aki. (Ezekiel 18:23) Ademas di esei, duna bo forsa i tempu pa yuda esnan enfermo, esnan deprimí i otronan tambe ta un sacrificio aceptabel.—1 Tesalonicensenan 5:14; Hebreonan 13:16; Santiago 1:27.

Contribucionnan financiero ta hunga un papel importante. Nan ta haci posibel pa producí Bijbel, literatura bíblico i obtené lugá unda cristiannan por reuní. (Hebreonan 10:24, 25) Contribucionnan tambe ta percurá fondo di auxilio pa yuda víctimanan di guera i di desasternan natural.

Pa guia nos den e asuntu di duna, e Palabra di Dios ta describí algun principio excelente. Por ehempel, e ta siña cu cristiannan ta duna, no un montante fiho, sino loke nan por aford razonablemente, i nan ta hacié boluntariamente i cu un curason gososo. (2 Corintionan 9:7) Algun por duna hopi; otronan, mescos cu e biuda den necesidad den tempu di Jesus, kisas por duna djis un tiki. (Lucas 21:2-4) No ta algu remarcabel cu Jehova, Doño di henter universo, ta apreciá tur regalo i sacrificio bon motivá cu ta ser hací den su nomber?—Hebreonan 6:10.

Pa nan por duna cu goso, ta informá Jehova su pueblo dje vários necesidadnan i di maneranan eficas cu por satisfacé e necesidadnan ei. I na su turno, Jehova su spiritu santu ta impulsá curasonnan boluntario pa reaccioná. Den Israel di antigwedad, nan a sigui e procedura aki ora di construí e tabernáculo i despues, e tempel. (Exodo 25:2; 35:5, 21, 29; 36:5-7; 39:32; 1 Crónicanan 29:1-19) Den promé siglo E.C., e mésun procedura a yuda cristiannan haña recurso cu nan tabatin mester pa hiba e bon nobo di Reino n’e nacionnan i pa sostené e rumannan den Israel tempu cu un hamber tabata reina.—1 Corintionan 16:2-4; 2 Corintionan 8:4, 15; Colosensenan 1:23.

Mescos awe tambe, Jehova a bendicioná su pueblo, i lo e sigui bendicioná nan dor di duna nan loke nan tin mester pa completá e campaña di predicá i siña di mas grandi cu mundu a yega di experenciá.—Mateo 24:14; 28:19, 20.

Kico Ta e Necesidadnan Actual?

Den añanan recien, Testigonan di Jehova a ser registrá den hopi pais unda anteriormente nan trabou tabata prohibí. Como resultado, hopi dje paisnan aki a mira un tremendo aumento den cantidad di publicadó. Ta di comprendé anto, cu tin un demanda grandi pa Bijbel i literatura bíblico.

Esei ta conta tambe pa Salon di Reino. Awor aki mes, rond mundu tin mester di mas o ménos 9.000 Salon di Reino. Si por a traha un Salon di Reino pa dia, lo tabatin mester di mas cu 24 aña pa cumpli cu e necesidad actual! Miéntras tantu, rond di shete congregacion nobo ta ser formá pa dia, i hopi di nan ta na partinan di mundu unda medionan financiero ta limitá. Na otro banda, hopi dje lugánan aki no ta rekerí edificionan costoso. Na algun lugá, for di 10.000 florin caba bo por traha un Salon di Reino cu ta cumpli cu e necesidad i cu ta duna un bon testimonio n’e comunidad.

Den promé siglo, tabatin algun cristian cu tabata mihó pará cu otronan den sentido financiero, p’esei Pablo a skirbi: “Mediante un igualacion, e exceso di boso awor aki mes por compensá loke nan falta, pa loke nan tin de sobra tambe por yega di compensá loke boso falta, pa un igualacion por tuma lugá.” (2 Corintionan 8:14) Awe, un “igualacion” similar ta percurá fondo necesario pa suministrá Bijbel, literatura bíblico, Salon di Reino, auxilio pa desaster i otro cosnan na hopi parti di mundu. Ki un bendicion tal dunamentu ta—tantu p’e dunadó como pa esun cu ta ricibí!—Echonan 20:35.

Manera e cartanan cu Sociedad ta ricibí for di hendenan di curason generoso, hopi lector dje revista aki tin gana di yuda pero nan no sa masha bon cua ta e vários maneranan cu nan por haci contribucion. Sin duda e cuadro cu ta compañá e artículo aki lo yuda contestá nan preguntanan.

Durante Sálomon su reinado glorioso, “tur e reynan di tera” cu a tende di Sálomon a bin bishit’é. Tog, Bijbel ta mencioná un gobernante so pa nomber, esta, e reina di Saba. (2 Crónicanan 9:23) Esta un sacrificio grandi el a haci! Pero el a ser recompensá ricamente, asina tantu cu na fin di su bishita el a keda “sin rosea i asombrá.”—2 Crónicanan 9:4, Today’s English Version.

Den futuro, Jehova, e Rey i Dunador di mas grandi, lo haci muchu mas pa esnan cu haci sacrificio p’e, cu Sálomon hamas lo por a haci. Esei lo pone cu nan lo keda “sin rosea i asombrá,” pasobra Jehova lo no solamente conserbá nan durante su dia di huicio inspirador di temor, sino despues di esei lo e ‘habri su man i satisfacé e deseo di tur cos bibu.’—Salmo 145:16.

[Kuadro na página 22]

Maneranan cu Algun Hende Ta Scoge pa

CONTRIBUI CU E OBRA MUNDIAL

HOPI hende ta apartá, of presupuestá, un montante cu nan ta pone den e cahanan di contribucion marcá: “Contribucion pa e Obra Mundial di Sociedad​—Mateo 24:14.” Tur luna congregacionnan ta manda e montantenan aki sea p’e sede mundial na Brooklyn, New York, of n’e oficina di sucursal local.

Tambe por manda donacion boluntario di placa directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-​2483, of n’e oficina di sociedad cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu nan ta un regalo incondicional mester compañá e contribucionnan aki.

AREGLO DI DONACION CONDICIONAL

Por duna Sociedad Watch Tower placa via un areglo special den cua, si e dunadó hañ’é den un necesidad personal, lo debolbé e donacion na dje. Pa mas informacion, por fabor, tuma contacto cu e Treasurer’s Office na e adres mencioná ariba.

PLANEAMENTU CARITATIVO

Ademas di regalo incondicional di placa i donacion condicional di placa, tin otro métodonan di duna na beneficio dje sirbishi di Reino mundial. Esakinan ta incluí:

Seguro: Por nombra Sociedad Watch Tower como beneficiario di un pólisa di seguro di bida of un plan di penshon.

Cuenta di Banco: Por duna Sociedad Watch Tower derecho di usa cuenta di banco, ‘time deposit’ of cuenta di penshon personal, of derecho di cobra nan despues di morto di nan doño, na armonia cu rekisitonan bancario local.

Accion i Bono: Por haci donacion di accion i bono na Sociedad Watch Tower sea como un regalo incondicional, of segun un areglo caminda e dunadó ta sigui ricibí nan dividendo of interes.

Propiedad: Por duna Sociedad Watch Tower propiedad cu por ser bendé, sea como regalo incondicional of bou dje condicion cu e dunadó por sigui biba den dje te na su morto. Mester tuma contacto cu Sociedad promé cu traha e acta pa traspasá cualkier propiedad pa Sociedad.

Testament i ‘Trust’: Por nombra Sociedad Watch Tower como heredero di propiedad of placa den un testament legal, of por nombra Sociedad como beneficiario di un areglo di trust. Un trust cu ta beneficiá un organisacion religioso por duna cierto bentahanan fiscal.

Sucursal mester ser informá, i mester ricibí un copia di tur documento relevante di cualkier un di e areglonan aki. Si bo ta interesá den un di e areglonan aki di planeamentu caritativo, bo mester tuma contacto cu Sociedad, via carta of telefon, na e adres indicá aki bou, of na e oficina di Sociedad cu ta sirbi bo pais.

SOCIEDAD WATCH TOWER

Curaçao, N.A.

Telefon: (599-9) 461-​7528

[Plachi na página 23]

Donacionnan boluntario ta sostené e actividadnan di Testigonan di Jehova