‘Nos A Haci Loke Nos Mester A Haci’
MANERA GEORGE COUCH A RELAT’E
Despues cu nos a predicá di cas-pa-cas henter mainta, mi compañero a saca dos sandwich. Ora nos a caba di come, mi a saca un sigaria pa mi huma. “Cuantu tempu bo tin den e berdad?” el a puntra. “Ayera anochi tabata promé biaha cu mi a bai reunion,” mi a bis’é.
MI A nace dia 3 di mart 1917, riba un hacienda cu ta keda rond di 50 kilometer oost di Pittsburgh, Pennsylvania, Merca, cerca dje stad chikitu, Avonmore. Einan mi mayornan a cria mi cuater ruman hombernan, un ruman muher i ami.
Nos no a haña masha educacion religioso. Un tempu mi mayornan tabata bai misa, pero nan a stop di bai for di tempu cu nos tabata chikitu. Tog, nos tabata kere den e Creador, i nos famia tabata biba segun e principionan básico di Bijbel.
E cos di mas excelente cu mi mayornan a siñá mi tin di haber cu responsabilidad—con pa aceptá responsabilidad i cumpli cuné. Den bida di hacienda esei tabata central. Pero nos bida no a consistí di trabou so. Nos a disfrutá di recreo sano, manera hunga basketball i baseball, core cabai i landa. E tempu ei placa tabata poco, pero tog bida di hacienda tabata dushi. Nos a bai scol básico den un edificio cu tabatin un klas so i pa scol secundario nos a bai stad.
Un anochi ami cu mi amigu tabata keiru den stad. Un mucha muher bunita a sali for di su cas bin cumindá mi amigu. Mi amigu a cerá mi conocí cu Fern Prugh. Su cas tabata net den e caya unda e scol secundario tabata situá. Hopi biaha ora mi pasa dilanti su cas, Fern tabata pafó haciendo trabou di cas. Bo por a mira cu e tabata un trahadó diligente, i esaki a impresioná mi. Nos a desaroyá un amistad cerá i nos amor pa otro a crece i na april 1936, nos a casa.
Contacto cu Berdad Bíblico
Promé cu mi a nace, hende den stad a maltratá un señora hende grandi pa motibu di su religion. Ora mi mama bai stad diasabra pa cumpra cos, e tabata bishit’é. Mama a haci cas limpi i tambe rospondi pa e señora, te dia cu e señora a muri. Mi ta kere cu Jehova a bendicioná Mama pa motibu cu el a trata e señora aki cu tabata un Studiante di Bijbel, manera tabata yama Testigonan di Jehova e tempu ei, cu bondad.
Poco tempu despues, mi tanta su yu muher hóben a muri repentinamente. Mi tanta no a haña masha consuelo for di misa, pero sí cerca un bisiña cu tabata un Studiante di Bijbel. E Studiante di Bijbel a splik’é kico ta sosodé ora un persona muri. (Job 14:13-15; Eclesiástes 9:5, 10) Esaki tabata un fuente di gran consuelo. Na su turno, mi tanta a conta mi mama tocante e speransa di resureccion. Esaki a lanta mi mama su interes, ya cu su mayornan a muri tempu e tabata chikitu i e tabata ansioso pa sa kico ta pasa cu un hende ora e muri. E experencia aki a imprimí den mi e importancia di semper probechá di tur oportunidad pa duna testimonio informal.
Den añanan ’30, Mama a cuminsá scucha tur diadomingo na radio e programa di Joseph F. Rutherford, kende e tempu ei tabata presidente di Watch Tower Bible and Tract Society. Ademas, durante e añanan ei, Testigonan a cuminsá predicá di cas-pa-cas, den nos bario. Nan tabata pone un tocadisco portátil den curá bou di un palu frescu i tabata toca e discursonan grabá di Ruman Rutherford. E grabacionnan aki huntu cu e revistanan E Toren di Vigilancia i Golden Age (awor Spierta!) a mantené Mama su interes bibu.
Un poco aña despues, na 1938, a manda pa abonadonan di E Toren di Vigilancia, un karchi di invitacion pa un reunion special den un cas privá un 25 kilometer leu. Mama kier a bai, p’esei ami cu Fern i dos di mi ruman hombernan, a compañ’é. John Booth cu Charles Hessler, superintendentenan biahero di Testigonan di Jehova, a duna discurso; nos tabata mas of ménos diesdos persona presente. Mas lat nan a cuminsá forma un grupo pa bai den sirbishi su manisé. Dor cu no tabatin ni un boluntario pa bai cu nan, Ruman Hessler a scoge ami i el a puntrá mi: “Pakico bo no ta bai cu nos?” Mi no tabata sa precis kico nan tabata bai haci, pero mi no por a pensa un motibu pakico no bai cu nan.
Despues cu nos a predicá di cas-pa-cas te banda di merdia, Ruman Hessler a saca dos sandwich. Nos a cai sinta riba trapi di misa i a cuminsá come. Tabata despues cu mi a saca e sigaria ei cu Ruman Hessler a haña sa cu ta na un reunion so mi a yega di asistí. El a invitá su mes na nos cas p’e cena dje anochi ei mes i el a pidi nos pa nos invitá nos bisiñanan pa un consideracion bíblico. Despues dje cena, el a tene un studio di Bijbel cu nos i a duna un discurso pa e rond di dies personanan cu tabat’ei. El a bisa nos cu nos mester a haña un studio di Bijbel tur siman. Aunke nos bisiñanan no a bai eens cu esaki, ami cu Fern sí a haci areglo pa haña un studio semanal di Bijbel na cas.
Progreso den e Berdad
Pronto despues, ami cu Fern a sali den sirbishi di veld. Nos tabata sintá den auto parti patras, i nos a caba di cende un sigaria ora mi ruman homber a bira wak nos i bisa: “Mi a caba di haña sa cu Testigonan no ta huma.” Mesora, Fern a tira su sigaria for di bentana. Ami sí a huma di mi. Maske nos tabata gusta huma, nunca mas nos a bolbe hacié.
Despues cu nos a bautisá na 1940, ami cu Fern tabata na un reunion unda nos a studia un artículo cu a animá rumannan pa traha pionero, manera e trabou di predicá di tempu completo ta ser yamá. Ora nos tabata bayendo cas, un ruman homber a puntra: “Pakico abo cu Fern no ta bai traha pionero? No tin nada ta stroba boso.” Nos mester a dun’é rason, di manera cu nos a pone nos mes disponibel. Mi a manda un carta pa mi haña retiro for di trabou denter di 30 dia, i nos a cuminsá prepará pa traha pionero.
Despues cu nos a cumbiní cu Sociedad Watch Tower tocante e lugá unda nos mester a sirbi, nos a muda pa Baltimore, Maryland. Ei tabatin un cas pa pionero, i e prijs pa posada i cuminda tabata 18 florin pa luna. Nos a pensa cu e poco cen cu nos tabatin di spar lo tabata suficiente pa te n’e tempu cu Armagedon yega. (Revelacion 16:14, 16) Al fin i al cabo, semper nos a pensa cu Armagedon ta djis tras di porta. P’esei ora nos a cuminsá traha pionero nos a bende nos cas i a renunciá tur cos sobrá.
Nos a traha pionero na Baltimore for di 1942 te cu 1947. E añanan ei tabatin masha hopi oposicion contra e trabou di Testigonan di Jehova. En bes di bai cu nos mes auto, tin biaha nos tabata laga un otro persona baha nos cerca nos studiantenan di Bijbel. Asina nos tabata evitá cu nan a corta nos tayernan. Niun hende ta haña oposicion asina dushi, ma mi por bisa cu semper nos tabatin goso den sirbishi di veld. Eigenlijk, nos tabata ansioso pa un poco excitacion den e trabou di Señor.
Pronto tur e cen cu nos tabatin di spar a caba. Nos tayernan a gasta, i tambe nos paña i sapatunan. Dos of tres biaha, nos a bira malu pa un temporada largu. No tabata fácil pa sigui padilanti, pero nunca nos a pensa di bandoná e trabou. Nunca nos no a ni sikiera papia di haci esei. Nos a reducí nos gastunan den otro cosnan pa asina nos por a sigui den e trabou di pionero.
Asignacionnan Nobo
Na 1947 nos a asistí n’e congreso di Los Angeles, California. Ora nos tabata einan, ami i mi ruman homber William a ricibí un carta di asignacion pa nos bai haci e trabou di superintendente biahero pa bishitá i yuda e congregacionnan. N’e tempu ei, nos no a haña entrenamentu p’e trabou special aki. Ta bai nos a bai. Durante e shete añanan cu a sigui, ami cu Fern a sirbi na Ohio, Michigan, Indiana, Illinois i New York. Na 1954 nos a haña invitacion pa asistí n’e di 24 klas di Galad, un scol pa entrená misioneronan. Ora nos tabata ei, Fern a haña polio. Afortunadamente, el a recuperá bon, i nos a haña e asignacion pa bai traha como superintendente biahero na New York i Connecticut.
Miéntras nos tabata sirbiendo na Stamford, Connecticut, Nathan H. Knorr, n’e tempu ei presidente di Sociedad Watch Tower, a invitá nos pa pasa un fin di siman huntu cuné i su casa, Audrey. Pa cena nos a come un dushi bistek cu no a falta nada. Nos a cera conocí cu nan algun tempu promé, i mi tabata conocé Ruman Knorr suficiente pa sa cu e tabatin algu mas na mente fuera di nos asociacion i cena. Mas lat e anochi ei, el a puntrá mi: “Lo bo tin gana di bini Betel?”
“Mi no tin sigur; mi no sa masha cos tocante e bida na Betel,” mi a contestá.
Despues cu nos a tuma vários siman pa pensa riba e asuntu aki, nos a bisa Ruman Knorr cu nos lo bin si e ta deseá esei. E siguiente siman nos a ricibí un carta cu a bisa pa nos presentá na Betel dia 27 di april 1957, dia cu nos a haci 21 aña casá.
Riba mi promé dia na Betel, Ruman Knorr a duná mi un splicacion masha cla di loke nan tabata spera di mi. El a bisá mi: “Bo no ta sirbidó di circuito mas; bo ta aki pa traha na Betel. Esaki ta bo trabou di mas importante, i ta nos deseo pa bo hinca bo energia i tempu pa aplicá e entrenamentu cu bo ta haña aki na Betel. Nos kier pa bo keda.”
Un Bida Significativo na Betel
Mi promé asignacion tabata den e Departamentonan di Revista i di Post. Cu tempu, despues di un tres aña, Ruman Knorr a manda yamá mi na su oficina. E ora ei el a bisá mi cu e berdadero motibu pakico nan a invitá mi na Betel tabata pa mi traha den e cas. E no a bira rond dje asuntu: “Bo ta aki pa manehá e Cas di Betel.”
E trabou di manehá Cas di Betel a hací mi corda loke mi mayornan a siñá mi tempu mi tabata lantando na e hacienda. Un Cas di Betel ta hopi parecido na un hogar di un famia comun. Mester laba paña, cushiná, laba tayó, drecha cama, etcétera. E organisacion dje hogar tin e intencion pa haci Betel un lugá confortabel pa biba, un lugá cu un hende por yama su hogar.
Mi ta kere cu famianan por siña masha hopi for dje manera cu Betel ta funcioná. Nos ta lanta mainta trempan i nos ta cuminsá nos dia cu algu spiritual dor di considerá e texto di dia. Ta ser sperá cu nos ta traha duru i cu nos ta hiba un bida balansá, pero tog ocupá. Betel no ta un monasterio, manera algun hende kisas ta pensa. Nos ta logra haci hopi dor cu nos ta programá nos actividadnan. Hopi ruman a bisa cu e entrenamentu cu nan a ricibí na Betel a yuda nan despues pa aceptá responsabilidadnan di famia i den e congregacion cristian.
Homber i muhernan hóben cu bini Betel por haña asignacion den departamento di limpiesa, labanderia of nan por bai traha den e fábrica. E mundu lo tin gana pa nos kere cu e trabou físico ei ta rebahá nos. Tog, hóbennan cu ta na Betel ta comprendé cu ta necesario pa cumpli cu e trabounan aki pa nos famia por ta felis i funcioná bon.
Kisas e mundu ta promové tambe e idea di cu bo mester tin posicion haltu i prestigio pa bo ta berdaderamente felis. Esei no ta berdad. Ora nos cumpli cu nos asignacion, nos ta ‘haci loke nos mester ta haciendo,’ i Jehova ta bendicioná nos. (Lucas 17:10) Nos por logra berdadero contentamentu i felicidad solamente si nos sigui corda e propósito di nos trabou: haci Jehova su boluntad i traha p’e adelanto dje interesnan di Reino. Si nos keda mantené esaki na mente, nos lo haña goso i satisfaccion den cualkier asignacion.
E Privilegio di Por Tuma Parti den Expansion
Durante e congreso na Cleveland, Ohio, na 1942, mas cu un década promé cu nos a bini Betel, Ruman Knorr a duna e discurso “Pas—E Por Dura?” El a mustra bon cla cu Guera Mundial II cu tabata andando n’e tempu ei, lo a terminá i cu lo tin un tempu di pas cu lo haci posibel pa un campaña di predicacion mas extenso por tuma lugá. Na 1943 a establecé e Scol di Galad pa entrená misioneronan i e Scol di Ministerio Teocrático pa mehorá e abilidad di duna discurso di ruman hombernan. Tambe a organisá congresonan grandi. E congresonan cu foral a destacá den añanan ’50 tabata esnan tené den Yankee Stadium, New York. Pa loke ta trata e congresonan tené einan na 1950 i 1953, mi tabatin e oportunidad di yuda den organisá e inmenso Trailer City cu a acomodá decenas di miles di persona durante ocho dia pa cada congreso.
Despues di e congresonan aki, incluso esun mas grandi di tur na 1958, tabatin gran aumento den e cantidad di publicadó di Reino. Esaki tabatin un impacto directo riba nos trabou na Betel. Na fin di añanan ’60 i principio di añanan ’70, nos a haña nos enfrentá cu un necesidad urgente pa mas espacio i kamber pa trahadó. Pa acomodá nos famia cu tabata creciendo, nos tabatin mester di mas kamber, cushina i comedor.
Ruman Knorr a pidi ami cu Ruman Max Larson, superintendente dje fábrica, pa busca lugá apropiado pa nos por expandé. Na 1957, ora mi a yega Betel, nos famia cu a consistí di un 500 persona, tabata biba den un edificio grandi. Pero atrabes di añanan Sociedad a cumpra i renobá tres hotel den cercania—Towers, Standish i Bossert—i tambe complehonan mas chikitu di apartamento. Na 1986, Sociedad a cumpra e tereno unda Hotel Margaret tabata situá i a transformá e edificio nobo i bunita cu nan a traha ei den un hogar pa mas o ménos 250 persona. Anto na principio di añanan ’90, a construí un edificio di 30 piso pa acomodá un 1.000 trahadó mas. Awor aki e mas cu 3.300 miembro di nos famia por biba i come na Betel di Brooklyn.
Tambe a cumpra tereno na Wallkill, New York, casi 160 kilometer for di Betel na Brooklyn. Atrabes di añanan, cuminsando na fin di añanan ’60, a construí residencianan i un imprenta grandi einan. Awor, tin rond di 1.200 miembro di nos famia di Betel ta traha i biba ei. Na 1980 a cuminsá busca un tereno di rond di 250 hectar situá mas cerca dje stad di New York i cu tabatin bon coneccion cu careteranan principal. E representante dje oficina di real estate a hari i bisa: “Unda bo ta bai haña un tereno asina? E ta algu imposibel.” Pero e siguiente mainta el a yama bek i bisa: “Mi a haña e tereno pa boso.” Awe e ta conocí como e Centro Educacional di Watchtower na Patterson, New York. Ei tin scolnan ta funcioná i tin un famia di mas cu 1.300 minister.
Lesnan cu Mi A Saca
Mi a siña cu un bon superintendente ta esun cu sa di saca informacion balioso for di otronan. Mayoria idea cu, como superintendente di Betel, mi tabatin privilegio di ehecutá, a bini di otronan.
Ora mi a yega Betel, hopi dje rumannan tabata mas grandi, mescos cu ami ta awe. Awor mayoria no t’ei mas. Ken ta reemplasá esnan cu bira bieu i muri? No semper ta esnan cu tin mas tantu abilidad. Sino esnan cu ta aki, cumpliendo fielmente cu nan tarea i cu ta haci nan mes disponibel.
Un otro cos importante pa corda ta, e balor di un bon casá. E apoyo cu mi kerida esposa, Fern, a duná mi, tabata un gran yudansa pa mi por a cumpli cu mi asignacionnan teocrático. Esposonan tin e responsabilidad pa haci sigur cu nan esposa ta disfrutá di nan asignacion. Mi ta purba planea algu cu tantu ami como Fern ta gusta. E no tin nodi costa hopi, djis un cambio di ambiente. Ta e esposo tin cu haci cosnan pa haci su esposa felis. E tempu cu e ta pasa cu su esposa ta masha precioso i ta pasa bai masha lihé, p’esei e tin cu haci bon uso di dje.
Mi ta contentu cu mi ta biba den e último dianan cu Jesus a papia di dje. Esaki ta e tempu di mas asombroso den henter historia di humanidad. Nos por wak i mira cu nos wowonan di fe con Señor ta guia e desaroyo di su organisacion, i prepar’é asina pa e yegada dje mundu nobo primintí. Si mi wak bek riba mi bida den e sirbishi di Jehova, mi por ripará cu Jehova ta esun cu ta dirigí e organisacion aki—i no hende. Nos ta simplemente su sirbidónan. Como tal, semper nos mester acudí na dje pa guia. Una bes cu e mustra nos kico pa haci, nos mester ta cla pa obedecé i cooperá.
Duna bo mes n’e organisacion, i bo tin e garantia di un bida satisfaciente i felis. Kico cu bo ta haci—sea ta e trabou di pionero, di circuito, sirbiendo den e congregacion como publicadó, como betelita of den e trabou di misionero—sigui e instruccionnan cu ta disponibel, i mustra aprecio pa bo asignacion. Haci bo best pa bo disfrutá di cada asignacion i di cada dia den sirbishi di Jehova. De bes en cuando lo bo cansa, i kisas sintí bo agotá debí na hopi trabou of sintí bo desanimá. Esei ta momento pa bo corda pakico bo a dedicá bo bida na Jehova. Pa bo haci su boluntad, i no esun di bo.
No tabatin un dia cu mi a bai traha i cu mi no tabatin goso den loke mi tabata haci. Di con? Pasobra ora nos duna nos mes di henter alma na Jehova, nos ta sinti un satisfaccion dor di sa cu ‘nos a haci loke nos mester a haci.’
[Plachi na página 19]
Departamento di Revista
[Plachi na página 19]
Trailer City, 1950
[Plachi na página 19]
Trahando pionero na Baltimore, 1946
[Plachi na página 19]
Huntu cu Fern na Trailer City na aña 1950
[Plachi na página 22]
Huntu cu Audrey i Nathan Knorr
[Plachi na página 23]
Centro Educacional di Watchtower na Patterson, New York
[Plachi na página 24]
Huntu cu Fern awe