Cultiva e Spiritu di Gratitud

UN DOKTER na Estado di New York ta salba bida di Marie den un situacion di emergencia. Pero Marie di 50 aña di edad no ta gradicí e dokter ni paga su cuenta. Ki un ehempel típico di ingratitud!

Bijbel ta conta cu un biaha, ora Jesus a drenta un pueblo, el a topa dies homber cu tabatin e malesa teribel di lepra. Nan a sclama na dje na bos haltu: “Jesus, Instructor, tene misericordia di nos!” Jesus a manda nan: “Bai i mustra boso mes na e sacerdotenan.” E leprosonan a aceptá su instruccion, i miéntras nan tabata riba caminda, nan a cuminsá mira i sinti con nan salú a ser restorá.

Nuebe dje leprosonan cu a cura a sigui nan caminda. Pero e otro leproso, un samaritano, a bini bek pa busca Jesus. E ex-leproso aki a alabá Dios, i ora el a haña Jesus, el a cai na su pia i a gradicié. Jesus a contest’é bisando: “Dies a ser hací limpi, no ta berdad? Unda e otro nuebenan ta anto? No a haña ningun cu a bira bek pa duna gloria na Dios, sino e homber aki di un otro nacion?”—Lucas 17:11-19.

Tin un les importante implicá den e pregunta: “Unda e otro nuebenan ta anto?” Mescos cu Marie, e nuebe leprosonan tabatin un falta serio—nan no a mustra gratitud. Ingratitud asina ta masha prevalente awe. Kico ta e motibu pa esaki?

Causa Básico di Ingratitud

Básicamente, ingratitud ta brota for di egoismo. Tuma nos promé mayornan humano, Adam i Eva. Jehova a crea nan cu atributonan divino i a duna nan tur cos pa nan felicidad, incluyendo un bunita hofi como hogar, ambiente perfecto, i trabou significativo i satisfaciente. (Génesis 1:26-29; 2:16, 17) Sin embargo, bou dje presion di Satanas pa sigui nan mes interesnan, como pareha nan a bira desobediente i a respondé cu desprecio n’e generosidad di Jehova.—Génesis 3:1-5; Revelacion 12:9.

Considerá tambe e pueblo di Israel di antigwedad, kende Dios a scoge pa ta su propiedad special. Ki gradicidu tur mayor israelita mester tabata riba e anochi di 14 di nísan, 1513 P.E.C.! Riba e anochi trasedental ei, e angel di Dios a mata “tur primogénito den e tera di Egipto” pero a pasa over dje casnan israelita cu tabata corectamente marcá. (Exodo 12:12, 21-24, 30) I ora Moises i e yunan di Israel a ser librá for dje ehército di fárao na Laman Corá, cu curason yen di gratitud, nan ‘a procedé na canta na Jehova.’—Exodo 14:19-28; 15:1-21.

No obstante, djis algun siman despues cu nan a bandoná Egipto, “henter e asamblea dje yunan di Israel a cuminsá murmurá.” Ki lihé nan a bira víctima di ingratitud! Nan a sinti falta di “sinta banda dje weanan di carni, . . . come pan te keda satisfecho,” cu nan a disfrutá di dje na Egipto, e tera den cua nan tabata esclabo. (Exodo 16:1-3) Claramente, egoismo ta stroba hende cultivá i manifestá gratitud.

Siendo desendiente di Adam pecaminoso, tur hende ta nace cu un tiki egoismo i un tendencia pa ta malagradecí. (Romanonan 5:12) Tambe ingratitud ta un parti dje spiritu egoista cu ta dominá hende dje mundu aki. Mescos cu e aire cu nos ta respirá, e spiritu ei ta tur caminda, i e ta afectá nos. (Efesionan 2:1, 2) P’esei anto, nos tin cu cultivá un disposicion di gratitud. Con nos por haci esei?

Meditacion Ta Necesario!

Webster’s Third New International Dictionary ta definí gratitud como “e condicion di ser gradicidu: sintimentu caluroso i amigabel pa cu un benefactor cu ta impulsá un hende pa paga bek un fabor.” Nos no por cende i paga un sintimentu di un manera mecánico; e mester surgi spontáneamente di un persona su paden. Gratitud ta mas cu un simpel despliegue di bon manera of di etiket; e ta brota for di curason.

Con nos por siña pa ta gradicidu di curason? Bijbel ta atribuí hopi di loke nos ta sinti n’e cosnan cu nos ta pensa ariba. (Efesionan 4:22-24) Pa nos siña sinti nos mes gradicidu nos tin cu cuminsá meditá cu aprecio riba e bondad cu nos ta ricibí. Na armonia cu esaki, Dr. Wayne W. Dyer, kende ta traha riba e tereno di salú mental, ta bisa: “Bo no por tin un sintimentu (emocion) sin cu bo a experenciá un pensamentu promé.”

Tuma, por ehempel, e asuntu di ta gradicidu pa e creacion rond di nos. Ora bo mira un shelu yen di strea riba un anochi sin nubia, con bo ta sinti tocante loke bo ta experenciando? Rey David a expresá e temor reverencial cu el a sinti: “Ora mi mira bo shelunan, e obranan di bo dedenan, e luna i streanan cu bo a prepará, kico ta homber mortal pa bo tene cuenta cuné, i e yu di hende terenal pa bo percurá p’e?” I den e silencio di anochi, e streanan a papia cu David, impulsand’e pa skirbi: “Shelunan ta declarando e gloria di Dios; i dje obra di su mannan e expansion ta informando.” Pakico shelunan yen di strea a toca David asina profundamente? E mes ta contestá: “Mi a meditá riba tur bo actividad; di buena gana mi a mantené mi mes intensamente interesá den e obra di bo propio mannan.”—Salmo 8:3, 4; 19:1; 143:5.

David su yu Sálomon tambe a apreciá e balor di pensa riba e maraviyanan di creacion. Por ehempel, relacioná cu e papel cu nubianan di awaceru ta hunga den refrescá nos tera, el a skirbi: “Tur e corientenan di awa di winter ta saliendo pa laman, no obstante laman mes no ta yen. N’e lugá unda e corientenan di awa di winter ta saliendo, ei nan ta regresá pa por sali.” (Eclesiástes 1:7) Pues ta despues cu awaceru i riunan refrescá tera, nan awanan ta completá e ciclo for dje océanonan bek den e nubianan. Con e tera aki lo tabata sin e ciclo di awa purificador aki? Ki gradicidu Sálomon mester a sinti su mes ora el a meditá riba e pensamentunan aki!

Un persona gradicidu ta duna balor tambe na su relacionnan cu miembronan di famia, amigu i conocínan. Nan actonan di bondad ta capta su atencion. Segun cu e ta considerá cu aprecio nan bondad, e ta sinti su mes gradicidu di curason.

Expresando Gratitud

Ki simpel e palabra “danki” ta! Ta asina fácil pa haci un expresion asina. I oportunidadnan pa haci esei tin na abundancia. Ki refrescante ta un Danki caluroso i sincero na un hende cu ta tene un porta habrí pa nos of ta coge algu cu nos a laga cai! Tendiendo e expresion ei por haci e trabou di un empleado di pacus of di un waiter den un restaurant of di e partidó di carta mas fácil i mas recompensador.

Mandando un karchi di gradicimentu ta un manera cumbiniente pa expresá gratitud pa actonan di bondad. Hopi dje tarhetanan disponibel den negoshinan ta expresá sintimentunan di un manera bunita. Pero ora bo agregá palabranan di aprecio skirbí na man lo e no haña un toke personal amoroso? Algun asta ta preferá di no usa un tarheta comercial i nan ta manda na lugá di esei un cartica personal.—Compará cu Proverbionan 25:11.

Probablemente, esnan cu mas ta merecé nos gratitud ta esnan mas yegá na nos na cas. Bijbel ta bisa di un esposa capas: “Su doño ta lanta i ta elogi’é.” (Proverbionan 31:28) Un esposo su expresionnan sincero di gratitud na su esposa no ta contribuí na un ambiente pacífico i di contentamentu na cas? I e esposo tambe no ta contentu pa yega cas i ricibí un saludo caluroso i apreciativo di su esposa? Den e tempu aki, tin hopi presion riba matrimonio, i ora presionnan ta montoná, beis di hende ta daña fácilmente. Esun cu tin un disposicion gradicidu ta cla pa mustra consideracion i ta lihé pa pasa por haltu di ofensa i pordoná.

Hóbennan tambe mester ta conciente pa expresá aprecio sincero na nan mayornan. Naturalmente, mayornan no ta perfecto, pero esei no ta motibu pa ser malagradecidu pa loke nan a haci pa bo. Hamas bo por cumpra e amor i atencion cu nan a duná bo desde bo nacementu. Si nan a siñá bo conocé Dios, bo tin un motibu adicional pa ta gradicidu.

Salmo 127:3 ta declará: “Yunan ta un herencia for di Jehova.” P’esei mayornan mester busca oportunidad pa encomendá nan yunan en bes di recurí na iritá nan cu cosnan insignificante. (Efesionan 6:4) I ki un privilegio nan tin pa yuda hóbennan bou di nan cuido cultivá e spiritu di gratitud!—Compará cu Proverbionan 29:21.

Gradicidu na Dios

Jehova Dios ta e Dunador di “tur bon don i tur regalo perfecto.” (Santiago 1:17) Specialmente importante ta e don di bida, pasobra tur loke nos tin of por planea lo ta inútil si nos perde nos bida. E Scritura ta urgi nos pa corda cu “e fuente di bida ta cerca [Jehova Dios].” (Salmo 36:5, 7, 9; Echonan 17:28) Pa cultivá un curason gradicidu pa cu Dios, nos tin cu meditá riba su percuracionnan generoso cu ta sostené nos bida físico i spiritual. (Salmo 1:1-3; 77:11, 12) Un curason asina lo impulsá nos pa mustra aprecio cu palabra i accion.

Oracion ta un manera directo pa expresá nos gratitud na Dios. Salmista David a declará: “Hopi cos bo mes a haci, O Jehova mi Dios, asta bo obranan maraviyoso i bo pensamentunan pa cu nos; no tin ningun cu por ser compará cu bo. Si mi incliná mi mes pa informá i papia di nan, nan a bira mas numeroso di loke mi por relatá.” (Salmo 40:5) Laga nos ser motivá di manera similar.

David tabata determiná tambe pa mustra Dios su aprecio pa medio dje palabranan cu el a papia cu otronan. El a bisa: “Lo mi elogiá bo, O Jehova, cu tur mi curason; lo mi declará tur bo obranan maraviyoso.” (Salmo 9:1) Probablemente, e manera mas excelente pa mustra Dios nos gratitud ta ora nos ta papia cu otronan tocante dje i ta expresá nos mes dor di compartí e berdad for di su Palabra cu nan. I esaki lo yuda nos pa ta mas gradicidu den otro aspectonan di bida.

Jehova ta bisa: “Esun cu ta ofrecé accion di gradicimentu como su sacrificio ta esun cu ta glorificá mi; i en cuanto esun cu ta warda un caminda fiho, lo mi hacié mira salbacion.” Ohalá bo experenciá e goso cu ta bini di demostrá bo gratitud sincero na dje.—Salmo 50:23; 100:2.

[Plachi na página 7]

Bida ta un don di Dios. Haci sigur di agregá un toke personal