Bo Creador—Siña Ki Clase di Persona E Ta

“Mi mes lo haci pa tur mi bondad pasa dilanti bo cara, i lo mi declará e nomber di Jehova dilanti bo.”—EXODO 33:19.

1. Pakico e Creador ta merecé pa nos onr’é?

APOSTEL Juan, escritor dje último buki di Bijbel, a registrá e siguiente declaracion profundo tocante e Creador: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.” (Revelacion 4:11) Manera e artículo anterior a establecé, hopi bes descubrimentunan di ciencia moderno ta duna mas motibu pa kere den e Creador di tur cos.

2, 3. (a) Kico hende tin cu siña tocante e Creador? (b) Pakico no ta razonabel pa kere cu nos por mira e Creador personalmente?

² Mes importante cu ta pa aceptá cu e Creador ta existí, mes importante ta pa siña ki clase di persona e ta, esta, cu e ta un berdadero persona, cu un personalidad i camindanan cu ta atraé hende na dje. Sin importá te na ki grado bo a haci esei, lo no ta beneficioso pa siña conoc’é mihó? Esei no ta nificá cu nos mester top’é personalmente mescos cu nos ta topa otro hende.

³ Jehova ta e Fuente dje streanan, i nos solo ta djis un strea di tamaño mediano. Bo ta pensa di purba topa solo djacerca? No! Mayoria hende ta asta tene cuidou pa no wak den dje of exponé nan cueru na su rayonan potente pa hopi ora. E temperatura di su núcleo ta rond di 15.000.000 grado Celsius. Cada seconde, e fornu termonuclear aki ta transformá un cuater miyon ton di masa den energia. Un fraccion di esei so ta alcansá tera den forma di calor i lus, pero esei mes ta sostené tur bida aki riba. E detayenan básico ei mester mustra nos ki impresionante e poder asombroso dje Creador ta. Cu bon motibu Isaías por a skirbi tocante “e abundancia di [e Creador su] energia dinámico, pasobra tambe e ta vigoroso den poder.”—Isaías 40:26.

4. Kico Moises a pidi, i con Jehova a contest’é?

⁴ Pero bo tabata sa cu algun luna despues cu e israelitanan a sali for di Egipto na aña 1513 P.E.C., Moises a roga e Creador: “Por fabor, laga mi mira bo gloria.” (Exodo 33:18) Ora bo corda cu Dios ta e Fuente di nada ménos cu solo, bo por comprendé pakico el a bisa Moises: “Bo no por mira mi cara, pasobra ningun hende no por mira mi i tog biba.” E Creador a permití Moises sconde su curpa riba ceru Sínai miéntras El a “pasa.” E ora ei Moises a mira Dios su “lomba” cu, na moda di papia, tabata un tipo di resplandor dje Creador su gloria of presencia cu a keda atras.—Exodo 33:20-23; Juan 1:18.

5. Den ki manera e Creador a satisfacé Moises su peticion, i kico esei ta proba?

⁵ Moises su deseo pa siña conocé e Creador mihó no a keda sin cumpli. Evidentemente, papiando mediante un angel, Dios a pasa banda di Moises i a declará: “Jehova, un Dios misericordioso i yen di gracia, cu ta tarda pa rabia i ta abundante den bondad amoroso i berdad, cu ta conserbá bondad amoroso pa miles, i ta pordoná eror i transgresion i picá, pero di ningun manera lo e duna dispensacion di castigu.” (Exodo 34:6, 7) Esaki ta mustra cu conocé nos Creador mihó no kier men mira un forma físico, sino capta ki clase di persona e ta, su personalidad i característicanan na un midí mas completo.

6. Den ki manera nos sistema di inmunidad ta un maraviya?

⁶ Un manera cu nos por haci esei ta dor di dicerní Dios su cualidadnan for di loke el a crea. Tuma por ehempel bo sistema di inmunidad. Den un edicion cu a trata inmunidad, Scientific American a bisa: “For di promé cu nacementu te na morto, e sistema di inmunidad ta den un estado di alerta constante. Un variedad di molekuul i cel . . . ta protehá nos contra parasit i bacteria. Sin e defensanan ei, hende lo no por sobrebibí.” Kico ta e fuente dje sistema ei? Un artículo den e revista ei a bisa: “E variedad maraviyoso di cel ábilmente interactivo cu ta defendé e curpa contra microbio i vírusnan invasor, ta surgi for di algun cel precursor cu ta presentá pa promé bes rond di nuebe siman despues di concepcion.” Un muher na estado ta pasa un poco inmunidad over p’e feto cu ta den desaroyo. Mas despues, via su lechi di pechu, e ta percurá celnan di inmunidad i kímiconan beneficioso tambe pa su baby.

7. Kico nos por bisa di nos sistema di inmunidad, i esei ta hiba na ki conclusion?

⁷ Bo tin bon motibu pa concluí cu bo sistema di inmunidad ta surpasá cualkier cos cu medicina moderno por proveé. P’esei, puntra bo mes: ‘Kico esaki ta bisa nos di su Originador i Percurador?’ E sistema aki, cu ta “presentá pa promé bes rond di nuebe siman despues di concepcion” i cu ta cla pa protehá un baby recien nací, sigur ta reflehá sabiduria i pensamentu adelantá. Pero nos lo por dicerní asta mas cos tocante e Creador for dje sistema aki? Kico mayoria di nos ta bisa di Albert Schweitzer i otronan cu a dedicá nan bida na duna cuido médico na esnan ménos privilegiá? Generalmente nos ta atribuí bon cualidadnan n’e personanan compasivo ei cu a dedicá nan mes na proyectonan humanitario. Na comparacion, kico nos por bisa tocante nos Creador, cu a duna un sistema di inmunidad na tantu ricu como pober? Ta bisto cu e ta amoroso, imparcial, compasivo i hustu. Esaki no ta cuadra cu e descripcion cu Moises a tende dje Creador?

E Ta Revelá Ki Clase di Persona E Ta

8. Den ki manera special Jehova ta revelá su mes na nos?

⁸ Pero tin un otro manera pa conocé nos Creador: via Bijbel. Esaki ta particularmente importante, pasobra tin cosnan cu ciencia i e universo no por revelá mes tocante dje, i tin otro cosnan cu ta muchu mas cla for di Bijbel. Un ehempel di esun promé ta e Creador su nomber personal. Ta Bijbel so ta laga hende sa tantu e nomber dje Creador como su nificacion. Den manuscritonan hebreo di Bijbel, su nomber ta aparecé rond di 7.000 bes como cuater consonante cu nos por skirbi como YHWH, of JHVH, generalmente pronunciá como Jehova na papiamentu.—Exodo 3:15; 6:3.

9. Kico e Creador su nomber personal ta nificá, i kico nos por concluí for di esaki?

⁹ Pa nos yega na conocé e Creador mihó, nos tin cu comprendé cu e no ta djis un “Promé Causa” abstracto of algu vago manera “Ami Ta.” Su nomber personal ta mustra esei. E ta un forma di un verbo hebreo cu ta nificá “bira” of “resultá di ta.”a (Compará cu Génesis 27:29; Eclesiástes 11:3.) E nomber di Dios ta nificá “E Ta Causa pa Bira” i ta enfatisá cu e ta establecé un propósito i ta actua tambe. Dor di conocé su nomber i us’é, nos por comprendé mihó cu e ta cumpli cu su promesanan i ta realisá su propósito activamente.

10. Ki comprendimentu penetrante importante nos por gana for dje registro di Génesis?

¹⁰ Bijbel ta e fuente di conocimentu di Dios su propósitonan i personalidad. E registro di Génesis ta revelá cu un tempu humanidad tabata na pas cu Dios i tabatin e prospecto di un bida largu i significativo. (Génesis 1:28; 2:7-9) Na armonia cu e nificacion di su nomber, nos por tin sigur cu Jehova lo caba cu e sufrimentu i frustracion cu hende a enfrentá pa hopi tempu. Nos ta lesa tocante e cumplimentu di su propósito: “A someté e mundu físico na frustracion, no dor di su mes deseo, sino dor dje boluntad dje Creador, kende dor di haci esei, a dun’é un speransa cu un dia por . . . hacié compartí e glorioso libertad dje yunan di Dios.”—Romanonan 8:20, 21, The New Testament Letters, di J. W. C. Wand.

11. Pakico nos mester lesa e relatonan di Bijbel, i over di kico un di nan ta bai?

¹¹ Tambe Bijbel por yuda nos conocé nos Creador mihó dor cu e ta revelá su accion i reaccionnan tempu cu e tabata trata cu Israel di antigwedad. Considerá un ehempel cu a enbolbé Eliseo i Naman, e hefe militar dje sirionan enemigu. Ora bo lesa e relato aki den 2 Reynan capítulo 5, lo bo mira con un hobencita israelita prezu a insistí cu Naman su lepra por a cura cu yudansa di Eliseo na Israel. Naman a bai aya keriendo cu Eliseo lo zwai su mannan den forma di un rito místico di curacion. Na lugá di esei, Eliseo a bisa e sirio pa bai dal un baño den riu Jordan. Aunke ta Naman su hendenan bou di dje tabatin cu convenc’é pa sigui e instruccion ei, ora el a hacié, el a cura. Naman a ofrecé regalonan balioso cu Eliseo a nenga di tuma. Mas despues, un socio di Eliseo a bai kuchikuchi cerca Naman i cu un mentira a haña algun cos di balor. Su desonestidad a pone cu el a haña lepra. Esaki ta un relato fasinante masha humano, unu cu nos por siña for di dje.

12. Ki conclusionnan nos por saca tocante e Creador for dje relato di Eliseo i Naman?

¹² E relato atractivo aki ta mustra cu e Magnífico Creador di universo no ta demasiado elevá pa tuma nota i faborecé un mucha muher chikitu, algu cu ta totalmente contrario cu e norma den hopi cultura awe. E ta proba tambe cu e Creador no ta faborecé un rasa of nacion so. (Echonan 10:34, 35) Ta interesante pa nota cu en bes di spera pa hende usa abracadabra—un práctica comun di algun “sanadó” di pasado i presente—e Creador a desplegá un sabiduria maraviyoso. E tabata sa con pa cura lepra. Tambe el a manifestá comprendimentu penetrante i husticia ora e no a permití fraude tuma lugá. Esei tambe no ta cuadra cu Jehova su personalidad cu Moises a tende di dje? Aunke e relato di Bijbel ei ta corticu, nos por detectá hopi for di dje ki clase di persona nos Creador ta!—Salmo 33:5; 37:28.

13. Ilustrá con nos por saca lesnan balioso for di relatonan di Bijbel.

¹³ Otro relatonan tocante e actonan malagradecí di parti di Israel i e manera cu Dios a reaccioná, ta proba cu Jehova di berdad ta interesá den hende. Bijbel ta bisa cu bes tras bes e israelitanan a pone Jehova na prueba, loke a ofend’é i caus’é dolor. (Salmo 78:40, 41) Pues, e Creador tin sintimentu, i ta interesá den loke hende ta haci. Tambe tin hopi cos cu nos por siña for di relatonan tocante personanan bon conocí. Ora Dios a scoge David pa bira rey di Israel, el a bisa Samuel: “Simpel hende ta mira loke ta parce na bista; pero en cuanto Jehova, e ta mira loke e curason ta.” (1 Samuel 16:7) Sí, e Creador ta mira loke nos ta di paden, no djis aparencia externo. Esta satisfaciente esei ta!

14. Ora nos ta lesa e Scritura Hebreo, kico nos por haci cu lo beneficiá nos?

¹⁴ Trintinuebe dje bukinan di Bijbel a ser skirbí promé cu e tempu di Jesus, i ta bon pa nos lesa nan. Esaki no mester ta djis pa siña relatonan of historia di Bijbel. Si nos realmente kier sa ki clase di persona nos Creador ta, nos mester meditá riba e relatonan ei, tal bes pensa: ‘Kico e episodio aki ta revelá tocante su personalidad? Cua di su cualidadnan ta resaltá aki?’b Dor di haci esei, nos por yuda asta e sképticonan mira cu Bijbel mester tin un orígen divino, i asina nos ta pone un base pa nan conocé su Autor amoroso mihó.

Un Gran Maestro Ta Yuda Nos Conocé e Creador

15. Pakico Jesus su obra i siñansanan ta instructivo?

¹⁵ Ta berdad cu hende cu ta duda den existencia dje Creador of kende nan punto di bista di Dios ta vago, kisas sa masha poco tocante Bijbel. Tal bes bo a topa hende cu no por a bisa si Moises a biba promé of despues di Mateo i cu no sa casi nada di Jesus su obra of siñansanan. Esei ta masha tristu, pasobra un hende por siña hopi cos tocante e Creador for dje Gran Maestro, Jesus. Dor cu e tabatin un relacion íntimo cu Dios, e por a revelá ki clase di persona nos Creador ta. (Juan 1:18; 2 Corintionan 4:6; Hebreonan 1:3) I esei ta loke el a haci. En realidad, el a bisa un biaha: “Ken cu a mira mi a mira e Tata tambe.”—Juan 14:9.

16. Kico Jesus su trato cu un muher samaritano ta ilustrá?

¹⁶ Considerá e ehempel aki. Na un ocasion ora Jesus tabata cansá di biaha, el a papia cu un muher samaritano cerca di Sícar. El a splik’é algun berdad profundo i a concentrá riba e necesidad pa “adorá e Tata cu spiritu i cu berdad.” Hudiu dje época ei a rechasá samaritano. Na contraste, Jesus a reflehá con dispuesto Jehova ta pa aceptá homber i muher sincero di tur nacion, mescos cu nos a ripará for dje incidente cu a enbolbé Eliseo i Naman. Esei mester trankilisá nos cu Jehova no ta aprobá e hostilidad religioso intolerante cu ta reina den e mundu djawe. Tambe nos por tuma nota dje echo cu Jesus tabata dispuesto pa siña un muher, i den e caso aki un muher cu tabata biba cu un homber cu no tabata su casá. En bes di conden’é, Jesus a trat’é cu dignidad, den un manera cu lo por a ègt yud’é. Despues di esei, otro samaritanonan a scucha Jesus i a concluí: “Nos sa cu e homber aki sigur ta e salbador di mundu.”—Juan 4:2-30, 39-42; 1 Reynan 8:41-43; Mateo 9:10-13.

17. Na ki conclusion e relato dje resureccion di Lázaro ta hiba nos?

¹⁷ Laga nos considerá un otro ehempel dje manera cu nos por siña tocante e Creador dor di familiarisá nos mes cu Jesus su accion i siñansanan. Pensa riba e ocasion ora Jesus su amigu Lázaro a muri. Anteriormente Jesus a demostrá su poder ora el a lanta hende for di morto. (Lucas 7:11-17; 8:40-56) Pero con el a reaccioná ora el a mira Lázaro su ruman muher Maria yora? Jesus “a suspirá den spiritu i a bira molestiá.” E no tabata indiferente of desinteresá; el “a entregá na lágrima.” (Juan 11:33-35) I esaki no tabata djis un manifestacion emocional. Jesus a ser impulsá pa tuma accion positivo: el a resucitá Lázaro. Bo por imaginá bo con esaki a yuda e apostelnan comprendé e Creador su sintimentu i accionnan. E mester yuda nos i otronan tambe comprendé e Creador su personalidad i camindanan.

18. Ki actitud hende mester tin pa cu studiamentu di Bijbel?

¹⁸ No tin motibu pa tene bergwensa di studia Bijbel i siña mas tocante nos Creador. Bijbel no ta un buki anticuá. Un persona cu a studi’é i cu a bira un socio íntimo di Jesus tabata Juan. Mas despues el a skirbi: “Nos sa cu e Yu di Dios a bini, i el a duna nos capacidad intelectual pa nos por gana conocimentu di esun berdadero. I nos ta den union cu esun berdadero, pa medio di su Yu Jesucristo. Esaki ta e Dios berdadero i bida eterno.” (1 Juan 5:20) Ripará cu haci uso di nos “capacidad intelectual” pa gana conocimentu di “esun berdadero,” esta e Creador, por hiba na “bida eterno.”

Con Bo Por Yuda Otronan Siña Tocante Dje?

19. Ki paso a dal pa yuda hende sképtico?

¹⁹ Pa algun hende, hopi evidencia ta necesario pa nan kere cu ta existí un Creador compasivo cu ta interesá den nos i pa comprendé ki clase di persona e ta. Tin miyones i miyones di hende cu ainda ta sképtico tocante e Creador of kende nan punto di bista di dje no ta corespondé cu loke nos ta haña den Bijbel. Con bo por yuda nan? N’e congresonan internacional i di distrito di 1998/1999 di Testigonan di Jehova, a presentá un herment eficas nobo den hopi idioma: e buki ¿Existe un Creador que se interese por nosotros? (Ta Existí un Creador Cu Ta Interesá den Bo?)

20, 21. (a) Con nos por usa e buki Creador cu éxito? (b) Conta experencia cu ta mustra con e buki Creador ya caba a resultá di ta eficas.

²⁰ E ta un publicacion cu lo fortalecé bo mes fe den nos Creador i bo aprecio pa su personalidad i camindanan. Pakico nos ta sigur di esaki? Pasobra a diseñá e buki ¿Existe un Creador que se interese por nosotros? specialmente cu e metanan ei na mente. Un liña cu ta core dor dje buki ta “Kico por duna bo bida mas nificacion?” E contenido ta presentá den un manera cu asta hende cu hopi educacion lo hañ’é fasinante. Tog, e ta toca deseonan cu nos tur tin. Tin material fasinante i persuasivo pa lectornan cu ta duda den existencia di e Creador. E buki no ta asumí cu e lector ta kere den un Creador. E manera cu e ta trata descubrimentu i conceptonan científico recien lo cautivá esnan cu ta sképtico. Tambe e detayenan ei lo fortalecé e fe di esnan cu ta kere den Dios.

²¹ Ora bo studia e buki nobo aki, lo bo mira cu algun parti di dje ta presentá un repaso general di historia di Bijbel den un manera cu ta resaltá aspectonan di Dios su personalidad, i ta yuda lectornan conocé Dios mihó. Hopi cu a les’é caba a comentá con esei tabata cierto den nan caso. (Mira e siguiente artículo, página 25-6.) Ohalá esei ta e caso cu bo tambe ora bo familiarisá bo mes cu e buki i us’é pa yuda otronan conocé nan Creador mihó.

[Nota]

Bo A Tuma Nota?

◻ Con Moises a siña conocé Jehova mihó riba ceru Sínai?

◻ Pakico un studio di Bijbel ta yuda nos mira ki clase di persona Dios ta?

◻ Ora nos ta lesa Bijbel, kico ta yuda nos hala mas cerca nos Creador?

◻ Den ki manera bo ta planea di haci uso dje buki Creador?

[Plachi na página 20]

Kico nos sistema di inmunidad ta indicá tocante nos Creador?

[Plachi na página 21]

Un seccion dje Rolnan di Laman Morto; ripará e Tetragramaton (e nomber di Dios na hebreo)

[Rekonosementu]

Pa cortesia di The Shrine of the Book, Museo di Israel, Jerusalem

[Plachi na página 23]

Kico nos por siña di Jesus su reaccion riba Maria su tristesa?