E Dia pa Corda

“Mi a bisa boso e cosnan aki pa cu pa medio di mi boso por tin paz. Den mundo boso tin tribulacion, pero tene curashi! Mi a vence mundo.”—JUAN 16:33.

1, 2. Cua dia den pasado ta keda destacá mas cu tur otro dia, i pakico?

E MUNDO djawe ta papia hopi tocante paz. Na fin di Gera Mundial II, paz tabata asociá cu e dia di victoria den Europa i e dia di victoria riba Hapón. Tur aña celebracion di navidad ta haci hende corda ‘paz riba tera.’ (Lucas 2:14) Pero tin un dia den tur e historia di humanidad cu ta sobresalí for di tur otro. Esei ta e dia riba locual Jesucristo a papia e palabra anterior. Den e mas cu dos miyón dia cu humanidad a existi aki riba tera, esei ta e solo dia cu a cambia completamente e camina di humanidad pa nan bienestar ­eterno.

² E dia mashá importante ei tabata dia 14 di Nisán segun e calendario hudío. Na aña 33 di nos era común, dia 14 di Nisán a cuminza ora solo a drenta dia 1 di April. Láganos considera suceso dje dia sobresaliente.

14 di Nisán!

3. Con Jesús a probecha dje último oranan di su bida?

³ Despues cu solo a drenta, probablemente luna yen bonita a briya como recordatorio di cu Jehova Dios ta determina tempo i temporada. (Echo 1:7) I kico a pasa den e sala ariba unda Jesús i su 12 apóstol a reuni pa celebra e pascu anual di hudío? Mientras cu Jesús a prepara pa ‘sali for di mundo pa bai cerca e Tata, el a mustra amor pa esnan di dje te na fin.’ (Juan 13:1) Con el a haci esei? Cu palabra di su boca i cu su ehempel, Jesús a sigi inculca den su disípelnan calidad cu por yúdanan vence mundo.

Bistimento di Humildad i Amor

4. (a) Con Jesús a demonstra un calidad fundamental pa su disípelnan? (b) Con nos sa cu Pedro a siña e importancia di humildad?

⁴ E apóstolnan ainda tabatin cu líbranan di algun medida di jaluzi ambicioso i orguyo. Jesús a faha su curpa cu un cerbete i a procede di laba nan pia. Esei no tabata un demonstracion di humildad falso, cu e papa di cristiandad ta demonstra den Roma tur aña. Di ningun manera! Berdadero humildad ta un dunamento di bo mes cu ta nace di un ‘humildad mental cu ta considera otronan como superior.’ (Filipense 2:2-5) Na principio, Pedro no a capta e sentido i a nenga di laga Jesús laba su pia. Despues di un correccion, el a pidi Jesús laba henter su curpa. (Juan 13:1-10) Pero, Pedro mester a siña e les. Hopi aña despues, el a duna conseho correcto na otronan. (1 Pedro 3:8, 9; 5:5) Ta ki importante awe pa nos tur traha como esclabo pa Cristo den humildad!—Mira també Proverbio 22:4; Mateo 23:8-12.

5. Cua mandamento di Jesús a mustra e importancia di un otro calidad clave?

⁵ Uno dje 12 apóstol no a beneficiá dje conseho di Jesús. Esei tabata Hudas Iscariote. Durante cu e cena di pascu a sigi, Jesús a bira molestiá den su spiritu, a identifica Hudas como su traidor, i a despidi di dje. Tabata solamente despues di esei cu Jesús a bisa e diesun fiel disípel: “Mi ta duna boso un mandamento nobo, pa boso stima un e otro; mescos cu mi a stima boso, pa boso també stima un e otro. Cu esei tur hende lo sa cu boso ta mi disípelnan, si boso tin amor den boso.” (Juan 13:34, 35) Esei en berdad tabata un mandamento nobo cu Jesús a ilustra cu su ehempel sublime! Ora e tempo a yega pa su morto sacrificial, Jesús a demonstra amor sobresaliente. El a usa tur minut precioso pa siña i anima e disípelnan. Despues, el a enfatiza e importancia di amor, bisando: “Esaki ta mi mandamento, pa boso stima un e otro mescos cu mi a stima boso. Ningun hende tin amor mayor cu esei, cu e hende cu ta entrega su alma pa su amigonan.”—Juan 15:12, 13.

“E Camina i e Berdad i e Bida”

6. Jesús a pone cua meta dilanti disípel íntimo di dje?

⁶ Jesús a bisa e diesun fielnan: “No laga boso curazón bira molestiá. Eherce fe den Dios, eherce fe també den mi. Den e cas di mi Tata tin hopi habitacion. Di otro manera, lo mi a bisa boso, pasobra mi ta bai pa prepara un lugar pa boso.” (Juan 14:1, 2) E lugar ta den e “reino di cielo.” (Mateo 7:21) Jesús a menciona con e grupo íntimo di disípel leal por alcanza nan meta. El a bisa: “Ami ta e camina i e berdad i e bida. Ningun hende ta acudi ne Tata sino pa medio di mi.” (Juan 14:6) Esei també ta aplica na hende cu ta gana bida eterna riba tera.—Revelacion 7:9, 10; 21:1-4.

7-9. Pakico Jesús a pinta su mes como “e camina i e berdad i e bida”?

⁷ Jesús ta “e camina.” E solo i único manera pa acudi na Dios den oracion ta mediante Jesucristo. Jesús mes a duna siguranza na su disípelnan di cu e Tata lo dúnanan tur loke nan pidi den e nomber di Jesús. (Juan 15:16) E Tata no ta tende ni no ta acepta oracion dirigí na imagen of “santo” religioso of cu tur sorto di avemaría i respons. (Mateo 6:5-8) Además, nos ta leza den Echo 4:12 tocante Jesús: “No tin otro nomber bao di cielo cu a wordu duná den humanidad mediante locual nos mester ta salbá.”

⁸ Jesús ta e “berdad.” Apóstol Juan a bisa tocante dje: “E Palabra a bira carni i a biba cerca nos, i nos a haya bista di su gloria, un gloria tal como ta pertenece na un yiu unigénito di tata; i e tabata yen di bondad inmerecida i berdad.” (Juan 1:14) Jesús a bira e berdad di cientos di profecía den e Scritura Hebreo, cumpliendo cu nan. (2 Corintio 1:20; Revelacion 19:10) El a duna di conoce e berdad ora el a papia cu su disípelnan i cu e multitud cu a scucha, den su discusion cu e clero hipócrita, i cu su ehempel bibo.

⁹ Jesús ta e “bida.” Como e Yiu di Dios, Jesús a bisa: “Esun cu eherce fe den e Yiu tin bida eterna; esun cu desobedece e Yiu lo no mira bida, sino e rabia di Dios ta permanece riba dje.” (Juan 3:36) Ehercicio di fe den e sacrificio di Jesús ta hiba na bida eterna—na bida inmortal den cielo pe “trupa chikito” di cristian ungí i bida eterna den un tera paradísico pa un multitud grandi di “otro carné.”—Lucas 12:32; 23:43; Juan 10:16.

Wantando Persecucion

10. Pakico nos mester ‘vence mundo,’ i Jesús a duna cua animacion en cuanto esei?

¹⁰ Hende cu ta spera di biba den e sistema nobo di Jehova Dios mester lucha contra un mundo cu ta “bao di poder dje malbado,” Satanás e Diabel. (1 Juan 5:19) P’sei, ki animador ta e palabra di Jesús den Juan 15:17-19! El a declara: “Mi ta manda boso esaki, Boso stima un e otro. Si mundo ta odia boso, boso sa cu el a odiámi promé cu el a odia boso. Si boso ta parti di mundo, mundo lo stima loke ta di dje. Awor door cu boso no ta parti di mundo, sino mi a scoge boso for di mundo, p’sei mundo ta odia boso.” Cristian berdadero a ser odiá te ne aña aki di 1993, i cuanto nos ta alegrá na ehempel excelente di esnan cu ta sigi para firme, humildemente hayando fortaleza bao dje man poderoso di Dios! (1 Pedro 5:6-10) Nos tur por wanta prueba door di eherce fe den Jesús, cu a conclui su consideracion cu e palabra animador aki: “Den mundo boso tin tribulacion, pero tene curashi! Mi a vence mundo.”—Juan 16:33.

Introduccion di un Pacto Nobo

11. Kico Jeremías a profetiza tocante un pacto nobo?

¹¹ Durante e mesun anochi, despues cu e celebracion di pascu hudío a termina, Jesús a papia tocante un pacto nobo. Profeta Jeremías a profetiza di esei siglonan di antemano, bisando: “‘Mira! Dianan ta bini,’ ta e declaracion di Jehova, ‘i lo mi cera un pacto nobo cu e cas di Israel i cu e cas di Hudá . . . Lo mi pone mi ley den nan, i lo mi skirbié den nan curazón. I lo mi bira nan Dios, i nan mes lo bira mi pueblo. . . . Lo mi pordoná nan error, i lo mi no corda nan picá mas.’” (Jeremías 31:31-34) Riba dia di 14 di Nisán di aña 33 EC, e sacrificio a wordu ofrecí cu a valida e pacto nobo!

12. Con Jesús a institui e pacto nobo, i kico e ta logra?

¹² Jesús a bisa e diesun fielnan cu el a deseá mashá pa come e pascu cu nan. Anto el a tuma pan, a duna agradicimento, a kibré, i a duné na nan, bisando: “Esaki ta nifica mi curpa cu lo ser duná na fabor di boso. Sigi haci esei na recuerdo di mi.” Di igual manera, el a pasa e copa di biña corrá pa nan, i a bisa: “E copa aki ta nifica e pacto nobo riba base di mi sanger, locual lo ser dramá na boso fabor.” (Lucas 22:15, 19, 20) E pacto nobo tabata poní na vigor mediante e “sanger precioso” di Jesús, di hopi mas balor cu e sanger di bestia cu tabata gesprenkel pa valida e pacto di Ley di Israel! (1 Pedro 1:19; Hebreo 9:13, 14) Hende introducí den e pacto nobo ta recibi pordón completo di nan picá. Asina, nan por satisface requisito pa ser dje 144.000, cu ta recibi un herencia eterno como Israel spiritual.—Galatio 6:16; Hebreo 9:15-18; 13:20; Revelacion 14:1.

“Na Recuerdo di Mi”

13. (a) Nos mester reflexioná riba kico ne tempo dje Conmemoracion? (b) Cua ta e úniconan cu por participa di emblema, i pakico?

¹³ E Conmemoracion anual número 1.961 dje morto di Jesús ta cai riba dia 6 di April di 1993. Mientras cu e fecha ta yega cerca, nos ta haci bon pa reflexiona riba tur loke e sacrificio perfecto di Jesús ta logra. Tal arreglo ta halza e sabiduría di Jehova Dios i su amor profundo pa humanidad. E integridad perfecto di Jesús, asta su morto doloroso, ta vindica Jehova contra e desprecio desafiador di Satanás di cu Su creacion humano tin defecto i lo faya bao di prueba. (Job 1:8-11; Proverbio 27:11) Cu su sanger sacrificial, Jesús ta Mediador dje pacto nobo, e instrumento di Jehova pe seleccion di “un raza escogí, un sacerdocio real, un nacion santo, un pueblo pa un posesion special.” Mientras cu nan ta riba tera ainda, nan ta “declara na tur parti e excelencia” di nan Dios, Jehova, cu a ‘yámanan for di scuridad na su luz maraviyoso.’ (1 Pedro 2:9; compara cu Éxodo 19:5, 6.) Apropiadamente, nan so ta participa di emblema durante e Conmemoracion tur aña.

14. Di ki manera e miyones di observador ta ser hací mas ricu?

¹⁴ Ne Conmemoracion di aña pasá, 11.431.171 a asisti rond di mundo, pero solamente 8.683 di eseinan—menos cu un décimo di 1 porciento—a participa di emblema. Pues, e celebracion tabata di ki probecho pe miyones di observador? E tabata di gran probecho! Aunque nan no a participa, tal asociacion cu e enorme hermandad mundial a hácinan mas ricu spiritualmente, pasobra nan a tende di tur e gran cosnan cu Jehova Dios ta haci mediante e sacrificio di su Yiu.

15. Di ki manera hende cu no ta dje ungínan ta beneficiá dje sacrificio di Jesús?

¹⁵ Además, e apóstol ta informános den 1 Juan 2:1, 2: “Nos tin un yudante cerca e Tata, Jesucristo, un husto. I e ta un sacrificio di reconciliacion pa nos picánan, pero no pa esnan di nos so sino també pa esnan di tur e mundo.” Sí, aunque e sacrificio di Jesús ta beneficiá promé e grupo cu Juan a simboliza, esnan cu ta introducí den e pacto nobo, e ta percura també pe pordón di picá di “tur e mundo.” Esei ta un “sacrificio di reconciliacion” pe picá di tur otro hende dje mundo di humanidad cu ta eherce fe den e sanger dramá di Jesús, cu ta presenta na nan e prospecto feliz di bida eterna den Paradijs riba tera.—Mateo 20:28.

“Den e Reino di mi Tata”

16. (a) Ta parce cu Jesús i coheredero di dje ta participa den cua actividad? (b) Kico ta necesario awe tanto pe resto ungí como pe multitud ­grandi?

¹⁶ Jesús a sigi anima su apóstolnan, siñalando ne dia ora di manera simbólico lo e bebe producto di wijndruif di nobo cu su disípelnan den e Reino di su Tata. (Mateo 26:29) El a bísanan: “Boso ta esnan cu a permanece cu mi den mi prueba; i mi ta cera un pacto cu boso, net manera mi Tata a cera un pacto cu mi, pa un reino, pa boso come i bebe na mi mesa den mi reino, i sinta riba trono pa huzga e diesdos tribu di Israel.” (Lucas 22:28-30) Desde cu Jesús a recibi poder di Reino den cielo na 1914, nos por conclui cu e mayoría di coheredero di Jesús, recogí através dje siglonan, a ser resusitá caba, pa “sinta riba trono” cuné. (1 Tesalonicense 4:15, 16) E dia ta yegando lihé pa angel los “e cuater bientu” dje “tribulacion grandi”! Ne tempo ei, e seyamento dje 144.000 di Israel spiritual i e recogimento dje miyones dje multitud grandi lo ser completo. Nan tur tin cu warda integridad, mescos cu Jesús, pa nan recibi e premio di bida eterna.—Revelacion 2:10; 7:1-4, 9.

17 i cuadro. (a) Si un dje ungínan ta ser rechazá como desleal, ken razonablemente por reemplazé? (b) Artículo di The Watchtower di 1938 a tira cua luz interesante riba e edificacion i expansion mas tardi dje organizacion teocrático riba tera?

¹⁷ Kico lo sosode si algun dje ungínan no ta warda nan integridad? Ne tempo laat aki, e cantidad di tal hende desleal lo ta poco sin duda. Razonablemente, cualkier reemplazo lo bini, no di hende recién bautizá, sino di esnan cu a permanece cu Jesús den Su prueba durante hopi aña di fiel sirbishi. Rayo briyante dje luz spiritual cu The Watchtower a percura entre 1920 i 1940 ta indica cu e recogimento dje resto di esnan ungí tabata casi completo durante e tempo ei. Esnan cu a ‘laba nan mantel i a hácinan blancu den e sanger dje Lamchi’ desde e tempo ei tin un otro speranza gozoso. Mediante Cristo, e spiritu di Jehova Dios ta guíanan ne “fontein di awa di bida” den Paradijs riba tera.—Revelacion 7:10, 14, 17.

Un Oracion Mashá Fervoroso

18. Cua les fuerte nos ta siña for dje oracion di Jesús den Juan capítulo 17?

¹⁸ Jesús a conclui e Conmemoracion cu el a celebra cu su disípelnan ofreciendo e oracion fervoroso skirbí den Juan 17:1-26. El a pidi promé pe Tata glorifiqué mientras cu el a warda su integridad te ne fin. Dje manera ei Jehova Dios també tabata glorificá, su nomber santificá—hací limpi di tur reproche. Pasobra, realmente, e homber perfecto Jesús sí a duna prueba cu e creacion humano di Dios por permanece sin defecto, asta bao di prueba di mas severo. (Deuteronomio 32:4, 5; Hebreo 4:15) Además, e morto sacrificial di Jesús a ofrece un gran oportunidad na desendiente di Adam. Segun Jesús: “Esaki ta nifica bida eterna, nan ganando conocimento di bo, e único Dios berdadero, i di esun cu bo a manda, Jesucristo.” Ta ki necesario pa gana conocimento exacto di Jehova Dios i di su Yiu, e Lamchi di Dios, cu a duna su bida pe vindicacion di Jehova Dios i pe salbacion di humanidad! (Juan 1:29; 1 Pedro 2:22-25) Bo ta aprecia tal sacrificio tanto amoroso te ne grado di dedica bo mes completamente na Jehova Dios i na su sirbishi precioso?

19. Con e resto i e multitud grandi por disfruta di unidad precioso?

¹⁹ Además, Jesús a pidi su Tata Santo vigila su disípelnan mientras cu nan ta duna prueba cu nan no ta parti di mundo, ta pega na Su palabra como e berdad, i ta mantene un unidad precioso cu e Tata i e Yiu. Su oracion no a ser contestá maraviyosamente te ne dia djawe mientras cu e resto ungí i e multitud grandi ta sirbi hunto unidamente den enlace di amor, i ta mantene nan neutralidad respecto e mundo, su violencia, i su maldad? Ki precioso ta e palabra di conclusion di Jesús dirigí na su Tata, Jehova Dios! Jesús a bisa: “Mi a dúnanan di conoce bo nomber i lo duné di conoce, pe amor cu locual bo a stimámi sea den nan i ami den union cu nan.”—Juan 17:14, 16, 26.

20. Pakico dia 14 di Nisán di aña 33 EC siguramente ta e dia pa corda?

²⁰ Saliendo pe hofi di Getsemaní, Jesús tabatin mas asociacion breve pero edificante cu su disípelnan. Anto su enemigonan a detenele! No tin palabra pa splica e agonía fisical, e tristeza kibrador di curazón cu Jesús a sinti ne reproche cu nan a montona riba Jehova Dios, ni su integridad ehemplar durante tur esei. Jesús a wanta te na fin, durante e anochi i pe mayor parti dje oranan di claridad dje dia. El a demonstra claramente cu su Reino no ta parti dje mundo aki. I cu su rosea final, el a sclama: “E ta cumplí!” (Juan 18:36, 37; 19:30) Su vencemento di mundo tabata completo. Dia 14 di Nisán di aña 33 EC, siguramente ta e dia pa corda!

Con Bo ta Contestá?

◻ Kico Jesús a siña tocante humildad i amor?

◻ Den ki sentido Jesús a bira “e camina i e berdad i e bida”?

◻ Ki propósito e pacto nobo tini?

◻ E resto ungí i e multitud grandi ta comparti cua unidad i amor?

[Kuadro na página 20]

E Sabiduría di Salomón Mayor

Artículo titulá “Organizacion” den número di The Watchtower di 1 i 15 di Juni di 1938 a establece e arreglo teocrático básico cu Testigo di Jehova ta sigi te ne dia djawe. Nan a culmina un periodo notable di reahuste di doctrina i di organizacion cu a cuminza na 1919. (Isaías 60:17) Den un comparacion dje periodo dje 20 aña ei cu e 20 aña durante locual Salomón a construi e tempel i e cas dje rey den Jerusalem, The Watchtower a bisa: “E Scritura ta mustra cu, despues di binti aña dje programa di construccion di Salomón . . . , el a keda ocupá den un programa di construccion pa tur e nacion. (1 Rey 9:​10, 17-23; 2 Cró. 8:​1-10) Anto e reina di Seba a bini ‘dje parti mas lehano dje tera pa tende e sabiduría di Salomón’. (Mat. 12:42; 1 Rey 10:​1-10; 2 Cró. 9:​1-9, 12) Esei ta haci un pregunta surgi: Kico tin den e futuro inmediato pe pueblo di Jehova riba tera? Cu plena confianza nos lo spera i nos lo mira.” Tal confianza tabata bon fundá. Bao dje organizacion teocrático un programa grandi mundial di edificacion spiritual a recoge mas cu cuater miyón hende dje multitud grandi. Mescos cu e reina di Seba, eseinan a bini di parti mas lehano dje tera pa tende e sabiduría di Salomón Mayor, Cristo Jesús​—⁠locual el a comunicá cu nan mediante e “sclabo fiel i prudente.”​—⁠Mateo 24:​45-47.