Apénas seis luna despues ku Hesus a kuminsá ku su ministerio riba tera, Nikodemo a rekonosé ku Hesus ‘a bin di Dios komo un maestro.’ Impreshoná ku e milagernan ku Hesus a kaba di hasi na Yerusalèm durante Pasku hudiu di aña 30 Era Komun, Nikodemo a bai serka Hesus, probechando ora ta skur, p’e konfesá su fe den Hesus i siña mas tokante e maestro aki. E ora ei Hesus a bisa Nikodemo un bèrdat profundo; ku hende mester “nase di nobo” pa nan por drenta e Reino di Dios. Ta n’e mesun okashon aki Hesus a bisa e palabranan: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.”—Huan 3:1-16.

Un chèns maravioso a habri pa Nikodemo! Lo e por a bira un kompañero íntimo di Hesus. Lo e por tabata testigu personal di vários aspekto dje bida di Hesus riba tera. Komo un gobernante hudiu i un maestro den Israel, Nikodemo tabatin un bon konosementu dje Palabra di Dios. Ademas e tabatin hopi perspikasia, pasobra el a identifiká Hesus komo un maestro mandá dor di Dios. Nikodemo tabatin interes den kos spiritual, i e tabatin un grado di humildat poko komun. Lo mester tabata masha difísil pa un miembro dje korte di mas haltu dje hudiunan rekonosé ku un humilde yu di karpinté tabata un hòmber mandá dor di Dios! Tur e kualidatnan ei ta hopi importante pa un hende por bira disipel di Hesus.

Di promé, Huan a mustra ku e gobernante hudiu “a bin serka Hesus den anochi.” (Huan 3:2) Un erudito di Beibel ta bisa ku kisas “Nikodemo a bini den anochi pa evitá e multitutnan ku lo a interumpí su entrevista ku Hesus, i no pa miedu.” Pero Huan a papia di Nikodemo komo esun ku “na prinsipio a bin serka [Hesus] den anochi” den e mesun konteksto ku el a referí na Hosé di Arimatea komo “un disipel di Hesus, ma na sekreto pa miedu di e hudiunan.” (Huan 19:38, 39) Pues, kasi sigur Nikodemo a bishitá Hesus probechando ku tabata skur “pa miedu di e hudiunan,” meskos ku otro hende di su tempu no tabata ke tin nada di haber ku Hesus, pa miedu.—Huan 7:13.