Capitulo 1

Bo Por Tin un Futuro Felis!

1, 2. Kico bo Creador ta deseá pa bo tin?

UN CALUROSO abraso di un persona cu bo stima. Harimentu cu smak durante un bon cuminda cu amigunan stimá. E placer di mira bo yunan contentu ta hunga. Momentonan manera esakinan ta momentonan felis den bida. Sin embargo, pa hopi hende bida ta parce di ta presentá un problema serio tras di otro. Si esei tabata bo experencia, cobra ánimo.

² Ta Dios su boluntad pa bo disfrutá di felicidad duradero bou di e mihó condicionnan den un ambiente maraviyoso. Esaki no ta meramente un soño, pasobra en realidad Dios ta ofrecé bo awor e clave pa tal futuro felis. E clave ei ta conocimentu.

3. Cua conocimentu ta e clave pa felicidad, i pakico nos por ta sigur cu Dios por percurá e conocimentu ei?

³ Nos ta papiando di un clase special di conocimentu cu ta hopi mas superior cu sabiduria humano. E ta “e conocimentu mes di Dios.” (Proverbionan 2:5) Casi 2.000 aña pasá, un escritor bíblico a bisa: “Tur cas ta ser construí dor di un persona, pero esun cu a construí tur cos ta Dios.” (Hebreonan 3:4) Pensa riba e conocimentu cu e Trahador di tur cos mester poseé! Bijbel ta bisa cu Dios ta conta i ta yama tur e streanan pa nomber. Ki un pensamentu tolondrador, siendo cu tin miles di miyones di strea den nos galaxia, i astrónomonan ta bisa cu tin rond di cien mil miyon otro galaxianan! (Salmo 147:4) Dios sa tambe tur cos di nos, p’esei ken otro por percurá mihó contestanan pa preguntanan importante tocante bida?—Mateo 10:30.

4. Pakico nos mester spera pa Dios proveé instruccionnan pa guia nos, i cua buki ta yena e necesidad aki?

⁴ Imaginá bo dos homber tratando di drecha nan auto. Disgustá, un di nan ta tira su hermentnan un banda. E otro trankilamente ta coregí e problema, ta drei e yabi di start, i ta sonreí ora e motor ta start i ta traha suavemente. Lo bo no tin cu kibra cabes pa suponé cua di e dos hombernan tabatin un manual for dje fábrica. No ta razonabel cu Dios lo a percurá instruccionnan pa guia nos den bida? Manera lo bo sa, e Bijbel ta afirmá di ta precisamente esei—un buki di instruccion i guia for di nos Creador, diseñá pa comunicá e conocimentu di Dios.—2 Timoteo 3:16.

5. Ki balioso ta e conocimentu cu e Bijbel ta contené?

⁵ Si Bijbel su afirmacion ta berdad, pensa riba e tesoronan di conocimentu cu e buki ei mester contené! Na Proverbionan 2:1-5, e ta insta nos pa busca sabiduria, pa coba p’e manera nos lo a haci pa un tesoro scondí—no den e tera di pensamentu humano, sino den Dios su mes Palabra. Si nos busca ei, nos lo “haña e conocimentu mes di Dios.” Siendo cu Dios ta comprendé nos limitacionnan i necesidadnan, e ta duna nos instruccionnan cu lo yuda nos hiba un bida felis i pacífico. (Salmo 103:14; Isaías 48:17) Ademas, e conocimentu di Dios ta ofrecé nos bon nobo excitante.

BIDA ETERNO!

6. Ki siguransa Jesucristo a duna en cuanto e conocimentu di Dios?

⁶ E personahe histórico bon conocí Jesucristo a describí e rasgo aki di conocimentu di Dios claramente. El a bisa: “Esaki ta nificá bida eterno, nan ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Imaginá bo—conocimentu cu ta hiba na bida eterno!

7. Cua evidencia tin cu no tabata Dios su intencion pa nos muri?

⁷ No descartá bida eterno un bes como simplemente un soño. Mas bien, wak e manera cu e curpa humano a ser trahá. E ta magníficamente diseñá pa smak, tende, hole, mira, i sinti. Tin asina hopi cos riba tera cu ta contentá nos sentidonan —cuminda delicioso, cantica di para placentero, flornan cu dushi holor, paisahenan bunita, compañerismo agradabel! I nos celebro extraordinario ta hopi mas cu un supercomputer, pasobra e ta capacitá nos pa apreciá i disfrutá di tur e cosnan ei. Bo ta kere cu nos Creador kier pa nos muri i perde tur e cosnan aki? Lo no ta mas razonabel pa concluí cu e kier pa nos biba felismente i disfrutá di bida pa semper? Wel, esei ta loke e conocimentu di Dios por nificá pa bo.

BIDA DEN PARADIJS

8. Kico Bijbel ta bisa tocante e futuro di humanidad?

⁸ Loke Bijbel ta bisa tocante e futuro di e tera i humanidad por ser resumí den un solo palabra—Paradijs! Jesucristo a papia di dje ora el a bisa un homber cu tabata muriendo: “Lo bo ta cu mi den Paradijs.” (Lucas 23:43) E mencion di Paradijs sin duda a trece na mente di e homber ei e estado felis di nos promé mayornan, Adam i Eva. Ora Dios a crea nan, nan tabata perfecto i a biba den un parke manera un hardin cu e Creador a diseñá i a planta. E tabata apropiadamente yamá e hardin di Eden, cua nomber ta nificá placer.

9. Con bida tabata den e Paradijs original?

⁹ Ki agradabel e hardin ei tabata! E tabata un berdadero Paradijs. Entre su palunan bunita tabatin esnan cu tabata duna fruta delicioso. Segun cu Adam i Eva a explorá nan teritorio, a bebe for di su awanan puru i saludabel i a recogé fruta for di su palunan, nan no tabatin ningun motibu pa ta angustiá of temeroso. Asta animalnan no a forma un menasa, pasobra Dios a pone e homber i su esposa den un dominio amoroso riba nan tur. Ademas, e promé pareha humano tabatin un salú vibrante. Tanten cu nan a keda obediente na Dios, un futuro felis i eterno tabata spera nan. Nan a ser duná e trabou satisfaciente di cuida nan maraviyoso cas paradísico. Ademas, Dios a duna Adam i Eva e mandato pa “yena e tera i domin’é.” Nan i nan desendiente mester a extendé e fronteranan di Paradijs te ora cu nos planeta completo a bira un lugá di bunitesa i alegria.—Génesis 1:28.

10. Ora Jesus a papia di Paradijs, kico e tabatin na mente?

¹⁰ Ora Jesus a mencioná Paradijs, no obstante, e no tabata pidiendo un homber cu tabata muriendo pa pensa riba e pasado lehano. No, Jesus tabata papiando tocante e futuro! E tabata sa cu henter nos cas terenal lo bira un paradijs. Dios lo a cumpli asina cu su propósito original pa humanidad i pa nos tera. (Isaías 55:10, 11) Sí, Paradijs lo ser restorá! I con lo e ta? Laga Dios su Palabra, e Bijbel Santu, contestá.

BIDA DEN E PARADIJS RESTORA

11. Den e Paradijs restorá, kico lo pasa cu malesa, behes i morto?

¹¹ Malesa, behes i morto lo no existí mas. “Na e tempu ei wowo di esnan ciegu lo ser habrí, i orea mes di esnan surdu lo ser habrí. Na e tempu ei esun coho lo subi mescos cu un biná ta subi, i e lenga di esun muda lo sclama di alegria.” (Isaías 35:5, 6) “Dios mes lo ta cu [humanidad]. I lo e seca tur lágrima for di nan wowo, i morto lo no t’ei mas, ni lamento ni sclamacion ni dolor lo t’ei mas. E cosnan anterior a pasa caba.”—Revelacion 21:3, 4.

12. Pakico nos por ta sigur cu lo no tin crímen, violencia i maldad den e futuro Paradijs?

¹² Crímen, violencia i maldad lo disparcé pa semper. “Malechornan mes lo ser cortá . . . Djis aki un poco tempu mas, i e malbado lo no t’ei mas . . . Lo e no t’ei. Pero e mansunan mes lo poseé e tera.” (Salmo 37:9-11) “En cuanto e malbado, nan lo ser cortá for di e tera mes; i en cuanto esnan traicionero, nan lo ser rancá for di dje.”—Proverbionan 2:22.

13. Con Dios lo trece pas?

¹³ Pas lo prevalecé riba tur e tera. “E [Dios] ta haciendo gueranan stop te na e extremidad di e tera. E ta kibra e boog i ta corta e lansa na pida.” (Salmo 46:9) “Esun hustu lo brota, i e abundancia di pas te cu e luna no t’ei mas.”—Salmo 72:7.

14, 15. Kico Bijbel ta bisa tocante i bibienda, trabou, i cuminda den e Paradijs restorá?

¹⁴ Bibienda lo ta sigur i trabou satisfaciente. “Nan siguramente lo edificá casnan i lo biba den nan . . . Nan lo no edificá i un otro hende biba den dje; nan lo no planta i un otro hende ta come. Pasobra manera e dianan di un palu lo ta e dianan di mi pueblo; i e obra di nan mes mannan mi scogínan lo usa na plenitud. Nan lo no afaná pornada, ni nan lo no duna lus pa disturbio.”—Isaías 65:21-23.

¹⁵ Cuminda saludabel lo ta disponibel na abundancia. “Lo yega di tin abundancia di grano riba e tera; riba top di e cerunan lo tin sobreabundancia.” (Salmo 72:16) “E tera mes siguramente lo duna su producto; Dios, nos Dios, lo bendicioná nos.”—Salmo 67:6.

16. Pakico bida den Paradijs lo ta agradabel?

¹⁶ Bida eterno riba un tera paradísico lo ta agradabel. “E hustunan mes lo poseé e tera, i nan lo biba pa semper riba dje.” (Salmo 37:29) “E desierto i e region sin awa lo alegrá, i e yanura di desierto lo ta gososo i lo florecé manera asafran.”—Isaías 35:1.

CONOCIMENTU I BO FUTURO

17. (a) Kico lo bo mester haci si bida den Paradijs ta atraé bo? (b) Con nos por sa cu Dios lo trece cambionan grandi riba e tera?

¹⁷ Si bida den Paradijs ta atraé bo, no laga nada strobá bo den ganamentu di conocimentu di Dios. E ta stima humanidad i lo trece e cambionan necesario pa haci e tera un paradijs. Pensa un ratu, si bo tabatin e poder pa caba cu miseria i inhusticia cu ta asina prevalente den e mundu, lo bo no haci’é? Lo nos mester spera ménos di Dios? Realmente, e Bijbel ta papia den términonan bibu di un tempu ora Dios lo kita e sistema aki yen di bringamentu i reemplas’é cu un gobernacion perfecto i hustu. (Daniel 2:44) Pero e Bijbel ta haci hopi mas cu conta nos tocante tur e cosnan aki. E ta mustra nos con nos por sobrebibí i drenta Dios su mundu nobo primintí.—2 Pedro 3:13; 1 Juan 2:17.

18. Kico e conocimentu di Dios por haci pa bo awor?

¹⁸ E conocimentu di Dios tambe por haci hopi pa bo for di awor mes. Bida su preguntanan di mas profundo i mas perturbador ta ser contestá den Bijbel. Aceptando su guia lo yudá bo desaroyá un amistad cu Dios. Ki un privilegio grandi! I esaki lo permití bo disfrutá di e pas cu Dios so por duna. (Romanonan 15:13, 33) Segun cu bo ta cuminsá adkerí e conocimentu vital aki, bo ta duna comienso na e esfuerso di mas importante i recompensador di bo bida. Lo bo no sinti duele nunca di a adkerí e conocimentu di Dios cu ta hiba na bida eterno.

19. Cua pregunta nos lo considerá den e siguiente capítulo?

¹⁹ Nos a referí na e Bijbel como e buki conteniendo e conocimentu di Dios. Sin embargo, con nos por sa cu e ta, no un buki di sabiduria humano, sino algu hopi mas superior? Nos lo considerá e pregunta aki den e siguiente capítulo.

TEST BO CONOCIMENTU

Pakico e conocimentu di Dios por hibá bo na felicidad eterno?

Con bida lo ta den e binidero Paradijs terenal?

Pakico lo bo beneficiá di adkerí conocimentu di Dios awor?