Di Con Saulo A Persiguí e Cristiannan?

‘AMI, REALMENTE A KERE cu mi mester a cometé hopi acto di oposicion contra e nomber di Jesus e nazareno; i ta esei mes mi a haci den Jerusalem. Hopi dje santunan mi a cera den prizon, como cu mi a ricibí autoridad for di e sacerdotenan principal. Ora mester a ehecutá e disipelnan, mi a vota contra nan. Dor di castigá nan hopi bes den tur e snoanan, mi a purba obligá nan di nenga nan fe. I como cu mi tabata sumamente rabiá contra nan, mi a bai asina leu di persiguí nan asta den stad djafó.’ —Echonan 26:9-11.

ASINA Saulo di Tarso, conocí tambe como apostel Pablo, a bisa. Naturalmente, pa tempu cu el a bisa esaki, el a cambia su bida. E no tabata un opositor di cristianismo mas. Awor e tabata un di su promotornan mas celoso. Pero kico a motivá Saulo promé cu esei pa persiguí e cristiannan? Di con el a pensa cu ‘e mester a cometé’ actonan asina? I tin un les cu nos por saca for di su relato?

E Piedramentu di Esteban

Saulo ta presentá den e registro bíblico como un di esnan cu a mata Esteban. “Despues di a tira [Esteban] pafó dje stad, nan a cuminsá tir’é cu piedra. I e testigonan a pone nan bistínan exterior na e pianan dje hóben yamá Saulo.” “Saulo, di su parti, a aprobá e asesinato di dje.” (Echonan 7:58; 8:1) Kico a hiba na e atake aki? Hudiunan, entre nan algun for di Cilicia, a discutí cu Esteban, pero no por a para contra dje. Aunke Saulo tambe tabata di Cilicia, Bijbel no ta bisa si e tabata entre nan. En todo caso, nan a usa testigo falsu pa acusá Esteban di blasfemia i a lastr’é hiba dilanti Sanedrin. (Echonan 6:9-14) E asamblea aki, presidí pa e sumo sacerdote, a actua como e corte supremo hudiu. Como e autoridad religioso supremo, su miembronan tambe a protehá loke segun nan tabata puresa di doctrina. Den nan opinion, Esteban a merecé morto. E no a tribi acusá nan di no ta warda Ley? (Echonan 7:53) Awel, nan lo mustr’é con mester warda Ley!

E echo cu Saulo a aprobá dje opinion ei tabata un consecuencia lógico di su conviccionnan. E tabata un fariseo. E secta poderoso aki a exigí pa hende warda ley i tradicion estrictamente. Nan a considerá cristianismo como net lo contrario di e principionan ei, ya cu el a siña un caminda nobo pa salbacion mediante Jesus. Hudiunan di promé siglo a verwagt cu e Mesías lo ta un Rey glorioso cu lo a libra nan for dje yugo odiá di dominacion romano. Pues, pa nan tabata algu totalmente straño, inaceptabel i repugnante cu e Mesías por tabata e persona cu e Gran Sanedrin a condená riba e acusacion di blasfemia i despues a cologá na staca di tormento como un criminal maldicioná.

Ley a declará cu un homber cologá riba un staca tabata “maldicioná pa Dios.” (Deuteronomio 21:22, 23; Galationan 3:13) For di Saulo su punto di bista, “e palabranan aki a aplicá claramente na Jesus,” segun Frederick F. Bruce. “El a muri bou dje maldicion di Dios, i p’esei no por tabata posibel cu e ta e Mesías, riba ken, casi pa definicion, e bendicion di Dios tabata te na un grado único. P’esei, pa hende pretendé cu Jesus tabata e Mesías, tabata un blasfemia; esnan cu a pretendé algu absurdo asina a merecé di sufri como blasfemadó.” Manera Saulo mes a reconocé despues, e idea so di e “Cristo clabá n’e staca [tabata] p’e hudiunan un causa pa trompecá.”—1 Corintionan 1:23.

Saulo su reaccion riba un siñansa asina tabata di opon’é cu mas tantu determinacion posibel. El a usa asta forsa brutu den un intento pa eliminá e siñansa aki. E tabatin sigur cu ta esei Dios tabata kier. Describiendo e actitud cu e tabatin, Saulo a bisa: “En cuanto celo, [mi a persiguí] e congregacion; en cuanto husticia cu ta pa medio di ley, unu cu a proba su mes liber di culpa.” “Te na extremo mi a sigui persiguí e congregacion di Dios i destruyé, i mi tabata haci mas progreso den hudaismo cu hopi di mi mes edad den mi rasa, pasobra mi tabata hopi mas celoso p’e tradicionnan di mi tatanan.”—Filipensenan 3:6; Galationan 1:13, 14.

E Protagonista den Persecucion

Despues di morto di Esteban, Saulo no ta figurá mas como djis un cómplice di persecucion, sino como e protagonista. Como tal, e mester a bira basta notorio, ya cu, despues cu el a combertí, el a haci un esfuerso pa uni cu e disipelnan, pero “nan tur tabatin miedu di dje, pasobra nan no a kere cu e tabata un disipel.” Ora a keda bisto cu di berdad el a bira un cristian, e echo cu el a combertí a haci e disipelnan contentu i gradicidu. Pasobra nan a tende cu no ta cualkier ex-opositor a combertí, sino mas bien cu “e homber cu ántes a persiguí nos, awor ta declará e bon nobo tocante e fe cu ántes el a destruí.”—Echonan 9:26; Galationan 1:23, 24.

Damasco ta situá un 220 kilometer for di Jerusalem, un caminata di shete pa ocho dia. Sin embargo, “respirando . . . menasa i asesinato contra e disipelnan,” Saulo a bai na e sumo sacerdote i a pidié cartanan pa e snoanan den Damasco. Pakico? Pa asina Saulo por a trece ken cu el a haña cu a pertenecé na “E Caminda” mará na Jerusalem. Cu aprobacion oficial, el a ‘cuminsá trata escandalosamente cu e congregacion, i a invadí un cas tras di otro, lastrando tantu hende homber como muher saca afó, pa entregá nan na prizon.’ Otro cristiannan el a ‘suta den snoanan,’ i el a ‘tira su voto’ (literalmente, su “piedra di vota”) na fabor di nan ehecucion.—Echonan 8:3; 9:1, 2, 14; 22:5, 19; 26:10, nota na pia di página.

Tumando na cuenta e educacion cu Saulo a ricibí bou di Gamaliel i e poder cu e tabatin awor, tin erudito ta kere cu el a progresá for di un simpel studiante di Ley te na ehercé un midí di autoridad den hudaismo. Por ehempel, segun un autor, podisé Saulo a bira un maestro den un snoa na Jerusalem. Sin embargo, nos no sa sigur si ora Bijbel ta bisa cu Saulo “a vota,” esei kier men cu el a haci esei como miembro di un corte of como un persona cu a expresá su apoyo moral pa e ehecucion dje cristiannan.a

Como cu na principio tur cristian tabata sea hudiu of prosélito hudiu, aparentemente Saulo a mira cristianismo como un movementu apóstata den hudaismo, i el a considerá cu ta e responsabilidad di hudaismo oficial pa corigí e siguidónan di cristianismo. Segun erudito Arland J. Hultgren: “No ta probabel cu e persiguidó Pablo lo a oponé cristianismo pasobra el a mir’é como un religion pafó di hudaismo, como un rival. E i otronan lo a mira e movementu cristian como sometí ainda na autoridad hudiu.” Su intencion anto tabata pa usa tur medio disponibel pa forsa e hudiunan rebelde pa nenga nan fe i bolbe bek n’e sistema ortodox. (Echonan 26:11) Un método cu e tabatin na su disposicion tabata encarcelacion. Un otro tabata sutamentu den snoa, un método comun di disiplina cu cualkier corte local di tres hues por a duna como castigu contra esnan cu desobedecé autoridad rabínico.

Naturalmente, ora Jesus a aparecé na Saul riba e caminda pa Damasco, tur esei a stop. Saul a cambia di ripiente for di ta un enemigu feros di cristianismo pa bira su defensor ferviente, i no a tarda hopi cu e hudiunan na Damasco tabata busca e pa mata. (Echonan 9:1-23) Sí, manera cos a bin para, como cristian, Saulo mester a sufri hopi cos cu e mes a haci cu otronan tempu e tabata un persiguidó, di manera cu añanan despues e por a bisa: “Dje hudiunan mi a ricibí cincu bes cuarenta golpi ménos un.”—2 Corintionan 11:24.

Celo Por Ta Mal Dirigí

Despues cu Saulo a combertí, i a bira mihó conocí como Pablo, el a skirbi: “Antes mi tabata un blasfemadó i persiguidó i un homber insolente. No obstante, mi a ser mustrá misericordia, pasobra mi tabata ignorante i a actua cu falta di fe.” (1 Timoteo 1:13) P’esei, ser sincero i activo den bo religion no ta un garantia cu bo tin e aprobacion di Dios. Saulo tabata celoso i a actua conforme cu su concenshi, pero esei no a dun’é rason. Su celo ardiente tabata mal dirigí. (Compará cu Romanonan 10:2, 3.) Esaki mester pone nos pensa un ratu.

Hopi hende awe ta firmemente convencí cu tur loke Dios ta pidi di nan ta bon conducta. Pero ta asina? Nos cada un ta haci bon di scucha e exhortacion di Pablo: “Haci sigur di tur cos; tene firmemente gará loke ta excelente.” (1 Tesalonicensenan 5:21) Esei ta nificá tuma tempu pa gana conocimentu exacto dje Palabra di Dios, cu ta e berdad, anto biba na pleno armonia cuné. Si nos realisá for di nos examinacion di Bijbel cu tin cambionan cu nos tin cu haci, e ora ei nos mester haci nan sin tarda. Kisas ántes masha poco di nos tabata blasfemadó, persiguidó of hende insolente te n’e grado cu Saulo tabata. No obstante, solamente dor di actua conforme cu fe i conocimentu exacto nos, mescos cu Saulo, por gana Dios su fabor.—Juan 17:3, 17.

[Nota]