E Tempo pa Busca Dios

E ILUSTRACION riba e bladji aki ta dje Acrópolis den Atenas, cu na un tempo tabata un centro di adoracion di hopi dios i diosa. Mas abao cu e Acrópolis ta e Areópago, cu segun historia tabata e sitio di un tribunal di tempo di antigua. Tabata ne sitio ei, casi 2.000 aña atrás, cu apóstol Pablo a para i a pronunciá un discurso berdaderamente notable. Lo sigiente ta algo di loke el a bisa: “[Dios] a traha for di un solo homber tur nacion di hende, pa nan biba riba tur e superficie dje tera, i el a decreta tempo siñalá i a pone límite di habitacion di hende, pa nan busca Dios, si acaso nan ta fula pe i realmente ta hayé, aunque, en berdad, e no ta leu for di cada un di nos. Pasobra pa medio di dje nos tin bida i ta move i ta existi.”—Echo 17:26-28.

E pasado lo ta ki diferente si humanidad en general a tuma nota dje palabra di Pablo! Cuanto gera, cuanto sufrimento, por a ser prevení si hende a reconoce nan interés común como desendiente dje solo homber cu Señor Soberano, Jehova Dios, a crea.

Awe, nacionalismo, discriminacion di clase, odio racial, i desigualdad social ta parti humanidad. Pero, e palabra di Pablo ta aplica ainda. Nos tur ta desendiente dje solo homber cu Dios a crea. Nos tur, den un sentido, ta ruman. I no ta mucho laat ainda pa busca Dios mientras cu nos por hayé.

E palabra di Pablo ta bira asta mas serio ora nos ta considera e palabra final di su discurso. El a bisa: “[Dios] a pone un dia den locual e tin e propósito di huzga e tera habitá den husticia, usando un homber cu el a nombra, i el a duna garantía na tur hende pasobra el a resusité for di morto.”

E resureccion di Jesús ta un echo histórico, i manera Pablo a mustra, esei ta un garantía di cu lo tin un dia di huicio pa humanidad. Na ki tempo? Wel, nos sa cu e ta casi 2.000 aña mas cerca cu ora Pablo a para riba e Areópago i a declara e palabra ei. Realmente, cumplimento di profecía bíblica ta indica cu e ta mashá cerca. Ki un idea pa provoca pensamento serio! Ta ki urgente pa nos busca Dios cu tur sinceridad, siendo cu, manera Pablo a bisa hende ateno, “awor e ta bisa humanidad pa nan tur na tur parti arrepenti”!—Echo 17:30, 31.