Referensia pa Material i Tarea pa Reunion Nos Bida i Sirbishi Kristian

2-8 DI ÒKTOBER

TESORONAN DI E PALABRA DI DIOS | DANIEL 7-9

“Daniel A Profetisá e Yegada di e Mesías”

it-2-S 1017 §6

Setenta Siman

Fin di transgreshon i piká. E morto di Hesus, su resurekshon i su presensia den shelu a ‘terminá transgreshon, a pone fin na piká i a hasi ekspiashon pa inikidat.’ (Dan 9:24) E pakto di Lei a saka na kla ku e hudiunan tabata pekadó, a kondená nan komo pekadó i a trese maldishon riba nan pasobra nan no a kumpli ku e pakto ei. Pero ora hende a “kometé hopi piká,” manera e Lei di Moises a demostrá, Dios a mustra mas miserikòrdia i bondat na nan mediante su Mesías. (Rom 5:20) Pa medio di e sakrifisio di e Mesías, hende ku arepentí por haña pordon pa nan transgreshon- i pikánan i por keda librá di kastigu.

it-2-S 1016 §5

Setenta Siman

Yegada di e Mesías Despues di ‘Sesent’i Nuebe Siman.’ Relashoná ku e siguiente ‘sesent’i dos siman,’ (Dan 9:25) ku ta parti di e setenta simannan i menshoná na di dos lugá, nan lo a sigui despues ku e promé ‘shete simannan’ a pasa. P’esei, e tempu ku a pasa “for di e momento ku e òrdu a wòrdu duná” pa rekonstruí Herúsalèm te na yegada di “e Mesías, e Lider” (NW) tabata 7 siman ku 62 “siman,” esta, 69 “siman” (483 aña), ku a pasa for di aña 455 promé ku Kristu te ku aña 29 despues di Kristu. Manera a ser menshoná kaba, den hèrfst di aña 29, Hesus a batisá den awa, a ser ungí ku spiritu santu i a kuminsá sirbi komo “e Mesías, e Lider.”—Luk 3:1, 2, 21, 22.

it-2-S 1017 §1

Setenta Siman

“Kòrtá kitá afó” meimei di e siman. Awor, Gabriel a bisa Daniel: “Despues di e sesent’i dos simannan e Mesías lo wòrdu kòrtá kitá afó, i lo no tin nada.” (Dan 9:26) Algun tempu despues ku e ‘shete i e sesenta i dos simannan’ a pasa, pa ta eksakto, tres aña i mei despues, Kristu a ser kòrtá ora el a muri riba un staka di tormento i asina a entregá tur loke e tabatin komo sakrifisio pa reskatá humanidat. (Isa 53:8) Echonan ta mustra ku Hesus a usa e promé mitar di e “siman” pa kumpli ku su sirbishi. Na un okashon, probablemente den hèrfst di aña 32, Hesus a usa un ilustrashon ku aparentemente a kompará e nashon hudiu ku un palu di figu (kompará ku Mat 17:15-20; 21:18, 19, 43) ku no a produsí fruta durante “tres aña.” E trahadó den e kunuku di wendrùif a bisa e doño di e kunuku: “Shon, lag’é keda e aña akí tambe, te ora ku mi koba rònt di dje i pone mèst; anto si e pari den futuro, ta bon; ma si e no pari, e ora ei lo bo kap e basha abou.” (Luk 13:6-9) Kisas Hesus tabata referí na e tempu ku lo el a kumpli ku su sirbishi den tempu di e nashon insensibel ei, un sirbishi ku ya el a kumpli kuné durante tres aña i ku lo el a sigui kuné durante parti di e di kuater aña.

it-2-S 1017 §4

Setenta Siman

“Meimei di e siman” lo tabata mitar di e shete añanan, òf tres aña i mei despues ku e “siman” di añanan a kuminsá. Komo ku e di 70 “siman” a kuminsá den hèrfst di aña 29 despues di Kristu, ora Hesus a batisá i a ser ungí pa bira e Kristu, meimei di e siman ei, (tres aña i mei) lo a yega na lènte di aña 33, es desir, den e temporada di Pasku Hudiu (14 di nisan) di e aña ei. Parse ku e dia ei a kai riba 1 di aprel di aña 33, segun e kalènder gregoriano. (Wak CENA DEL SEÑOR [Cuándo se instituyó] den Perspikasia pa Komprondé e Skritura, na spañó.) Apòstel Pablo a bisa ku Hesus a bini pa ‘hasi e boluntat di Dios,’ esta, pa ‘eliminá loke tabata promé [e sakrifisio- i ofrendanan segun e Lei] pa por establesé loke ta di dos.’ El a hasi esaki ora el a ofresé su mes kurpa komo sakrifisio.—Heb 10:1-10.

NOS BIDA KRISTIAN

Kon pa Bira un Bon Studiante di Beibel

g-S 2/12 18-20

Loke Hóbennan Sa Puntra

Kon Mi Por Hasi Mi Estudio di Beibel Mas Agradabel?

Pakiko studia Beibel? Purba di mir’é di e manera akí:

Beibel ta un best seller ku por yuda bo haña hopi tesoro. Kon?

● E ta prepará bo pa haña e mihó manera di biba

● E ta konta bo kosnan di pasado i futuro ku lo bo no por haña sa di dje di ningun otro manera

● E ta yuda bo konosé bo mes mihó i bira un mihó personaa

PA STUDIA Beibel, bo tin ku hasi esfuerso, pero e rekompensa ta grandi! Bo ke sa kon otro hóbennan a logra esei? Siguientemente nos lo mustra bo kon algun hóben a vense opstákulonan i a logra saka lo máksimo di nan estudio personal di Beibel. E informashon akí ta útil pa bo estudio di Beibel.

“Beibel tin algu pa tur hende. Tin un sin fin di tópiko pa studia.”—Valerie.b

Bo por haña mas artíkulo di “Loke Hóbennan Sa Puntra” riba jw.org

[Plachi i kuadro di página 19 i 20]

KON PA STUDIA BEIBEL

E problema: FALTA DI MOTIVASHON

“Tin biaha, mi no tin niun tiki gana di sinta studia.”—Lena.

E solushon: UN BON MOTIBU

Pa haña smak di studia Beibel, puntra bo mes: ‘Kiko mi ta gana ku esaki?’ Wèl, lo bo ke ta amigu di Dios, komprondé di kon mundu ta manera e ta òf sa kon pa mehorá bo personalidat? Beibel por yuda bo haña kontesta pa e preguntanan akí i muchu mas!

“No pensa ku ta un trabou òf hùiswèrk bo ta bai hasi. Mas bien, mir’é komo un manera pa sera un bon amistat ku e mihó Amigu ku bo por tin, esta, Yehova Dios.”—Bethany.

“Ora bo ta studia Beibel, ta manera kos ku bo ta pasa un ratu bo so ku Yehova. Si bo mayornan semper ta huntu ku bo ora bo ta den kompania di sierto persona, bo por bisa ku e persona ei ta bo amigu òf mas bien e ta nan amigu? Si bo ta studia riba bo mes, Yehova lo bira bo amigu.”—Bianca.

Kòrda: Tur loke tin skirbí den Beibel ta bini di Dios i ta útil pa siña hende, pa yuda nan, korigí nan i mustra nan kon pa hiba un mihó bida. (2 Timoteo 3:16) Beibel por ta útil pa bo tambe.

“Mi ta purba di keda enfoká riba e benefisionan. Si tin algu di mi personalidat ku mi no ta gusta, mi ta probechá studia tokante esei pa asina mira kon mi por mehorá.”—Max.

Puntra bo mes:

Ki motibu ami tin pa studia?

E problema: STUDIAMENTU TA LAF

“Despues ku mi tin dies minüt ta studia algu, mi ta kuminsá kansa; despues di 20 minüt, mi ke bai hasi otro kos; despues di mei ora mi ta sinti mi hopi laf!”—Allison.

E solushon: SEA KREATIVO

Usa bo imaginashon. Kiko bo ta bai studia? Kon bo ta bai hasié? Na unda?

“Saka tempu pa buska kontesta pa preguntanan ku bo tin. Ora bo haña kontesta pa un pregunta ku bo tabatin, bo ta sinti bo bon, asta kontentu.”—Richard.

“Ora bo ta lesa un relato, purba di imaginá ku bo ta den e esena. Imaginá bo ku bo ta e personahe prinsipal òf un opservadó. Purba di mira e relato ku wowo di bo imaginashon.”—Steven.

“Hasi bo bèst pa bo estudio ta agradabel. Bo por sinta den kurá i bebe algu. Ami ta gusta ches algu ora mi ta studia. Ken nò?”—Alexandra.

Kòrda: Si bo ta sinti bo laf, hopi biaha esei ta algu mental, no real. P’esei, en bes di bisa: “Studiamentu ta laf,” bisa: “Ami ta laf.” Ta abo ta disidí kon bo estudio lo ta. Tuma e kontrol i hasi e kambionan nesesario.—Proverbionan 2:10, 11.

“Bo estudio personal no tin pakiko di ta laf. E por ta loke abo ke pa e ta.”—Vanessa.

Puntra bo mes:

Kon ami por ta kreativo?

E problema: NO TIN TEMPU

“Lo mi ke studia Beibel un poko mas, pero mi ta asina drùk ku mi no sa di unda mi ta saka tempu pa sinta studia!”—Maria.

E solushon: PONE PRIORIDAT

Parti di e proseso di bira adulto ta siña kon pa “hasi sigur kiko ta e kosnan mas importante.”—Filipensenan 1:10.

“Mi mama a yuda mi komprondé ku nunka lo mi sobra tempu. Mi tin ku traha tempu. Asina ta ku ora mi a disidí di studia, mi a saka tempu pa hasié.”—Natanya.

“Mi a siña ku mi tin ku pone un ora fiho pa studia. I ora e ora yega, mi ta stòp di hasi loke ku mi ta hasiendo i ta bai studia.”—Yolanda.

“Si bo pone bo estudio promé ku entretenimentu, mi ta garantisá bo ku lo bo disfrutá mas di bo estudio. Anto, despues bo por dibertí bo mes sin sinti bo kulpabel.”—Diana.

Kòrda: Si bo no pone prioridat, lo bo pèrdè kontrol di bo tempu i lo bo bira su katibu. Semper ta mihó pa pone un orario pa studia i no laga esei pa djis ora bo tin chèns.—Efesionan 5:15, 16.

“Komo studiante di skol sekundario, mi por tin hopi kos pa hasi. Sinembargo, mi ta hasi mi bèst pa hinka estudio di Beibel den mi programa; esei ta mi prioridat.”—Jordan.

Puntra bo mes:

Ki orario ami por pone pa mi studia?

[Plachi i kuadro na página 19]

TEP DI OTRO HÓBENNAN

Zachary—No studia solamente loke bo mayornan òf otro hende ta studia. Pa bo estudio ta realmente un estudio personal, bo tin ku skohe algu ku abo ke siña tokante dje.

Kaley—Kuminsá pokopoko. Si ta nesesario, kuminsá ku un estudio di sinku minüt so, pero hasié tur dia. Despues bo por subi e tempu pa 10 minüt, despues pa 15 minüt . . . i ku tempu lo bo gust’é.

Daniela—Tur detaye ta importante. Sòru pa bo tin pèn di diferente koló i un bunita skref òf traha riba bo kòmpiuter un fail ku yama Estudio Personal.

Jordan—Ora mi skohe un tema, mi ta studia ku smak i pa mas tempu. Ademas, mi mester studia den un lugá trankil. Mi no por konsentrá si tin hopi bochincha.

16-22 DI ÒKTOBER

Buska Hoyanan Spiritual

g05-S 8/9 12 §2

Berdadero Pas i Armonia Rònt Mundu

De echo, lo tin un otro tipo di armonia aki riba tera, ya ku Dios lo siña su súpditonan leal kon pa kuida e tera manera mester ta. Na moda di papia, Dios asta lo sera “un pakto” (NW) ku tur bestia salbahe pa nan biba na pas i bou di kontrol di hende.—Oséas 2:18; Génesis 1:26-28; Isaías 11:6-8.

23-29 DI ÒKTOBER

TESORONAN DI E PALABRA DI DIOS | HOSEA 8-14

“Duna Yehova Lo Mihó”

(Oséas 14:2, NW) “Bini bèk serka Yehova ku e palabranan akí, Bis’é: ‘Pordoná nos nos eror i aseptá loke ta bon serka nos,i nos lo ofresé alabansa di nos lepnan meskos ku nos ta ofresé sakrifisio di toro yòn.’”

jd-S 87 §11

Sirbi Yehova Segun Su Normanan Haltu

¹¹ Oséas 14:9 ta enfatisá tambe e benefisionan di sigui un kaminda di hustisia. Sin duda, ora nos hasi loke Dios ta pidi di nos, esei ta benefisiá nos i ta trese bendishon. Komo Kreador, Yehova sa kon nos ta trahá. Loke Dios ta pidi di nos ta pa nos mes bon. Pa splika kon bon Dios konosé nos, nos por usa e ehèmpel di un outo ku su fabrikante. E fabrikante konosé bon bon e diseño di e outo i kon e ta hinká den otro. P’esei, e ta stipulá den e manual pa kambia zeta di motor kada tantu tempu. Kiko por pasa si nos pensa ku e outo ta kore bon i nos no sigui e instrukshon ei? Den ménos tempu ku normal, e motor por kuminsá faya i asta daña. Asina tambe ta pasa ku hende. Dios ta duna nos su mandamentunan. Si nos kumpli ku nan lo bai nos bon. (Isaías 48:17, 18) P’esei, si nos komprondé e benefisionan ku nos tin, nos lo sinti nos mas motivá pa biba segun e normanan di Dios i obedesé su mandamentunan.—Salmo 112:1.

30 DI ÒKTOBER–5 DI NOVÈMBER

TESORONAN DI E PALABRA DI DIOS | YOËL 1-3

“Boso Yu Hòmbernan i Yu Muhénan Lo Profetisá”

jd-S 167 §4

“Proklamá Esaki Meimei di e Nashonnan”

⁴ Laga nos wak e asuntu for di un otro ángulo. Yehova Dios a bisa profeta Yoël ku lo a bini un tempu den kua, na moda di papia, tur tipo di hende lo a profetisá: “I lo sosodé despues di esaki ku lo mi basha mi spiritu riba henter humanidat; i boso yu hòmbernan i yu muhénan lo profetisá, boso ansianonan lo soña soñonan, boso hóbennan lo mira vishonnan.” (Yoël 2:28-32) Riba dia di Pentekòste di aña 33, apòstel Pedro a apliká e profesia akí na e dramamentu di spiritu santu riba e disipelnan ku tabata reuní den un kamber ariba den un kas na Herúsalèm i na nan predikashon di “e obranan magnífiko di Dios” ku a tuma lugá despues. (Echonan 1:12-14; 2:1-4, 11, 14-21) Awor, pensa riba nos tempu. E profesia di Yoël a kuminsá haña su kumplimentu prinsipal for di komienso di siglo 20. De echo, ta na e tempu ei, kristiannan ungí, tantu hòmber komo muhé, hóben i grandi a kuminsá “profetisá,” òf proklamá “e obranan magnífiko di Dios,” inkluyendo e bon notisia di Reino ku ya ta establesí den shelu.

[Nota]