LÈS 47
Bo Ta Kla pa Batisá?
Durante bo kurso di Beibel, bo a siña hopi kos tokante Yehova. E kosnan ku bo a siña probablemente a motivá bo pa hasi kambio den bo bida. Asina mes, kisas bo ta sinti ku tin algu ta stroba bo di dediká bo mes na Yehova i batisá. Den e lès akí, nos lo trata algun opstákulo ku por stroba un persona di batisá i e manera pa vense nan.
1. Kon bon bo mester konosé Beibel promé ku bo batisá?
Pa bo por batisá, bo mester tin “konosementu eksakto di e bèrdat.” (1 Timoteo 2:4) Esaki no ta nifiká ku bo mester sa kontesta pa delaster un pregunta ku hende por hasi bo tokante Beibel. Asta kristian ku tin hopi tempu batisá ta sigui siña tokante loke Beibel ta bisa. (Kolosensenan 1:9, 10) Loke sí ta importante ta pa bo komprondé e siñansanan básiko di Beibel. E ansianonan di kongregashon lo yuda bo haña sa si bo tin e konosementu básiko ei.
2. Kiko ta algun kos ku bo tin ku hasi promé ku bo batisá?
Promé ku bo batisá, bo mester “arepentí, i kambia [bo] rumbo.” (Lesa Echonan 3:19.) Esaki ta enserá ku bo ta sinti duele profundo pa kualke piká ku bo a kometé den pasado i ta pidi Yehova pa pordoná bo. Ademas, bo ta kompletamente determiná pa no hasi loke Yehova ta odia. Anto bo ta hasi esfuerso pa biba di un manera ku ta agrad’é. Banda di esei, bo ta kuminsá asistí na reunion i prediká huntu ku e kongregashon komo un publikadó no batisá.
3. Dikon bo no mester laga miedu stroba bo di batisá?
Tin hende tin miedu ku nan lo no por kumpli ku loke nan a primintí Yehova. Ta bèrdat ku bo tambe lo kometé fayo meskos ku fiel sirbidó di Dios ku Beibel ta menshoná. Sinembargo, Yehova no ta ferwagt perfekshon di su sirbidónan. (Lesa Salmo 103:13, 14.) Lo e keda kontentu ora e wak e esfuerso ku bo ta hasi pa sirbié. Anto lo e yuda bo. De echo, Yehova ta sigurá nos ku nada “lo por separá nos for di [su] amor.”—Lesa Romanonan 8:38, 39.
KIKO MAS NOS POR SIÑA?
Laga nos wak dos kos ku por yuda bo vense kualke opstákulo ku por stroba bo di batisá: siña konosé Yehova mihó i aseptá su yudansa.
4. Siña konosé Yehova mihó
Kon bon bo mester konosé Yehova promé ku bo batisá? Bo mester konosé Yehova sufisientemente bon ku esei ta laga bo stim’é i duna bo gana di hasi loke ta agrad’é. Pasa e VIDIO pa wak kon diferente studiante di Beibel di rònt mundu a siña konosé Yehova. Despues, analisá e siguiente pregunta:
Segun e vidio, kiko a yuda algun hende prepará pa boutismo?
Lesa Romanonan 12:2. Despues, analisá e siguiente preguntanan:
Bo tin duda tokante algun siñansa di Beibel? Bo ta duda ku Testigunan di Yehova ta siña hende e bèrdat ku tin den Beibel?
Si bo tin duda, kiko bo por hasi?
5. Vense opstákulo ku por stroba bo di batisá
Nos tur ta haña nos ku difikultat ora nos skohe pa dediká nos mes na Yehova i batisá. Pa wak un ehèmpel di esei, pasa e VIDIO. Despues, analisá e siguiente preguntanan:
Ki opstákulo Narangerel mester a vense pa e por a sirbi Yehova?
Kon amor pa Yehova a yud’é vense e opstákulonan ei?
Lesa Proverbionan 29:25 i 2 Timoteo 1:7. Despues, analisá e siguiente pregunta:
Kiko ta duna nos kurashi pa vense opstákulo?
6. Konfia ku Yehova lo yuda bo
Yehova lo yuda bo hasi loke ta agrad’é. Pasa e VIDIO. Despues, analisá e siguiente preguntanan:
Dikon e studiante den e vidio tabata duda pa batisá?
Kiko a yud’é haña mas konfiansa den Yehova?
Lesa Isaías 41:10, 13. Despues, analisá e siguiente pregunta:
Dikon bo por tin sigur ku bo por kumpli ku e promesa ku bo ta hasi ora bo dediká bo mes na Yehova?
7. Haña mas apresio pa e amor ku Yehova tin pa bo
Mas bo pensa riba kuantu Yehova ta stima bo, mas gradisidu lo bo ta i mas gana lo bo haña di sirbié pa semper. Lesa Salmo 40:5. Despues, analisá e siguiente pregunta:
Ki bendishon di Yehova bo ta apresiá mas?
Profeta Yeremías tabata stima Yehova i Su mensahe, i e tabata masha gradisidu ku e por a sirbi Yehova. Yeremías a bisa: “Bo palabranan a yena mi kurason ku felisidat i alegria, pasobra mi ta karga bo nòmber, o Yehova.” (Yeremías 15:16) Analisá e siguiente preguntanan:
Dikon ta un onor pa ta un Testigu di Yehova?
Bo ke batisá i bira un Testigu di Yehova?
Tin algu ta stroba bo di hasi esei?
Kiko bo ta pensa ku bo tin ku hasi pa bo por batisá?
LOKE HENDE SA BISA: “Mi no ta kere mi por kumpli ku tur loke mi primintí ora mi batisá.”
Bo tambe ta sinti asina?
RESÚMEN
Yehova por yuda bo vense kualke opstákulo ku por stroba bo di batisá.
Repaso
Kon bon bo mester konosé Beibel pa bo por batisá?
Ki ta algun kambio ku bo tin ku hasi pa bo por batisá?
Dikon bo no mester laga miedu stroba bo di batisá?
MAS INFORMASHON INTERESANTE
Wak kiko mester motivá bo pa batisá.
Wak kon bo por vense algun opstákulo ku por stroba bo di batisá.
“Kiko Ta Stroba Mi di Batisá?” (E Toren di Vigilansia di mart 2019)
Wak kon un hòmber a logra vense algun opstákulo difísil ku tabata strob’é di batisá.
Na promé instante, un hòmber ku yama Ataa tabata duda pa batisá. Wak kiko a konvens’é pa tuma e desishon importante akí.