Kapítulo Kuater
Esun Ku Tur Profeta A Duna Testimonio di Dje
1. Kiko e echonan tokante Hesus su eksistensia prehumano ta revelá di su relashon ku Yehova?
“E Tata ta stima e Yu i ta mustr’é tur kos ku e mes ta hasi.” (Huan 5:20) Ki un relashon kariñoso e Yu tin ku su Tata Yehova! E relashon será ei a kuminsá for di tempu ku el a ser kreá, un kantidat inkontabel di aña promé ku el a nase komo hende. E tabata Dios su Yu unigénito, es desir, e úniko kreá direktamente dor di Yehova mes. Tur otro kos den shelu i riba tera a ser kreá mediante e promé Yu masha stimá ei. (Kolosensenan 1:15, 16) Tambe el a sirbi komo e Palabra di Dios, esta Dios su Bosero, Esun via ken Dios tabata komuniká su boluntat na otro hende. E Yu aki pa ken Dios tabatin un kariño spesial, a bira e hòmber Hesukristu.—Proverbionan 8:22-30; Huan 1:14, 18; 12:49, 50.
2. Te kon leu profesianan di Beibel a referí na Hesus?
2 Promé ku Dios su Yu primogénito a ser konsebí milagrosamente komo hende, e profetanan a skirbi hopi profesia inspirá tokante dje. Apòstel Pedro a bisa Kornelio: “Di dje tur e profetanan ta duna testimonio.” (Echonan 10:43) Beibel a presentá asina hopi informashon tokante e papel di Hesus, ku un angel a bisa apòstel Huan: “E testimonio di Hesus ta e spiritu di profesia.” (Revelashon 19:10) E profesianan aki a mustra bon kla ku e ta e Mesías. Nan a dirigí atenshon na e vários papelnan ku lo el a hunga den realisashon dje propósitonan di Dios. Tur esaki mester ta di sumo interes pa nos awe.
Loke Profesia A Revelá
3. (a) Den e profesia na Génesis 3:15, ken e kolebra, “e muhé,” i e ‘simia dje kolebra’ a representá? (b) Dikon sirbidónan di Yehova lo ta masha interesá den e echo ku ‘e kolebra ta ser heridá den kabes’?
3 E promé profesia a keda ekspresá despues dje rebelion den Eden. Yehova a bisa e kolebra: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Génesis 3:15) Bon mirá, e profesia ei a ser dirigí na Satanas, esun ku e kolebra a representá. “E muhé” ta Yehova su propio organisashon leal den shelu, ku ta manera un esposa fiel na dje. E ‘simia dje kolebra’ ta inkluí tur angel i hende ku ta desplegá e aktitut di Satanas, esnan ku ta oponé Yehova i Su pueblo. ‘Heridá e kolebra den kabes’ ta nifiká ku e rebelde Satanas, kende a kalumniá Yehova i trese gran sufrimentu pa humanidat, ku tempu lo ser destruí. Pero ken ta e parti prinsipal dje “simia” ku lo a heridá e kabes dje kolebra? Pa siglonan, esei a keda un misterio, un “sekreto sagrado.”—Romanonan 16:20, 25, 26, NW.
4. Kon Hesus su antesedensia ta yuda demostrá ku e ta e Simia primintí?
4 Despues di un 2.000 aña di historia humano, Yehova a duna mas detaye. El a revelá ku e Simia lo a bini dje liña di desendiente di Abraham. (Génesis 22:15-18) Sin embargo, e faktor ku lo a determiná ken lo tabata e siguiente den e liña di desendiente ku lo a hiba n’e Simia no a dependé di desendensia karnal, sino di ken Dios a skohe. Apesar ku Abraham tabata stima su yu Ismael, ku el a haña ku Hagar, Yehova a bisa: “Mi aliansa lo mi establesé ku Isak, kende Sara lo haña pa bo.” (Génesis 17:18-21) Despues Dios a konfirmá e aliansa, òf pakto ei, no ku Esau e promé yu di Isak, sino ku Yakòb, for di ken e 12 tribunan di Israel a sali. (Génesis 28:10-14) Ku tempu, Dios a indiká ku e Simia lo nase dje tribu di Huda, dje liña di desendiente di David.—Génesis 49:10; 1 Krónikanan 17:3, 4, 11-14.
5. Ora Hesus a kuminsá su ministerio riba tera, kiko a indiká bon kla ku e tabata e Mesías?
5 Ki otro indikashon Beibel a duna dje identidat di e Simia? Mas ku 700 aña di antemano, Beibel a menshoná Bètlehèm komo e lugá kaminda e Simia primintí lo nase komo hende. Tambe el a revelá ku e Simia ya tabata eksistí kaba “for di e dianan di eternidat,” for di tempu ku el a ser kreá den shelu. (Mikéas 5:2) Tambe Beibel a profetisá, via profeta Daniel, e tempu eksakto ku lo el a presentá riba tera komo Mesías. (Daniel 9:24-26) I ora Hesus a ser ungí ku spiritu santu, birando de echo Yehova su Mesías, Dios su propio stèm for di shelu a bisa bon kla ku esaki ta Su Yu. (Mateo 3:16, 17) E Simia a ser revelá! P’esei Felipe por a bisa ku konvikshon: “Nos a haña esun di kende Moises a skirbi den e Lei i di kende e Profetanan tambe a skirbi—Hesus.”—Huan 1:45.
6. (a) Segun Lukas 24:27, kiko Hesus su siguidónan a bin realisá? (b) Ken ta e parti prinsipal dje ‘simia dje muhé,’ i kiko ta nifiká ku lo e heridá e kabes dje kolebra?
6 Mas despues, Hesus su siguidónan a bin realisá ku den e Skritura inspirá tabatin un kantidat di profesia ku ta referí na dje. (Lukas 24:27) A bira asta mas kla ku Hesus tabata e parti prinsipal dje ‘simia dje muhé,’ esun ku lo a heridá kabes dje kolebra, destruyendo Satanas. Mediante Hesus, tur Dios su promesanan na humanidat, tur e kosnan ku nos ta anhelá intensamente, lo kumpli.—2 Korintionan 1:20.
7. Fuera di komprendé ta ken ta Esun ku e profesianan ta referí na dje, kiko mas ta bon pa realisá?
7 Ki efekto e konosementu aki mester tin riba nos? Beibel ta konta di un eunuko di Etiopia ku tabata lesa algun dje profesianan aki tokante e binidero Reskatador i Mesías. Konfundí, el a puntra e evangelisadó Felipe: “Di ken e profeta ta bisa esaki?” Pero ora e eunuko a haña e kontesta, e no a laga e asuntu te ei. Despues di a skucha ku sumo atenshon n’e splikashon ku Felipe a duna, e hòmber a realisá ku si di bèrdat el a komprendé e profesia aki ku a kumpli i a keda gradisidu pa esei, lo e mester a demostrá esaki ku akshon di su parti. El a komprendé ku e mester batisá. (Echonan 8:32-38; Isaías 53:3-9) Nos ta reakshoná meskos?
8. (a) E echo ku Abraham a purba ofresé Isak a prefigurá kiko? (b) Dikon Yehova a bisa Abraham ku tur nashon lo bendishoná nan mes mediante e Simia, i kon esaki ta apliká na nos awe?
8 Konsiderá tambe e relato konmovedor di Abraham su intento pa ofresé Isak, e úniko yu ku e tabatin ku Sara. (Génesis 22:1-18) Esei a prefigurá loke Yehova lo a hasi, esta, ofresé su Yu unigénito: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Huan 3:16) Esaki ta duna nos e konfiansa ku meskos ku Yehova a duna su Yu unigénito pa kumpli ku Su propósito, asina tambe lo E “duna nos tur-tur kos.” (Romanonan 8:32) Kiko esei ta eksigí di nos parti? Manera ta pará skirbí na Génesis 22:18, Yehova a bisa Abraham ku tur nashon lo bendishoná nan mes mediante e Simia, “pasobra [Abraham] a obedesé [Dios su] bos.” Nos tambe tin ku skucha i obedesé Yehova i su Yu: “Esun ku kere den e Yu tin bida eterno; ma esun ku no obedesé e Yu lo no mira bida, ma e furia di Dios ta keda riba dje.”—Huan 3:36.
9. Kiko nos lo hasi si nos ta gradisidu pa e speransa di bida eterno ku Hesus su sakrifisio a hasi posibel?
9 Si nos ta gradisidu pa e speransa di bida eterno ku a bira posibel dor di Hesus su sakrifisio, nos lo kier hasi e kosnan ku Yehova ta bisa nos mediante Hesus. E mandamentunan aki tin di haber ku nos amor pa Dios i pa nos próhimo. (Mateo 22:37-39) Hesus a mustra ku nos amor pa Yehova mester motivá nos pa siña otro hende “kumpli ku tur loke [Hesus] a ordená [nos].” (Mateo 28:19, 20) I nos kier kompartí e amor ei ku e otro sirbidónan di Yehova dor di ‘asistí regularmente na nos reunionnan’ huntu ku nan. (Hebreonan 10:25; Galationan 6:10) Ademas, ora di skucha Dios i su Yu, nos no mester pensa ku nan ta eksigí perfekshon for di nos. Hebreonan 4:15 ta bisa ku Hesus, komo nos Sumo Saserdote, por “kompadesé di nos debilidatnan.” Esta un konsuelo esei ta! Foral ora nos ta akudí na Dios den orashon pa medio di Kristu pa haña yudansa pa vense nos debilidatnan.—Mateo 6:12.
Demostrá Fe den Kristu
10. Dikon no tin salbashon sin Hesukristu?
10 Despues di a splika e korte supremo hudiu na Yerusalèm ku profesia bíbliko a kumpli den Hesus, apòstel Pedro a konkluí konvinsentemente: “No tin salbashon den ningun otro; pasobra no tin bou di shelu ningun otro nòmber ku a wòrdu duná na hende, pa medio di kual nos mester wòrdu salbá.” (Echonan 4:12) Siendo ku tur desendiente di Adam ta pekador, nan morto no tin niun balor ku por sirbi pa reskatá ningun persona. Pero Hesus tabata perfekto, i su bida tabatin balor komo sakrifisio. (Salmo 49:6-9; Hebreonan 2:9) El a ofresé Dios un preis di reskate ku a korespondé eksaktamente ku e balor dje bida perfekto ku Adam a pèrdè. (1 Timoteo 2:5, 6, NW) Esaki a habri kaminda pa nos por optené bida eterno den Dios su mundu nobo.
11. Splika kon e sakrifisio di Hesus por ta di gran benefisio pa nos.
11 Tambe e reskate a habri kaminda pa nos risibí otro benefisionan, asta for di awor. Por ehèmpel, maske nos ta pekador, Hesus su sakrifisio ta hasi posibel ku nos por tin un konsenshi limpi debí na pordon di nos pikánan. Esaki ta hopi mas di loke e israelitanan hamas a logra mediante e sakrifisionan di bestia ku e Lei di Moises a eksigí. (Echonan 13:38, 39; Hebreonan 9:13, 14; 10:22) Sin embargo, pa nos haña e pordon ei nos tin ku atmití onestamente ku nos tin mester dje sakrifisio di Kristu: “Si nos bisa ku nos no tin piká, nos ta gaña nos mes, i e bèrdat no ta den nos. Si nos konfesá nos pikánan, e ta fiel i hustu pa pordoná nos nos pikánan i pa limpia nos di tur inhustisia.”—1 Huan 1:8, 9.
12. Dikon boutismo den awa ta un faktor importante pa haña un bon konsenshi dilanti Dios?
12 Kon pekador por ekspresá fe den Kristu i su sakrifisio? Ora hende den promé siglo a bira kreyente, nan a demostrá esei públikamente. Kon? Nan a batisá. Dikon? Pasobra Hesus a manda pa tur su disipelnan batisá. (Mateo 28:19, 20; Echonan 8:12; 18:8) Un persona lo no keda sin hasi esei si di bèrdat su kurason ser konmoví dor dje regalo amoroso ku Yehova a perkurá mediante Hesus. Lo e hasi kualkier kambio nesesario den su bida, dediká su mes na Dios den orashon i simbolisá su dedikashon mediante boutismo den awa. Ta dor di demostrá fe den e manera aki e persona ei ta hasi un “apelashon na Dios pa un bon konsenshi.”—1 Pedro 3:21.
13. Si nos realisá ku nos a kometé un piká, kiko nos mester hasi al respekto, i dikon?
13 Klaro ku asta despues di batisá, nos lo keda ku karakterístikanan pekaminoso. Kiko e ora ei? Apòstel Huan a bisa: “Mi ta skirbi boso e kosnan aki pa boso no hasi piká. I si un hende hasi piká, nos tin un abogado serka e Tata, Hesukristu, e hustu; i e mes ta e propisiashon [sakrifisio pa pordon, SAB] pa nos pikánan.” (1 Huan 2:1, 2) Esaki ta nifiká ku maske ki piká nos kometé, basta nos resa pidi Dios pordon, tur kos ta drecha? No nesesariamente. E klave pa pordon ta berdadero repentimentu. Kisas tambe nos tin mester di yudansa for di personanan ku tin mas edat i eksperensia den e kongregashon kristian. Nos tin ku rekonosé kon malu loke nos a hasi ta, i sinti ègt duele ya asina nos lo hasi un esfuerso sinsero pa no ripitié. (Echonan 3:19; Santiago 5:13-16) Si nos hasi esaki, nos por tin sigur ku Hesus lo yuda nos i ku nos lo bolbe haña Yehova su aprobashon.
14. (a) Splika un manera importante ku Hesus su sakrifisio ta benefisiá nos. (b) Kiko nos lo hasi si di bèrdat nos tin fe?
14 Hesus su sakrifisio a habri e kaminda pa bida eterno den shelu pa un “tou chikitu,” e parti sekundario dje simia menshoná na Génesis 3:15. (Lukas 12:32; Galationan 3:26-29) Tambe su sakrifisio a habri kaminda pa míles di miónes di hende haña bida eterno riba e tera transformá den un paradeis. (Salmo 37:29; Revelashon 20:11, 12; 21:3, 4) Bida eterno ta “e don di grasia di Dios . . . den Kristu Hesus, nos Señor.” (Romanonan 6:23; Efesionan 2:8-10) Si nos tin fe den e don òf regalo ei i ta gradisidu pa e manera ku Dios a hasié posibel, nos lo demostrá esaki. Si nos a komprendé e manera maravioso ku Yehova a usa Hesus pa kumpli ku Su boluntat i kon vital ta pa nos tur sigui e pasonan di Hesus ku sumo kuidou i atenshon, nos lo hasi e sirbishi kristian un dje aktividatnan mas importante den nos bida. Nos fe lo ta bisto na e konvikshon ku kua nos ta konta otro hende tokante e regalo magnífiko aki di Dios.—Echonan 20:24.
15. Kon fe den Hesukristu ta trese union?
15 Tal fe ta trese union maravioso. Pasobra mediante e fe ei nos ta hala mas serka di Yehova, di su Yu i di otro kompañeronan den e kongregashon kristian. (1 Huan 3:23, 24) P’esei nos ta kontentu ku Yehova bondadosamente a duna su Yu “e nòmber ku ta riba tur nòmber [ku eksepshon dje nòmber di Dios], ku pa e nòmber di Hesus tur rudia mester dobla, di esnan ku ta den shelu, i riba tera, i bou di tera, i ku tur lenga mester konfesá ku Hesukristu ta Señor, pa e gloria di Dios Tata.”—Filipensenan 2:9-11.
Komo Repaso
• Dikon ora e Mesías a presentá, su identidat tabata bon kla pa esnan ku di bèrdat a kere e Palabra di Dios?
• Kiko asina nos mester hasi pa demostrá nos gratitut p’e sakrifisio di Hesus?
• Kon nos ta benefisiando kaba di Hesus su sakrifisio? Kon esaki ta yuda nos ora nos ta pidi Yehova pordon pa nos pikánan?
[Plachi na página 36]
Hesus a bisa su siguidónan ku nan mester siña otro hende kumpli ku e mandamentunan di Dios