Con pa Entrená Bo Concenshi

“UN CONCENSHI limpi ta e mihó cusinchi.” E proverbio bieu aki ta resaltá un echo importante: Ora nos ta haci caso di nos concenshi, nos ta disfrutá di pas i armonia interno.

Sin embargo, no ta tur hende ta scoge pa haci esaki. Adolf Hitler a determiná pa emprendé un mision pa libra hende for dje ilusion degradante ei, conocí como concenshi. Su reinado di teror ta duna un bistaso desalentador den con cruel hende por ta ora nan ta nenga di haci caso di nan concenshi. Sin embargo, hopi dje criminalnan violento djawe ta mes cruel—esnan cu ta violá i mata sin remordimentu. Cantidadnan aumentante di esnan cu ta cometé e crímennan aki ta masha yong. P’esei un buki cu ta analisá e fenómeno aki a carga e subtítulo Children Without a Conscience (Muchanan Sin Concenshi).

Aunke mayoria hende nunca lo pensa di cometé un crímen violento, hopi no tin remordimentu pa participá den inmoralidad sexual, gañamentu of estafa. Normanan moral ta deteriorando rond mundu. Refiriendo na e gran apostasia for di adoracion berdadero, apostel Pablo a skirbi cu algun cristian lo a cede n’e influencia di mundu i bira asina “marcá den nan concenshi como si fuera cu heru cayente.” (1 Timoteo 4:2) E menasa pa ser corumpí ta asta mas grandi awe durante e “último dianan” aki. (2 Timoteo 3:1) P’esei cristiannan tin cu haci esfuerso vigoroso pa salbaguardiá nan concenshi. Nos por haci esaki dor di entren’é i desaroy’é.

Mente, Curason i Bo Concenshi

Apostel Pablo a bisa: “Mi ta bisando e berdad den Cristo; mi no ta gañando, siendo cu mi concenshi ta duna testimonio cu mi den spiritu santu.” (Romanonan 9:1) P’esei e concenshi por ta un dunadó di testimonio. E por examiná un curso di conducta i sea aprob’é of conden’é. Hopi di nos sentido di loke ta bon i malu a ser poné den nos dor di nos Creador. Tog, nos concenshi por ser moldeá i entrená. Con asina? Dor di gana conocimentu exacto for dje Palabra di Dios. “Sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios,” apostel Pablo ta bisa. (Romanonan 12:2) Segun cu bo ta inculcá Dios su pensamentunan i boluntad den bo mente, bo concenshi ta cuminsá funcioná den un manera mas piadoso.

Testigonan di Jehova a yuda miyones di hende rond mundu ‘gana conocimentu di Jehova Dios i Jesucristo.’ (Juan 17:3) Mediante nan areglo di studio di Bijbel grátis na cas, nan ta siña esnan di curason onesto Jehova Dios su normanan tocante sex, bebida alcohólico, matrimonio, acuerdonan comercial i hopi otro tópico.a (Proverbionan 11:1; Marco 10:6-12; 1 Corintionan 6:9, 10; Efesionan 5:28-33) Ganando e “conocimentu exacto” aki ta un paso importante den desaroyá un concenshi piadoso. (Filipensenan 1:9) Naturalmente, asta despues cu un cristian gana un comprendimentu completo di Bijbel, e tin cu sigui alimentá su mente cu e Palabra di Dios regularmente pa su concenshi keda salú.—Salmo 1:1-3.

Bijbel ta conectá tambe e concenshi cu e curason figurativo, cu ta enbolbé nos sintimentu i emocionnan. (Romanonan 2:15) Mente i curason mester traha huntu armoniosamente p’e concenshi por funcioná debidamente. No ta suficiente pa djis hinca informacion den bo mente. Tambe bo tin cu moldea bo curason—bo sintimentu, deseo i anhelonan interno. Asina, e buki di Proverbionan ta usa expresionnan manera “incliná bo curason,” “fiha bo curason” i “guia bo curason.” (Proverbionan 2:2; 23:19; 27:23) Un manera pa haci esei ta mediante meditacion i refleccion riba e Scritura. “Siguramente lo mi meditá riba tur bo actividad, i den bo tratonan lo mi interesá mi mes intensamente,” Salmo 77:12 ta bisa. Meditacion ta yuda nos alcansá nos sintimentu i motibunan di mas interno.

Suponé, por ehempel, cu bo tin un custumber impuru tal como un adiccion na tabaco. Mescos cu mayoria hende, sin duda bo ta bon na altura di su riesgonan pa salú. Tog, maske cuantu amigu i famia instá bo pa stop, bo ta haña esei difícil. Con meditacion riba e mensahe di Bijbel por fortalecé bo concenshi al respecto?

Como ehempel, purba meditá riba e palabranan di apostel Pablo cu bo por haña na 2 Corintionan 7:1: “P’esei, siendo cu nos tin e promesanan aki, stimánan, laga nos limpia nos mes di tur contaminacion di carni i di spiritu, perfeccionando santidad den temor di Dios.” Capta e sentido dje palabranan aki. Puntra bo mes, ‘Exactamente kico ta e “promesanan aki” na cua Pablo ta referí?’ Dor di lesa e contexto, lo bo nota cu e versículonan anterior ta bisa: “‘“Sali for di meimei di nan, i separá boso,” Jehova ta bisa, “i stop di mishi cu e cos impuru”’; ‘“i lo mi ricibí boso.”’ ‘“I lo mi ta un tata pa boso, i boso lo ta yu homber i yu muher pa mi,” Jehova e Todopoderoso ta bisa.’”—2 Corintionan 6:17, 18.

Pablo su mandamentu pa ‘limpia nos mes di contaminacion’ awor tin mas forsa! Como un incentivo poderoso pa haci esei, Dios ta primintí di ‘ricibí nos,’ esta, pone nos bou di su cuido protectivo. ‘Lo mi disfrutá di un relacion íntimo cuné—manera esun di un yu homber of un yu muher cu un tata?’ bo por puntra bo mes. E idea di ser ‘ricibí’ of stimá dor di un Dios amoroso i sabí no ta hopi atractivo? Si e idea ei ta parce straño pa bo, observá e manera cu tatanan amoroso ta expresá amor i cariño na nan yunan. Awor imaginá un laso asina entre abo i Jehova! Mas bo meditá riba dje, mas e deseo pa un relacion asina crece.

Pero ripará: Intimidad cu Dios ta posibel solamente si bo “stop di mishi cu e cos impuru.” Puntra bo mes: ‘Adiccion na tabaco no ta entre e “cosnan impuru” cu Dios ta condená? Uso di tabaco no ta un “contaminacion di carni,” exponiendo mi mes na tur sorto di riesgonan pa salú? Siendo cu Jehova ta un Dios limpi of “santu,” e por aprobá e echo cu mi ta contaminá mi curpa deliberadamente den e manera aki?’ (1 Pedro 1:15, 16) Nota cu Pablo ta spierta tambe contra ‘contaminacion di bo spiritu,’ of inclinacion mental. Puntra bo mes: ‘E adiccion aki ta dominá mi manera di pensa? Lo mi haci tur loke ta posibel pa satisfacé mi anhelo, tal bes riscando mi salú, mi famia of asta mi relacion cu Dios? Te na ki grado mi a permití mi adiccion na tabaco perhudicá mi bida?’ Muy probablemente lo bo haña e curashi pa stop si bo enfrentá e preguntanan inkietante aki!

Naturalmente, lo bo tin mester di yudansa i apoyo for di otronan pa vence adiccion na tabaco. Sin embargo, meditacion riba Bijbel por contribuí hopi pa entrená i fortalecé bo concenshi pa bo por libra bo mes di adiccion.

Ora Nos Haci Malu

Maske cuantu nos purba pa haci loke ta corecto, tin biaha nos imperfeccionnan ta vence nos i nos ta faya. E ora ei nos concenshi lo molestiá nos, pero nos por ser tentá pa purba ignor’é. Of nos por bira asina desanimá cu nos lo kier stop di haci tur esfuerso pa sirbi Dios. Sin embargo, corda e caso di Rey David. Despues cu el a cometé adulterio cu Bat-seba, su concenshi a afligié. E ta describí e angustia cu el a sinti: “Dia i anochi bo man tabata pisá riba mi. E humedad di mi bida a cambia mescos cu den e calor secu di zomer.” (Salmo 32:4) Doloroso? Anto hopi! Tog e tristesa piadoso aki a conmové David pa repentí i bira reconciliá cu Dios. (Compará cu 2 Corintionan 7:10.) David su súplica agonisante pa pordon ta duna evidencia amplio di su repentimentu sincero. Pa motibu cu David a respondé na su concenshi, el a ser yudá pa cambia i cu tempu a recobrá su goso.—Salmo 51.

Mescos por sosodé awe. Algun persona a studia Bijbel cu Testigonan di Jehova den pasado, pero a stop ora nan a haña sa cu nan bida no tabata na armonia cu e normanan haltu di Dios. Tal bes nan tabata biba cu un persona dje sexo opuesto sin tabata casá of nan tabata sclabisá na custumbernan impuru. Nan concenshi a remordé nan!

Si bo ta den un situacion asina, considerá e palabranan di apostel Pedro riba e dia di Pentecoste. Ora el a exponé e picánan di su paisanonan hudiu, “nan a ser heridá den nan curason.” En bes di entregá, nan a haci caso dje conseho di Pedro pa repentí, i nan a gana e fabor di Dios. (Echonan 2:37-41) Bo por haci mescos! En bes di bandoná Jehova i su organisacion pa motibu cu bo concenshi ta remordé bo, laga bo concenshi conmové bo pa ‘repentí i bira bek.’ (Echonan 3:19) Cu determinacion i esfuerso, bo por haci e cambionan necesario pa gana e fabor di Dios.

“Tene un Bon Concenshi”

Sea bo a caba di cuminsá siña e camindanan di Jehova of bo tin hopi aña di experencia como un cristian maduro, e spiertamentu di Pedro ta apropiado: “Tene un bon concenshi.” (1 Pedro 3:16) E ta un beneficio, no un carga. Entren’é dor di alimentá bo mente i curason cu e sabiduria cu e Palabra di Dios, Bijbel, ta contené. Haci caso di bo concenshi ora e ta spiertá bo. Disfrutá dje pas mental interno cu obedencia na bo concenshi por trece.

Ta di comprendé cu no ta un tarea fácil pa entrená i moldea bo concenshi. Sin embargo, bo por pidi Jehova Dios yudá bo. Cu su yudansa, lo bo por ta capas pa sirbi Dios ‘motivá pa un bon concenshi i pa fe sin hipocresia.’—1 Timoteo 1:5.

[Nota]

[Plachi na página 6]

Lesa i meditá riba e Palabra di Dios ta yuda nos entrená nos concenshi