LÈS 49
Kon Bo Por Tin un Bida di Famia Felis?—Parti 1
Un pareha resien kasá ta deseá pa e felisidat ku nan a sinti dia nan a kasa dura henter nan bida. Anto esei sigur ta posibel! Pareha kristian ku tin hopi tempu kasá i ku ta hasi esfuerso pa sigui konseho di Beibel den nan bida sa esei.
1. Ki konseho Beibel tin pa esposo?
Yehova a hasi e esposo kabes di famia. Esei ke men ku Yehova a dun’é e responsabilidat pa guia su famia. (Lesa Efesionan 5:23.) Yehova ke pa un esposo tuma desishon ku lo benefisiá su famia. Beibel ta bisa e esposonan: “Sigui stima boso esposa.” (Efesionan 5:25) Kiko esei ta enserá? Un esposo ku ta stima su kasá ta trat’é bon, tantu na kas komo ora nan ta huntu ku otro hende. Un bon esposo ta hasi esfuerso pa laga su kasá sintié safe i felis. Ademas, e ta pèrkurá pa e nesesidatnan físiko i emoshonal di su esposa. (1 Timoteo 5:8) Mas importante ainda, un bon esposo ta yuda su esposa tin un amistat será ku Yehova. (Mateo 4:4) Por ehèmpel, e por hasi orashon ku su esposa i lesa Beibel huntu kuné. Ora un esposo ta kuida su kasá ku amor, e esposo ta keda ku un bon amistat ku Yehova.—Lesa 1 Pedro 3:7.
2. Ki konseho Beibel tin pa esposa?
Beibel ta bisa ku un esposa “mester tin rèspèt profundo pa su esposo.” (Efesionan 5:33) Kiko esei ta enserá? Un esposa mester pensa riba e bon kualidatnan ku su kasá tin i riba e esfuerso ku su kasá ta hasi pa kuida e i nan yunan. Ademas, un esposa por mustra ku e ta respetá su esposo ora e ta apoyá e desishonnan ku su esposo ta tuma. Un esposa por mustra tambe ku e ta respetá su esposo ora e ta papia na un manera bondadoso kuné i ta papia bon tokante dje ku otro hende. Un esposa mester respetá su esposo, sea ku su esposo ta sirbi Yehova òf nò.
3. Kon un pareha por fortalesé nan matrimonio?
Beibel ta bisa tokante pareha kasá: “Nan dos lo ta ún karni.” (Mateo 19:5) Esei ta nifiká ku nan mester evitá kualke kos ku por pone nan amor pa otro fria. Nan por hasi esei ora nan ta pasa tempu regularmente ku otro i ora nan ta papia na un manera amoroso i habrí ku otro tokante nan pensamentunan i nan sintimentunan. Fuera di Yehova, ningun otro persona òf kos ta mas importante ku nan kasá. Ademas, nan ta tene masha kuidou pa nan no tin amistat demasiado será ku un persona ku no ta nan kasá.
KIKO MAS NOS POR SIÑA?
Laga nos wak ki prinsipio di Beibel por yuda bo fortalesé bo matrimonio.
4. Esposo, stima i kuida bo esposa
Beibel ta bisa ku “esposonan mester stima nan esposa manera nan mes kurpa.” (Efesionan 5:28, 29) Kiko esei ta enserá? Pasa e VIDIO. Despues, analisá e siguiente pregunta:
Kon ta algun manera ku un esposo por mustra ku e ta stima i kuida su esposa?
Lesa Kolosensenan 3:12. Despues, analisá e siguiente pregunta:
Kon un esposo por demostrá e kualidatnan ku e teksto ta menshoná den su matrimonio?
5. Esposa, stima i respetá bo esposo
Beibel ta animá un esposa pa respetá su esposo, sea ku su esposo ta sirbi Yehova òf nò. Lesa 1 Pedro 3:1, 2. Despues, analisá e siguiente preguntanan:
Si bo kasá no ta un sirbidó di Yehova, siguramente bo ke pa e kuminsá sirbi Yehova. Kon bo ta pensa ta e mihó manera pa yuda bo kasá: prediká tur ora bai na dje òf trat’é na un manera bondadoso, kariñoso i respetuoso? Dikon bo ta pensa esei?
Esposo i esposa por tuma bon desishon huntu. Pero, tin biaha ta sosodé ku un esposa no ta di akuerdo ku su esposo. Na momento asina, un esposa por bisa su kasá na un manera trankil i respetuoso kiko e ta pensa, pero e mester kòrda ku Yehova a duna e hòmber e responsabilidat pa disidí kiko ta mihó pa nan famia. Un esposa mester hasi su bèst pa apoyá e desishon ku su esposo tuma. Ora e hasi esei, henter e famia lo ta felis. Lesa 1 Pedro 3:3-5. Despues, analisá e siguiente pregunta:
Kiko Yehova ta pensa ora e mira un esposa ta trata su esposo ku rèspèt?
6. Boso por resolvé problema ku presentá den boso matrimonio
Ningun matrimonio no ta perfekto. P’esei, pareha kasá mester traha huntu pa resolvé problema ku presentá den nan matrimonio. Pasa e VIDIO. Despues, analisá e siguiente preguntanan:
Kiko ta mustra ku e pareha den e vidio tabata distansiando for di otro?
Kiko nan a hasi pa fortalesé nan matrimonio?
Lesa 1 Korintionan 10:24 i Kolosensenan 3:13. Despues di lesa kada teksto, analisá e siguiente pregunta:
Ora un pareha sigui e konseho akí, kon esei por fortalesé nan matrimonio?
Beibel ta bisa ku nos mester mustra onor na otro. Ora nos ta mustra onor na un hende, nos ta trat’é na un manera bondadoso i ku rèspèt. Lesa Romanonan 12:10. Despues, analisá e siguiente preguntanan:
Un esposo òf esposa mester warda pa su kasá mustr’é onor promé? Dikon sí, òf dikon nò?
LOKE HENDE SA BISA: “Ami ku mi kasá no ta dje será ei mas ku otro.”
Kon bo por splika e persona ku Beibel por yuda nan?
RESÚMEN
Un esposo i un esposa por ta felis ora nan ta stima otro, respetá otro i sigui prinsipio di Beibel.
Repaso
Kiko un esposo mester hasi pa su matrimonio por ta felis?
Kiko un esposa mester hasi pa su matrimonio por ta felis?
Si bo ta kasá, ki prinsipio di Beibel por yuda fortalesé boso matrimonio?
MAS INFORMASHON INTERESANTE
Wak sugerensia práktiko ku por yuda bo tin un bida di famia felis.
Wak un vidio musikal ku ta mustra e bendishonnan ku pareha kasá ta risibí ora nan ta apliká konseho di Dios den nan matrimonio.
Un esposa mester ta sumiso na su esposo komo kabes di famia. Wak kiko esei ta enserá.
“Esposanan, Pakiko Ser Sumiso na Boso Esposo?” (E Toren di Vigilansia di 1 di mei 2010)
Kiko a yuda un parehatrata ku problema serio, inkluso divorsio?