Balorá Bo Privilegio di Sirbishi

1. Kon hopi hende den e mundu akí ta mira nos trabou di prediká?

¹ Pa hopi hende den e mundu di Satanas nos trabou di prediká ta un “bobedat” òf lokura. (1 Kor. 1:​18-⁠21) Si nos no tene kuidou, e manera di pensa ei por desanimá nos i mengua nos zelo. (Pro. 24:⁠10; Isa. 5:⁠20) Dikon nos tin ku balorá nos privilegio di ta Testigunan di Yehova?​—⁠Isa. 43:⁠10, NW.

2. Dikon nos por bisa ku nos predikashon ta un “trabou santu”?

² Un “Trabou Santu”: Apòstel Pablo a referí na e predikashon komo un “trabou santu.” (Rom. 15:​15, 16) Den ki sentido e ta un “trabou santu”? Pasobra ora nos ta prediká, nos ta “kompañero di trabou” di Yehova, “Esun Santu,” i esaki ta kontribuí tambe na santifikashon di su nòmber. (1 Kor. 3:⁠9; 1 Ped. 1:⁠15) Yehova ta mira nos trabou di prediká komo “un sakrifisio di alabansa” i esaki ta hasi nos ministerio un parti masha importante di nos adorashon.​—⁠Heb. 13:⁠15.

3. Dikon ta un gran onor pa nos prediká e bon notisia?

³ Masha poko hende ta disfrutá di e gran onor ku nos tin, esta, di prediká e bon notisia. E angelnan lo ta kontentu pa kumpli ku un asignashon asina, i sin duda nan lo hasi esei na un manera masha efikas. (1 Ped. 1:⁠12) Pero Yehova a duna nos komo hende imperfekto, ku ta manera “pòchi di klei,” e privilegio asombroso akí.​—⁠2 Kor. 4:⁠7.

4. Kon nos por demostrá ku nos ta balorá e predikashon?

⁴ Un Prioridat: Debí ku nos ta balorá e privilegio ku nos tin, nos ta mira e predikashon komo un di “e kosnan mas importante” den nos bida. (Flp. 1:⁠10) P’esei, nos ta apartá tempu tur siman pa partisipá den dje. Un músiko ku ta balorá e privilegio ku e tin di toka den un orkesta di fama internashonal lo prepará bon pa kada presentashon i ta traha duru pa desaroyá su abilidat. Di mesun manera, nos tin ku prepará bon promé ku nos bai prediká, pa asina nos por “manehá e palabra di e bèrdat korektamente.” Ademas, nos tin ku hasi esfuerso pa mehorá nos “arte di siña.”​—⁠2 Tim. 2:⁠15; 4:⁠2.

5. Ken ta balorá nos predikashon?

⁵ Mayoria di hende no ta reakshoná na un manera positivo riba e mensahe, pero no laga esei desanimá bo. Kòrda ku ainda tin hopi hende den nos teritorio ku ta apresiá nos bishita. Pero nos no ta buskando aprobashon di hende. Pa nos, loke ta mas importante ta kon Yehova ta sinti, pasobra e sí ta balorá nos esfuerso diligente pa kumpli ku e trabou.​—⁠Isa. 52:⁠7.