Pakico Nos Ta Muri?
“Riba tur cabes di ceru ta ketu awor, den tur top di mata apénas bo ta tende un rosea; e paranan ta na soño den e palunan: warda; djis abo lo bai sosegá mescos cu nan.”—JOHANN WOLFGANG VON GOETHE, POËTA ALEMAN.
1, 2. (a) Hende a ser creá cu ki deseo? (b) Ki clase di bida e promé pareha humano a gosa di dje?
DIOS a crea hende cu un anhelo pa biba pa semper. Sí, Bijbel ta bisa cu “El a pone etèrnidat den nan kurason.” (Eclesiástes 3:11, Editorial Evangélica) Pero Dios a haci mas cu duna hende e deseo di biba pa semper. Tambe el a duna nan e oportunidad di haci esei.
2 Nos promé mayornan, Adam cu Eva, a ser creá perfecto, sin defecto di mente of curpa. (Deuteronomio 32:4) Imaginá bo: sin dolornan crónico aki of aya, sin miedu ni ansiedad insaludabel! Ademas, Dios a pone nan den un bunita hogar paradísico. Dios su propósito tabata pa hende biba pa semper i pa despues di tempu e tera yena cu su desendiente perfecto. (Génesis 1:31; 2:15) Pakico anto, nos ta muri?
Desobedencia Ta Trece Morto
3. Bida eterno pa Adam cu Eva a dependé di kico?
3 Dios a manda Adam: “Bo por come di tur palu dje hofi te na satisfaccion. Pero, en cuanto e palu di conocimentu di bon i malu, bo no mag come di dje, pasobra den e dia cu bo come di dje lo bo muri positivamente.” (Génesis 2:16, 17) Pues bida eterno pa Adam cu Eva tabata mará na un condicion; el a dependé di obedencia na Dios.
4. Ora Adam cu Eva a peca, di con nan a perde e prospecto di biba pa semper den Paradijs?
4 Sin embargo, lamentablemente Adam cu Eva a desobedecé Dios su ley. (Génesis 3:1-6) Dor di haci esei nan a bira pecadó, pasobra “picá ta maldad.” (1 Juan 3:4) Como resultado, Adam cu Eva no tabatin e prospecto di bida eterno mas. Di con? Pasobra “e salario cu picá ta paga ta morto.” (Romanonan 6:23) Pues, ora di pronunciá sentencia riba Adam cu Eva, Dios a bisa: “Stof bo ta i na stof lo bo bolbe.” Anto nos promé mayornan a ser expulsá for di nan hogar paradísico. Riba e dia cu nan a peca, Adam cu Eva a cuminsá muri den un proceso lento pero sigur.—Génesis 3:19, 23, 24.
“Morto A Plama na Tur Hende”
5. Con morto a plama na henter e rasa humano?
5 Awor Adam cu Eva tabatin picá profundamente grabá den nan genenan. P’esei, nan no por a producí desendiente perfecto, mescos cu un malchi imperfecto no por producí un obheto perfecto. (Job 14:4) Sí, cada hende cu nace ta confirmá cu nos promé mayornan a perde salú perfecto i bida eterno pa nan mes i pa nan yunan. Apostel cristian Pablo a skirbi: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.”—Romanonan 5:12; compará cu Salmo 51:5.
6. Pakico nos ta muri?
6 Awe científiconan simplemente no sa di con hende ta bira bieu i muri. Sin embargo, Bijbel ta splica cu nos ta muri pasobra nos a nace pecaminoso, dor cu nos a heredá e condicion aki for di nos promé mayornan humano. Pero kico ta pasa cu nos ora nos muri?