-
Kiko e Reino di Dios Ta?Bo Por Disfrutá di Bida pa Semper!—Kurso di Beibel Interaktivo
-
-
7. E leinan di e Reino di Dios ta mihó ku e leinan di gobièrnu humano
Por lo general, gobièrnu ta traha lei pa yuda i protehá su pueblo. E Reino di Dios tambe tin lei pa hende ku lo biba bou di su gobernashon. Lesa 1 Korintionan 6:9-11. Despues, analisá e siguiente preguntanan:
Kon bo ta kere mundu lo ta ora tur hende ta obedesé e leinan di Dios?a
Bo ta kere ta bon ku Yehova ta ferwagt pa hende ku ta biba bou di su Reino obedesé su leinan? Dikon bo ta pensa asina?
Kiko ta mustra ku hende ku no ta obedesé e leinan akí por kambia?—Wak versíkulo 11.
Un gobièrnu ta traha lei pa protehá i kuida su pueblo. E leinan ku e Reino di Dios tin pa protehá i kuida hende ku ta bou di su gobernashon ta mihó ku e leinan di gobièrnu humano
-
-
Kiko Beibel Ta Bisa Tokante Sèks?Bo Por Disfrutá di Bida pa Semper!—Kurso di Beibel Interaktivo
-
-
LÈS 41
Kiko Beibel Ta Bisa Tokante Sèks?
Hopi hende ta sinti nan mes inkómodo pa papia tokante sèks. Pero ora Beibel ta papia tokante sèks, e ta papia di dje na un manera habrí i respetuoso. Loke Beibel ta bisa tokante sèks ta benefisiá nos. Esei no ta nada straño pasobra Beibel ta bini di Yehova, nos Kreador. Anto Yehova sa kiko ta mihó pa nos. Yehova ta bisa nos kiko nos tin ku hasi pa agrad’é i kiko lo yuda nos disfrutá di bida pa semper.
1. Kiko ta Yehova su punto di bista tokante sèks?
Sèks ta un bunita regalo di Yehova. Yehova ke pa un hòmber i un muhé ku ta kasá ku otro disfrutá di e regalo ei. Sèks no solamente ta permití un pareha haña yu, sino tambe e ta permití nan demostrá nan amor i kariño na otro i ta laga nan sinti e plaser ku esei ta trese kuné. P’esei, Beibel ta bisa: “Alegrá huntu ku bo esposa ku ta ku bo for di bo hubentut.” (Proverbionan 5:18, 19) Yehova ta ferwagt pa ora un pareha kristian kasa, nan keda fiel na otro. P’esei, nunka nan lo pensa pa kometé adulterio.—Lesa Hebreonan 13:4.
2. Kiko ta inmoralidat seksual?
Beibel ta bisa ku hende ku ta kometé fornikashon, òf inmoralidat seksual, “lo no risibí e Reino di Dios.” (1 Korintionan 6:9, 10) E eskritornan ku a skirbi buki di Beibel na griego a usa e palabra pornéia pa referí na inmoralidat seksual. E palabra pornéia ta inkluí (1) relashon seksual entre dos hende ku no ta kasá ku otro,a (2) homoseksualidat i (3) relashon seksual ku bestia. Ora nos ta “apstené di fornikashon,” nos ta hasi Yehova Dios kontentu i ta benefisiá nos mes.—1 Tesalonisensenan 4:3.
KIKO MAS NOS POR SIÑA?
Haña sa kon bo por evitá inmoralidat seksual i kon lo bo benefisiá ora bo keda moralmente limpi.
3. Hui di inmoralidat seksual
Yósef, un sirbidó fiel di Dios di pasado, a nenga di tene relashon seksual ku un muhé ku a pidié pa drumi kuné. Lesa Génesis 39:1-12. Despues, analisá e siguiente preguntanan:
Kiko a motivá Yósef pa hui bai for di e muhé?—Wak versíkulo 9.
Bo ta kere ku Yósef a hasi loke ta korekto? Dikon bo ta pensa esei?
Kon un hóben awe por imitá Yósef i hui di inmoralidat seksual? Pasa e VIDIO.
Yehova ke pa nos rechasá tur práktika inmoral. Lesa 1 Korintionan 6:18. Despues, analisá e siguiente preguntanan:
Ki situashon por hiba un hende na kometé inmoralidat seksual?
Kon bo por hui di inmoralidat seksual?
4. Bo por resistí e tentashon pa kometé inmoralidat seksual
Ki ora por bira difísil pa resistí e tentashon pa kometé inmoralidat seksual? Pasa e VIDIO. Despues, analisá e siguiente pregunta:
Kiko e ruman hòmber den e vidio a hasi ora el a realisá ku algun kos ku e tabata pensa i hasi por a strob’é di keda fiel na su kasá?
Tin biaha, asta kristian fiel ta lucha kontra pensamentu robes. Kiko bo por hasi pa evitá ku bo ta keda pensa riba kos inmoral? Lesa Filipensenan 4:8. Despues, analisá e siguiente preguntanan:
Ki tipo di kos nos mester pensa riba dje?
Ora nos ta lesa Beibel i ta keda okupá den sirbishi di Yehova, kon esei por yuda nos resistí tentashon pa kometé piká?
5. E normanan di Yehova ta benefisiá nos
Yehova sa kiko ta mihó pa nos. Yehova ta bisa nos kon pa keda moralmente limpi i kiko ta e benefisionan ora nos hasi esei. Lesa Proverbionan 7:7-27 òf pasa e VIDIO. Despues, analisá e siguiente preguntanan:
Kon bini e hóben a hañ’é den un situashon peligroso?—Wak Proverbionan 7:7-9.
Segun Proverbionan 7:23 i 26, inmoralidat seksual por tin konsekuensia serio. Ki problema nos por evitá ora nos keda moralmente limpi?
Si nos keda moralmente limpi, kon esei lo yuda nos disfrutá di bida pa semper?
Tin hende ta pensa ku loke Beibel ta bisa tokante homoseksualidat no ta amoroso. Pero, Yehova ta un Dios di amor i e ke pa tur hende disfrutá di bida pa semper. Anto pa nos por biba pa semper, nos tin ku biba segun su normanan. Lesa 1 Korintionan 6:9-11. Despues, analisá e siguiente pregunta:
Segun e teksto akí, ta deseo homoseksual so Dios ta haña malu?
Pa agradá Dios, nos tur mester hasi kambio. E esfuerso ei ta bale la pena? Lesa Salmo 19:8, 11. Despues, analisá e siguiente preguntanan:
Bo ta kere ku e normanan moral di Yehova ta difísil pa kumpli kuné? Dikon sí, òf dikon nò?
Yehova a yuda hopi hende pa obedesé su leinan moral i e por yuda abo tambe
LOKE HENDE SA BISA: “Dos hende por hasi sèks basta nan ta stima otro.”
Kiko lo bo por bisa un hende ku bisa esei?
RESÚMEN
Sèks ta un regalo di Yehova. Yehova ke pa un hòmber i un muhé ku ta kasá ku otro disfrutá di relashon seksual.
Repaso
Ki práktika ta kai bou di inmoralidat seksual?
Kiko lo yuda nos evitá inmoralidat seksual?
Ora nos ta biba segun Yehova su normanan moral, kon esei ta benefisiá nos?
MAS INFORMASHON INTERESANTE
Wak dikon Dios ke pa un hòmber i un muhé kasa promé ku nan biba huntu.
“Kiko Beibel Ta Bisa Tokante Bibamentu Huntu Sin Kasa?” (artíkulo riba jw.org)
Haña sa dikon e echo ku Beibel ta bisa ku homoseksualidat ta malu no ta nifiká ku nos mester odia hende homoseksual.
Wak kon e leinan di Dios ku tin di haber ku sèks ta protehá nos.
Lesa e artíkulo “Nan A Trata Mi ku Dignidat” pa wak kiko a motivá un hòmber ku tabata homoseksual pa hasi kambio den su bida pa agradá Dios.
“Beibel Ta Kambia Bida di Hende” (E Toren di Vigilansia di 1 di aprel 2011, na spañó)
a Esaki ta inkluí un variedat di práktika i no ta referí na relashon seksual so, sino tambe na, por ehèmpel, sèks oral i anal i karisiamentu di un persona su órganonan seksual.
-
-
Kiko Beibel Ta Bisa Tokante Bebementu di Alkohòl?Bo Por Disfrutá di Bida pa Semper!—Kurso di Beibel Interaktivo
-
-
LÈS 43
Kiko Beibel Ta Bisa Tokante Bebementu di Alkohòl?
Rònt mundu, hende tin vários opinion tokante alkohòl. Algun hende sa bebe alkohòl ora nan ta pasa tempu ku nan amigunan. Anto tin hende ku ta skohe pa no bebe alkohòl mes. Di otro banda, tin hende ta bebe asina tantu ku nan ta bira fuma. Kiko Beibel ta bisa tokante alkohòl?
1. Ta malu pa bebe bibida alkohóliko?
Beibel no ta bisa ku ta malu pa bebe alkohòl. De echo, ora Beibel ta menshoná vários di e kosnan bon ku Dios a duna nos, e ta menshoná tambe “biña ku ta hasi hende su kurason kontentu.” (Salmo 104:14, 15) Beibel ta asta menshoná algun fiel sirbidó di Dios ku a bebe bibida alkohóliko.—1 Timoteo 5:23.
2. Ki konseho Beibel tin pa hende ku skohe pa bebe alkohòl?
Yehova ta kondená bebementu di mas i buracheria. (Galationan 5:21) Beibel ta bisa: “No anda ku hende ku ta bebe demasiado biña.” (Proverbionan 23:20) Pues, si nos skohe pa bebe alkohòl, sea huntu ku otro hende òf nos so, nos no mester bebe te na e punto ku nos no por pensa kla mas ni no por kontrolá loke nos ta bisa i hasi. Ademas, nos no mester bebe asina tantu te ku nos ta daña nos salú. Si nos ta sinti ku nos no por kontrolá nos bebementu di alkohòl, ta mihó nos stòp di bebe.
3. Kon nos por mustra ku nos ta respetá e desishonnan ku otro hende ta tuma relashoná ku alkohòl?
Kada persona mester disidí si nan ke bebe alkohòl òf nò. Nos no mester husga un persona ku disidí di bebe alkohòl na un manera moderá ni nos no mester preshoná un persona ku no ke bebe alkohòl. (Romanonan 14:10) Anto si nos bebementu di alkohòl lo por laga hende rònt di nos sinti nan inkómodo, ta mihó nos skohe pa no bebe. (Lesa Romanonan 14:21.) Nos ta buska “no [nos] mes benefisio, sino esun di e otro persona.”—Lesa 1 Korintionan 10:23, 24.
KIKO MAS NOS POR SIÑA?
Laga nos wak algun prinsipio di Beibel ku lo yuda bo disidí si bo ta bebe alkohòl òf nò i kuantu lo bo bebe si bo disidí di hasi esei. Ademas, wak kiko bo por hasi si bo tin problema ku bebementu di mas.
4. Disidí si bo ta bebe alkohòl òf nò
Kiko Hesus a pensa tokante bebementu di alkohòl? Pa bo por haña kontesta pa e pregunta ei, tuma nota di e promé milager ku Hesus a hasi. Lesa Huan 2:1-11. Despues, analisá e siguiente preguntanan:
For di loke bo a kaba di lesa, kiko Hesus tabata pensa tokante alkohòl i tokante hende ku ta bebe alkohòl?
Hesus no a kondená bebementu di alkohòl. Pues, kon un kristian mester mira un persona ku ta skohe pa bebe alkohòl?
E echo ku un kristian por skohe pa bebe alkohòl no ta nifiká ku ta semper sabí pa e hasi esei. Lesa Proverbionan 22:3. Despues, analisá si ta sabí pa bebe den e siguiente situashonnan:
Bo tin ku traha ku un mashin òf kore outo.
Bo ta na estado.
Dòkter a konsehá bo pa no bebe alkohòl.
Bo tin problema pa kontrolá e kantidat di alkohòl ku bo ta bebe.
Lei di e pais ta prohibí bo di bebe alkohòl.
Bo ta huntu ku un persona ku ta skohe pa no bebe alkohòl debí ku den pasado e tabatin problema ku bebementu di mas.
Bo mester sirbi alkohòl na kasamentu òf otro evento sosial? Pasa e VIDIO pa wak kiko ta algun punto ku bo tin ku tene kuenta kuné.
Lesa Romanonan 13:13 i 1 Korintionan 10:31, 32. Despues di lesa kada teksto, analisá e siguiente pregunta:
Si bo apliká e prinsipio akí, kon esei por yuda bo tuma un desishon ku ta hasi Yehova kontentu?
Kada kristian por disidí pa su mes si e ta bebe alkohòl òf nò. Asta ora un kristian skohe pa bebe alkohòl na sierto momento, por tin otro momento ku e ta skohe pa no hasi esei
5. Disidí kuantu alkohòl lo bo bebe
Si bo skohe pa bebe bibida alkohóliko, bo tin ku kòrda ku aunke Yehova no ta kondená bebementu di alkohòl, e ta kondená bebementu di mas sí. Dikon? Lesa Oséas 4:11, 18. Despues, analisá e siguiente pregunta:
Kiko por pasa ku un persona ku bebe di mas?
Kiko por yuda nos evitá di bebe di mas? Nos mester ta modesto, ku otro palabra, nos mester ta konsiente di nos limitashonnan. Lesa Proverbionan 11:2. Despues, analisá e siguiente pregunta:
Dikon ta bon pa bo pone límite na e kantidat di alkohòl ku bo ta bebe?
6. Kiko por yuda un persona stòp di bebe di mas?
Wak kiko a yuda un hòmber stòp di bebe di mas. Pasa e VIDIO. Despues, analisá e siguiente preguntanan:
Kon Dmitry tabata bira ora e bebe alkohòl?
Dmitry por a stòp mesora ku su hábito di bebe alkohòl?
Kon Dmitry a logra vense su adikshon na alkohòl?
Lesa 1 Korintionan 6:10, 11. Despues, analisá e siguiente preguntanan:
Kiko Beibel ta bisa tokante buracheria?
Kon nos por sa ku hende ku ta bebe di mas por kambia?
Lesa Mateo 5:30. Despues, analisá e siguiente pregunta:
Ora Hesus a menshoná kapmentu di man den e ilustrashon akí, e kier a mustra ku tin biaha nos mester hasi sakrifisio pa agradá Yehova. Si bo ta haña difísil pa stòp di bebe di mas, kiko bo por hasi?a
Lesa 1 Korintionan 15:33. Despues, analisá e siguiente pregunta:
Kiko lo ta e resultado si bo ta anda ku hende ku ta bebe di mas?
SI UN HENDE PUNTRA: “Ta malu pa bebe alkohòl?”
Kiko lo bo kontestá?
RESÚMEN
Yehova a duna hende alkohòl pa nan disfrutá di dje, pero e ta kondená bebementu di mas i buracheria.
Repaso
Kiko Beibel ta bisa tokante bebementu di alkohòl?
Kiko ta e peliger di bebementu di mas?
Kon nos por respetá e desishonnan ku otro hende ta tuma relashoná ku bebementu di alkohòl?
MAS INFORMASHON INTERESANTE
Kon un tiner por tuma bon desishon ora ta trata di alkohòl?
Wak kiko ta algun kos ku bo por hasi pa stòp ku bebementu di mas.
“Tene Alkohòl na Su Debido Lugá” (E Toren di Vigilansia di 1 di yanüari 2010)
Ta bon pa un kristian brinda?
“Pregunta di Lektor” (E Toren di Vigilansia di 15 di febrüari 2007)
Lesa e relato “Mi Tabata Manera un Barí sin Bòm” pa wak kon un hòmber a stòp ku bebementu di mas.
“Beibel Ta Kambia Bida di Hende” (E Toren di Vigilansia di 1 di mei 2012, na spañó)
a Hende ku ta adikto na alkohòl kisas mester di yudansa profeshonal pa nan por stòp. Segun hopi dòkter, hende ku tabatin problema ku bebementu di alkohòl den pasado no mester bebe mes.
-
-
Kiko si Bo A Kometé un Piká Serio?Bo Por Disfrutá di Bida pa Semper!—Kurso di Beibel Interaktivo
-
-
Tin biaha, lo bo kometé fayo apesar ku bo ta stima Yehova hopi i ta hasi esfuerso pa evitá di hasié tristu. Sinembargo, algun piká ta mas serio ku otro. (1 Korintionan 6:9, 10) Si bo a kometé un piká serio, kòrda esaki: Yehova no a stòp di stima bo, i e ta kla pa pordoná bo i yuda bo.
1. Kiko nos mester hasi pa Yehova pordoná nos?
Hende ku ta stima Yehova ta bira masha tristu ora nan realisá ku nan a kometé un piká serio. Pero Yehova ta konsolá nan ku e promesa ku el a hasi na su pueblo: “Maske boso pikánan ta kòrá manera sanger, nan lo bira blanku manera sneu.” (Isaías 1:18) Si nos arepentí di kurason, Yehova lo pordoná nos kompletamente. Kon nos ta demostrá ku nos a arepentí? Nos ta demostrá esei ora nos ta sinti duele profundo pa loke nos a hasi, ta stòp di hasi loke ta malu i ta pidi Yehova pa pordoná nos. Despues, nos ta hasi tur nos esfuerso pa kambia kualke mal pensamentu òf hábito ku a hiba nos na kometé e piká. Anto, nos ta sigui hasi esfuerso pa biba di akuerdo ku Yehova su normanan moral limpi.—Lesa Isaías 55:6, 7.
2. Kon Yehova ta usa e ansianonan pa yuda nos ora nos peka?
Si nos kometé un piká serio, Yehova ta bisa nos pa “yama e ansianonan di kongregashon.” (Lesa Santiago 5:14, 15.) E ansianonan ta stima Yehova i su karnénan. Nan a siña kon pa yuda nos drecha nos relashon ku Yehova.—Galationan 6:1.
Kon e ansianonan ta yuda nos si nos kometé un piká serio? Dos òf tres ansiano lo usa teksto di Beibel pa mustra nos dikon loke nos a hasi ta robes. Ademas, nan lo duna nos bon konseho i animashon ku por yuda nos pa no bolbe kometé piká serio. Si un persona ku a kometé piká serio no arepentí, e ansianonan lo saká e persona akí for di e kongregashon pa e no influensiá otro hende.—1 Korintionan 5:13.
KIKO MAS NOS POR SIÑA?
Haña mas apresio pa e manera ku Yehova ta yuda nos si nos kometé un piká serio.
3. Ora nos konfesá nos piká, nos por drecha nos amistat ku Yehova
Kualke piká ku nos kometé ta duel Yehova. P’esei, nos tin ku konfesá na dje. Lesa Salmo 32:1-5. Despues, analisá e siguiente pregunta:
Dikon ta bon pa nos konfesá nos pikánan na Yehova na lugá di purba di skonde nan?
Ora nos pidi e ansianonan pa yudansa despues ku nos a konfesá nos pikánan na Yehova, nos lo sinti nos mihó. Pasa e VIDIO. Despues, analisá e siguiente pregunta:
Kon e ansianonan a yuda Canon bolbe serka Yehova?
Ora nos ta papia ku e ansianonan, nos mester ta habrí i onesto ku nan pasobra nan t’ei pa yuda nos. Lesa Santiago 5:16. Despues, analisá e siguiente pregunta:
Dikon ta mas fásil pa e ansianonan yuda nos ora nos ta onesto ku nan?
Konfesá bo piká, sea onesto ku e ansianonan i aseptá Yehova su yudansa amoroso
4. Yehova ta mustra miserikòrdia na hende ku peka
Si un persona ku a kometé un piká serio ta nenga di obedesé Yehova su normanan, e ta ser saká for di e kongregashon. Nos no ta pasa tempu mas ku e persona ei, pero nos por kumind’é brevemente. Lesa 1 Korintionan 5:6, 11. Despues, analisá e siguiente pregunta:
Meskos ku zürdeg ta fermentá henter un mansa, kon pasamentu di tempu ku un pekadó ku no a arepentí ta afektá e kongregashon?
Pa imitá e miserikòrdia di Yehova, e ansianonan ta hasi tur nan esfuerso pa yuda hende ku a ser saká for di e kongregashon. Hopi hende ku a ser saká for di e kongregashon a bini bèk. Dikon? Wèl, aunke e disiplina ku nan a risibí tabata doloroso, e disiplina a yuda nan realisá ku loke nan a hasi tabata robes.—Salmo 141:5.
Kon e manera ku Yehova ta trata hende ku a peka ta demostrá ku e ta rasonabel, miserikòrdioso i amoroso?
5. Yehova ta pordoná nos ora nos arepentí di nos piká
Hesus a usa un ilustrashon ku ta laga nos komprondé kon Yehova ta sintié ora un persona arepentí. Lesa Lukas 15:1-7. Despues, analisá e siguiente pregunta:
Kiko e ilustrashon akí ta siña bo tokante Yehova?
Lesa Ezekiel 33:11. Despues, analisá e siguiente pregunta:
Ki paso importante nos tin ku tuma pa demostrá ku di bèrdat nos a arepentí?
Meskos ku un wardadó di karné ta stima su karnénan, Yehova tambe ta stima su karnénan mashá
LOKE HENDE SA BISA: “Mi tin miedu di papia ku e ansianonan tokante mi piká, pasobra nan lo saka mi for di e kongregashon.”
Kiko lo bo bisa un hende ku ta pensa asina?
RESÚMEN
Si nos a kometé un piká serio pero nos ta sinti duele profundo pa loke nos a hasi i nos ta determiná pa no bolbe kometé e piká ei, Yehova lo pordoná nos.
Repaso
Dikon ta bon pa nos konfesá nos pikánan na Yehova?
Kiko nos mester hasi pa Yehova pordoná nos nos pikánan?
Si nos a kometé un piká serio, dikon ta bon pa nos buska yudansa serka e ansianonan?
MAS INFORMASHON INTERESANTE
Wak kon un hòmber a eksperensiá e miserikòrdia di Yehova ku Isaías 1:18 ta deskribí.
Kon e ansianonan ta purba di yuda un persona ku a kometé un piká serio?
Wak kon e ansianonan ta mustra amor i miserikòrdia na un persona ku no a arepentí.
Den e historia di bida “Mi Mester A Bolbe Serka Yehova,” wak kon un hòmber ku a bandoná e bèrdat a sinti ku Yehova tabata ke pa e bolbe serka dje.
“Beibel Ta Kambia Bida di Hende” (E Toren di Vigilansia di 1 di aprel 2012, na spañó)
-