Con Dios A Inspirá Bijbel?

COMUNICACION ta mas fasinante awe cu na cualkier otro tempu den historia. Telefon, fax, computer—hopi aña pasá, ken por a imaginá nan mes un tempu ora mensahenan lo a ser transmití prácticamente tur caminda rond mundu instantáneamente.

Pero e clase di comunicacion mas intrigante ta unu cu hende no por dominá—inspiracion divino. Jehova a inspirá rond di 40 escritor humano pa producí su Palabra skirbí, Bijbel Santu. Mescos cu hende tin mas cu un medio di comunicacion na nan disposicion, asina Jehova a usa vários método di comunicacion pa inspirá e Scritura.

Dictado. Dios a comunicá mensahenan specífico cu mas despues a ser poné den e registro bíblico.a Tuma, por ehempel, e regulacionnan cu a forma e pacto di Ley. “Skirbi e palabranan aki pa bo mes,” Jehova a bisa Moises, “pasobra ta conforme e palabranan aki cu di berdad mi ta cera un pacto cu bo i cu Israel.” (Exodo 34:27) Moises a copia e “palabranan” ei, cu a ser “transmití dor di angelnan,” i awor nos por haña nan den e bukinan bíblico di Exodo, Levítico, Númeronan i Deuteronomio.—Echonan 7:53.

Hopi otro profeta, incluyendo Isaías, Jeremías, Ezekiel, Amos, Nahum i Mikéas, a ricibí mensahenan specífico for di Dios atrabes di angelnan. Algun biaha e hombernan aki a cuminsá nan pronunciacionnan cu e frase: “Esaki ta loke Jehova a bisa.” (Isaías 37:6; Jeremías 2:2; Ezekiel 11:5; Amos 1:3; Mikéas 2:3; Nahum 1:12) E ora ei nan a pone loke Dios a bisa por escrito.

Vision, Soño i Trans. Un vision ta un representacion, esena of mensahe cu a cubri un persona su mente miéntras e ta lantá, generalmente dor di un of otro manera extraordinario. Por ehempel, Pedro, Santiago i Juan, “ora nan a lanta completamente,” a mira un vision di Jesus transfigurá. (Lucas 9:28-36; 2 Pedro 1:16-21) Den algun caso un mensahe a ser transmití den un soño, of vision di anochi, siendo grabá den e subconciencia di esun cu ta ricibié ora e tabata na soño. P’esei Daniel ta skirbi di “e visionnan di mi cabes riba mi cama”—of, manera e traductor Ronald A. Knox ta traducié, “segun cu mi tabata drumi ta wak den mi soño.”—Daniel 4:10.

Un persona cu Jehova a hinca den un trans evidentemente a ser absorbá den un condicion di concentracion profundo, aunke por lo ménos parcialmente lantá. (Compará cu Echonan 10:9-16.) Den Bijbel e palabra griego traducí “trans” (ekʹsta·sis) ta nificá ‘warda na un caminda of pone na un lugá ekibocá.’ E ta duna idea di saca e mente for di su condicion normal. Pues, un persona den un trans lo ta inconciente di loke ta pasa rond di dje miéntras cu e ta plenamente receptivo p’e vision. Apostel Pablo tabata probablemente den un trans asina ora el a ser “hibá den paradijs i a tende palabranan inexpresabel cu no ta legal pa un hende papia.”—2 Corintionan 12:2-4.

Na contraste cu esnan cu a transcribí mensahenan cu Dios a dicta, escritornan di Bijbel cu a ricibí vision of soñonan of cu a experenciá trans hopi biaha, tabatin algun libertad pa describí den nan propio palabra loke nan a mira. Dios a bisa Habacuc: “Skirbi e vision, i pon’é cu claridad riba tablanan, pa esun cu ta lesa na bos haltu for di dje por haci esei cu afluencia.”—Habacuc 2:2.

Esaki ta nificá cu e partinan aki di Bijbel di un manera of otro ta ménos inspirá cu pasashinan cu a ser dictá? Di ningun manera. Mediante su spiritu, Jehova a fiha su mensahenan firmemente den mente di cada escritor, di manera cu e pensamentunan di Dios i no esnan di hende a ser transmití. Aunke Jehova a permití e escritor selectá palabranan apropiado, el a guia e mente i curason dje escritor afin cu ningun parti esencial a ser omití i e resultado final lo tabata cu e palabranan a ser considerá corectamente como di Dios.—1 Tesalonicensenan 2:13.

Revelacion Divino. Bijbel ta contené profecia—historia revelá i skirbí di antemano—cu ta hopi mas ayá cu simpel capacidad humano. Un ehempel ta e subida i caida di “e rey di Grecia,” Alexander de Grote, predicí mas o ménos 200 aña di antemano! (Daniel 8:1-8, 20-22) Tambe Bijbel ta revelá sucesonan cu wowo humano no a mira nunca. E creacion di shelu i tera ta un ehempel. (Génesis 1:1-27; 2:7, 8) Tambe tin combersacionnan cu a tuma lugá den shelu, manera esnan cu e buki di Job ta informá di dje.—Job 1:6-12; 2:1-6.

Si Dios no a revelá e sucesonan ei directamente n’e escritor, el a duna nan di conocé na un hende di manera cu esakinan a bira parti dje historia oral of skirbí, a pasa nan di un generacion p’e siguiente te ora nan a bira parti dje registro bíblico. (Mira cuadro na página 7.) Di tur manera, nos por tin sigur cu Jehova tabata e Fuente di tur e informacion ei, i el a guia e escritornan di manera cu nan relatonan no a ser corumpí cu inexactitud, exageracion of mito. Pedro a skirbi en coneccion cu profecia: “Hende a papia di parti di Dios segun cu nan a ser hibá pa spiritu santu.”b—2 Pedro 1:21.

Esfuerso Diligente Ta Necesario

Aunke e escritornan di Bijbel “a ser hibá pa spiritu santu,” asina mes nan mester a pensa cuidadosamente tocante loke nan a skirbi. Por ehempel, Sálomon “a meditá i a haci scudriñamentu cabal, p’e por a areglá hopi proverbio ordenadamente. [El] a busca pa haña e palabranan deleitabel i e skirbimentu di palabranan corecto dje berdad.”—Eclesiástes 12:9, 10.

Algun escritor di Bijbel tabatin cu haci bastante investigacion pa documentá nan material. Lucas, por ehempel, a skirbi tocante su relato di Evangelio: “Mi a investigá tur cos desde principio cu exactitud, pa skirbi nan den órden lógico.” Naturalmente, e spiritu di Dios a bendicioná Lucas su esfuersonan, sin duda moviend’e p’e localisá documentonan histórico confiabel i pa entrevistá testigonan ocular confiabel, manera e disipelnan cu ainda tabata na bida i posiblemente Jesus su mama, Maria. Anto e spiritu di Dios lo a guia Lucas p’e registrá e informacion den forma exacto.—Lucas 1:1-4.

Na contraste cu e Evangelio di Lucas, esun di Juan tabata di un testigo ocular, skirbí rond di 65 aña despues cu Jesus a muri. E spiritu di Jehova sin duda a haci Juan su memoria skerpi di manera cu e no a ser debilitá cu pasamentu di tempu. Esaki tabata na armonia cu loke Jesus a primintí su siguidónan: “E yudante, e spiritu santu, cu e Tata lo manda den mi nomber, esei lo siña boso tur cos i haci boso corda tur loke mi a bisa boso.”—Juan 14:26.

Den algun caso escritornan di Bijbel a incluí compilacionnan di documentonan di escritornan histórico di promé cu tabata testigonan ocular, di ken no tur tabata inspirá. Jeremías a compilá gran parti di Promé i Segundo Reynan den e manera aki. (2 Reynan 1:18) Esdras a referí na por lo ménos 14 fuente no-inspirá pa reuní material pa Promé i Segundo Crónicanan, incluyendo “e relato dje asuntunan dje dianan di Rey David” i “e Buki dje Reynan di Huda i di Israel.” (1 Crónicanan 27:24; 2 Crónicanan 16:11) Moises asta a cita for di “e buki dje Gueranan di Jehova”—aparentemente un registro confiabel dje gueranan dje pueblo di Dios.—Númeronan 21:14, 15.

Den e casonan ei spiritu santu tabata activamente enbolbí, moviendo escritornan di Bijbel pa selectá solamente material confiabel, cu e ora ei a bira parti dje registro inspirá di Bijbel.

Conseho Práctico—For di Ken?

Bijbel ta contené un abundancia di conseho práctico basá riba observacionnan personal penetrante. Por ehempel, Sálomon a skirbi: “Pa loke ta un hende, no tin nada mas mihó cu e come i en berdad bebe i laga su alma mira e bon pa motibu di su trabou duru. Esaki tambe mi a mira, asta ami, cu esaki ta bini for dje man di e Dios berdadero.” (Eclesiástes 2:24) Pablo a declará cu su conseho tocante matrimonio tabata “segun [su] opinion,” aunke el a agregá: “Siguramente mi ta kere cu mi tambe tin e spiritu di Dios.” (1 Corintionan 7:25, 39, 40) Pablo siguramente tabatin e spiritu di Dios, pasobra manera apostel Pedro a mencioná, loke Pablo a skirbi tabata “segun e sabiduria duná na dje.” (2 Pedro 3:15, 16) Dje manera ei, bou di guia dje spiritu di Dios, e tabata dunando su opinion.

Ora escritornan di Bijbel a expresá tal conviccionnan personal, nan a haci esei despues cu nan mes a studia i aplicá e textonan cu tabata disponibel na nan. Nos por ta sigur cu nan skirbimentunan tabata na armonia cu e pensamentu di Dios. Loke nan a registrá a bira parti dje Palabra di Dios.

Claro cu Bijbel ta contené declaracionnan di algun persona kende nan pensamentunan tabata eróneo. (Compará Job 15:15 cu 42:7.) Tambe e ta incluí un par di expresion cu a transmití e sintimentunan di angustia di sirbidónan di Dios, aunke e declaracionnan ei no a transmití e cuadro completo di asuntunan.c Aunke e escritor a haci declaracionnan personal asina, tog tabata e spiritu di Dios cu a gui’é pa haci un registro exacto, cu a sirbi pa identificá i exponé razonamentu robes. Ademas, den cada caso e contexto ta clarificá pa cualkier lector razonabel si e pensamentu dje escritor ta válido.

En resúmen, nos por tin confiansa cu henter e Bijbel ta e mensahe di Dios. En berdad, Jehova a haci sigur pa tur loke e ta contené cuadra cu su propósito i suministrá instruccion esencial pa esnan cu ta deseá di sirbié.—Romanonan 15:4.

Escritornan Humano—Pakico?

E echo cu Jehova a usa hende pa skirbi Bijbel ta mustra su gran sabiduria. Considerá esaki: Si Dios a delegá e asuntu na angelnan, Bijbel lo tabata mes atractivo? Ta cierto cu lo ta excitante pa lesa di Dios su cualidadnan i tratonan for di un punto di bista di angel. Pero si tabata falta e elemento humano completamente, nos lo por tin dificultad pa capta e mensahe di Bijbel.

Pa ilustrá: Bijbel por a simplemente informá cu Rey David a cometé adulterio i homicidio i cu despues di esei el a repentí. Sin embargo, ta cuantu mas mihó pa haña David su mes palabranan, ora el a expresá angustia aplastante tocante su accionnan i a roga Jehova pa su pordon! “Mi picá ta dilanti mi constantemente,” el a skirbi. “Un curason kibrá i aplastá, O Dios, lo bo no despreciá.” (Salmo 51:3, 17) P’esei, Bijbel tin e calor, variedad i atraccion cu e elemento humano ta dun’é.

Sí, Jehova a scoge e manera di mas excelente pa duna nos su Palabra. Maske el a usa hende cu debilidad, nan a ser hibá pa spiritu santu di manera cu no tabatin eror den nan skirbimentunan. P’esei, Bijbel tin balor superlativo. Su conseho ta sano, i su profecianan relacioná cu e futuro Paradijs riba tera ta confiabel.—Salmo 119:105; 2 Pedro 3:13.

Pakico no hacié un custumber pa lesa un porcion dje Palabra di Dios tur dia? Pedro a skirbi: “Desaroyá un anhelo p’e lechi no-adulterá cu ta pertenecé n’e palabra, pa mediante dje boso por crece te na salbacion.” (1 Pedro 2:2) Siendo cu e ta inspirá pa Dios, lo bo haña cu henter e Scritura ta “probechoso pa siña, pa reprendé, pa rectificá cosnan, pa disipliná den husticia, pa e hende di Dios por ta plenamente competente, completamente ekipá pa tur bon obra.”—2 Timoteo 3:16, 17.

[Nota]

[Kuadro/Plachinan na página 7]

Unda Moises A Haña Su Informacion?

MOISES a skirbi e buki bíblico di Génesis, pero tur loke el a registrá a tuma lugá hopi tempu promé cu el a nace. Di unda, anto, el a haña tal informacion? E por a ser revelá na dje directamente dor di Dios, of conocimentu di algun dje sucesonan lo por a pasa oralmente di un generacion pa otro. Siendo cu hende tabata biba mas largu den e tempu cu humanidad a cuminsá existí, hopi di loke Moises a registrá den Génesis por a ser pasá di Adam pa Moises mediante solamente cincu persona kendenan a biba despues di otro, cubriendo otro su bida parcialmente—Metúsalem, Sem, Isaac, Levi i Amram.

Ademas, kisas Moises a consultá registronan skirbí. En coneccion cu esaki, ta notabel cu frecuentemente Moises ta usa e frase “esaki ta e historia di,” promé cu e mencioná e persona cu ta ser considerá. (Génesis 6:9; 10:1; 11:10, 27; 25:12, 19; 36:1, 9; 37:2) Algun erudito ta bisa cu e palabra hebreo aki traducí como “historia,” toh·le·dhohthʹ, ta referí na un documento histórico skirbí ya existente cu Moises a usa como un fuente pa su skirbimentu. Naturalmente, nos no por bisa esaki cu tur siguridad.

Por ta cu Moises a obtené e informacion cu e buki di Génesis ta contené dor di tur e tres métodonan mencioná ariba—algun dor di revelacion directo, algun dor di transmision oral, i algun for di registronan skirbí. E punto importante ta cu e spiritu di Jehova a inspirá Moises. P’esei, loke el a skirbi por ser considerá corectamente como e palabra di Dios.

[Plachi na página 4]

Den vários manera, Dios a inspirá hende pa skirbi Bijbel