Hòmbernan, Boso Ta Sumiso na Kristu Komo Boso Kabes?

“Kristu ta e kabes di tur hòmber.”​—1 KOR. 11:3.

1. Kiko ta mustra ku Yehova ta un Dios di òrdu?

“REVELASHON 4:11 ta bisa: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” Debí ku Yehova Dios a krea tur kos, e ta e Soberano Supremo di universo i tin outoridat riba tur loke el a krea. E manera ku Yehova a organisá su famia selestial ta laga nos mira ku e ‘no ta Dios di desòrdu, pero Dios di pas.’​—1 Kor. 14:33, BPK; Isa. 6:​1-3; Heb. 12:​22, 23.

2, 3. (a) Ken tabata Yehova su promé kreashon? (b) Kiko e Skritura ta bisa tokante e posishon di e Tata i di su Primogénito?

² Promé ku Dios a kuminsá krea, e so tabata eksistí pa un kantidat inkontabel di siglo. Su promé kreashon tabata e kriatura spiritual, kende a bira konosí komo “e Palabra” pasobra e tabata e Bosero di Yehova. E Palabra a yuda traha tur otro kos. Despues, el a bini na tera komo un hòmber perfekto i a bira konosí komo Hesukristu.​—Lesa Juan 1:​1-3 i 14.

³ Kiko e Skritura ta bisa tokante e posishon di Dios i di su Primogénito? Bou di inspirashon apòstel Pablo a skirbi: “Mi kier pa boso komprondé ku Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.” (1 Kor. 11:3) Pues, e Tata ta kabes di Kristu. Pa por tin òrdu i pas entre kriaturanan inteligente, mester tin personanan ku ta na kabes i otronan ku ta sumiso. Sí, asta esun ‘pa medio di ken tur kos a wòrdu kreá’ mester someté su mes na Dios komo su kabes.​—Kol. 1:16.

4, 5. Kon Hesus a mira sumishon na Yehova?

⁴ Kon Hesus a mira sumishon na Yehova komo su kabes i e echo ku e mester a bini na tera? E Skritura ta bisa: “Kristu Hesus, kende, ounke ku e tabata eksistí den e forma di Dios, no a konsiderá igualdat ku Dios algu pa tene na dje, ma a bandoná su mes gloria, tumando forma di un sirbidó, siendo trahá den e semehansa di hende. I hañando su mes den kondishon di hende, el a humiá su mes dor di bira obedesidu te na morto.”​—Fil. 2:​5-8.

⁵ Semper Hesus a someté su mes humildemente na boluntat di su Tata. El a bisa: “Mi no por hasi nada di mi mes. . . . Mi husgamentu ta hustu, pasobra mi no ta buska mi mes boluntat, sino e boluntat di esun ku a manda mi.” (Juan 5:30) Ademas, el a deklará: “Semper mi ta hasi e kosnan ku ta agradá [mi Tata].” (Juan 8:29) I na final di Hesus su bida riba tera, el a bisa su Tata den orashon: “Mi a glorifiká bo riba tera. Mi a kumpli ku e trabou ku bo a duna mi pa hasi.” (Juan 17:4) Ta bisto anto ku Hesus no tabatin problema pa rekonosé ni aseptá Dios komo su kabes.

Sumishon na e Tata Ta Benefisiá e Yu

6. Ki kualidatnan maravioso Hesus a desplegá?

⁶ Ora Hesus tabata na tera, el a desplegá hopi kualidat maravioso. Entre esakinan tabatin su gran amor pa su Tata. El a bisa: “Mi ta stima e Tata.” (Juan 14:31) El a demostrá tambe ku e ta stima hende. (Lesa Mateo 22:​35-40.) Hesus tabata un persona bondadoso i kompasivo; e no tabata kruel ni arogante. El a bisa: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.” (Mat. 11:​28-30) Debí ku Hesus tabata un persona agradabel i a prediká un mensahe edifikante, e tabata un gran konsuelo pa tur hende semehante di karné, spesialmente pa esnan ku tabata oprimí i abatí.

7, 8. (a) Kon e Lei a restringí e señora ku tabatin bashamentu? (b) Kon Hesus a trata e señora akí?

⁷ Laga nos konsiderá e manera ku Hesus a trata hende muhé. Atraves di historia, hopi hende hòmber a trata hende muhé malu. Esei tabata e kaso tambe ku lidernan religioso den Israel di antigwedat. Pero Hesus sí a trata hende muhé ku rèspèt. Un ehèmpel di esaki ta e manera ku el a trata un señora ku tabatin bashamentu pa 12 aña largu. E señora akí “a sufri mashá” na man di dòkter i a gasta tur loke e tabatin pa e por a bira bon. Pero apesar di tur su esfuersonan, el “a bira pió.” I segun e Lei, e tabata impuru, i ken ku a mishi kuné tambe lo a bira impuru.​—Lev. 15:​19, 25.

⁸ Ora ku e señora a tende ku Hesus tabata kura hende enfermo, el a bai den e multitut ku tabata rònt di Hesus. I el a bisa den su mes: “Si mi djis mishi ku su paña, lo mi bira bon.” Anto asina ku el a mishi ku Hesus, el bira bon. Ounke Hesus tabata sa ku e señora no tabatin mag di mishi ku su paña, e no a zundr’é. Al kontrali, el a trata e señora bondadosamente. Sí, Hesus a komprondé pa e señora; despues di tur e añanan di sufrimentu, e señora tabata masha afligí i desesperá pa haña yudansa. Ku kompashon Hesus a bis’é: “Mi yu, bo fe a salba bo; bai na pas i sea kurá.”​—Mar. 5:​25-34.

9. Kon Hesus a reakshoná ora su disipelnan kier a stroba e muchanan di bini serka dje?

⁹ Asta muchanan tabata sinti nan kómodo den presensia di Hesus. Na un okashon, e disipelnan a rabia ku e hendenan ku tabata trese nan yunan serka Hesus; evidentemente, nan a pensa ku Hesus no tabata ke pa e muchanan molesti’é. Pero Hesus no a pensa asina. E relato bíbliko ta konta nos: “Ora Hesus a mira esaki, el a keda tur indigná i a bisa [su disipelnan]: ‘Laga e muchanan bin serka mi; no stroba nan, pasobra e reino di Dios ta pertenesé na esnan manera esakinan.’” Es mas, “el a tuma nan den su brasa i a bendishoná nan, poniendo su mannan riba nan.” Pues, Hesus realmente tabatin kariño pa mucha; e no a djis tolerá nan.​—Mar. 10:​13-16.

10. Kon bin Hesus tabatin e kualidatnan ku el a desplegá?

¹⁰ Kon bin Hesus tabatin e kualidatnan ku el a desplegá durante su bida riba tera? Promé ku el a bira hende, el a opservá su Tata su manera di hasi kosnan pa míles i míles di aña i a adoptá esaki. (Lesa Proverbionan 8:​22, 23 i 30.) Sí, el a mira e manera amoroso ku Yehova tabata ehersé outoridat riba henter Su kreashon, i el a imitá Yehova. Si Hesus no tabata sumiso, lo e no por a hasi esei. Pa e tabata un goso pa ta sumiso na su Tata, i pa Yehova tabata un plaser pa tin un Yu asina. P’esei, ora Hesus tabata riba tera, el a reflehá e kualidatnan maravioso di su Tata perfektamente. Awor, ki privilegio nos tin awe? Nos por ta sumiso na Kristu, e Gobernante di e Reino selestial ku Dios a nombra!

Imitá Kristu Su Kualidatnan

11. (a) Ken nos mester hasi esfuerso pa imitá? (b) Dikon spesialmente ruman hòmbernan den kongregashon mester hasi esfuerso pa imitá Hesus?

¹¹ Tur hende den e kongregashon kristian, spesialmente ruman hòmbernan, mester hasi esfuerso kontinuamente pa imitá Kristu su kualidatnan. Manera nos a mira kaba, Beibel ta bisa: “Kristu ta e kabes di tur hòmber.” Meskos ku Kristu a imitá su Kabes, e Dios berdadero, hòmbernan kristian mester hasi esfuerso pa imitá nan kabes—Kristu. Ta esei apòstel Pablo tambe a hasi ora el a bira kristian. P’esei, el a konsehá su kompañeronan kristian: “Sea imitadónan di mi, meskos ku ami tambe ta di Kristu.” (1 Kor. 11:1) I apòstel Pedro a bisa: “Boso a wòrdu yamá pa e propósito akí, komo ku Kristu tambe a sufri pa boso, lagando un ehèmpel pa boso, pa boso sigui den su pasonan.” (1 Ped. 2:21) Tin un motibu mas pakiko e instrukshon pa imitá Kristu ta importante foral pa hende hòmber: nan ta esnan ku ta bira ansiano i sirbidó ministerial. Meskos ku Hesus tabatin goso den imitá Yehova, pa hòmbernan kristian tambe mester ta un goso pa imitá Kristu i su kualidatnan.

12, 13. Kon ansianonan tin ku trata e karnénan ku ta bou di nan kuido?

¹² Ansianonan den e kongregashon kristian tin e obligashon di imitá Kristu. P’esei, Pedro a konsehá nan: “Pastoriá e tou di Dios meimei di boso, hasiendo e trabou di kuidadó, no fòrsá, ma boluntariamente, segun e boluntat di Dios; i no pa ganashi desonesto, sino ku hopi afan; no manera hende ku tin dominio riba esnan ku a wòrdu konfiá na boso, ma siendo ehèmpel pa e tou.” (1 Ped. 5:​1-3) Ansianonan kristian no mester ta diktadó, dominante, brutu ni severo. Mas bien, nan ta hasi esfuerso pa desplegá amor, konsiderashon, humildat i bondat. Asina, nan ta imitá Kristu su ehèmpel ora di trata ku e karnénan ku a ser konfiá na nan.

¹³ Ruman hòmbernan ku ta dirigí e kongregashon kristian ta imperfekto, i konstantemente nan mester ta konsiente di e limitashon ei. (Rom. 3:23) P’esei, nan mester ta ansioso pa siña tokante Hesus i pa imitá su amor. Nan tin ku meditá riba e manera ku Dios i Kristu ta trata hende i hasi esfuerso pa imitá nan. Pedro a ekshortá: “Boso tur, bisti boso mes ku humildat pa ku otro, pasobra Dios ta resistí e orguyosonan, ma ta duna grasia na e humildenan.”​—1 Ped. 5:5.

14. Te kon leu ansianonan mester mustra onor na otro hende?

¹⁴ Hòmbernan nombrá den kongregashon tin ku desplegá kualidatnan ekselente den nan trato ku e tou di Dios. Romanonan 12:10 ta bisa: “Stima otro ku amor fraternal; duna preferensia na otro den onor.” P’esei, ansiano- i sirbidónan ministerial ta mustra onor na otronan. Meskos ku e otro kristiannan, e hòmbernan akí no mester hasi nada ku e deseo di pleita ni motivá pa ‘egoismo òf orguyo, ma ku humildat nan mester konsiderá otronan mas importante ku nan.’ (Fil. 2:3) Sí, esnan ku ta duna guia siguramente mester konsiderá otronan superior. Nan ta sigui e konseho di Pablo ku ta bisa: “Awor nos ku ta fuerte mester soportá e debilidatnan di esnan ku ta sin forsa, i no djis agradá nos mes. Laga kada un di nos agradá su próhimo pa su bon, pa su edifikashon. Pasobra ni Kristu no a agradá su mes.”​—Rom. 15:​1-3.

‘Duna Esposanan Onor’

15. Kon esposonan mester trata nan esposa?

¹⁵ Awor, laga nos konsiderá loke Pedro a konsehá hòmbernan kasá. El a skirbi: ‘Boso, esposonan, biba ku boso esposa ku komprenshon, manera ku un vaso mas delikado, komo ku e ta hende muhé, i dun’é onor.’ (1 Ped. 3:7) Ora bo ta onra un persona, bo ta balor’é i tin masha rèspèt p’e. Pues, bo ta tene kuenta ku su opinion, nesesidat i deseo i kisas asta ta kumpli ku esakinan ora no tin motibu válido pa keda sin hasié. Asina un esposo mester trata su esposa.

16. Dikon e Palabra di Dios ta manda esposonan pa onra nan esposa?

¹⁶ Ora Pedro a bisa esposonan pa onra nan esposa, el a agregá e spièrtamentu akí: “Pa boso orashonnan no wòrdu strobá.” (1 Ped. 3:7) Pues, esaki ta un asuntu serio den bista di Yehova! Si un esposo no ta mustra onor na su esposa, su orashonnan por ser strobá. Ademas, por lo general, un esposa ta reakshoná bon ora su esposo ta trat’é ku rèspèt.

17. Te kon leu un esposo tin ku stima su esposa?

¹⁷ Relashoná ku e amor ku esposonan mester tin pa nan kasá, e Palabra di Dios ta konsehá: ‘Esposonan mester stima nan esposa manera nan mes kurpa. Pasobra nunka ni un hende no a odia su mes karni, ma ta aliment’é i ta kuid’é, meskos ku Kristu tambe ta hasi ku e iglesia. Asina anto, laga kada un di boso tambe stima su esposa manera su mes.’ (Efe. 5:​28, 29, 33) Te kon leu esposonan mester stima nan kasá? Pablo a skirbi: “Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efe. 5:25) Sí, un esposo mester ta dispuesto pa asta entregá su bida pa su esposa, meskos ku Kristu a hasi pa hende. Ora un esposo kristian ta trata su esposa ku ternura, konsiderashon i rèspèt, ta mas fásil pa e esposa ta sumiso na dje komo su kabes.

18. Ki yudansa hòmbernan tin na nan disposishon pa kumpli ku nan responsabilidatnan matrimonial?

¹⁸ Yehova ta ferwagt demasiado di esposonan ora e ta pidi nan onra nan esposa? Nò. Nunka Yehova lo pidi nan hasi algu ku nan no por kumpli kuné. Ademas, adoradónan di Yehova tin akseso na e forsa di mas poderoso di universo: Dios su spiritu santu. Hesus a bisa: ‘Si boso, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!’ (Luk. 11:13) Pues, esposonan por pidi Yehova yuda nan mediante su spiritu santu den nan trato ku otro hende, inkluso nan kasá.​—Lesa Echonan 5:32.a

19. Kiko nos lo trata den e siguiente artíkulo?

¹⁹ Sí, hende hòmber tin e responsabilidat pisá di siña kon pa ta sumiso na Kristu i di imitá e manera ku Kristu ta ehersé su outoridat komo kabes. Pero ki papel hende muhé, spesialmente esposanan, ta hunga den e asuntu akí? E siguiente artíkulo lo konsiderá kon nan mester mira e papel ku Yehova a duna nan.

Esposanan, Pakiko Ser Sumiso na Boso Esposo?

“E hòmber ta e kabes di e muhé.”​—1 KOR. 11:3.

1, 2. (a) Kiko apòstel Pablo a skirbi tokante Yehova su prinsipio di outoridat i sumishon den famia? (b) Ki preguntanan nos lo trata den e artíkulo akí?

TA YEHOVA a establesé e prinsipio di outoridat ku apòstel Pablo a menshoná ora el a skirbi ku “Kristu ta e kabes di tur hòmber” i “Dios ta e kabes di Kristu.” (1 Kor. 11:3) E artíkulo anterior a mustra ku pa Hesus ta un privilegio i goso pa ta sumiso na su Kabes, Yehova Dios. El a mustra tambe ku Kristu ta kabes di hende hòmber. Ademas, nos a siña ku Kristu a trata hende na un manera bondadoso, kompasivo i inegoista, i ku ta asina ruman hòmbernan den kongregashon mester trata otro hende, spesialmente nan kasá.

² Pero kiko di hende muhé? Ken ta nan kabes? Pablo a skirbi: “E hòmber ta e kabes di e muhé.” Kon hende muhé mester konsiderá e deklarashon inspirá akí? E prinsipio akí ta konta tambe ora e esposo no ta Testigu di Yehova? Sumishon na esposo komo kabes ta nifiká ku semper esposa mester keda ketu i no tin nada di bisa ora e esposo ta tuma desishon? Den ki manera un hende muhé ta demostrá di ta digno di elogio?

“Lo Mi Traha un Yudadó P’e”

3, 4. Dikon e prinsipio di outoridat den famia ta benefisioso?

³ Ta Dios a determiná ken mester ta kabes den famia. Despues di a krea Adam, Yehova Dios a bisa: “No ta bon pa e hòmber ta so; lo mi traha un yudadó p’e ku ta pas kuné.” Ora Adam a mira Eva, el a keda asina kontentu ku su kompañera i yudadó ku el a bisa: “Esaki ta awor wesu di mi wesunan, i karni di mi karni.” (Gén. 2:​18-24) Adam i Eva tabatin e maravioso oportunidat di bira tata i mama di henter un rasa di hende perfekto ku lo a biba felis i pa semper den un paradeis mundial.

⁴ Debí na e rebelion di nos promé mayornan, e situashon perfekto den e hardin di Edén a bai pèrdí. (Lesa Romanonan 5:12.) Pero e prinsipio di outoridat ku Dios a establesé den bida di famia, esta, ku hòmber ta kabes di hende muhé, a keda na vigor. I si e esposo i esposa apliká e prinsipio akí korektamente den nan matrimonio, lo e benefisiá nan, i nan lo ta felis. Sí, nan lo tin e mesun sintimentu ku Hesus, kende, durante su eksistensia prehumano, tabata ‘regosihá semper dilanti di su Kabes, Yehova.’ (Pro. 8:30) Pero debí na imperfekshon, hende hòmber no ta kapas pa ehersé nan outoridat komo kabes perfektamente ni hende muhé no por demostrá sumishon perfekto. Sinembargo, ora esposo- i esposanan ta hasi nan máksimo esfuerso pa sigui e prinsipio di outoridat den nan matrimonio, nan lo tin e mayor felisidat ku ta posibel den nos tempu.

5. Dikon parehanan kasá mester hasi kaso di e konseho na Romanonan 12:10?

⁵ Pa un matrimonio por ta eksitoso, ta masha importante pa parehanan kasá apliká e konseho bíbliko akí ku ta konta pa tur kristian: “Stima otro ku amor fraternal; duna preferensia na otro den onor.” (Rom. 12:10) Ademas, tantu e esposo komo e esposa mester hasi esfuerso pa ta ‘kariñoso ku otro, miserikòrdioso i pa pordoná otro.’​—Efe. 4:32.

Ora Bo Kasá No Ta Testigu

6, 7. Kiko por ta e resultado ora un esposa kristian ta sumiso na su esposo ku no ta Testigu?

⁶ Awor, kiko si bo kasá no ta un sirbidó di Yehova? Hopi biaha, ta e esposo no ta Testigu. Den un kaso asina, kon e esposa mester trata su kasá? Beibel ta kontestá: “Boso, esposanan, sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.”​—1 Ped. 3:​1, 2.

⁷ Pues, e Palabra di Dios ta mustra ku e esposa mester ta sumiso na su esposo maske e no ta Testigu. E esposa su bon kondukta por pone su esposo puntra su mes kiko ta motivá su esposa pa komportá su mes asina. I pa haña kontesta, e por bai investigá e kreensianan di su esposa kristian, i ku tempu, e mes por aseptá e bèrdat.

8, 9. Kiko un esposa kristian por hasi si su esposo ku no ta Testigu no ta reakshoná faborablemente apesar di su bon kondukta?

⁸ Pero kiko si e esposo ku no ta Testigu no ta reakshoná faborablemente apesar di e bon kondukta di su esposa? Beibel ta animá e esposa kreyente pa desplegá kualidatnan kristian tur ora bai ounke kon difísil esaki lo por ta. Por ehèmpel, na 1 Korintionan 13:4, nos ta lesa: “Amor tin pasenshi.” P’esei, ta bon pa e esposa kristian sigui komportá su mes ‘ku tur humildat i suavedat, i ku pasenshi,’ soportando e situashon ku amor. (Efe. 4:2) I ku yudansa di Dios su forsa aktivo, esta, spiritu santu, e esposa por sigui desplegá kualidatnan kristian asta bou di sirkunstansianan difísil.

⁹ Pablo a skirbi: “Pa tur kos mi tin e forsa mediante esun ku ta duna mi poder.” (Fil. 4:13, NW) Sí, ku yudansa di Dios su spiritu santu, e kasá ku ta Testigu por hasi hopi kos ku di otro manera lo e no por a hasi. Por ehèmpel, si bo kasá ta trata bo malu, lo bo por haña gana di tuma vengansa. Sinembargo, Beibel ta bisa tur kristian: “Nunka paga malu ku malu na ningun hende. . . . Pasobra ta pará skirbí: ‘Ta di mi vengansa ta, ami lo paga bèk,’ [Yehova] ta bisa.” (Rom. 12:​17-19) Ademas, 1 Tesalonisensenan 5:15 ta konsehá nos: “Mira pa ni un hende no paga otro malu ku malu, ma semper buska loke ta bon pa otro i pa tur hende.” Nos no por logra esaki riba nos mes forsa, pero ku e yudansa di Yehova su spiritu santu sí. P’esei, ta masha apropiá pa nos resa pidi Dios duna nos su spiritu santu pa yuda nos kaminda ta nesesario.

10. Kon Hesus a reakshoná ora e hendenan tabata bis’é kosnan desagradabel i trat’é malu?

¹⁰ Hesus a pone un ekselente ehèmpel den e manera ku el a trata e hendenan ku tabata bis’é kosnan desagradabel i trat’é malu. Promé Pedro 2:23 ta bisa: “Ora ku el a wòrdu zundrá, e no a zundra bèk; ora ku el a sufri, e no a menasá, ma a konfia su mes na esun ku ta husga ku hustisia.” Beibel ta animá nos pa sigui su ekselente ehèmpel. Pues, no laga e mal komportashon di otro hende provoká nos pa hasi loke ta malu. Mas bien, laga nos sigui e konseho ku Beibel ta duna tur kristian: “Sea miserikòrdioso i humilde den spiritu, no pagando malu ku malu òf insulto ku insulto.”​—1 Ped. 3:​8, 9.

Semper Esposanan Mester Keda Ketu?

11. Ki privilegio algun hende muhé kristian lo tin?

¹¹ Sumishon na esposo komo kabes ta nifiká ku hende muhé semper mester keda ketu? Akaso nan no tin nada di bisa den asuntunan di famia òf enkuanto otro tópiko? Di ningun manera. Yehova a duna tantu hende muhé komo hende hòmber hopi privilegio. Djis pensa riba e gran privilegio ku 144.000 persona tin di por sirbi komo rei i saserdote den shelu ora Kristu ta goberná e tera akí. Entre e personanan ei tin hende muhé tambe! (Gal. 3:​26-29) Pues ta opvio ku hende muhé tin un papel importante den Yehova su organisashon.

12, 13. Duna un ehèmpel ku ta mustra ku hende muhé a yega di profetisá.

¹² Den tempu bíbliko por ehèmpel, tabatin algun hende muhé ku a profetisá. Joel 2:​28 i 29 ta bisa: “Lo mi basha mi spiritu riba henter humanidat; i boso yu hòmbernan i yu muhénan lo profetisá . . . Tambe riba e sirbidónan hòmber i muhé lo mi basha mi spiritu den e dianan ei.”

¹³ Riba dia di Pentekòste di aña 33 di nos era, mas o ménos 120 disipel di Hesus—tantu hòmber komo muhé—tabata reuní den un kamber ariba na Yerusalèm. Na e okashon ei, Dios a basha su spiritu santu riba nan tur. P’esei, Pedro por a sita loke profeta Joel a profetisá i apliká esaki na tantu hende hòmber komo hende muhé. Pedro a bisa: “Esaki ta loke a wòrdu papiá pa medio di profeta Joel: ‘I lo sosodé den e último dianan,’ Dios ta bisa, ‘ku lo mi basha di mi spiritu riba henter humanidat; i boso yu hòmbernan i boso yu muhénan lo profetisá . . . ; tambe riba mi sirbidónan, tantu hòmber komo muhé, lo mi basha di mi spiritu den e dianan ei, i nan lo profetisá.’”​—Echo. 2:​16-18.

14. Ki papel hende muhé a hunga den plamamentu di siñansa kristian den promé siglo?

¹⁴ Den e promé siglo, hende muhé a hunga un papel importante den plamamentu di siñansa kristian. Nan a prediká tokante e Reino di Dios i a hasi otro kosnan tambe pa apoyá e trabou ei. (Luk. 8:​1-3) Por ehèmpel, apòstel Pablo a yama Febe ‘un sirbidó dje kongregashon na Senkrea.’ (NW) El a menshoná tambe vários hende muhé fiel, manera “Trifena i Trifosa, trahadónan den Señor” ora el a manda saludo pa su kompañeronan di trabou. Ademas, el a manda saludo pa “Pérsida, e ruman stimá, kende a traha duru den Señor.”​—Rom. 16:​1, 12.

15. Ki papel hende muhé ta hunga den plamamentu di siñansa kristian den nos tempu?

¹⁵ Rònt mundu tin mas ku shete mion persona ta prediká e bon notisia di e Reino di Dios; un gran parti ta hende muhé di tur edat. (Mat. 24:14) Hopi ta sirbidó di tempu kompletu, misionero i miembro di famia di Bètel. E salmista David a kanta: ‘Yehova ta laga un òrdu sali, kantidat di muhé ta plama e bon notisia.’ (Sal. 68:11, BPK) E palabranan ei ta kumpliendo en bèrdat! I Yehova ta balorá e trabou ku hende muhé ta hasi pa deklará e bon notisia i kumpli ku Su propósito. Pues, e echo ku Yehova ta rekerí pa muhénan kristian ta sumiso no ta nifiká ku semper nan mester keda ketu.

Dos Hende Muhé Ku No A Keda Ketu

16, 17. Kon e ehèmpel di Sara ta mustra ku no ta semper esposanan mester keda ketu?

¹⁶ Si Yehova mes ta duna hende muhé vários privilegio, no ta sabí pa esposonan konsultá ku nan esposa promé ku tuma desishonnan importante? No tin duda! E Skritura ta menshoná vários insidente den kua esposanan a papia òf aktua sin ku nan esposo a pidi nan. Laga nos konsiderá dos kaso.

¹⁷ Sara, esposa di e patriarka Abraham, tabata blo bis’é pa kore ku su di dos kasá i su yu hòmber pasobra nan no tabatin rèspèt. “E asuntu a duel Abraham mashá,” pero Yehova no a sinti asina. El a bisa Abraham: “No tene duele pa motibu di e mucha ni pa motibu di bo kriá; kiko ku Sara bisa bo, skuch’é.” (Gén. 21:​8-12) Abraham a obedesé Yehova. P’esei, el a skucha Sara i a hasi manera el a pidié.

18. Ki inisiativa Abigail a tuma?

¹⁸ Konsiderá tambe e ehèmpel di Abigail, e esposa di Nabal. Ora David tabata hui pa e rei yalurs Saul, el a kampa pa un tempu den bisindario di e tounan di Nabal. David i su hòmbernan no a hòrta e propiedatnan di e hòmber riku akí; mas bien, nan a protehá su propiedatnan. Sinembargo, Nabal, kende tabata “brutu i di mala fe,” “a despresiá” e hòmbernan di David. E tabata un “hòmber pèrvèrso” i “banidat a kompañ’é.” Ora e hòmbernan di David respetuosamente a pidi Nabal awa i kuminda, el a nenga nan. Kon Abigail a reakshoná ora el a tende loke a pasa? Sin bisa Nabal nada, el “a hasi lihé-lihé i a kohe dosshen pan, dos saku-di-kueru ku biña aden, sinku karné prepará kaba, sinku midí di maishi tostá, shen tròshi di rasenchi i dosshen klòmpi di figu” i a duna David i su hòmbernan. Abigail a hasi loke tabata korekto? Sí, algun suseso ku a tuma lugá despues ta mustra esei. Beibel ta bisa ku Yehova “a afligí Nabal, i el a muri.” Despues, David a kasa ku Abigail.​—1 Sam. 25:​3, 14-19, 23-25, 38-42.

Hende Muhé Digno di ‘Elogio’

19, 20. Kiko ta hasi un hende muhé realmente digno di elogio?

¹⁹ E Skritura ta elogiá esposanan ku ta hasi kosnan manera Yehova ke. E buki bíbliko Proverbionan ta elogiá “un muhé birtuoso,” bisando: “É bal muchu mas ku rubí. Kurason di su esposo ta konfia den dje, i su esposo lo no tin falta di ganashi. E ta hasi bon na su esposo, i no malu, tur e dianan di su bida.” Es mas, “e ta habri su boka ku sabiduria, i siñansa kariñoso ta riba su lenga. E ta tene e kamindanan di su famia bon na bista, i no ta kome pan di flohedat. Su yunan ta lanta i ta yam’é bendishoná; su esposo tambe, i e ta gab’é.”​—Pro. 31:​10-12, 26-28.

²⁰ Kiko ta hasi un hende muhé digno di elogio? Proverbionan 31:30 ta bisa: ‘Ser atraktivo ta engañoso i bunitesa ta banidat, ma un muhé ku ta teme SEÑOR lo wòrdu elogiá.’ I un manera ku e por demostrá ku e ta teme Yehova ta di someté su mes boluntariamente na Dios su prinsipio di outoridat. Segun e prinsipio akí, “e hòmber ta e kabes di e muhé” meskos ku “Kristu ta e kabes di tur hòmber” i “Dios ta e kabes di Kristu.”​—1 Kor. 11:3.

Sea Gradisidu pa e Regalo di Dios

21, 22. (a) Dikon kristiannan kasá mester gradisí Dios pa e regalo di matrimonio? (b) Dikon nos tin ku mustra rèspèt pa Yehova su prinsipio di outoridat? (Wak e kuadro.)

²¹ Kristiannan kasá tin hopi motibu pa gradisí Dios. Nan por sirbi Yehova skouder ku skouder. Sí, nan por ta gradisidu na Yehova p’e regalo di matrimonio ku a duna nan e oportunidat di kana ku Yehova komo pareha uní. (Ruth 1:9, NW; Mik. 6:8) Komo e Originador di matrimonio, e sa eksaktamente kiko ta nesesario pa un pareha kasá por ta felis. P’esei, parehanan, semper hasi manera Yehova ke. E ora ei, ‘e goso di Yehova lo ta boso fortalesa’ asta den e mundu turbulento akí.​—Neh. 8:10.

²² Un esposo kristian ku ta stima su esposa manera su mes lo ehersé su outoridat na un manera tierno i ku konsiderashon. Su esposa deboto na Dios, na su turno, lo apoy’é i mustra rèspèt profundo p’e. I esaki ta pone su esposo stim’é mas. Pero loke ta mas importante, nan matrimonio ehemplar lo duna onor na nos Dios, Yehova, kende ta digno di alabansa.