Bibando pa Awe of pa un Futuro Eterno?
“Nos a ser salbá den e speransa aki.”—ROMANONAN 8:24.
1. Kico e epicureonan a siña, i con e clase di filosofia ei a afectá algun cristian?
APOSTEL Pablo a skirbi n’e cristiannan cu tabata biba na Corinto: “Con bini cu algun den boso ta bisa cu no tin resureccion dje mortonan?” (1 Corintionan 15:12) Aparentemente, e filosofia venenoso dje sabio griego Epicuro a penetrá entre e cristiannan di promé siglo. P’esei Pablo a hala atencion n’e siñansa epicureo: “Ban come i bebe, pasobra mañan nos tin cu muri.” (1 Corintionan 15:32) E siguidónan dje filósofo a tira afó tur speransa cu por tin un bida despues di morto i p’esei tabatin e creencia cu placer carnal tabata e único of e principal beneficio den bida. (Echonan 17:18, 32) Filosofia epicureo tabata egocéntrico, cínico i finalmente degradante.
2. (a) Pakico tabata asina peligroso pa nenga e berdad dje resureccion? (b) Con Pablo a fortalecé e fe dje cristiannan di Corinto?
2 E nengamentu aki dje berdad dje resureccion tabatin implicacionnan profundo. Pablo a razoná: “Si, en berdad, no tin resureccion dje mortonan, Cristo tampoco no a ser lantá. Pero si Cristo no a ser lantá, nos predicamentu siguramente ta en bano, i nos fe ta en bano. . . . Si ta den e bida aki so nos a spera den Cristo, di tur hende nos ta esnan mas digno di lástima.” (1 Corintionan 15:13-19) Sí, sin e speransa di un futuro eterno, cristianismo lo ta “en bano.” Lo e ta sin propósito. Nada straño, anto, cu bou dje influencia dje pensamentu pagano aki, e congregacion corintio a bira un tera fértil pa problemanan. (1 Corintionan 1:11; 5:1; 6:1; 11:20-22) P’esei, e intencion di Pablo tabata pa fortalecé nan fe den e resureccion. Usando lógica poderoso, citanan bíblico i ilustracionnan, el a proba fuera di tur duda cu e speransa di resureccion no tabata ficcion sino un realidad cu lo cumpli sigur. Riba e base aki, e por a insta su compañeronan creyente: “Bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor.”—1 Corintionan 15:20-58.
“Sigui Vigilá”
3, 4. (a) Segun Pedro, ki actitud peligroso algun lo adoptá durante e último dianan? (b) Kico nos mester sigui tene na mente?
3 Awe, hopi hende tin un actitud pesimista, di biba pa awe so. (Efesionan 2:2) Ta manera apostel Pedro a predicí. El a papia di “mofadónan cu nan mofa . . . bisando: ‘Unda e presencia primintí di dje ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde e principio di creacion.’” (2 Pedro 3:3, 4) Si adoradónan berdadero sucumbí na un punto di bista asina, nan lo por bira “inactivo of infructífero.” (2 Pedro 1:8) Afortunadamente, esei no ta e caso cu e mayoria dje pueblo di Dios djawe.
4 No ta malu pa ta interesá den e binidero fin dje mal sistema di cosnan actual. Corda e interes cu Jesus su mes apostelnan a demostrá: “Señor, bo ta restorá e reino pa Israel na e tempu aki?” Jesus a contestá: “No ta pertenecé na boso pa haña conocimentu di tempunan of temporadanan cu e Tata a pone bou di su mes hurisprudencia.” (Echonan 1:6, 7) E palabranan ei ta carga e mensahe básico cu el a transmití riba e Ceru di Olijfi: “Boso no sa riba ki dia boso Señor ta bini. . . . Na un ora cu boso no ta pensa cu e ta, e Yu di hende ta bini.” (Mateo 24:42, 44) Nos tin cu sigui corda riba e conseho ei! Algun por ser tentá pa adoptá un actitud di: ‘Kisas mi mester djis bai mas sosegá i no preocupá asina tantu tocante e fin.’ Ki un ekibocacion esei lo ta! Tuma por ehempel Santiago i Juan, e “Yunan di Donder.”—Marco 3:17.
5, 6. Ki lesnan nos por saca for dje ehempelnan di Santiago i Juan?
5 Nos sa cu Santiago tabata un apostel sumamente celoso. (Lucas 9:51-55) Una bes e congregacion cristian a ser establecí, e mester a hunga un papel activo. Pero tempu Santiago tabata relativamente yong ainda, Herodes Agripa I a laga mat’é. (Echonan 12:1-3) Nos ta pensa cu Santiago, mirando con su bida tabata bai caba inesperadamente, a haña duele cu e tabata asina celoso i cu el a traha duru den su ministerio? No ta probabel! Sigur e tabata contentu cu el a dedicá e mihó añanan di su bida relativamente corticu den sirbishi di Jehova. Awor, ningun di nos por sa si nos bida lo caba inesperadamente. (Eclesiástes 9:11; compará cu Lucas 12:20, 21.) Pues ta bisto cu ta sabí pa mantené un celo intenso i keda masha activo den sirbi Jehova. Den e manera ei nos lo mantené nos bon nomber cuné i sigui biba cu nos futuro eterno na bista.—Eclesiástes 7:1.
6 Tin un les práctico den cua apostel Juan tabata enbolbí, kende tabata presente ora Jesus a urgi intensamente, “Sigui vigilá.” (Mateo 25:13; Marco 13:37; Lucas 21:34-36) Juan a tuma esei na pechu, sirbiendo cu entusiasmo pa hopi década. De echo, ta parce cu el a biba mas largu cu tur e otro apostelnan. Ora Juan tabatin un edad hopi avansá, capas pa mira bek riba décadanan di fiel actividad, el a mira esei como un ekibocacion, un bida mal dirigí of desbalansá? No, sigur cu no! Ainda e tabata sperando cu anhelo p’e futuro. Ora e Jesus resucitá a bisa, “Sí; mi ta bini lihé,” Juan a contestá mesora, “Amen! Bini, Señor Jesus.” (Revelacion 22:20) Juan sigur no tabata bibando pa e presente, anhelando un ‘bida normal’ sosegá i trankil. E tabata dicididu pa sigui sirbi cu tur su bida i forsa, sin importá ki ora e Señor bini. Kico di nos?
Tin Base pa Kere den Bida Eterno
7. (a) Con e speransa di bida eterno a ser “primintí promé cu tempu di duracion largu”? (b) Con Jesus a tira lus riba e speransa di bida eterno?
7 Bo por ta sigur cu e speransa di bida eterno no ta un soño of fantasia di hende. Manera Tito 1:2 ta bisa, nos debocion piadoso ta basá riba “un speransa di bida eterno cu Dios, kende no por gaña, a primintí promé cu tempu di duracion largu.” Tabata Dios su propósito original pa tur hende obediente biba pa semper. (Génesis 1:28) Nada, ni sikiera e rebelion di Adam cu Eva, por stroba e propósito aki. Manera Génesis 3:15 ta bisa, inmediatamente Dios a primintí un “simia” cu lo deshací di tur e daño causá na humanidad. Ora e “simia” of Mesías, Jesus, a yega, el a haci e speransa di bida eterno un di su siñansanan básico. (Juan 3:16; 6:47, 51; 10:28; 17:3) Dor di entregá su bida perfecto como un rescate, Cristo a obtené e derecho legal pa otorgá bida eterno na humanidad. (Mateo 20:28) Algun di su disipelnan, 144.000 na tur, lo biba pa semper den shelu. (Revelacion 14:1-4) Asina algun hende cu un tempu tabata mortal lo “bisti inmortalidad”!—1 Corintionan 15:53.
8. (a) Kico ta “inmortalidad,” i pakico Jehova ta otorgu’é n’e 144.000? (b) Ki speransa Jesus a pone dilanti e “otro carnénan”?
8 “Inmortalidad” ta nificá mas cu simplemente no muri nunca. E ta enbolbé “e poder di un bida indestructibel.” (Hebreonan 7:16; compará cu Revelacion 20:6.) Pero, kico Dios ta logra otorgando un don remarcabel asina? Corda cu e desafio di Satanas tabata cu ningun criatura di Dios por ser confiá. (Job 1:9-11; 2:4, 5) Dor di otorgá inmortalidad n’e 144.000, Dios ta mustra cu e tin confiansa completo den e grupo aki cu a contestá e desafio di Satanas asina sobresalientemente. Pero kico di e resto di humanidad? Jesus a bisa e promé disipelnan scogí pa forma parti dje “trupa chikitu” aki di co-heredero di Reino cu nan lo “sinta riba trononan pa husga e diesdos tribunan di Israel.” (Lucas 12:32; 22:30) Esaki ta implicá cu otronan lo ricibí bida eterno riba tera como súbditonan di su Reino. Aunke e “otro carnénan” aki no ta ricibí inmortalidad, nan ta ricibí sí “bida eterno.” (Juan 10:16; Mateo 25:46) Pues bida eterno ta e speransa di tur cristian. Esei no ta un fantasia, sino e ta algu cu “Dios, kende no por gaña,” a primintí solemnemente i a paga p’e cu e sanger precioso di Jesus.—Tito 1:2.
Den Futuro Lehano?
9, 10. Ki indicacionnan cla tin cu e fin ta cerca?
9 Apostel Pablo a profetisá cu “tempu crítico, duru pa trata cuné” lo indicá cu nos a yega indiscutiblemente den “e último dianan.” Segun cu sociedad humano rond di nos ta hundi den un estado di falta di amor, golosidad, gratificacion propio i maldad, nos no ta realisá cu e dia di Jehova pa ehecutá su huicionan riba e sistema di mundu malbado aki ta acercando rápidamente? Segun cu violencia i odio ta escalá, nos no ta mira tur rond di nos e cumplimentu di loke Pablo a bisa siguientemente: “Hende malbado i impostornan lo bai di malu pa pió”? (2 Timoteo 3:1-5, 13) Algun lo por expresá cu optimismo gritunan di “Pas i siguridad,” pero tur prospecto di pas lo evaporá, pasobra “destruccion repentino lo bini riba nan instantáneamente mescos cu e dolor di angustia riba un muher na estado; i nan lo no scapa di ningun manera.” Nos no a ser lagá den scuridad en cuanto e nificacion di nos tempu. Pues, “laga nos keda lantá i mantené nos huicio.”—1 Tesalonicensenan 5:1-6.
10 Ademas, Bijbel ta indicá cu e último dianan ta “un periodo di tempu corticu.” (Revelacion 12:12; compará cu 17:10.) Aparentemente, e mayor parti dje ‘periodo corticu’ ei a pasa caba. Daniel su profecia, por ehempel, ta describí exactamente e conflicto entre “e rey di nort” i “e rey di zuid” cu a extendé te den nos siglo. (Daniel 11:5, 6) Tur loke falta pa cumpli ta e atake final di “e rey di nort,” describí na Daniel 11:44, 45.—Mira La Atalaya di 1 di juli, 1987, i 1 di november, 1993, pa un consideracion dje profecia aki.
11. (a) Te na ki grado Mateo 24:14 a cumpli? (b) Kico e palabranan di Jesus registrá na Mateo 10:23 ta indicá?
11 Tambe tin Jesus su profecia cu “e bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Awe, Testigonan di Jehova ta efectuá nan trabou den 233 pais, grupo di isla i teritorionan. Ta berdad cu ainda tin teritorionan cu no a ser trahá, i tal bes n’e debido tempu di Jehova, un porta di oportunidad lo habri. (1 Corintionan 16:9) Sin embargo, Jesus su palabranan registrá na Mateo 10:23 ta pone nos pensa seriamente: “Di ningun manera boso lo completá e circuito dje stadnan di Israel te ora e Yu di hende yega.” Aunke ta sigur cu e bon nobo lo ser anunciá na tur parti dje tera, nos lo no alcansá tur parti dje tera personalmente cu e mensahe di Reino promé cu Jesus “yega” como Ehecutor.
12. (a) Na cua ‘seyamentu’ Revelacion 7:3 ta referí? (b) Kico e echo cu e cantidad di ungí riba tera ta menguando, ta nificá?
12 Considerá e texto na Revelacion 7:1, 3, cu ta bisa cu e “cuater bientunan” di destruccion ta ser wantá “te despues cu nos a seya e esclabonan di nos Dios den nan frenta.” Esaki no ta referí n’e seyamentu inicial, cu ta tuma lugá ora esnan di e 144.000 ricibí e yamamentu celestial. (Efesionan 1:13) E ta referí n’e seyamentu final, ora nan a ser identificá irevocablemente como probá i fiel “esclabonan di nos Dios.” E cantidad dje berdadero yunan ungí di Dios na bida riba tera a mengua bastante. Ademas, Bijbel ta declará masha cla cu ta “pa causa dje scogínan” cu e fase inicial dje tribulacion grandi lo “ser cortá.” (Mateo 24:21, 22) Mayoria di esnan cu ta profesá di ta ungí tin edad basta avansá. Esaki tambe no ta indicá cu e fin ta cerca?
Un Vigilante Fiel
13, 14. Kico ta e responsabilidad dje clase di vigilante?
13 Miéntras tantu, ta bon pa nos haci caso dje guia cu e “esclabo fiel” ta duna. (Mateo 24:45) Pa mas cu shen aña, e “esclabo” moderno a sirbi fielmente como “vigilante.” (Ezekiel 3:17-21) E Toren di Vigilancia [na ingles] di 1 di januari, 1984, a splica: “E vigilante aki ta observá con sucesonan ta desaroyá riba tera segun cu nan ta cumpli cu profecia di Bijbel, ta anunciá e spiertamentu di un inminente ‘tribulacion grandi tal como no a sosodé desde principio di mundu’ i ta publicá ‘bon nobo di algu mihó.’”—Mateo 24:21; Isaías 52:7.
14 Corda: E tarea di un vigilante ta pa anunciá na bos haltu “precis loke e ta mira.” (Isaías 21:6-8) Den tempu bíblico un vigilante tabata resoná un spiertamentu asta ora e potencial menasa tabata na un distancia muchu leu pa ser identificá claramente. (2 Reynan 9:17, 18) Siguramente tabatin casonan di alarma falsu e tempu ei. Pero un bon vigilante lo no keda sin papia pa miedu di bergwensa. Si bo cas ta na candela, con lo bo sinti si e bomberonan keda sin presentá pa motibu cu nan ta pensa cu lo por ta trata di un alarma falsu? No, nos ta spera pa e hendenan ei reaccioná rápidamente riba cualkier señal di peliger! Den un manera similar, e clase di vigilante a papia cu curashi ora circunstancianan a parce di hustificá esei.
15, 16. (a) Pakico ta haci ahustenan den nos comprendimentu di profecia? (b) Kico nos por siña for di fiel sirbidónan di Dios cu tabatin un comprendimentu ekibocá di cierto profecianan?
15 Sin embargo, segun cu sucesonan a desaroyá, nos comprendimentu di profecia a bira mas cla. Historia ta mustra cu masha poco biaha, si el a yega di sosodé mes, hende a comprendé profecianan divino completamente promé cu nan a cumpli. Dios a bisa Abram exactamente pa cuantu tempu su simia lo tabata “residente stranhero den un tera cu no tabata di nan,” esta, 400 aña. (Génesis 15:13) Sin embargo, Moises a ofrecé su mes como libertadó prematuramente.—Echonan 7:23-30.
16 Considerá tambe e profecianan Mesiánico. Mirando bek ta parce mes cla cu di dia cu e morto i resureccion di Mesías a ser profetisá. (Isaías 53:8-10) Sin embargo, Jesus su mes disipelnan no a capta e echo aki. (Mateo 16:21-23) Nan no a mira cu Daniel 7:13, 14 lo a cumpli durante Cristo su futuro pa·rou·siʹa, of “presencia.” (Mateo 24:3) Pues nan calculacion a hera cu casi 2.000 aña ora nan a puntra Jesus: “Señor, bo ta restorá e reino pa Israel na e tempu aki?” (Echonan 1:6) Asta despues cu e congregacion cristian a bira bon establecí, ideanan eróneo i expectativanan falsu a sigui presentá. (2 Tesalonicensenan 2:1, 2) Aunke de bes en cuando algun cristian tabatin puntonan di bista ekibocá, no tin duda cu Jehova a bendicioná e trabou dje creyentenan ei di promé siglo!
17. Con nos mester mira ahustenan den nos comprendimentu dje Scritura?
17 E clase di vigilante awe tambe tabatin cu clarificá su puntonan di bista de bes en cuando. Sin embargo, ken por duda cu Jehova a bendicioná e “esclabo fiel”? Ademas, mirá den e totalidad, mayoria dje ahustenan cu a tuma lugá no tabata relativamente chikitu? Nos comprendimentu básico di Bijbel no a cambia. Nos conviccion cu nos ta bibando den e último dianan ta mas fuerte cu nunca!
Bibando pa un Futuro Eterno
18. Pakico nos tin cu evitá di biba pa awe so?
18 Tal bes e mundu ta bisa, ‘Ban come i bebe, pasobra mañan nos ta muri,’ pero esaki no mester ta nos actitud. Pakico core por nada tras di placernan cu bo por haña den bida awor ora bo por traha pa un futuro eterno? E speransa ei, sea ta bida inmortal den shelu of bida eterno riba tera, no ta un soño, no ta un fantasia. E ta un realidad cu Dios, “kende no por gaña,” a primintí. (Tito 1:2) E evidencia cu e realisacion di nos speransa ta cerca ta abrumador! “E tempu cu a keda ta reducí.”—1 Corintionan 7:29.
19, 20. (a) Con Jehova ta mira e sacrificionan cu nos a haci pa causa dje Reino? (b) Pakico nos tin cu biba cu eternidad na bista?
19 Ta cierto cu e sistema aki ya caba a dura mas largu cu hopi hende a pensa. Algun lo por sinti awor cu si nan tabata sa esaki promé, nan lo no a haci cierto sacrificionan. Pero un hende no mester lamentá cu el a haci esei. Al fin i al cabo, haci sacrificio ta un parti fundamental di ser un cristian. Cristiannan ‘ta nenga nan mes.’ (Mateo 16:24) Nunca nos mester sinti cu nos esfuersonan pa agradá Dios tabata en bano. Jesus a primintí: “Ningun hende a laga cas of ruman homber of ruman muher of mama of tata of yu of cunucu pa mi causa i pa causa dje bon nobo cu lo no haña shen biaha mas tantu awor . . . i den e binidero sistema di cosnan bida eterno.” (Marco 10:29, 30) Aki mil aña, ki importante bo trabou, cas of cuenta di banco lo parce? Pero, e sacrificionan cu bo a haci pa Jehova lo ta significativo aki un miyon aña—aki mil miyon aña! “Pasobra Dios no ta inhustu p’e lubidá boso trabou.”—Hebreonan 6:10.
20 P’esei, laga nos biba cu eternidad na bista, teniendo nos wowonan, “no riba e cosnan cu hende ta mira, sino riba e cosnan cu hende no ta mira. Pasobra e cosnan cu hende ta mira ta temporal, pero e cosnan cu hende no ta mira ta eterno.” (2 Corintionan 4:18) Profeta Habacuc a skirbi: “E vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda, keda den expectativa di dje; pasobra lo e ser realisá sin falta. Lo e no ta lat.” (Habacuc 2:3) Con e echo cu nos ta “keda den expectativa” dje fin ta afectá e manera cu nos ta cumpli cu nos responsabilidadnan personal i di famia? Nos siguiente artículo lo trata cu e asuntunan aki.
Puntonan pa Repaso
◻ Con algun persona awe a ser afectá p’e aparente tardansa dje fin dje sistema di cosnan aki?
◻ Kico ta e base pa nos speransa di bida eterno?
◻ Con nos mester mira sacrificionan cu nos a haci pa interesnan di Reino?
[Plachi na página 15]
E trabou di predicacion mundial tin cu ser completá promé cu e fin yega