Tikico—Un Co-Esclabo di Confiansa

NA VARIOS ocasion, Tíkico a biaha cu apostel Pablo i a actua como su mensahero. E tabata un representante cu Pablo por a confia cu placa i cu responsabilidadnan di supervision. Ya cu e Scritura ta resaltá su confiabilidad—un cualidad esencial pa tur cristian—tal bes lo bo kier sa mas tocante dje.

Pablo a describí Tíkico como su “ruman stimá i minister fiel i co-esclabo den Señor.” (Colosensenan 4:7) Pakico e apostel tabatin e opinion ei di dje?

E Mision di Auxilio pa Jerusalem

Un necesidad material a desaroyá entre cristiannan na Hudea rond di aña 55 E.C. Cu yudansa di congregacionnan na Europa i Asia Menor, Pablo a organisá un colect pa yuda nan. Tíkico, cu tabata dje distrito di Asia, a hunga un papel den e mision di auxilio.

Despues cu Pablo a duna instruccion con pa atendé e contribucion aki, el a sugerí pa manda hombernan confiabel Jerusalem of nan bai aya cuné pa hiba loke nan a colectá. (1 Corintionan 16:1-4) Ora el a cuminsá e biahe largu for di Grecia pa Jerusalem, e tabata compañá pa vários homber, di cua un di nan aparentemente tabata Tíkico. (Echonan 20:4) Kisas un grupo grandi asina tabata necesario pasobra nan tabata hiba placa cu vários congregacion a confia na nan. Kisas un factor notabel tabata e necesidad pa siguridad, siendo cu asaltantenan di caminda grandi a haci e biahe insigur.—2 Corintionan 11:26.

Siendo cu Aristarco i Trófimo a compañá Pablo pa Jerusalem, algun hende ta pensa cu probablemente Tíkico i e otronan tambe a haci esei. (Echonan 21:29; 24:17; 27:1, 2) Debí cu Tíkico tabata enbolbí den e programa di auxilio aki, e ta un dje vários hombernan proponé di tabata e “ruman” cu a traha cu Tito na Grecia pa organisá e colect, i cu a ser “nombrá p’e congregacionnan pa ta [Pablo su] compañero di biahe en coneccion cu e regalo bondadoso aki.” (2 Corintionan 8:18, 19; 12:18) Si e promé comision cu Tíkico a cumpli cuné tabata unu responsabel, su di dos no tabata ménos.

Di Roma pa Colósas

Cincu of seis aña despues (60-61 E.C.), Pablo tabata spera di ser librá for di su promé encarcelacion na Roma. Tíkico tabata huntu cuné, cientos di kilometer for di cas. Awor Tíkico tabata bayendo Asia bek. Esaki a permití Pablo manda carta p’e congregacionnan cristian den e área ei i manda Onésimo, e esclabo di Filemon cu a hui for di su doño, bek pa Colósas. Tíkico i Onésimo a hiba por lo ménos tres carta cu awor ta den e cánon bíblico—unu n’e efesionan, unu n’e colosensenan i unu na Filemon. Tal bes nan a entregá un carta n’e congregacion na Laodicea tambe, un stad rond di 18 kilometer for di Colósas.—Efesionan 6:21; Colosensenan 4:7-9, 16; Filemon 10-12.

Tíkico no tabata djis un partidó di carta. E tabata un mensahero personal di confiansa, pasobra Pablo a skirbi: “Tíkico, mi ruman stimá i minister fiel i co-esclabo den Señor, lo duna boso di conocé tur mi asuntunan. Pa e propósito di pone boso na haltura di loke tin di haber cu nos i p’e por consolá boso curason, mi ta mand’é cerca boso.”—Colosensenan 4:7, 8.

E erudito E. Randolph Richards ta mustra cu un hibadó di carta “hopi biaha tabata un medio di contacto personal entre e autor i esnan cu ta ricibí e carta, banda dje contacto por escrito. . . . [Un motibu] pa cua tabatin mester di un hibadó di carta confiabel tabata [cu] hopi bes e tabata hiba informacion adicional. Un carta por a describí un situacion brevemente, hopi bes cu e evaluacion dje autor, pero ta e hibadó lo mester a elaborá riba tur e detayenan pa esun cu ta ricibí e carta.” Aunke un carta por a trata cu siñansa i asuntunan urgente, otro cosnan lo a ser transmití verbalmente dor di un mensahero di confiansa.

E cartanan na e efesionan, e colosensenan i Filemon ta bisa poco tocante con tabata bayendo cu Pablo. Pues Tíkico tabatin cu pasa informacion personal, splica e circunstancianan di Pablo na Roma, i comprendé situacionnan reinante den e congregacionnan suficiente bon pa por a duna animacion. Ta hende cu bo por a dependé riba dje pa representá e remitente fielmente so bo por a confia cu e clase di mensahe i responsabilidadnan aki. Tíkico tabata un homber asina.

Supervision den Asignacionnan Leu

Despues cu Pablo a ser librá for di huisarrest na Roma, el a pensa pa manda sea Tíkico of Artemas cerca Tito riba e isla di Creta. (Tito 1:5; 3:12) Durante Pablo su segundo encarcelacion na Roma (probablemente rond di 65 E.C.), atrobe e apostel a manda Tíkico Efeso, posiblemente pa tuma e lugá di Timoteo, kende e ora ei lo por a biaha bini cerca Pablo p’e por tabata na su lado.—2 Timoteo 4:9, 12.

E Scritura no ta bisa si Tíkico a bai tantu Creta como Efeso durante e periodo aki. No obstante, referencianan manera esakinan ta indicá cu el a keda un di Pablo su socionan íntimo te cu e último añanan dje apostel su ministerio. Si Pablo tabata pensa di mand’é riba misionnan responsabel i tal bes difícil na lugá di Timoteo i Tito, ta bisto cu Tíkico mester tabata un superintendente cristian maduro. (Compará cu 1 Timoteo 1:3; Tito 1:10-13.) Su disponibilidad pa biaha i ser usá den asignacionnan leu a hacié útil pa Pablo i pa henter e congregacion cristian.

Awe, cristiannan cu tin un spiritu di sacrificio propio ta sirbi Dios di buena gana den congregacionnan local di Testigonan di Jehova of ta haci nan mes disponibel pa promové interesnan di Reino otro caminda. Miles di nan a aceptá gustosamente asignacionnan como misionero, superintendente biahero, sirbidó internacional den proyectonan di construccion, n’e sede mundial di Sociedad Watch Tower of na un di su sucursalnan. Mescos cu Tíkico, nan no ta destacá mashá, pero nan ta trahadónan diligente, ‘ministernan fiel’ cu Dios ta apreciá mashá i cu otro cristiannan ta stima como ‘co-esclabonan confiabel den Señor.’