Jehova—Un Dios Cu Ta Revela Secreto

“Ta existí un Dios den shelu cu ta un Revelador di secreto.”—DANIEL 2:28.

1, 2. (a) Den ki manera Jehova ta diferente for di su gran Adversario? (b) Con hende ta reflehá e diferencia aki?

JEHOVA, e Dios supremo i amoroso di universo, e solo i único Creador, ta un Dios di sabiduria i husticia. E no tin necesidad di sconde su identidad, su obranan of su propósitonan. Na su mes tempu i na su mes discrecion, e ta revelá su mes. Den e manera aki e ta diferenciá for di su Adversario, Satanas e Diabel, cu ta trata na sconde su berdadero identidad i intencionnan.

² Mescos cu Jehova i Satanas ta contrali na otro, asina tambe nan adoradónan ta. Esnan cu ta sigui e guia di Satanas ta ser caracterisá pa engaño i cosnan contradictorio. Nan ta purba presentá nan mes den un bon lus, miéntras nan ta haci obranan cu ta pertenecé na scuridad. Pablo a bisa e cristiannan corintio pa no laga e echo aki sorprendé nan. “Pasobra hombernan asina ta apostelnan falsu, trahadónan engañoso, transformando nan mes na apostelnan di Cristo. I nada straño, pasobra Satanas mes ta sigui transformá su mes na un angel di lus.” (2 Corintionan 11:13, 14) Cristiannan, di otro banda, ta acudí na Cristo como nan Lider. Tempu cu e tabata riba tera el a reflehá perfectamente e personalidad di su Tata, Jehova Dios. (Hebreonan 1:1-3) Asina, dor di sigui Cristo, cristiannan ta imitando Jehova, e Dios dje berdad, di lus i habrí pa conocé. Nan tampoco no tin necesidad di sconde nan identidad, nan obranan of nan propósitonan.—Efesionan 4:17-19; 5:1, 2.

3. Con nos por refutá e acusacion cu hende cu ta bira Testigo di Jehova ta ser forsá pa djoin un “secta secreto”?

³ Na e tempu cu Jehova ta haña ta mihó, e ta revelá detayenan tocante su propósitonan i tocante e futuro cu anteriormente tabata desconocí pa hende. Den e sentido aki e ta un Dios cu ta revelá secreto. P’esei, hende cu kier sirbié ta ser invitá—sí urgí—pa siña tal informacion revelá. Un investigacion na 1994 bou di mas cu 145.000 Testigo na un pais europeo a revelá cu, como promedio, cada un di nan personalmente a investigá e siñansanan di Testigonan di Jehova pa tres aña promé cu nan a scoge pa bira un Testigo. Nan a scoge esei segun nan propio boluntad liber no obligá. I nan a sigui tin libertad di boluntad i accion. Por ehempel, pa motibu cu algun no tabata eens mas cu e normanan haltu di moralidad pa cristiannan, nan a dicidí despues cu nan no kier a sigui mas como Testigo. Sin embargo, ta interesante cu durante e último cincu añanan, un gran parti di e ex-Testigonan aki a dal paso pa bolbe asociá i participá cu e Testigonan den nan actividadnan.

4. Kico no mester molestiá cristiannan fiel, i pakico no?

⁴ Naturalmente, no ta tur ex-Testigo ta regresá, i entre nan tin algun cu un tempu tabatin posicion di responsabilidad den e congregacion cristian. Esaki no mester ta un sorpresa, pasobra asta un di Jesus su siguidónan di mas íntimo, apostel Hudas, a bandon’é. (Mateo 26:14-16, 20-25) Pero esaki ta motibu pa keda preocupá tocante cristianismo mes? Esaki ta nulificá e éxito cu cua Testigonan di Jehova ta efectuando nan actividad educacional? Di ningun manera, mescos cu e accion traicionero di Hudas Iscariote no a stanca e propósitonan di Dios.

Todopoderoso i tog Amoroso

5. Con nos sa cu Jehova i Jesus ta stima hende, i con nan a demostrá e amor aki?

⁵ Jehova ta un Dios di amor. E ta interesá den hende. (1 Juan 4:7-11) Apesar di su posicion elevá, e ta gusta haci hende bira su amigu. Di un di su sirbidónan di antigwedad, nos ta lesa: “‘Abraham a pone fe den Jehova, i esei a ser contá na dje como husticia,’ i el a yega di ser yamá ‘amigu di Jehova.’” (Santiago 2:23; 2 Crónicanan 20:7; Isaías 41:8) Mescos cu amigunan humano ta compartí cosnan confidencial, of secretonan, asina tambe Jehova ta haci cu su amigunan. Den esaki Jesus a imitá su Tata, pasobra el a bira amigu di su disipelnan i a compartí secretonan cu nan. “Mi no ta yama boso esclabo mas,” el a bisa nan, “pasobra un esclabo no sa loke su doño ta haci. Pero mi a yama boso amigu, pasobra tur e cosnan cu mi a tende for di mi Tata mi a duna di conocé na boso.” (Juan 15:15) E informacion privá, of “secretonan,” cu Jehova, su Yu i nan amigunan ta compartí, ta uni nan den un vínculo inkebrantabel di amor i debocion.—Colosensenan 3:14.

6. Pakico Jehova no tin necesidad di sconde su intencionnan?

⁶ E nificacion dje nomber Jehova, “E Ta Causa pa Yega di Ser,” ta indicá su abilidad pa bira loke e tin cu bira pa por cumpli cu su propósito. Distinto for di hende, Jehova no tin necesidad di sconde su intencionnan pa miedu cu otronan lo por strob’é di cumpli cu nan. E simplemente no por faya, p’esei e ta revelá abiertamente den su Palabra, e Bijbel, hopi di loke e ta proponé di haci. E ta primintí: “Mi palabra . . . [lo] no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur pa locual mi a mand’é.”—Isaías 55:11.

7. (a) Kico Jehova a profetisá den Eden, i con Satanas a proba cu Dios ta papia berdad? (b) Con e principio na 2 Corintionan 13:8 semper ta cierto?

⁷ Djis despues dje rebelion den Eden, Jehova a revelá den algun palabra kico lo ta e resultado final dje controversia cu lo a sigui entre e i su Adversario, Satanas. E Simia primintí di Dios lo ser heridá dolorosamente, pero no permanentemente, miéntras cu Satanas finalmente lo sufri un herida fatal. (Génesis 3:15) Na 33 E.C., e Diabel en berdad a heridá e Simia, Cristo Jesus, causando su morto. Den e manera aki, Satanas a cumpli cu e Scritura i na mésun tempu a proba cu Jehova ta un Dios dje berdad, aunke esaki siguramente no tabata e intencion di Satanas. Su odio contra berdad i husticia, i tambe su actitud di orguyo i no-repentí, a pon’é haci exactamente loke Dios a predicí cu lo el a haci. Sí, pa tur opositor dje berdad, asta pa Satanas mes, e principio aki ta cierto: “Nos no por haci nada contra e berdad, sino solamente na fabor dje berdad.”—2 Corintionan 13:8.

8, 9. (a) Kico Satanas sa, pero e conocimentu aki ta pone e realisacion di Jehova su propósitonan na peliger? (b) Ki spiertamentu claro opositornan di Jehova ta ignorá, i pakico?

⁸ Desde cu e Reino di Dios a ser establecé invisiblemente na 1914, Revelacion 12:12 a aplicá: “P’e motibu aki alegrá, shelu i boso cu ta biba den dje! Ai dje tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” Pero, e echo cu Satanas sa cu su tempu ta corticu ta pon’é cambia su curso? Esei lo nificá cu Satanas ta admití cu Jehova ta un Dios dje berdad i cu como e Gobernante Supremo, e so ta digno di adoracion. Sin embargo, e Diabel no ta dispuesto pa admití derota maske e ta bon conciente dje echonan aki.

⁹ Jehova ta revelá abiertamente kico lo sosodé ora Cristo bini pa ehecutá huicio riba e sistema di mundu di Satanas. (Mateo 24:29-31; 25:31-46) En coneccion cu esaki, su Palabra ta anunciá relacioná cu gobernantenan di mundu: “Ki ora cu nan ta bisando: ‘Pas i siguridad!’ e ora ei destruccion repentino lo bini riba nan instantáneamente mescos cu e dolor di angustia riba un muher na estado.” (1 Tesalonicensenan 5:3) Esnan cu ta sigui Satanas su ehempel ta ignorá e spiertamentu claro aki. Nan ta ciegá pa causa di nan curason malbado, i esaki ta prevení nan di repentí di nan curso malbado i di cambia nan plannan i estrategia cu ta purba frustra Jehova su propósitonan.

10. (a) Te na ki grado 1 Tesalonicensenan 5:3 tabatin un cumplimentu, pero con Jehova su pueblo mester reaccioná? (b) Pakico hende sin fe por bira mas agresivo den futuro oponiendo e pueblo di Dios?

¹⁰ Particularmente desde 1986, ora Nacionnan Uní a proclamá un Aña Internacional di Pas, e asuntu di pas i siguridad tabata tópico di combersacion p’e mundu. Pasonan definitivo a ser tumá den un esfuerso pa garantisá pas mundial, i aparentemente e esfuerso aki a producí algun éxito. Esaki ta e cumplimentu completo dje profecia aki, of nos por spera un of otro sorto di anuncio asombroso den futuro? Jehova lo clarificá e asuntu ei na su debido tempu. Miéntras tantu, laga nos keda spiritualmente lantá “sperando i teniendo mashá presente e presencia dje dia di Jehova.” (2 Pedro 3:12) Segun cu tempu ta sigui pasa cu mas papiamentu ainda tocante pas i siguridad, algun individuo cu sa dje spiertamentu aki, pero cu ta scoge pa ignor’é, ta bira cada bes mas desafiante cu Jehova lo no cumpli, ni no por cumpli cu su palabra. (Compará cu Eclesiástes 8:11-13; 2 Pedro 3:3, 4.) Pero cristiannan berdadero sa cu Jehova lo realisá su propósito!

Debido Respet p’e Agencianan cu Jehova Ta Usa

11. Kico Daniel i Josef a siña tocante Jehova?

¹¹ Ora Rey Nabucodonosor, gobernante dje imperio neo-babilónico, a haña un soño cu a molesti’é i cu e no por a corda, el a busca yudansa. Su sacerdotenan, tovenarnan i bruhonan tampoco no por a bis’é kico su soño tabata ni splik’é loke el a nificá. Sin embargo, Daniel, e sirbidó di Dios, sí tabata por, aunke el a admití mesora cu e revelacion dje soño i su nificacion no tabata un resultado di su mes sabiduria. Daniel a bisa: “Ta existí un Dios den shelu cu ta un Revelador di secreto, i el a haci e Rey Nabucodonosor sa loke tin cu sosodé den e parti final dje dianan.” (Daniel 2:1-30) Vários siglo mas promé, Josef, un otro profeta di Dios, a experenciá di mes manera cu Jehova ta un Revelador di secreto.—Génesis 40:8-22; Amos 3:7, 8.

12, 13. (a) Ken tabata e profeta mas grandi di Dios, i pakico bo ta contestá asina? (b) Ken awe ta sirbi como “mayordomonan di secretonan sagrado di Dios,” i con nos mester mira nan?

¹² E profeta mas grandi di Jehova cu a sirbi riba tera tabata Jesus. (Echonan 3:19-24) Pablo a splica: “Dios, kende hopi tempu pasá a papia na hopi ocasion i den hopi manera cu nos antepasadonan pa medio dje profetanan, a papia cu nos na fin dje dianan aki pa medio di un Yu, kende el a nombra heredero di tur cos, i pa medio di ken el a traha e sistema di cosnan.”—Hebreonan 1:1, 2.

¹³ Jehova a papia cu cristiannan di promé pa medio di su Yu, Jesus, kende a revelá secretonan divino na nan. Jesus a bisa nan: “Ta duná na boso pa comprendé e secretonan sagrado dje reino di Dios.” (Lucas 8:10) Mas despues Pablo a bisa cu cristiannan ungí ta “esnan subordiná di Cristo i mayordomonan di secretonan sagrado di Dios.” (1 Corintionan 4:1) Awe, cristiannan ungí ta sigui sirbi como tal, componiendo un clase di esclabo fiel i discreto cu mediante su Cuerpo Gobernante ta suministrá alimento spiritual na e tempu apropiado. (Mateo 24:45-47) Si nos ta respetá altamente e profetanan di pasado cu Dios a inspirá, i particularmente e Yu di Dios, nos no mester respetá tambe e agencia humano cu Jehova ta usando awe pa revelá informacion bíblico asina necesario pa su pueblo den e tempu crítico aki?—2 Timoteo 3:1-5, 13.

Un Actitud Habrí of Secreto?

14. Ki ora cristiannan ta sigui cu nan actividadnan na secreto, siguiendo asina ken su ehempel?

¹⁴ Jehova su actitud habrí den revelá cosnan ta nificá cu cristiannan semper i bou di tur circunstancia mester revelá tur loke nan sa? Wel, cristiannan ta sigui Jesus su conseho na su apostelnan pa ta “cauteloso manera colebra i tog inocente manera palomba.” (Mateo 10:16) Si cristiannan ser informá cu nan no por adorá Dios manera nan concenshi ta exigí, nan ta sigui “obedecé Dios,” pasobra nan ta realisá cu ningun agencia humano tin derecho di restringí e adoracion di Jehova. (Echonan 5:29) Jesus mes a demostrá cu esaki ta apropiado. Nos ta lesa: “Awor despues dje cosnan aki, Jesus a sigui cana rond den Galilea, pasobra e no tabata kier a cana rond den Hudea, pasobra e hudiunan tabata busca moda di mat’é. Sin embargo, e fiesta dje hudiunan, e fiesta di tabernáculo, tabata cerca. P’esei Jesus a bisa nan [su rumannan carnal nocreyente]: . . . ‘Boso subi na e fiesta; ami no ta subi na e fiesta ainda, pasobra mi debido tempu no a yega completamente ainda.’ Di manera cu despues di a bisa nan e cosnan aki, el a keda den Galilea. Pero ora su rumannan a subi n’e fiesta, e ora ei e mes a subi tambe, no abiertamente sino na secreto.”—Juan 7:1, 2, 6, 8-10.

Bisa of No Bisa?

15. Con José a indicá cu tin biaha ta amoroso pa warda un secreto?

¹⁵ Den algun caso, no ta solamente sabí sino tambe amoroso pa tene un asuntu privá. Por ehempel, con José, e tata di criansa di Jesus, a reaccioná ora el a haña sa cu su futuro bruid, Maria, tabata na estado? Nos ta lesa: “Sin embargo, José su esposo, debí cu e tabata hustu i no tabata kier a haci un espectáculo público di dje, tabatin intencion di divorci’é secretamente.” (Mateo 1:18, 19) Ki cruel lo tabata pa haci un espectáculo público di dje!

16. Ki responsabilidad ancianonan, i tambe tur otro miembro dje congregacion, tin relacioná cu asuntunan confidencial?

¹⁶ Asuntunan confidencial cu lo por causa bergwensa of pena no mester ser revelá na personanan no-autorisá. Ancianonan cristian ta tene esaki na mente ora nan tin cu ofrecé conseho personal of consuelo na compañeronan cristian of posiblemente asta disipliná nan pa a cometé un picá serio contra Jehova. Ta necesario pa atendé e asuntunan aki den un manera bíblico; no ta necesario i ta un falta di amor pa revelá detayenan confidencial na esnan cu no ta enbolbí. Siguramente, miembronan dje congregacion cristian lo no trata di saca informacion confidencial for di ancianonan sino lo respetá e anciano su responsabilidad di tene cosnan confidencial secreto. Proverbionan 25:9 ta remarcá: “Pleita bo mes caso cu bo próhimo, i no revelá papiamentu confidencial di un otro.”

17. Pakico cristiannan den mayoria caso ta tene asuntunan confidencial secreto, pero pakico nan no por haci esei semper?

¹⁷ E principio aki di mantené confidencialidad ta aplicá tambe den e círculo di famia of entre amigunan íntimo. Tene algun asuntu confidencial ta vital pa evitá malcomprendimentu i relacionnan tenso. “E bientu di nort ta producí manera cu dolor di parto un awaceru; i un lenga cu ta divulgá un secreto, un cara denunciá.” (Proverbionan 25:23) Naturalmente, lealtad na Jehova i su principionan hustu, i tambe amor pa individuonan cu ta faya, de bes en cuando por haci necesario pa bisa mayornan, ancianonan cristian of otro personanan autorisá asta asuntunan confidencial.a Pero den mayoria caso, cristiannan ta tene e secretonan personal di otronan confidencial, wardando nan manera nan ta warda di nan mes.

18. Cua tres cualidadnan cristian por yuda nos determiná kico nos mester bisa i kico nos no mester bisa?

¹⁸ En resúmen, un cristian ta imitá Jehova dor di tene algun asuntu confidencial ora ta necesario, revelando nan solamente ora ta apropiado. Ora di dicidí kico e mester bisa i kico e no mester bisa, e ta laga humildad, fe i amor gui’é. Humildad ta previnié di exagerá su mes importancia, tratando di impresioná otronan sea dor di bisa nan tur loke e sa of dor di lanta nan curiosidad pa secretonan cu e no por bisa nan. Fe den e Palabra di Jehova i den e congregacion cristian ta motiv’é pa papia di informacion bíblico cu Dios a suministrá miéntras cu e ta tene cuidou pa no bisa cosnan cu fo’i cuminsamentu lo por ofendé otronan. Sí, amor ta motiv’é pa bisa libremente cosnan cu ta glorificá Dios i cu hende mester sa afin di gana bida. Di otro banda, e no ta revelá asuntunan personal confidencial, sabiendo cu den mayoria caso revelando nan lo indicá un falta di amor.

19. Ki curso di accion ta yuda identificá cristiannan berdadero, i na kico e ta hiba?

¹⁹ E actitud balansá aki ta yuda identificá cristiannan berdadero. Nan no ta sconde Dios su identidad dor di keda sin usa su nomber of dor di adoptá un doctrina di Trinidad misterioso i inexplicabel. Diosnan desconocí ta un característica di religion falsu, no di esun berdadero. (Mira Echonan 17:22, 23.) Jehova su Testigonan ungí berdaderamente ta apreciá e privilegio di ta “mayordomonan di secretonan sagrado di Dios.” Dor di revelá abiertamente e secretonan aki na otronan, nan ta yuda atraé personanan onrado pa busca e amistad di Jehova.—1 Corintionan 4:1; 14:22-25; Zacarías 8:23; Malakías 3:18.

[Notas]

Con Lo Bo Contestá?

◻ Pakico Jehova no tin necesidad di sconde su intencionnan?

◻ Na ken Jehova ta revelá su secretonan?

◻ Ki responsabilidad cristiannan tin relacioná cu asuntunan confidencial?

◻ Cua tres cualidadnan lo yuda cristiannan sa kico pa bisa i kico pa no bisa?

[Plachinan na página 8, 9]

Jehova ta revelá secreto pa medio di su Palabra