Acudí na Jehova pa Consuelo

“Laga e Dios cu ta suministrá awante i consuelo permití boso tene den boso mes e mésun actitud mental cu Cristo Jesus tabatin.”—ROMANONAN 15:5.

1. Pakico cada dia ta trece cuné un necesidad mas grandi pa consuelo?

CADA dia cu ta pasa ta trece cuné un necesidad aumentante pa consuelo. Manera un escritor bíblico a observá mas cu 1.900 aña pasá, “tur e creacion ta sigui suspirá huntu i kedando den dolor huntu te awor.” (Romanonan 8:22) Den nos tempu ‘suspiro’ i “dolor” tabata mas grandi cu nunca. Desde Guera Mundial I, humanidad a sufri un crísis tras di otro den forma di guera, crímen i desasternan natural cu hopi biaha ta conectá cu hende su mal maneho dje tera.—Revelacion 11:18.

2. (a) Ken ta e mayor culpabel p’e afliccionnan actual di humanidad? (b) Ki echo ta duna nos un base pa consuelo?

² Pakico tabatin asina tantu sufrimentu den nos tempu? Describiendo e tiramentu di Satanas for di shelu despues dje nacementu dje Reino na 1914, Bijbel ta contestá: “Ai dje tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:12) E evidencia claro dje cumplimentu dje profecia ei ta nificá cu nos ta casi n’e fin di Satanas su gobernacion malbado. Ta ki un consuelo pa sa cu pronto nos lo por biba atrobe den e condicion pacífico cu a existí promé cu Satanas a hiba nos promé mayornan na rebelion!

3. Na ki tempu hende no tabata den necesidad di consuelo?

³ Na cuminsamentu, e Creador di hende a percurá un bunita parke como hogar p’e promé pareha humano. E tabata situá den un área yamá Eden, nificando “Deleite” of “Placer.” (Génesis 2:8, nota) Ademas, Adam i Eva a disfrutá di salú perfecto, cu e perspectiva di no muri nunca. Djis pensa dje hopi áreanan den cua nan por a desaroyá nan abilidadnan—cultivá hardin, arte, construccion, música. Pensa tambe di tur e obranan di creacion cu nan por a studia segun cu nan a cumpli cu nan comision pa dominá e tera i hacié un paradijs. (Génesis 1:28) En berdad, e bida di Adam i Eva lo por tabata yená, no cu suspiro i dolor, sino cu placer i deleite. Claramente, nan lo no tabata den necesidad di consuelo.

4, 5. (a) Pakico Adam i Eva no a pasa e prueba di obedencia? (b) Con humanidad a bin haña su mes den necesidad di consuelo?

⁴ Sin embargo, loke Adam i Eva sí mester a haci, tabata cultivá un amor i aprecio profundo pa nan Tata celestial bondadoso. Un amor asina lo a motivá nan pa obedecé Dios bou di tur circunstancia. (Compará cu Juan 14:31.) Lamentablemente, tur nos dos mayornan original a faya na obedecé nan Soberano legítimo, Jehova. En bes di esei, nan a permití nan mes bini bou dje gobernacion malbado di un angel degradá, Satanas e Diabel. Tabata Satanas cu a tenta Eva pa peca i come e fruta prohibí. Despues Adam a peca ora e tambe a come dje fruta dje palu di cua Dios a spierta claramente: “Den e dia cu bo come di dje lo bo muri positivamente.”—Génesis 2:17.

⁵ Den e manera aki, e pareha pecaminoso a cuminsá muri. Ora Dios a duna e sentencia di morto, tambe el a declará na Adam: “Maldicioná e tera ta pa bo motibu. Cu dolor lo bo come su producto tur e dianan di bo bida. I sumpiña i bringamosa lo e producí pa bo, i bo mester come e berdura dje campo.” (Génesis 3:17, 18) Asina Adam i Eva a perde e posibilidad di combertí e tera no-cultivá den un paradijs. Expulsá for di Eden, nan tabatin cu concentrá nan energia pa haña nan cuminda cu sodó di nan frenta for di un tera cu a ser maldicioná. Nan desendientenan, cu a heredá e condicion pecaminoso i muribundo aki, a bin haña nan mes den un necesidad grandi di consuelo.—Romanonan 5:12.

Un Promesa Consolador Ta Ser Cumplí

6. (a) Ki promesa consolador Dios a haci despues cu humanidad a cai den picá? (b) Ki profecia relacioná cu consuelo Lamec a expresá?

⁶ Ora Jehova a sentenciá e instigador di hende su rebelion, el a resultá di ta ‘e Dios cu ta suministrá consuelo.’ (Romanonan 15:5) El a haci esei dor di primintí di manda un “simia” cu finalmente lo a libra e desendientenan di Adam for dje efectonan desastroso di Adam su rebelion. (Génesis 3:15) Cu tempu, Dios a duna tambe un bista delantá dje liberacion aki. Por ehempel, el a inspirá Lamec, un desendiente lehano di Adam via su yu homber Set, pa profetisá tocante loke e yu di Lamec lo a haci: “Esaki lo trece consuelo pa nos for di nos trabou i for dje dolor di nos mannan cu ta resultá for dje suela cu Jehova a maldicioná.” (Génesis 5:29) Na armonia cu e promesa aki, e mucha homber a ser yamá Noe, cu segun indicacion ta nificá “Sosiegu” of “Consolacion.”

7, 8. (a) Ki situacion a pone Jehova sinti duele cu el a crea hende, i kico El a proponé di haci consecuentemente? (b) Con Noe a cumpli cu e nificacion di su nomber?

⁷ Miéntras tantu, Satanas tabata ganando siguidornan entre algun dje angelnan celestial. Esakinan a materialisá como hende i a tuma desendientenan femenino atractivo di Adam como esposa. E matrimonionan innatural ei a corumpí e sociedad humano asta mas i a producí un rasa pecaminoso di Nefilim, “tumbadornan,” cu a yena e tera cu violencia. (Génesis 6:1, 2, 4, 11; Hudas 6) “Consecuentemente, Jehova a mira cu e maldad di hende tabata abundante den e tera . . . I Jehova a sinti duele cu el a traha hende riba e tera, i el a sintié ofendí den su curason.”—Génesis 6:5, 6.

⁸ Jehova a proponé pa destruí e mundu malbado ei mediante un diluvio mundial, pero promé el a laga Noe traha un arca pa conserbá bida. Asina, e rasa humano i e géneronan di animal a ser salbá. Ki un alivio Noe i su famia mester a sinti despues dje Diluvio ora cu nan a sali for dje arca riba un tera hací limpi! Tabata ki un consuelo pa haña cu e maldicion riba e suela a ser kitá, haciendo trabou di agricultura muchu mas fácil! En berdad, e profecia di Lamec a resultá di ta cierto, i Noe a cumpli cu e nificacion di su nomber. (Génesis 8:21) Como un fiel sirbidor di Jehova, Noe a hunga un papel importante den trece un midí di “consuelo” pa humanidad. Sin embargo, e influencia malbado di Satanas i su angelnan demoniaco no a caba na e Diluvio, i humanidad ta sigui suspirá bou dje peso di picá, enfermedad i morto.

Unu Mas Grandi cu Noe

9. Con Jesucristo a resultá di ta un yudante i consolador pa hende repentí?

⁹ Cu tempu, n’e fin di mas o ménos 4.000 aña di historia humano, e Simia primintí a yega. Motivá pa un amor grandi pa humanidad, Jehova Dios a manda su Yu unigénito na tera pa muri como un rescate pa humanidad pecaminoso. (Juan 3:16) Jesucristo ta trece gran alivio pa pecadornan repentí cu ta ehercé fe den su morto sacrificial. Tur persona cu ta dedicá nan bida na Jehova i ta bira disipelnan bautisá di su Yu ta experenciá refrescamentu i consuelo duradero. (Mateo 11:28-30; 16:24) Apesar di nan imperfeccion, nan ta haña goso profundo den sirbi Dios cu un concenshi limpi. Ta ki un consuelo pa nan pa sa cu si nan sigui ehercé fe den Jesus, nan lo ser recompensá cu bida eterno! (Juan 3:36; Hebreonan 5:9) Si debí na debilidad nan cometé un picá serio, e ora ei nan tin un yudante, of consolador, den Señor Jesucristo resucitá. (1 Juan 2:1, 2) Dor di confesá tal picá i dor di dal e pasonan bíblico pa evitá di bira practicante di picá, nan ta haña alivio, sabiendo cu ‘Dios ta fiel i hustu p’e pordoná nan picá.’—1 Juan 1:9; 3:6; Proverbionan 28:13.

10. Kico nos ta siña for dje milagernan cu Jesus a efectuá ora e tabata riba tera?

¹⁰ Tempu cu Jesus tabata riba tera, el a trece refrescamentu tambe dor di libra esnan poseí pa demoño, dor di cura tur sorto di enfermedad, i dor di lanta stimánan morto bek na bida. Ta cierto cu milagernan asina tabata solamente di beneficio temporal, siendo cu esnan cu a ricibí e bendicionnan ei despues a bira bieu i muri. No obstante, haciendo esei Jesus a señalá n’e futuro bendicionnan permanente cu lo e drama riba henter humanidad. Siendo awor un Rey celestial poderoso, pronto lo e haci hopi mas cu simplemente expulsá e demoñonan. Lo e tira nan den abismo huntu cu nan lider, Satanas, den un condicion di inactividad. E ora ei e glorioso Reinado di Mil Aña di Cristo lo cuminsá.—Lucas 8:30, 31; Revelacion 20:1, 2, 6.

11. Pakico Jesus a yama su mes “Señor di sabat”?

¹¹ Jesus a bisa cu e tabata “Señor di sabat,” i hopi di su curacionnan a ser efectuá riba e dia di sabat. (Mateo 12:8-13; Lucas 13:14-17; Juan 5:15, 16; 9:14) Pakico esaki tabata asina? Wel, sabat tabata parti dje Ley cu Dios a duna Israel i a sirbi asina como “un sombra dje bon cosnan pa bini.” (Hebreonan 10:1) E seis dianan di siman di trabou ta recordá nos di hende su pasado di 6.000 aña di sclabitud na Satanas su gobernacion opresivo. E dia di sabat na fin dje siman ta trece na mente e sosiegu consolador cu humanidad lo experenciá durante e Reinado di Mil Aña dje Noe Mayor, Jesucristo.—Compará cu 2 Pedro 3:8.

12. Ki experencianan consolador nos por spera cu anhelo?

¹² Ki un alivio súbditonan terenal dje gobernacion di Cristo lo sinti ora cu, por fin, nan haña nan mes totalmente liber for dje influencia malbado di Satanas! Mas consuelo lo bini ora nan haña curacion di nan enfermedadnan físico, emocional i mental. (Isaías 65:17) Anto, djis imaginá nan alegria inmenso ora nan cuminsá yama personanan stimá bon biní bek for di morto! Den e maneranan aki Dios lo “seca tur lágrima di nan wowo.” (Revelacion 21:4) Segun cu e beneficionan dje sacrificio di rescate di Jesus ta ser aplicá progresivamente, e súbditonan obediente dje Reino di Dios lo crece na perfeccion, birando totalmente liber di tur e mal efectonan dje picá di Adam. (Revelacion 22:1-5) E ora ei Satanas lo ser lagá los “pa un poco tempu.” (Revelacion 20:3, 7) Tur hende cu ta sostené fielmente e soberania legítimo di Jehova lo ser recompensá cu bida eterno. Imaginá e goso i alivio inexplicabel di ser ‘librá completamente for di sclabitud na corupcion’! Asina ei humanidad obediente lo disfrutá di “e glorioso libertad dje yunan di Dios.”—Romanonan 8:21.

13. Pakico tur cristian berdadero mester dje consuelo cu Dios ta suministrá?

¹³ Miéntras tantu, nos ta sigui pasa den e suspiro i dolor cu tur hende cu ta biba meimei dje sistema malbado di Satanas ta experenciá. E aumento di malesa físico i trastorno emocional ta afectá tur clase di hende, incluyendo cristiannan fiel. (Filipensenan 2:25-27; 1 Tesalonicensenan 5:14) Ademas, como cristiannan hopi biaha nos ta sufri dje bofon inhustu i persecucion cu Satanas ta montoná riba nos debí cu nos ta “obedecé Dios como gobernante mas bien cu hende.” (Echonan 5:29) Pues, si nos kier perseverá den hacimentu dje boluntad di Dios te n’e fin dje mundu di Satanas, nos tin mester dje consuelo, yudansa i fortalesa cu E ta suministrá.

Unda pa Haña Consuelo

14. (a) Ki promesa Jesus a haci riba e anochi promé cu su morto? (b) Kico ta necesario si nos kier beneficiá plenamente for dje consuelo dje spiritu santu di Dios?

¹⁴ Riba e anochi promé cu su morto, Jesus a splica su fiel apostelnan claramente cu pronto lo e tabatin cu bandoná nan i bolbe cerca su Tata. Esaki a molestiá nan i a haci nan tristu. (Juan 13:33, 36; 14:27-31) Reconociendo nan necesidad pa consuelo continuo, Jesus a primintí: “Lo mi pidi e Tata i lo e duna boso un otro consolador pa keda cu boso pa semper.” (Juan 14:16, nota) Aki Jesus a referí n’e spiritu santu di Dios, cua a ser dramá riba su disipelnan 50 dia despues di su resureccion.a Entre otro, e spiritu di Dios a consolá nan durante nan pruebanan i a fortalecé nan pa sigui haci e boluntad di Dios. (Echonan 4:31) Sin embargo, tal yudansa no mester ser mirá como algu automático. Pa beneficiá plenamente di dje, cada cristian mester sigui pidi den oracion p’e yudansa consolador cu Dios ta percurá mediante su spiritu santu.—Lucas 11:13.

15. Cua ta algun manera cu Jehova ta suministrá consuelo na nos?

¹⁵ Un otro manera den cua Dios ta percurá consuelo ta mediante su Palabra, e Bijbel. Pablo a skirbi: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Esaki ta mustra e necesidad pa nos studia i meditá regularmente riba e cosnan skirbí den Bijbel i den publicacionnan basá riba Bijbel. Tambe nos mester ta regular den asistí na reunionnan cristian, unda nos por compartí pensamentunan consolador for dje Palabra di Dios. Un dje propósitonan principal di reunionnan asina ta pa animá otro.—Hebreonan 10:25.

16. Kico e percuracionnan consolador di Dios mester motivá nos pa haci?

¹⁶ Pablo su carta n’e romanonan ta pasa na mustra e bon resultadonan cu nos ta ricibí dor di haci uso dje percuracionnan consolador di Dios. “Laga e Dios cu ta suministrá awante i consuelo,” Pablo a skirbi, “permití boso tene den boso mes e mésun actitud mental cu Cristo Jesus tabatin, afin cu di comun acuerdo boso por cu un solo boca glorificá e Dios i Tata di nos Señor Jesucristo.” (Romanonan 15:5, 6) Sí, dor di saca pleno probecho dje percuracionnan consolador di Dios, nos lo bira mas manera nos Lider yen di curashi, Jesucristo. Esaki lo motivá nos pa sigui usa nos boca pa glorificá Dios den nos trabou di duna testimonio, na nos reunionnan, den combersacion privá cu compañeronan creyente, i den nos oracionnan.

Den Tempu di Prueba Severo

17. Con Jehova a consolá su Yu, i cu ki resultado?

¹⁷ Jesus a bira “penosamente molestiá” i “profundamente afligí” e anochi promé cu su morto agonisante. (Mateo 26:37, 38) Di manera cu el a alehá un poco for di su disipelnan i den oracion a pidi su Tata pa yudansa. “El a ser tendé faborablemente pa su temor piadoso.” (Hebreonan 5:7) Bijbel ta informá cu “un angel for di shelu a aparecé na [Jesus] i a fortalec’é.” (Lucas 22:43) E forma balente i baronil den cua Jesus a pasa na enfrentá su opositornan ta evidencia cu e manera cu Dios a consolá su Yu tabata masha eficas.—Juan 18:3-8, 33-38.

18. (a) Ki periodo den e bida di apostel Pablo tabata particularmente difícil? (b) Con nos por ta un fuente di consuelo pa ancianonan compasivo cu ta traha duru?

¹⁸ Apostel Pablo tambe a pasa dor di periodonan di prueba severo. Por ehempel, su ministerio na Efeso tabata marcá pa “lágrima i prueba cu a bini riba [dje] debí n’e complotnan dje hudiunan.” (Echonan 20:17-20) Finalmente, Pablo a bandoná Efeso despues cu apoyadornan dje diosa Artémis a causa un disturbio den e stad debí na su actividad di predicá. (Echonan 19:23-29; 20:1) Ora Pablo a coge rumbo pa nort, p’e stad di Tróas, un otro cos a preocup’é masha tantu. Algun tempu promé cu e disturbio na Efeso, el a ricibí un informe perturbador. E congregacion recien formá na Corinto tabata plagá pa division, i e tabata tolerando fornicacion. Pues for di Efeso, Pablo a skirbi un carta di reprendementu fuerte cu speransa di corigí e situacion. Esaki no tabata un cos fácil p’e haci. “Cu hopi tribulacion i angustia di curason mi a skirbi boso cu hopi lágrima,” el a revelá despues den un segundo carta. (2 Corintionan 2:4) Mescos cu Pablo, pa ancianonan compasivo no ta fácil pa duna conseho corectivo i reprendementu, en parte pa motibu cu nan ta masha conciente di nan propio debilidadnan. (Galationan 6:1) Laga nos, anto, ser un fuente di consuelo pa esnan cu ta hiba delantera meimei di nos dor di respondé di buena gana na conseho amoroso, basá riba Bijbel.—Hebreonan 13:17.

19. Pakico Pablo a sali for di Tróas bai Macedonia, i con finalmente el a haña alivio?

¹⁹ Miéntras cu Pablo tabata na Efeso, e no solamente a skirbi e rumannan na Corinto, sino tambe el a manda Tito pa yuda nan, comisionando Tito pa raportá bek tocante nan reaccion n’e carta. Pablo a spera di interceptá Tito na Tróas. Ei Pablo a ser bendicioná cu oportunidadnan excelente pa haci disipel. Pero esaki no a aliviá su ansiedad pasobra Tito no a yega ainda. (2 Corintionan 2:12, 13) Di manera cu el a biaha pa Macedonia, sperando di topa cu Tito aya. Pablo su estado di ansha a bira pió dor di oposicion intenso contra su ministerio. “Ora nos a yega Macedonia,” e ta splica, “nos carni no a haña alivio, sino nos a sigui ser afligí den tur manera—tabatin pelea pafó, miedu paden. No obstante, Dios, cu ta consolá esnan abatí, a consolá nos cu e presencia di Tito.” (2 Corintionan 7:5, 6) Ki un alivio ora Tito finalmente a yega pa conta Pablo tocante e reaccion positivo dje corintionan riba su carta!

20. (a) Mescos cu den e caso di Pablo, cua ta un otro manera importante den cua Jehova ta suministrá consuelo? (b) Kico lo ser considerá den e siguiente artículo?

²⁰ Pablo su experencia ta consolador pa Dios su sirbidornan awe, di cua hopi tambe ta enfrentá pruebanan cu ta “abatí” of “deprimí” nan. (Phillips) Sí, ‘e Dios cu ta suministrá consuelo’ conocé nos necesidadnan individual i por usa nos pa consolá otro, mescos cu Pablo a haña consuelo mediante e informe di Tito dje actitud di repentimentu dje corintionan. (2 Corintionan 7:11-13) Den nos siguiente artículo, nos lo considerá Pablo su reaccion caluroso n’e corintionan i con esei por yuda nos compartí i participá eficasmente dje consuelo di Dios awe.

[Nota]

Bo Por Contestá?

◻ Con humanidad a bin haña su mes den necesidad di consuelo?

◻ Con Jesus a resultá di ta mas grandi cu Noe?

◻ Pakico Jesus a yama su mes “Señor di sabat”?

◻ Con Dios ta suministrá consuelo awe?

[Mapa/Plachi na página 10]

(Pa e teskto den su formato kompleto, wak e publikashon)

Pablo a haña gran consuelo dor dje informe di Tito tocante e corintionan

MACEDONIA

Filípos

GRECIA

Corinto

ASIA

Tróas

Efeso