Confiansa den un Mundu Imperfecto

“E BON cu mi ta deseá mi no ta haci, pero e malu cu mi no ta deseá ta loke mi ta practicá.” Bo ta haña cu esaki ta cierto den bo caso? No desanimá pasobra apostel Pablo tabatin e mésun problema; tog e tabata un homber di integridad cristian sobresaliente. Esaki no ta un contradiccion? Den su carta n’e cristiannan na Roma, Pablo a analisá e problema: “Awor, si loke mi no ta deseá ta loke mi ta haci, esun cu ta obra esei no ta ami mas, sino e picá cu ta biba den mi.” Na cua picá e ta referí, i con el a venc’é di manera cu e por tabata un homber di integridad?—Romanonan 7:19, 20.

Mas promé den su carta, Pablo a skirbi: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” E “solo hende” tabata Adam. (Romanonan 5:12, 14) E picá adámico—e picá dje promé hende, Adam—ta e causa dje imperfeccionnan heredá dje rasa humano i un motibu fundamental pakico mantené integridad ta un berdadero desafio.

Pablo su punto di bista di “picá original,” manera e tabata ser yamá ántes, no tin un aceptacion amplio awe mas pasobra e relato bíblico di creacion a ser rechasá den círculonan teológico na fabor dje teorianan di evolucion. Un crítica textual riba Romanonan 5:12-14 ta bisa cu “eruditonan a tira henter e pasashi un banda.” Sin embargo, shen aña pasá, críticanan textual di Bijbel consistentemente a splica cu “ora Adam a peca . . . el a contaminá tur su desendientenan cu e picá ei i cu su consecuencianan.”a

E Promé Kibramentu di Integridad

Mescos cu hopi hende awe ta nenga e existencia di Adam, e promé homber, asina tambe hende ta descartá Satanas e Diabel como djis un mito.b Pero ningun ménos cu Jesucristo ta bisa nos cu esun aki “no a para firme den e berdad,” cu otro palabra, e no tabata digno di confiansa. (Juan 8:44) I tabata riba instigacion di Satanas cu Adam i su esposa, Eva, a rebelá contra Jehova i a kibra nan integridad bou di prueba.—Génesis 3:1-19.

Pa motibu cu nos tur ta bini di Adam, nos tur ta heredá e tendencia di peca. E homber sabí Sálomon a declará: “No tin ningun hende hustu riba tera cu ta sigui haci bon i no ta peca.” (Eclesiástes 7:20) Tog, cualkier hende por ta digno di confiansa. Con esaki ta posibel? Esei ta pasobra un hende no mester ta perfecto p’e mantené integridad.

E Base pa Integridad

Rey David di Israel a cometé hopi eror, incluyendo su relacion adúltero bon documentá cu Bat-seba. (2 Samuel 11:1-27) David su hopi erornan a sirbi pa resaltá cu e tabata leu for di perfecto. Sin embargo, kico Jehova a mira den e homber? Dirigiendo su mes na David su yu, Sálomon, Jehova a bisa: “Cana dilanti mi, mescos cu David bo tata a cana, cu integridad di curason i cu rectitud.” (1 Reynan 9:4) Apesar di su hopi erornan, Jehova a reconocé cu David tabata básicamente digno di confiansa. Pakico?

David a duna e contesta ora el a bisa Sálomon: “Tur curason Jehova ta scudriñando, i tur inclinacion dje pensamentunan e ta dicerniendo.” (1 Crónicanan 28:9) David a cometé erornan, pero e tabata humilde, i e kier a haci loke tabata corecto. Cada bes el a aceptá reprendementu i coreccion—en realidad, el a pidi p’e. “Examiná mi, O Jehova, i poné mi na prueba; refiná mi nirnan i mi curason” tabata su peticion. (Salmo 26:2) I David siguramente a ser purificá. E sufrimentunan a consecuencia di su picá cu Bat-seba, por ehempel, a dura te n’e fin di su bida. Tog, David nunca a purba hustificá su malecho. (2 Samuel 12:1-12) Mas importante, e nunca a desviá for di adoracion berdadero. P’e motibu aki, i debí na David su repentimentu i duele genuino i sincero, Jehova tabata cla pa pordoná su picánan i acept’é como un hende di integridad.—Mira tambe Salmo 51.

Ser Digno di Confiansa Bou di Prueba

Satanas e Diabel a pone Jesus na prueba den un esfuerso pa kibra su integridad. E tabatin cu mantené su integridad atrabes di penalidad i sufrimentu, na contraste cu Adam, kende por a mustra su obedencia como un homber perfecto dor di simplemente sigui e instruccion di obedecé un ley divino. Ademas, Jesus tabatin e peso di sa cu rescate dje famia humano tabata dependé riba su integridad.—Hebreonan 5:8, 9.

Satanas, determiná pa kibra Jesus su integridad, a acerk’é ora e tabata den un di su momentonan mas débil—despues cu el a pasa 40 dia meditando i yunando den e desierto. Tres bes el a tenta Jesus—pa combertí piedra na pan; pa bula for dje toren dje tempel, presumiendo cu intervencion angelical lo a salb’é i asina duna un señal milagroso pa proba e echo cu e ta e Mesías; i pa aceptá gobernacion riba tur e reinonan dje mundu aki a cambio di djis un solo “acto di adoracion” na Satanas. Pero Jesus a rechasá cada tentacion, manteniendo su integridad na Jehova.—Mateo 4:1-11; Lucas 4:1-13.

E Integridad di Job

Job su posicion, manteniendo su integridad bou di prueba, ta bon conocí. Interesantemente, Job no tabata comprendé pakico desaster a bini riba dje. E no tabata sa cu Satanas a atribuí mal motibunan na dje, insinuando cu Job a sirbi Dios pa motibunan egoista i pretendiendo cu pa salba su mes cueru, Job lo a kibra su integridad boluntariamente. Dios a permití Job pasa den algun experencia masha penoso pa asina mustra cu Satanas tabata robes.—Job 1:6-12; 2:1-8.

Tres amigu falsu a drenta den e esena. Deliberadamente nan a malrepresentá e norma i propósitonan di Dios. Asta Job su casá, mes incapas pa comprendé e cuestion, a keda sin animá su esposo den su momento di necesidad extremo. (Job 2:9-13) Pero Job a para firme. “Te ora mi expirá lo mi no kita mi integridad for di mi mes! Na mi husticia mi a wanta, i lo mi no lagu’é los; mi curason lo no molestiá mi cu mofa pa ningun di mi dianan.”—Job 27:5, 6.

Job su ehempel excelente, huntu cu e integridad di hopi otro homber i muher fiel, manera ta skirbí den Bijbel, ta proba cu Satanas ta un mentiroso.

Integridad i e Ministerio Cristian

Integridad ta un cualidad cu Jehova ta duna hopi balor djis pa su mes satisfaccion? No. Integridad riba su mes tin hopi balor pa nos como hende. Tabata pa nos beneficio cu Jesus a spierta nos pa ‘stima Jehova nos Dios cu henter nos curason i cu henter nos alma i cu henter nos mente.’ Berdaderamente, esaki ta “e mandamentu di mas grandi i esun primario,” i un homber, muher of mucha di integridad mester obedec’é. (Mateo 22:36-38) Kico mantené integridad ta enbolbé, i kico ta e recompensanan?

Un hende di integridad por ser confiá, no solamente dor di su semehante sino, mas importante, dor di Dios. Bo ta mira su puresa di curason den su accionnan; e ta liber di hipocresia. E no ta mañoso ni corupto. Apostel Pablo a bis’é den e forma aki: “Nos a renunciá e cosnan baho pa cua mester tene bergwensa di dje, i nos no ta anda cu astucia, ni nos no ta falsificá e palabra di Dios, sino dor di saca e berdad na cla, nos ta recomendá nos mes na tur concenshi humano den bista di Dios.”—2 Corintionan 4:2.

Ripará cu Pablo ta mencioná actitudnan cu tin di haber cu e ministerio cristian. Con un minister cristian por sirbi otronan si su mannan no ta limpi, si e no ta un hende di integridad? E cabes di un comunidad religioso irlandes kende recientemente a renunciá ta ilustrá e punto claramente. El a admití cu el a “permití un pastor pedofil sigui traha cu mucha hopi tempu despues cu su abusu di mucha a sali na cla,” segun e corant The Independent. E relato a splica cu e abusu di mucha a extendé pa mas cu 24 aña. E pastor a ser encarcelá pa cuater aña, pero pensa dje sufrimentu cu el a ocasioná e muchanan cu el a violá durante e añanan ei pa motibu cu su supervisor a falta e integridad moral pa tuma accion!

Integridad—E Recompensanan

Apostel Juan tabata un homber sin temor. Pa motibu dje entusiasmo ardiente di Juan i su ruman Santiago, Jesus a yama nan “Yunan di Donder.” (Marco 3:17) Juan, un homber di integridad sobresaliente, huntu cu Pedro, a splica e gobernantenan hudiu cu e ‘no por a stop di papia’ tocante e cosnan cu el a mira i tende miéntras cu e tabata cu Jesus. Juan tambe tabata un dje apostelnan cu a bisa: “Nos mester obedecé Dios como gobernante mas bien cu hende.”—Echonan 4:19, 20; 5:27-32.

Ta parce cu ora Juan tabata leu den su 90 i picu aña di edad, el a ser mandá den exilio riba e Isla di Pátmos pa motibu cu el a “papia tocante Dios i duna testimonio di Jesus.” (Revelacion 1:9) Na su edad, e por a pensa cu su ministerio a terminá. Pero solamente un homber di su integridad por a ser confiá cu e asignacion pa skirbi e vision emocionante di Revelacion. Den esaki, Juan tabata fiel. Ki un privilegio esei tabata p’e! I tabatin mas pa bini. Despues, aparentemente den becindario di Efeso, el a skirbi su relato di Evangelio i tres carta. Tal privilegionan magnífico ta sirbi pa coroná 70 aña di sirbishi fiel, digno di confiansa!

Ora un persona ta digno di confiansa, esei ta dun’é satisfaccion profundo. Ser digno di confiansa den bista di Dios ta trece recompensanan eterno. Awe, “un multitud grandi” di adoradornan berdadero ta ser prepará pa drenta un mundu nobo di pas i armonia, cu e prospecto di bida eterno. (Revelacion 7:9) Nos tin cu mantené integridad den e asuntunan vital di moralidad i adoracion, apesar dje pruebanan dje sistema di cosnan aki i e hopi desafionan cu Satanas por trece riba e sirbidornan di Dios. Sea sigur cu den e poder cu Jehova ta impartí, bo por tin éxito.—Filipensenan 4:13.

Papiando tantu di presente como di futuro, e salmista David ta trankilisá nos tur, ora e bisa den un oracion di gradicimentu na Jehova: “En cuanto ami, pa causa di mi integridad bo a sostené mi, i lo bo poné mi dilanti bo cara pa tempu indefiní. Bendicioná sea Jehova . . . Amen i Amen.”—Salmo 41:12, 13.

[Nota]

[Plachi na página 4]

Apesar di su erornan, David a resultá di ta digno di confiansa

[Plachi na página 5]

Jesus a duna nos e mihó ehempel di ser digno di confiansa

[Plachinan na página 7]

Ser digno di confiansa ta trece gran satisfaccion cuné