Konfiá ku un Tesoro
1 Apòstel Pablo a balorá e enkargo di prediká ku Dios a dun’é i el a yam’é un “tesoro.” (2 Kor. 4:7) El a soportá difikultat i persekushon ora e tabata kumpli ku e tarea ei. Diligentemente el a duna testimonio na ken ku el a topa. El a hasi hopi biahenan largu, difísil i peligroso riba tera i via laman. Kon nos por imitá Pablo i mustra ku nos ta apresiá nos ministerio? (Rom. 11:13, BPK) Dikon nos ministerio ta un tesoro inkomparabel?
2 Un Tesoro Superior: Hopi bes tesoronan terenal ta bin ku hopi doló di kabes i nan benefisionan ta únikamente limitá òf temporal. Di otro banda, nos ministerio ta trese benefisionan duradero, tantu pa nos komo pa otro hende. (1 Tim. 4:16) E ta yuda hende sinsero siña konosé Yehova, hasi e kambionan nesesario den nan bida i haña un berdadero speransa pa bida eterno. (Rom. 10:13-15) Ora nos ta duna hopi balor na nos ministerio, nos ta haña un propósito satisfasiente den bida, un sentido di logro duradero i un speransa alentador pa futuro.—1 Kor. 15:58.
3 Demostrá Ku Bo Ta Balorá Bo Tesoro: E importansia ku nos ta duna na algu hopi bes ta keda bisto na loke nos ta dispuesto pa sakrifiká p’e. Ta ki un privilegio nos tin di por usa nos tempu i energia pa duna alabansa na Yehova! (Efe. 5:16, 17) E manera ku nos ta usa nos tempu mester mustra ku nos ta duna mas balor na kosnan spiritual ku na kosnan material. Siendo ku nos tin algu asina balioso pa kompartí ku otro hende, nos lo ke prediká ku entusiasmo i keda alerto pa papia di e bon nobo na tur oportunidat ku presentá.
4 Generalmente hende no ta skonde tesoro balioso, sino ta eksibié pa otronan por disfrutá di dje. Si nos ta konsiderá nos ministerio komo un tesoro, lo e tin un lugá importante den nos bida. (Mat. 5:14-16) Laga nos, ku kurason yen di apresio, semper imitá apòstel Pablo i probechá di tur oportunidat pa mustra ku nos realmente ta balorá nos ministerio. Sí, ku nos ta apresi’é manera un tesoro.