Sirbidor Di Dios ​—⁠Un Pueblo Organizá I Feliz

“Feliz ta e pueblo kende nan Dios ta Jehova!”​—⁠SALMO 144:⁠15.

JEHOVA ta e Soberano Universal, e Dios todopoderoso, e Creador. (Génesis 1:1; Salmo 100:⁠3) Como tal, e tin derecho di establece norma di conducta pa sirbidor di dje, sabiendo loke ta mihor pa nan. (Salmo 143:⁠8) I e ta nan Ehemplar Principal kende su calidadnan nan tin cu imita. “Bira imitador di Dios, como yiunan stimá,” segun e apóstol.​—⁠Efesio 5:⁠1.

² Un característica di Dios cu nos tin cu imita tin cu ber cu organizacion. E no ta ‘un Dios di desordu.’ (1 Corintio 14:33) Ora nos ta scudriña cuidadosamente loke Dios a crea, nos ta keda obligá di conclui cu e ta e Personahe di mas organizá den e universo. Sin embargo, un otro característica di Dios cu e kier pa su sirbidornan imitá ta su felicidad, pasobra e ta “e Dios feliz.” (1 Timoteo 1:11) Asina, su capacidad di organizá ta keda balanzá cu felicidad. Un característica di dje no ta ser hací esun principal resultando den e rebahamento di un otro.

³ Evidencia di cu Jehova ta un Dios di organizacion ta bisto den tur loke el a traha, for di loke ta mas grandi te na loke ta mas chikito. Por ehempel, tuma na cuenta e universo visibel. E ta contene miles di miyones di strea. Pero, eseinan no ta plamá pa nan cuenta. Astrofísico George Greenstein a ripara cu tin “un dibuho den e organizacion di strea.” Nan ta ser organizá den grupo yamá galaxia, algun conteniendo cientos di miles di miyones di strea. I nan ta calcula cu tin miles di miyones di galaxia! Galaxia també ta organizá, cu varios di nan (for di un poco te na varios mil) agrupá hunto den grupo di galaxia. I nan ta kere cu grupo di galaxia ta organizá den unidad asta mas grandi yamá supergrupo.​—⁠Salmo 19:1; Isaías 40:​25, 26.

⁴ E organizacion magnífico dje creacion di Dios ta ser mirá na tur parti, no solamente den cielo visibel sino també riba tera, cu su miyares di cosnan bibiente. En cuanto esei, Paul Davies, un profesor di física, a skirbi cu observador ta keda “asombrá” dje “mahestad i organizacion complicá dje mundo físico.”​—⁠Salmo 104:⁠24.

⁵ Considera algun ehempel dje “organizacion complicá” cu ta ser hayá den cos bibiente. Neurociruhano Joseph Evans a bisa dje celebro humano i dje nervio di weso di lomba: “E realidad dje gran ordu ta casi inexplicable.” Bacteriólogo H. J. Shaughnessy a bisa tocante cel bibiente microscópico: “E complehidad i ordu bonita dje mundo microbiológico ta ser construí asina maraviyosamente cu e ta parce di ser un parti di un sistema ordená divinamente.” I biólogo molecular Michael Denton a bisa dje código genético (DNA) den un cel: “E ta asina eficiente cu tur informacion . . . necesario pa specificá e diseño di tur raza di organismo cu hamás a existi riba e planeta aki . . . por ta poní den un telep i toch lo tin espacio sobrá pa tur informacion den tur buki hamás skirbí.”​—⁠Mira Salmo 139:⁠16.

⁶ Jehova Dios no solamente ta organiza su creacion material sino també ta organiza su creacion spiritual den cielo. Daniel 7:10 ta informános di cu angel te ne cantidad di ‘diez mil bez diez mil a sigi para net dilanti Jehova.’ Cien miyón criatura spiritual fuerte tabata presente, cada un asigná na su trabao propio! Ta tolondrá hende pa corda cuanto aptitud ta necesario pa organizá asina un cantidad enorme. Apropiadamente, e Bijbel ta bisa: “Bendiciona Jehova, O angel di dje, poderoso den poder, cumpliendo cu su palabra, mediante scuchamento ne boz di su palabra. Bendiciona Jehova, tur ehército [angelical] di dje, sirbidor di dje, haciendo su boluntad.”​—⁠Salmo 103:​20, 21; Revelacion 5:⁠11.

⁷ Ki magníficamente organizá i eficiente ta obra dje Creador! No ta un sorpresa cu criatura spiritual fuerte den dominio celestial ta declara di manera inspirá pa temor i na moda sumiso: “Bo ta digno, Jehova, asta nos Dios, pa recibi gloria i onor i poder, pasobra bo a crea tur cos, i pa motibo di bo boluntad nan ta existi i tabata creá.”​—⁠Revelacion 4:⁠11.

⁸ Jehova també ta organiza sirbidor di dje riba tera. Ora el a manda e diluvio dje dia di Noé na aña 2370 P.E.C., Noé i siete otronan a sobrebiba e diluvio como un famía organizá. Den Éxodo skirbí na aña 1513 P.E.C., Jehova a saca varios miyón di su pueblo for di esclabitud den Egipto i a dúnanan un código di ley en detaye pa organizá nan asunto diario i nan adoracion. I despues, den e Tera Primintí, diez di miles di nan tabata organizá pa sirbishi special den e tempel. (1 Crónica 23:​4, 5) Den e promé siglo, congregacion cristian tabata organizá bao di direccion divino: “El a duna algun como apóstol, algun como profeta, algun como evangelizador, algun como wardador i maestro, afin di reahusta e santonan, pa trabao ministerial.”​—⁠Efesio 4:​11, 12.

Sirbidor moderno organizá també

⁹ Di igual manera, Jehova Dios a organiza sirbidor moderno di dje pa nan efectivamente haci su trabao pa nos dia​—⁠e predicacion dje bon nobo di Reino promé cu e ta pone fin ne sistema malbado di cosnan actual. (Mateo 24:14) Considera loke tal trabao mundial ta enbolbe i ki importante bon organizacion tá. Miyones di homber, muher, i mucha ta ser entrená pa siña berdad bíblico na otronan. Pa duna ayudo na tal entrenamento, un cantidad enorme di Bijbel i publicacion basá riba e Bijbel ta ser publicá. Sí, cada número di E Toren di Vigilancia awor tin un publicacion di mas cu 16 miyón copia na 118 idioma, i Despertad! rond di 13 miyón copia na 73 idioma. Casi tur número ta ser publicá simultáneamente di manera cu casi tur sirbidor di Jehova ta recibi e mesun informacion ne mesun tempo.

¹⁰ Además, mas cu 73.000 congregacion di Testigo di Jehova mundialmente ta organizá pa reuni regularmente pa recibi instruccion bíblico. (Hebreo 10:​24, 25) També tin miles di reunion mas grandi​—⁠asamblea di circuito i di districto​—⁠tur aña. Tin construccion na escala mundial di Salón di Reino nobo of renobá, Salón di Asamblea, cas di Betel, i facilidad pa publicacion di literatura bíblico. Tin scol pa duna entrenamento superior na maestro bíblico, tal como e Scol Bíblico di Galad di Watchtower pa misionero i e Scol pe Sirbishi di Pionero, conducí den país rond di mundo.

¹¹ Ki bon Jehova Dios a organiza su pueblo riba tera pa nan ‘cumpli cu nan ministerio cabalmente,’ cu e yudanza di su angelnan ministerial! (2 Timoteo 4:5; Hebreo 1:​13, 14; Revelacion 14:⁠6) Door di instrui su sirbidornan den e camina di bon organizacion awor, Dios ta cumpli cu algo mas. Su sirbidornan ta bon prepará di manera cu ora nan ta sobrebiba e fin dje sistema di cosnan aki, nan lo ta organizá caba pa cuminza bida den e mundo nobo. Anto, na moda organizá bao di direccion di Jehova Dios, nan lo cuminza edifica e Paradijs mundial. També, nan lo ser bon prepará pa siña requisito divino pa bida en detaye ne miles di miyones di hende cu lo ser resusitá for di morto.​—⁠Isaías 11:9; 54:13; Echo 24:15; Revelacion 20:​12, 13.

Organizá pero feliz

¹² Aunque Jehova Dios ta un trahador asombroso i organizador excelente, e no ta severo, stijf, of mecánico. Mas bien, e ta un Personahe mashá cariñoso i feliz cu ta interesá den nos felicidad. Segun 1 Pedro 5:7: “E ta interesá den boso.” Nos por mira su interés i su deseo pa sirbidor di dje ser feliz den loke el a traha pa hende. Por ehempel, ora Dios a crea e homber i muher perfecto, el a pónenan den un paradijs di placer. (Génesis 1:​26-31; 2:​8, 9) El a dúnanan tur loke tabata necesario pa hácinan sublimemente feliz. Pero, nan a perde tur esei mediante rebelion. Como resultado di nan picá, nos a hereda imperfeccion i morto.​—⁠Romano 3:23; 5:⁠12.

¹³ Aunque nos ta hende imperfecto awor, toch nos por haya felicidad den loke Dios a traha. Tin hopi cos cu nos por disfruta​—⁠ montaña mahestuoso; lagún bonita, rio, lamá i oriya di lamá; flor yen di color i fragante i otro mata na variedad sin fin; un abundancia di cuminda sabroso; drentamento espectacular di solo cu nos nunca ta fada di mira; cielo yen di strea cu nos ta gusta mira anochi; e creacion di animal cu su variedad enorme i yiu interesante cu nan hungamento cu otro; música inspirador; trabao interesante i útil; bon amigo. Ta keda bisto cu Esun cu a haci arreglo pa tal cosnan ta un persona feliz cu ta gusta haci otronan feliz.

¹⁴ Pues, eficencia organizá no ta loke Jehova Dios kier. E kier pa sirbidor di dje ser feliz també, mescos cu e ta feliz. E no kier pa nan organiza tur cos na moda fanático te ne grado di daña nan felicidad. Sirbidor di Dios mester balanzá nan aptitud di organizá cu felicidad, mescos cu e ta haci, pasobra unda cu su spiritu santo poderoso tá, gozo tin ei també. Realmente, Galatio 5:22 ta mustra cu e segundo fruta dje spiritu santo di Dios obrando riba su pueblo ta “gozo.”

Amor ta produci felicidad

¹⁵ Ta di sumo interés pa ripara cu e Bijbel ta bisa cu: “Dios ta amor.” (1 Juan 4:​8, 16) E nunca ta bisa cu: “Dios ta organizacion.” Amor ta e calidad principal di Dios, i sirbidor di dje mester imité. P’sei e promé fruta dje spiritu di Dios mencioná den Galatio 5:22 ta “amor,” i “gozo” ta sigié. Amor ta produci gozo. Ora nos ta imita e amor di Jehova den nos tratamento cu otro hende, felicidad ta sigi, pasobra hende amoroso ta hende feliz.

¹⁶ E importancia di imita amor divino ta ser hací prominente den e siñanza di Jesús. El a bisa: “Mi ta papia net loke e Tata a siñámi.” (Juan 8:28) Kico, specialmente, Jesús tabata siñá cu e, na turno, a siña otro hende? Esei tabata cu e dos mandamento mayor ta di stima Dios i stima próhimo. (Mateo 22:​36-39) Jesús tabata ehempel di tal amor. El a bisa: “Mi ta stima e Tata,” i a duna prueba di esei haciendo e boluntad di Dios te na su morto. I el a demonstra su amor pa hende door di muri pa nan. Apóstol Pablo a bisa hende cristian den Efeso: ‘Cristo a stima boso i a entrega su mes pa boso.’ (Juan 14:31; Efesio 5:⁠2) P’sei, Jesús a bisa sigidor di dje: “Esaki ta mi mandamento, pa boso stima otro mescos cu mi a stima boso.”​—⁠Juan 15:​12, 13.

¹⁷ Pablo a expresa ki vital tal amor divino tá ora el a bisa: “Si mi ta papia cu lenga di hende i di angel pero no tin amor, mi ta bira un pida di coper cu ta klink of un cimbal cu ta borotá. I si mi tin e don di profetizá i mi ta conoce tur secreto sagrado i tur conocimento, i si mi tin tur fe afin di transplanta montaña, pero no tin amor, mi ta nada. I si mi ta duna tur mi pertenencia pa alimenta otro, i si mi entrega mi curpa, pa mi por gaba, pero no tin amor, esei no ta di ningun probecho pa mi. . . . Ta permanece fe, speranza, amor, e tresnan ei; pero esun mayor di nan ta amor.”​—⁠1 Corintio 13:​1-3, 13.

¹⁸ Ora nos ta imita e amor di Jehova, nos por tene confianza di su amor pa nos, asta ora nos ta haci equibocacion, pasobra e ta “un Dios misericordioso i bondadoso, tardá pa rabia i abundante den bondad amoroso i berdad.” (Éxodo 34:⁠6) Si nos ta arrepenti sinceramente ora nos ta haci equibocacion, Dios no ta tene cuenta di esei sino ta pordonános amorosamente. (Salmo 103:​1-3) Sí, “Jehova ta mashá tierno di cariño i misericordioso.” (Santiago 5:11) Nos conocimento di esei ta contribui na nos felicidad.

Felicidad relativo awor

¹⁹ Sin embargo, ta posibel pa hende ser feliz awe, siendo cu nos ta biba den e último dianan dje mundo inmoral aki bao di Satanás, yen di crimen, violencia, unda enfermedad i morto ta enfrentános? Naturalmente, nos no por spera e grado di felicidad cu lo existi den e mundo nobo di Dios, tal como su Palabra ta profetiza: “Atá mi ta crea cielo nobo i tera nobo; i e cosnan di antes lo no ser recordá, ni lo subi den e curazón. Pero hubila i sea gozoso pa semper den loke mi ta crea.”​—⁠Isaías 65:​17, 18.

²⁰ Loke sirbidor di Dios por haya awor ta felicidad relativo pasobra nan ta conoce su boluntad i tin conocimento exacto di bendicion maraviyoso cu lo bini pronto den su mundo nobo paradísico. (Juan 17:3; Revelacion 21:⁠4) P’sei e Bijbel por bisa: “O Jehova di ehército, feliz ta e hende cu ta confia den bo,” “feliz ta tur hende cu ta teme Jehova, cu ta camna den su camina,” “feliz ta hende di genio suave, pasobra nan lo hereda e tera.” (Salmo 84:12; 128:1; Mateo 5:⁠5) P’sei, apesar di circunstancia dificultoso actual cu locual nos tin cu lucha, nos por haya un grado grandi di felicidad. Asta ora cosnan malu ta pásanos, nos no ta bira tristu manera hende cu no ta conoce Jehova i cu no tin e speranza di bida eterna.​—⁠1 Tesalonicense 4:⁠13.

²¹ Felicidad també ta bini na sirbidor di Jehova Dios pasobra nan ta dedica tempo, energía, i nan recurso na siñamento di berdad bíblico na otro hende, specialmente na hende cu ta ‘suspira i lamenta riba tur abominacion’ cu e mundo di Satanás ta comete. (Ezekiel 9:⁠4) E Bijbel ta bisa: “Feliz ta cualkier hende cu ta trata persona humilde cu consideracion; den e dia di calamidad Jehova lo percura escape pe. Jehova mes lo wardé i conserbé bibo. Lo e ser declará feliz den e tera.” (Salmo 41:​1, 2) Manera Jesús a bisa, “tin mas felicidad den duna cu tin den recibi.”​—⁠Echo 20:⁠35.

²² Pues, aunque sirbidor di Dios no por spera felicidad sublime den e tempo actual, nan por obtene e felicidad cu hende cu no ta sirbi Dios no ta goza. Jehova Dios ta declara: “Mira! Mi mes sirbidornan lo sclama gozosamente pa causa dje bon condicion di nan curazón, pero boso mes lo haci sclamacion pa causa di dolor di curazón i boso lo grita pa causa di puro kibramento di spiritu.” (Isaías 65:14) També, hende cu ta sirbi Dios tin un motibo mashá special pa felicidad awor​—⁠nan tin su spiritu santo cu “Dios a duna esnan cu ta obedecé como gobernante.” (Echo 5:32) I no lubida, unda e spiritu di Dios tá, tin felicidad.​—⁠Galatio 5:⁠22.

²³ Den e organizacion di sirbidor di Dios djawe, “homber di mayor edad,” anciano, ta hunga un papel importante, hibando e delantera den e congregacion, contribuyendo ne felicidad dje pueblo di Jehova Dios. (Tito 1:⁠5) Con anciano mester considera nan responsabilidad i nan relacion pa cu nan rumanan spiritual, homber i muher? Nos sigiente artículo lo considera esei.

[Study Questions]

1, 2. (a) Pakico Jehova tin e derecho di pone norma pa su sirbidornan? (b) Menciona dos característica di Jehova cu nos mester deseá specialmente di imita.

3. Con cielo yen di strea ta demonstra e poder di Jehova di organiza?

4, 5. Menciona ehempel di organizacion den cosnan bibiente riba tera.

6, 7. Cua organizacion ta ser manifestá den criatura spiritual, i con nan ta expresa aprecio pa nan Creador?

8. Cua ehempel ta mustra cu Jehova ta organiza su sirbidornan riba tera?

9, 10. Con Jehova a organiza su pueblo den nos tempo?

11. Cua beneficio di futuro lo bini como resultado di siña bon organizacion awor?

12, 13. Pakico nos por bisa cu Jehova kier pa su pueblo ser feliz?

14. Jehova ta pidi cua balanza di nos parti den nos imitacion di dje?

15. Pakico amor ta tanto importante den nos felicidad?

16. Con Jesús a demonstra e importancia di amor?

17. Con Pablo a mustra cu e expresion di amor pa otronan ta vital?

18. Kico nos por spera foi Jehova Dios cu ta aumenta nos felicidad?

19, 20. (a) Pakico felicidad total no ta posibel awor? (b) Con e Bijbel ta mustra cu nos por haya felicidad relativo ne tempo aki?

21. Con e dedicacion di nan tempo, energía i recurso ta contribui ne felicidad di sirbidor di Jehova?

22. (a) En cuanto felicidad, haci contraste entre sirbidor di Dios i hende cu no ta sirbié. (b) Pa cua motibo special nos mester spera di ser feliz?

23. Kico nos lo considera den e sigiente estudio?

[Caption on page 10]

Te ariba: Courtesy of ROE/Anglo-Australian Observatory, photograph by David Malin

[Caption on page 14]

Con bo ta contesta?

◻ Con e creacion ta duna testimonio dje organizacion di Jehova?

◻ Con Jehova a organiza sirbidor di dje den e pasado i ne tempo actual?

◻ Jehova kier pa nos manifesta cua equilibrio?

◻ Amor ta ki importante pa nos felicidad?

◻ Nos por spera cua clase di felicidad den nos tempo?