No Warda Rencor

POR parce un desafio mas grandi cu nunca pa evitá di bira rencoroso ora un persona ofendé nos. Bijbel tin conseho práctico pa situacionnan asina. “Sea rabiá,” apostel Pablo a skirbi, “i tog no peca; no laga solo baha cu bo den un estado provocá.”—Efesionan 4:26.

Ora un persona haci un malu contra nos, ta solamente normal pa sinti un midí di rabia. Cu Pablo ta bisa “sea rabiá” ta indicá cu e rabia tin biaha por ta apropiado—tal bes como reaccion riba un trato inhustu of un fayo den administrá husticia. (Compará cu 2 Corintionan 11:29.) Pero ora e ser lagá sin resolvé, asta rabia hustificá por tin consecuencianan desastroso, hibando na picá grandi. (Génesis 34:1-31; 49:5-7; Salmo 106:32, 33) Pues, kico bo por haci ora bo sintí bo provocá na rabia?

Den mayoria caso cu ta enbolbé ofensanan menor, bo por sea resolvé e situacion den bo curason “i keda ketu” of acercá e ofensor i considerá e asuntu. (Salmo 4:4; Mateo 5:23, 24) Sea cual sea, ta mihó pa resolvé e asuntu lihé pa no fomentá rencor cu por producí resultadonan trágico.—Efesionan 4:31.

Jehova ta pordoná nos picánan libremente, asta picánan cu den nos ignorancia kisas nos no ta conciente di a cometé. Nos no por pordoná mescos e ofensanan menor di un próhimo?—Colosensenan 3:13; 1 Pedro 4:8.

Interesantemente, e palabra griego pa “pordoná” literalmente ta nificá “laga bai.” Pordon no ta rekerí pa nos minimisá of pasa por haltu dje malecho. Tin biaha e por simplemente enbolbé laga e situacion bai, realisando cu wardando rencor solamente lo haci bo carga mas pisá i desbaratá e unidad dje congregacion cristian. Ademas, wardamentu di rencor por ta perhudicial pa bo salú!—Salmo 103:9.