Sigui Traha pa Alcansá Boso Mes Salbacion!

“Stimánan, . . . sigui traha pa alcansá boso mes salbacion cu temor i temblamentu.”—FILIPENSENAN 2:12.

1, 2. Ki conceptonan popular a pone hopi hende sinti cu nan no tin control riba kico lo para di nan bida?

“TA ASINA bo a nace?” Recientemente, e pregunta ei a resaltá riba kaft di un revista popular. Bou dje titular a aparecé e palabranan: “Personalidad, temperamentu, asta decisionnan den bida. Estudionan nobo ta mustra cu e ta principalmente den bo genenan.” Declaracionnan asina por pone algun hende sinti cu nan tin tiki control riba nan mes bida.

² Otronan ta teme cu e criansa inferior di nan mayornan of e forma di siña inferior di nan maestronan di un manera of otro a condená nan na un bida infelis. Nan por sinti nan destiná na ripití e erornan di nan mayornan, na actua riba nan impulsonan di mas malu, na resultá infiel na Jehova—cu poco palabra, na tuma mal decision. Esei ta loke Bijbel ta siña? Tin sigur algun persona religioso cu ta insistí cu Bijbel ta siña esei, esta, e doctrina di predestinacion. Segun e doctrina aki, hopi tempu pasá Dios a predeterminá tur suceso den bo bida.

3. Ki mensahe animador Bijbel tin tocante nos abilidad pa carga responsabilidad pa nos futuro?

³ Tur e diferente conceptonan aki tin un solo mensahe en comun: Bo tin tiki opcion, tiki control riba kico lo para di bo bida. Esei ta un mensahe desanimador, no ta berdad? I desanimacion ta haci e problema mas grandi. Proverbionan 24:10 ta bisa: “Bo a mustra bo mes desanimá den e dia di afliccion? Bo poder lo ta poco.” Sin embargo, nos ta ser animá ora nos haña sa cu, segun Bijbel, nos por ‘traha pa alcansá nos mes salbacion.’ (Filipensenan 2:12) Con nos por reforsá nos confiansa den e siñansa bíblico positivo aki?

E Trabou di “Edificá” cu Nos Ta Haci den Nos Mes

4. Aunke 1 Corintionan 3:10-15 ta papia di construí cu material cu ta resistí candela, kico esaki no ta implicá?

⁴ Considerá apostel Pablo su ilustracion na 1 Corintionan 3:10-15. Ei, e ta papia di un trabou di construccion cristian, i e principio di su ilustracion por aplicá tantu n’e ministerio interno como esun externo. Pablo ta implicá cu si un disipel scoge finalmente pa sirbi Jehova i keda fiel, esei ta e responsabilidad completo di esnan cu a siñ’é i entren’é? No. Pablo tabata enfatisando e importancia p’e maestro haci e mihó trabou di construccion posibel. Pero manera nos a siña den e artículo anterior, e no tabata bisando cu e studiante of disipel no tin ningun opcion den e asuntu. Ta cierto cu Pablo su ilustracion ta enfocá riba e trabou cu nos ta haci den otro hende, i no e edificacion di nos mes. Esaki ta evidente pasobra Pablo ta papia di trabou di construccion con-cu-ta cu ta ser destruí miéntras cu e constructor mes ta salba. No obstante, tin bes Bijbel ta aplicá e mésun forma di expresion ei n’e trabou cu nos ta haci den nos mes.

5. Ki textonan ta mustra cu cristiannan tin cu haci un trabou di “edificá” den nan mes?

⁵ Tuma por ehempel, Hudas 20, 21: “Boso, stimánan, dor di edificá boso mes riba boso santísimo fe, i haciendo oracion cu spiritu santu, manten’é boso den e amor di Dios.” Aki Hudas ta usa e mésun palabra griego pa “edificá” cu Pablo ta usa den 1 Corintionan capítulo 3, pero e punto di Hudas ta cu nos ta edificá nos mes riba e fundeshi di nos fe. Ora Lucas a registrá Jesus su ilustracion dje homber cu a funda su cas riba un baranca, e ta usa e mésun palabra griego pa “fundeshi” cu Pablo ta usa den su ilustracion di construccion cristian. (Lucas 6:48, 49) Ademas, Pablo ta usa e cuadro mental di ser establecí riba un “fundeshi” ora di exhortá su compañeronan cristian pa haci progreso spiritual. Sí, e Palabra di Dios ta siña cu nos ta haci trabou di “edificá” den nos mes.—Efesionan 3:15-19; Colosensenan 1:23; 2:7.

6. (a) Ilustrá con cada disipel cristian ta e resultado di un proyecto colectivo di construccion. (b) Ki responsabilidad cada disipel individual tin?

⁶ Edificá un cristian ta trabou di un hende so? Wel, imaginá cu bo ta dicidí di traha un cas. Bo ta bai cerca un arkitecto p’e pinta e mapa pa bo. Aunke bo intencion ta pa haci hopi dje trabou bo mes, bo ta busca un contratista pa traha cu bo i pa consehá bo riba e mihó métodonan. Si e pone un fundeshi sólido, yudá bo comprendé e mapa, sugerí e mihó materialnan cu bo por cumpra, i asta siñá bo hopi tocante construccion, probablemente lo bo ta di acuerdo cu el a haci un bon trabou. Pero kico si bo ignorá su conseho, cumpra material barata of inferior, i asta desviá for dje mapa dje arkitecto? Sigur bo no por culpa ni e contratista ni e arkitecto si e cas basha den otro! Di igual manera, cada disipel cristian ta resultado di un proyecto colectivo di construccion cu participacion di vários persona. Jehova ta e arkitecto maestro. E ta sostené e cristian fiel kende, como un ‘colaboradó di Dios,’ ta siña i edificá un studiante. (1 Corintionan 3:9) Pero e studiante tambe ta enbolbí. Den e análisis final, e ta responsabel pa su mes curso di bida. (Romanonan 14:12) Si e kier tin excelente cualidadnan cristian, e tin cu traha duru pa adkerí nan, pa construí nan den su mes.—2 Pedro 1:5-8.

7. Ki desafionan algun cristian ta enfrentá, i kico lo por consolá nan?

⁷ Esaki ta nificá, anto, cu genética, ambiente i e calidad di nos maestronan ta insignificante? Claro cu no. E Palabra di Dios ta reconocé cu cada un di esakinan ta importante i tin hopi influencia. Hopi tendencia pecaminoso i negativo ta inherente i por ta masha difícil pa combatí. (Salmo 51:5; Romanonan 5:12; 7:21-23) Entrenamentu di mayornan i e ambiente di cas por tin un tremendo impacto riba hóbennan—pa bon of pa malu. (Proverbionan 22:6; Colosensenan 3:21) Jesus a condená e lidernan religioso hudiu pa e mal efecto cu nan siñansanan tabatin riba otro hende. (Mateo 23:13, 15) Awe, factornan asina ta afectando nos tur. Por ehempel, algun sirbidó di Dios ta enfrentá desafionan como resultado di un infancia difícil. Esakinan tin mester di nos bondad i empatia. I nan por saca consuelo for dje mensahe di Bijbel cu nan no ta destiná na ripití e erornan di nan mayornan ni pa resultá infiel. Considerá con algun dje reynan di Huda di antigwedad ta ilustrá e punto aki.

Reynan di Huda—Cada Un A Dicidí pa Su Mes

8. Ki mal ehempel Jotan su tata a pone, tog ki decision Jotan a tuma?

⁸ Uzías a bira rey di Huda n’e edad yong di 16 aña i a reina pa 52 aña. Atrabes di gran parti dje tempu aki, el “a sigui haci loke tabata recto den bista di Jehova, conforme cu tur loke Amazías su tata a haci.” (2 Reynan 15:3) Jehova a bendicion’é cu un seri di victoria militar impresionante. Pero lamentablemente, éxito a susha Uzías su cabes. El a bira soberbe i a rebelá contra Jehova dor di ofrecé censia n’e altar den e tempel, un tarea reservá pa sacerdotenan. A reprendé Uzías, pero el a reaccioná furioso. E ora ei el a ser humiyá—heridá cu lepra i obligá na biba e resto di su dianan isolá for di hende. (2 Crónicanan 26:16-23) Con su yu Jotan a reaccioná riba tur esaki? E tata dje hóben aki por a influenci’é fácilmente i Jotan por a carga rencor contra e coreccion di Jehova. E pueblo en general por tabata un influencia negativo riba dje ya cu nan a sigui cu nan mal custumbernan religioso. (2 Reynan 15:4) Pero Jotan a tuma su mes decision. “El a sigui haci loke tabata recto den bista di Jehova.”—2 Crónicanan 27:2.

9. Kico tabata algun dje bon influencianan riba Acas, pero kico a para di su bida?

⁹ Jotan a goberná pa 16 aña, permaneciendo fiel na Jehova tur e tempu. P’esei, su yu Acas, tabatin e ehempel excelente di un tata fiel. I Acas tabatin otro bon influencianan. E tabatin e bendicion di a biba tempu e fiel profetanan Isaías, Oséas i Mikéas tabata profetisá activamente den e tera. Tog, el a scoge robes. “E no a haci loke tabata recto den bista di Jehova manera su antepasado David.” El a traha imágen di Baal i a adorá nan i asta a kima algun di su mes yunan den candelanan sacrificial na diosnan pagano. Apesar dje mihó influencianan, el a faya teriblemente como rey i como sirbidó di Jehova.—2 Crónicanan 28:1-4.

10. Ki clase di tata Acas tabata, pero ki decision su yu Ezekías a tuma?

¹⁰ For dje punto di bista di adoracion puru, ta difícil imaginá un tata mas malbado cu Acas. Sin embargo, su yu Ezekías no por a scoge ken e tabata kier como tata! E yu hombernan chikitu cu Acas a mata den sacrificio na Baal tabata probablemente Ezekías su mes rumannan. E antecedente teribel aki a condená Ezekías na un bida di infieldad na Jehova? Al contrario, Ezekías a bira un dje poco berdadero gran reynan di Huda—un homber stimá, fiel i sabí. “Jehova a resultá di ta cuné.” (2 Reynan 18:3-7) De echo, tin motibu pa kere cu tempu Ezekías tabata un prins yong ainda, el a skirbi Salmo 119 bou di inspiracion. Si ta asina, no ta difícil pa mira pakico el a skirbi e palabranan: “Mi alma no por a drumi di desconsuelo.” (Salmo 119:28) Apesar di Ezekías su problemanan penoso, el a laga e Palabra di Jehova gui’é den bida. Salmo 119:105 ta bisa: “Bo palabra ta un lampi pa mi pia, i un lus pa mi caminda.” Sí, Ezekías a tuma un decision, esun corecto.

11. (a) Apesar dje bon influencia di su tata, ki extremo Manases su rebelion contra Jehova tabata? (b) Kico Manases a scoge pa haci na fin di su bida, i kico nos por siña for di esaki?

¹¹ Pero, manera un contradiccion, for di un dje mihó reynan di Huda a bini un dje piónan. Manases, yu di Ezekías, a promové idolatria, spiritismo i violencia na gran escala na un grado sin precedente. E registro ta bisa cu “Jehova a sigui papia cu Manases i su pueblo,” probablemente mediante e profetanan. (2 Crónicanan 33:10) Segun tradicion hudiu, Manases a respondé dor di laga zag Isaías na pida-pida. (Compará cu Hebreonan 11:37.) Sea esei ta e caso of no, Manases no a scucha na ningun spiertamentu divino. Echo ta cu el a laga kima algun di su mes yunan bibu como sacrificio, mescos cu su welo Acas a haci. Tog, e homber malbado aki, ora el a haña su mes den pruebanan severo mas despues den bida, a repentí i a cambia su caminda. (2 Crónicanan 33:1-6, 11-20) Su ehempel ta siña nos cu un persona cu a tuma decisionnan teribel no necesariamente no por ser salbá mas. E por cambia.

12. Ki scogementu opuesto Amon i su yu Hosías a haci relacioná cu sirbishi na Jehova?

¹² Amon, yu di Manases, por a siña hopi for dje repentimentu di su tata. Pero el a scoge robes. En realidad Amon “a haci culpabilidad aumentá” te ora finalmente nan a asesin’é. Su yu Hosías tabata un contraste refrescante. Hosías evidentemente a scoge pa siña for di loke a sosodé cu su welo. El a cuminsá reina cu apénas ocho aña di edad. Ora el a caba di haci 16, el a cuminsá busca Jehova i despues di esei a bira un rey fiel i ehemplar. (2 Crónicanan 33:20–34:5) El a tuma un decision—esun corecto.

13. (a) Kico nos ta siña for dje reynan di Huda cu nos a trata? (b) Con importante entrenamentu di mayor ta?

¹³ E examinacion breve aki di shete rey di Huda ta siña nos un les poderoso. Den algun caso, e pió reynan tabatin e mihó yunan i, di otro banda, e mihó reynan tabatin e pió yunan. (Compará cu Eclesiástes 2:18-21.) Esaki no ta mengua e importancia pa mayornan entrená nan yunan. Mayornan cu ta entrená nan yunan segun e caminda di Jehova siguramente ta duna nan yunan e mihó oportunidad posibel pa bira fiel sirbidó di Jehova. (Deuteronomio 6:6, 7) Tog, algun yu, apesar dje mihó esfuersonan di mayornan fiel, ta scoge pa sigui un curso robes. Otro yunan, apesar dje influencia di mas malu di mayornan, ta scoge pa stima i sirbi Jehova. Cu su bendicion, nan ta haci nan bida exitoso. Bo sa puntra bo mes tin biaha, cua di nan lo ta bo caso? Considerá, anto, algun garantia personal di Jehova di cu abo por scoge e caminda corecto!

Jehova Ta Kere den Bo!

14. Con nos sa cu Jehova ta comprendé nos limitacionnan?

¹⁴ Jehova ta mira tur cos. Proverbionan 15:3 ta bisa: “Wowo di Jehova ta na tur parti, vigilando mal hende i bon hende.” Rey David a bisa di Jehova: “Bo wowo a mira asta mi embrio, i den bo buki tur su partinan a ser skirbí, en cuanto e dianan ora cu nan a ser formá i ainda no tabatin ningun di nan.” (Salmo 139:16) Pues Jehova sa ki tendencianan negativo bo ta lucha contra dje—sea bo a heredá nan of adkerí nan como resultado di otro influencianan fuera di bo control. E ta comprendé exactamente con esakinan ta afectá bo. E ta comprendé bo limitacionnan asta mihó cu bo mes. I e ta misericordioso. Nunca e ta spera mas di nos cu nos razonablemente por haci.—Salmo 103:13, 14.

15. (a) Kico ta un fuente di consuelo pa esnan cu otro personanan a perhudicá deliberadamente? (b) Jehova ta dignificá cada un di nos dor di duna nos ki responsabilidad?

¹⁵ Di otro banda, Jehova no ta mira nos como víctimanan impotente di circunstancia. Si nos tabatin mal experencianan den pasado, nos por haña consuelo den e siguridad cu Jehova ta odia tur conducta deliberadamente perhudicial. (Salmo 11:5; Romanonan 12:19) Pero si nos bira i scoge concientemente pa haci cos robes, lo e dispensá nos e ora ei dje consecuencianan? Claro cu no. Su Palabra ta bisa: “Cada un lo hiba su mes carga di responsabilidad.” (Galationan 6:5) Jehova ta dignificá cada un di su criaturanan inteligente cu e responsabilidad di haci bon i sirbié. Ta manera Moises a bisa e nacion di Israel: “Di berdad mi ta tuma shelu i tera como testigo contra boso awe, cu mi a pone bida i morto bo dilanti, e bendicion i e maldicion; i bo tin cu scoge bida pa bo por keda na bida, abo i bo desendencia.” (Deuteronomio 30:19) Jehova tin confiansa cu nos tambe por scoge pa haci lo corecto. Con nos sa esei?

16. Con nos por ta exitoso den ‘traha pa alcansá nos mes salbacion’?

¹⁶ Tuma nota di loke apostel Pablo a skirbi: “P’esei, mi stimánan, . . . sigui traha pa alcansá boso mes salbacion cu temor i temblamentu; pasobra Dios ta esun cu, pa causa di su complacencia, ta actua den boso pa boso tin tantu e deseo como e actuacion.” (Filipensenan 2:12, 13) E palabra griego original traducí como “traha pa alcansá” aki ta nificá completá algu. Pues, ningun di nos ta destiná pa fracasá of stop. Jehova Dios mester tin confiansa cu nos por completá e trabou cu el a duna nos pa haci—e trabou cu ta hiba na nos salbacion—sino lo e no a inspirá un declaracion asina. Pero con nos ta logra éxito? Esei no ta riba nos mes forsa. Si nos tabata suficiente fuerte di nos mes, lo no tabatin necesidad pa “temor i temblamentu.” Mas bien, Jehova ta ‘actua den nos,’ su spiritu santu ta obra den nos mente i curason pa yuda nos ‘tin e deseo i e actuacion.’ Cu e yudansa amoroso ei, tin motibu pakico nos no mester scoge lo corecto den bida i biba segun nan? No!—Lucas 11:13.

17. Ki cambionan nos por haci den nos mes, i con Jehova ta yuda nos haci esei?

¹⁷ Nos lo haña obstáculonan pa vence—tal bes mal hábito i influencianan perhudicial cu nos tabatin henter nos bida, cu por troce nos manera di pensa. No obstante, cu yudansa di Jehova su spiritu, nos por vence esakinan! Manera Pablo a skirbi e cristiannan na Corinto, e Palabra di Dios ta suficiente poderoso pa tumba asta “cosnan fuertemente ancrá.” (2 Corintionan 10:4) De facto, Jehova por yuda nos haci cambionan grandi den nos bida. Su Palabra ta urgi nos pa “kita e personalidad bieu” i pa “bisti e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:22-24) Di berdad Jehova su spiritu por yuda nos haci e cambionan ei? Sigur cu sí! E spiritu di Dios ta producí fruta den nos—cualidadnan bunita i precioso cu nos tur kier cultivá. E promé di esakinan ta amor.—Galationan 5:22, 23.

18. Kico tur hende sensato ta completamente capas pa scoge pa haci, i kico esaki mester yuda nos ta determiná pa haci?

¹⁸ Aki den tin un berdad grandi cu ta libra hende. Jehova Dios tin un capacidad ilimitá pa stima, i nos ta creá den su imágen. (Génesis 1:26; 1 Juan 4:8) Di manera cu nos por scoge pa stima Jehova. I e amor ei—no nos estilo di bida anterior, no nos fayonan característico, no nos tendencia heredá pa haci malu—ta e clave pa nos futuro. Amor pa Jehova Dios ta loke Adam i Eva tabatin mester pa keda fiel den Eden. Un amor asina ta loke cada un di nos mester pa por sobrebibí Armagedon i pasa e prueba final na fin di Cristo su Reinado di Mil Aña. (Revelacion 7:14; 20:5, 7-10) Cada un di nos, sea cual sea nos circunstancianan, por cultivá e amor ei. (Mateo 22:37; 1 Corintionan 13:13) Laga nos ta determiná pa stima Jehova i sigui construí riba e amor ei pa tur eternidad.

Kico Bo Ta Pensa?

◻ Ki conceptonan popular ta contradicí e siñansa positivo di Bijbel relacioná cu responsabilidad individual?

◻ Ki trabou di construccion cada cristian tin cu haci den su mes?

◻ Con e ehempelnan dje reynan di Huda ta demostrá cu cada individuo ta scoge pa su mes?

◻ Con Jehova ta sigurá nos cu nos por scoge pa lo corecto den bida, sin importá e influencianan negativo rond di nos?

[Plachi na página 15]

Genética ta determiná bo futuro?

[Plachi na página 17]

Apesar dje mal ehempel di su tata, Rey Hosías a scoge pa sirbi Dios