Pober Pero Tog Ricu—Con Ta Posibel?

Siglonan pasá un homber sabí a pidi den oracion p’e no bira pober. Di con el a haci un peticion asina? Pasobra e tabatin miedu cu pobresa lo a hib’é na actitud i accionnan cu lo a menasá su relacion cu Dios. Esaki ta evidente for di su palabranan: “Lagá mi come e alimento prescribí pa mi . . . pa mi no cai den pobresa i realmente horta i atacá e nomber di mi Dios.”

—PROVERBIONAN 30:8, 9.

ESAKI ta nificá cu ta imposibel pa un hende pober sirbi Dios fielmente? Sigur cu no! Atrabes di historia un cantidad incontabel di sirbidó di Jehova Dios a mantené integridad na dje apesar dje miseria cu pobresa ta trece. Na su turno, Jehova ta stima esnan cu ta confia den dje i e ta percurá pa nan.

Personanan Fiel den Antigwedad

Apostel Pablo mes a pasa den tempu di berans. (2 Corintionan 6:3, 4) Tambe el a describí un ‘nubia grandi’ di fiel testigonan pre-cristian, di cua algun “a cana rond den cueru di carné, den cueru di cabritu, miéntras nan tabata den necesidad . . . Nan a dual den desierto i ceru i cueba i holnan dje tera.”—Hebreonan 11:37, 38; 12:1.

Un dje personanan fiel aki tabata profeta Elías. Durante un secura di tres aña i mei, Jehova a percurá cuminda regularmente p’e. Promé, Dios a laga rafnan trece pan i carni p’e profeta. (1 Reynan 17:2-6) Despues, milagrosamente Jehova a sigui rende e suministro di hariña i zeta for di cua un biuda a percurá pa Elías. (1 Reynan 17:8-16) E cuminda tabata masha simpel, pero el a tene e profeta, e muher i su yu homber na bida.

Mescos tambe Jehova a sostené e fiel profeta Jeremías durante tempu económico difícil. Jeremías a sobrebibí Babilonia su sitiamentu di Jerusalem, ora hende tabatin cu “come pan na peso i cu preocupacion ansioso.” (Ezekiel 4:16) Cu tempu, e hamber den e stad a bira asina severo cu algun muher a come e carni di nan mes yunan. (Lamentacionnan 2:20) Maske Jeremías tabata encarcelá debí na su predicamentu intrépido, Jehova a soru pa nan dun’é “un pan rondó” diariamente “te ora cu tur pan den e stad a caba.”—Jeremías 37:21.

Pues Jeremías, mescos cu Elías, tabatin poco di come. E Scritura no ta conta nos kico Jeremías a come ni cuantu biaha el a come, despues cu pan a caba den Jerusalem. Sin embargo, nos sa cu Jehova a sosten’é i cu el a sobrebibí e tempu teribel ei di hamber.

Awe, pobresa ta existí na tur parti di mundu. Segun Nacionnan Uní, e mayor concentracion di pobresa ta ser hañá na Africa. Un comunicado di prensa di Nacionnan Uní na 1996 a declará: “Por lo ménos mitar di tur africano ta pober.” Apesar di circunstancianan económico cada bes mas severo, un cantidad aumentante di africano ta aplicá principionan bíblico den nan bida i ta sirbi Dios fielmente, cu confiansa cu lo e sostené nan. Considerá algun ehempel for di un parti di nos mundu turbulento.

Manteniendo Onrades

Michael,a cu ta biba na Nigeria, ta un cunukero cu seis yu pa cria. “Ta difícil pa ta onrado ora bo no tin placa pa cuida bo famia,” e ta bisa. “Sin embargo, ora e tentacion t’ei pa mi ta desonrado, mi ta corda riba Efesionan 4:28, cu ta bisa: ‘Laga esun cu ta horta no horta mas, sino mas bien lagu’e haci trabou duru, haciendo cu su man loke ta bon trabou.’ Pues ora mi ser tentá, mi ta puntra mi mes: ‘Mi a traha pa e placa aki?’”

Michael ta sigui conta: “Por ehempel, un dia ora mi tabata cana, mi a mira un tas cai for di un motosaikel. Mi no por a para e motociclista, di manera cu mi a coge e tas i a ripará cu e tabata yen di placa! Usando e identificacion den e tas, mi a haña e doño i a hiba e tas bek p’e.”

Combatiendo Depresion

Un homber na Nort Africa a remarcá: “Pobresa ta [manera] keda pegá den un buracu hundu, mirando e lus ariba i hende cu ta cana bai bini libremente, pero sin tin e forsa pa grita pa yudansa of pa pidi un trapi pa sali afó.” Nada straño anto cu pobresa hopi bes ta trece sintimentunan di depresion i frustracion! Asta sirbidónan di Dios por mira e rikesa di otronan i cuminsá pensa cu un bida di integridad no ta bale la pena. (Compará cu Salmo 73:2-13.) Con nan por superá sintimentunan asina?

Gobiernu a manda Peter, un persona di West Africa, cu penshon despues di 19 aña den su servicio. Awor e ta biba principalmente di un penshon chikitu. “Ora mi tin periodonan di desanimacion,” Peter ta declará, “mi ta corda riba loke mi a lesa den Bijbel i den e publicacionnan di Sociedad Watch Tower. E sistema bieu aki ta cerca di pasa bai, i nos ta sperando un sistema mihó.

Tambe, mi ta pensa riba 1 Pedro 5:9, cu ta bisa: ‘Tuma boso posicion contra [Satanas], sólido den fe, sabiendo cu e mésun cosnan en cuanto sufrimentu ta ser realisá den henter e asociacion di boso rumannan den e mundu.’ Pues mi no ta e único cu ta pasa trabou. E recordatorionan aki ta yudá mi kita pensamentunan desanimante i cu ta hací mi deprimí.”

Peter ta agregá: “Ademas, Jesus a efectuá hopi milager tempu e tabata riba tera, sin embargo e no a haci ningun hende ricu den sentido material. Di con mi tin cu verwagt cu e ta haci ami sí ricu?”

E Poder di Oracion

Halando cerca Jehova Dios den oracion ta un otro manera pa combatí pensamentu negativo. Ora Mary a bira un Testigo di Jehova na 1960, su famia a bandon’é. Soltera i awor den su 50 i picu aña, su salú ta delicado i e tin masha poco den sentido material. No obstante, e ta celoso den e ministerio cristian.

Mary ta bisa: “Ora mi ta sintí mi desanimá, mi ta acudí na Jehova den oracion. Mi sa cu ningun hende por yudá mi mas cuné. Mi a siña cu ora bo ta confia den Jehova, e ta yudá bo. Semper mi ta corda e palabranan aki di Rey David, hañá na Salmo 37:25: ‘Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan.’

Tambe mi ta saca animacion for dje experencianan di rumannan spiritual mas grandi relatá den E Toren di Vigilancia. Jehova Dios a yuda nan, pues mi sa cu lo e sigui yuda ami tambe. E ta bendicioná mi pida trabou di bende fufu [un cuminda trahá di casabe], i mi ta logra cumpli cu mi necesidadnan diario. Tin biaha ora casi mi no tin niun cen mas i mi ta puntra mi mes kico pa haci, Jehova ta manda un hende cu ta duná mi un regalo den mi man i ta bisa, ‘Ruman, por fabor, tuma esaki.’ Jehova nunca a desapuntá mi.”

E Balor di Studia Bijbel

Testigonan di Jehova ta haña studio dje Palabra di Dios, e Bijbel, algu importante, i esnan pober entre nan no ta un excepcion. John, di sesenta aña, ta un pionero (un predicadó di tempu completo) i un sirbidó ministerial den e congregacion. E ta biba den un edificio di dos piso tur wayangá, caminda tin 13 famia ta biba. Su cuarto ta un pida dje gang dje promé piso, di skòt cu palu. Den dje tin dos stul bieu i un mesa cu stapel di buki pa studia Bijbel. E ta drumi riba un cama di pushi.

Antes John tabata gana mas of ménos un dollar pa dia bendiendo pan di trigu, pero ora nan a prohibí importacion di trigu, el a perde su entrada. E ta bisa: “Tin biaha mi ta haña bida hopi duru, pero mi ta sigui traha pionero. Jehova ta esun cu ta sostené mi. Mi ta haci cualkier trabou cu mi por haña i no ta stèns riba ningun ser humano pa sostené of alimentá mi, aunke mi rumannan den e congregacion ta cla pa yuda. Nan ta yudá mi haña trabou i tin biaha ta regalá mi placa.

Mi ta traha tempu pa lesa e Bijbel i e publicacionnan di Sociedad Watch Tower. Mi ta studia mainta trempan ora cas ta ketu i ta lesa mas lat den anochi ki ora cu nos tin coriente. Mi sa cu mi tin cu keda al dia cu mi studio personal.”

Entrenando Yunan pa Bida Eterno

Daniel ta un biudo cu tin seis yu. Na 1985 el a perde su trabou cu e tabatin pa 25 aña, pero el a haña un otro trabou como manager di un tienda. “Económicamente bida ta duru p’e famia,” e ta bisa. “Awor nos por come solamente un biaha pa dia. Tabatin un biaha cu nos a pasa tres dia sin come. Unico cos cu nos por a haci tabata bebe awa pa keda na bida.”

Daniel ta sirbi como anciano den e congregacion. “Nunca mi no ta perde mi reunionnan cristian, i mi ta keda ocupá cu asignacionnan teocrático,” e ta bisa. “Ki ora cu tin cualkier trabou di haci na e Salon di Reino, mi ta soru pa mi t’ei. I ki ora cu cos ta pertá, mi ta corda riba e palabranan cu Pedro a bisa Jesus, skirbí na Juan 6:68: ‘Señor, cerca ken nos lo bai?’ Si mi stop di sirbi Jehova, unda mi ta bai? Pablo su palabranan cu nos ta haña na Romanonan 8:35-39 tambe ta yená mi cu determinacion pasobra nan ta mustra cu nada lo separá nos for dje amor di Dios i di Cristo. Esaki ta e actitud cu mi ta inculcá den mi yunan. Constantemente mi ta bisa nan cu nunca nos mester bandoná Jehova.” Daniel su celo, combiná cu un studio di Bijbel regular di famia, tabatin un influencia positivo riba su yunan.

Un Spiritu di Duna

Un hende lo por pensa cu esnan cu ta biba den pobresa extremo apénas lo ta den un posicion pa contribuí financieramente pa promové interesnan di Reino. Pero esei no ta e caso. (Compará cu Lucas 21:1-4.) Algun Testigo na Ghana cu ta biba principalmente di loke nan cunucu ta producí, ta apartá un pida di nan tereno pa usa pa promové interesnan dje Reino di Dios. Ora nan bende e productonan agrícola dje pida tereno apartá ei, nan ta usa e placa exclusivamente pa interesnan di Reino, locual ta incluí tira contribucion na e Salon di Reino local di Testigonan di Jehova.

Joan, kende ta biba na Africa Central, ta un pionero. Pa cuida su casá paralisá i cuater otro miembro di famia, e ta bende pan. Ora e congregacion na cua e ta asistí tabatin mester di banki pa e Salon di Reino, e famia di Joan a dicidí di duna tur e placa cu nan tabatin e momento ei na cas. Esei a laga nan sin niun cen pretu. Sin embargo, e siguiente dia inesperadamente un persona a paga un debe masha bieu, dunando nan e placa cu ya nan a perde tur speransa di haña!

Joan ta alegre i no ta preocupá indebidamente tocante placa. “Den oracion mi ta splica Jehova mi situacion, anto caba mi ta bai den e ministerio di veld. Mi sa cu no tin masha speransa pa tempu mas mihó den e sistema di cosnan aki. Sin embargo, nos ta realisá cu Jehova lo percurá pa nos necesidadnan.”

Mustrando Diligencia

Testigonan di Jehova ta ser identificá pa nan amor un pa otro. (Juan 13:35) Esnan cu tin placa ta yuda nan compañeronan cristian cu ta den necesidad. Hopi bes esaki ta bini den forma di un regalo, i tin biaha den forma di un trabou.

Mark, kende ta biba na Congo, ta sufri di lepra. E lepra a deformá su tenchinan i dedenan. P’esei, pa cana e mester di kruk. Ora Mark a dicidí di sirbi Jehova, el a cuminsá haci cambionan grandi den su bida. En bes di pidi limosna manera e tabata haci anteriormente, el a cuminsá cultivá su propio cuminda. Tambe e tabata traha i bende bloki di klei.

Aunke Mark ta físicamente desabilitá, el a sigui traha diligentemente. Cu tempu el a cumpra un pida tereno i a construí un cas modesto riba dje. Awe, Mark ta sirbi como anciano den un congregacion i ta hopi respetá den e pueblo caminda e ta biba. Awor e ta yuda otronan den necesidad.

Naturalmente, den hopi lugá ta casi imposibel pa haña trabou. Un anciano cristian cu ta sirbi na un dje sucursalnan di Sociedad Watch Tower na Africa Central a skirbi: “Hopi ruman homber aki no tin trabou. Algun ta purba crea nan propio trabou, pero esaki ta difícil. Hopi a razoná cu maske kico nan haci, tog nan ta sufri i p’esei ta mihó haci sacrificio material como ministernan pionero. Haciendo esei, hopi ta ripará cu nan ta ser bendicioná mas abundantemente cu si nan tabatin un trabou cu ta paga tiki of nada mes.”

Jehova Ta Sostené Su Pueblo

Jesucristo a bisa di su mes: “Zoronan tin cueba i paranan di shelu tin neshi, pero e Yu di hende no tin lugá pa pone su cabes.” (Lucas 9:58) Di igual manera, apostel Pablo a skirbi: “Te n’e ora actual nos ta sigui sufri di hamber i tambe di sed i cu poco bistí i ta ser maltratá i ta sin cas.”—1 Corintionan 4:11.

Tantu Jesus como Pablo a scoge pa hiba un bida di poco recurso económico pa asina nan por a efectuá nan ministerio mas plenamente. Hopi cristian djawe ta pober, pasobra nan no tin ningun otro opcion. Tog, nan ta aplicá principionan di Bijbel den nan bida i celosamente ta busca pa sirbi Dios. Nan sa cu Jehova ta stima nan mashá segun cu nan ta experenciá e berdad di loke Jesus a sigurá: “Sigui busca, anto, promé e reino i Su husticia, i tur e otro cosnan [material] aki lo ser agregá na boso.” (Mateo 6:25-33) Ademas, e sirbidónan di Dios aki cu ta pober tin evidencia cu “e bendicion di Jehova—esei ta loke ta haci ricu.”—Proverbionan 10:22.

[Notas]

[Kuadro na página 6]

Ken Ta “Hacidónan dje Palabra”?

SEGUN un encuesta di Gallup na 1994, 96 porciento di mericano ta “kere den Dios of den un spiritu universal.” Tambe tin “hopi mas misa pa cabes na Merca cu tin den cualkier otro nacion riba Tera,” segun U.S.News & World Report. Apesar di un aparencia deboto asina, e encuestadó veterano, George Gallup, Jr., ta bisa: “Echo ta sí cu mayoria mericano no sa kico nan ta kere of pakico.”

Estadísticanan ta indicá tambe cu tin un diferencia grandi entre e conviccionnan religioso i e accionnan di hende. Por ehempel, segun escritor Jeffery Sheler: “Sociólogonan ta ripará cu algun dje áreanan den e pais cu tin mas criminalidad ta resultá di ta tambe e lugánan caminda creencia i práctica religioso ta mas fuerte.”

Esaki no mester sorprendé nos. Di con? Pasobra for di den e promé siglo mes, apostel Pablo a spierta cristiannan pa tene cuidou cu esnan cu “ta declará públicamente cu nan conocé Dios, pero [cu] ta nengu’é cu nan obranan.” (Tito 1:16) Ademas, Pablo a bisa e hóben Timoteo cu “e último dianan” lo ta marcá pa hende ‘cu tin un forma di debocion piadoso pero cu ta resultá falsu na su poder.’—2 Timoteo 3:1, 5.

Sin embargo, cristiannan berdadero ta haci nan máximo esfuerso pa sigui e mandamentu di Jesucristo pa “bai . . . i haci disipel di hende di tur nacion.” (Mateo 28:19) Den e manera aki nan ta “bira hacidónan dje palabra, i no tendedónan so.”—Santiago 1:22.

[Plachi na página 7]

Rond parti mundu tin hende ta haña studio di Bijbel importante