“For di Infancia Bo A Conocé”

SEGUN estudionan científico recien, papia cu baby ta influenciá profundamente e desaroyo di nan celebro, estableciendo nan abilidad di pensa, razoná i resolvé problema. Esaki ta specialmente e caso durante e promé aña di bida di un baby. E International Herald Tribune ta informá cu algun investigadó ta kere awor cu “e cantidad di palabra cu un baby ta tende tur dia ta e solo cos di mas importante cu ta determiná su futuro inteligencia, éxito na scol i competencia social.”

Sin embargo, e palabranan papiá tin cu bini di un persona. Ta parce cu television of radio no ta un substituto.

Un neurocientífico n’e Universidad di Washington na Seattle, Merca, a declará: “Awor nos sa cu coneccionnan di nervio di celebro ta ser formá masha trempan den bida i cu e celebro di un baby ta sperando literalmente riba experencianan pa determiná con coneccionnan ta ser hací. Te cu masha recien nos no a realisá con trempan e proceso aki ta cuminsá. Por ehempel, na edad di seis luna babynan a siña e zonidonan di nan idioma nativo.”

Investigacion recien ta disputá e opinion general di cu babynan lo florecé intelectualmente si djis duna nan hopi amor. Tambe e ta resaltá e importancia dje papel di mayornan den desaroyo di un mucha.

Esaki ta pone nos corda e palabranan di apostel Pablo su carta inspirá na Timoteo: “For di infancia bo a conocé e scrituranan santu, cu por hací bo sabí pa salbacion.” Probablemente, e scrituranan santu cu Timoteo su mama i wela creyente a papia cuné como baby, a hunga un papel vital den su desaroyo como un sirbidó di Dios sobresaliente.—2 Timoteo 1:5; 3:15.