Mayornan bou di Presion

HOPI bes esnan cu a caba di bira mama of tata ta parce di ta loco di contentu. Casi tur cos di nan baby ta parce di emocioná nan. E baby su promé sonrisa, su promé palabranan i su promé pasonan ta ocasionnan masha importante. Nan ta entretené amigu i famianan cu cuentanan i potretnan. No tin duda, nan ta stima nan yu.

Sin embargo, den algun famia, segun cu añanan ta pasa, poco-poco un tragedia ta bin sali na cla. E mayor su papiamentu lief ta bira palabranan duru sin heful; abrasonan di cariño ta bira wantanan yen di rabia of ningun contacto físico mes; orguyo di mayor ta bira amargura. “Nunca mi mester a haña yu,” hopi ta bisa. Den otro famianan e problema ta pió ainda—e mayornan no a mustra amor ni ora e yu tabata baby! Den tur dos caso, kico a pasa? Unda e amor a keda?

Naturalmente, muchanan no tin e capacidad pa saca afó e contestanan pa e preguntanan ei. Pero esei lo no impedí nan di saca nan mes conclusionnan. Profundamente den su curason, un mucha por wel yega n’e conclusion: ‘Si Mami of Papi no stimá mi, ta pasobra tin algu malu cu mi. Mi mester ta hopi mal hende.’ Esaki por bira algu cu e ta kere firmemente aden—algu cu por causa tur clase di daño durante henter su bida.

Pero e berdad ta cu mayornan por keda sin mustra nan yunan e amor cu nan tin mester pa hopi motibu. Nos mester admití cu awe mayornan ta enfrentá presionnan hopi grandi, di cua algun ta riba un escala sin precedente. Pa mayornan cu no ta prepará pa manehá nan bon, e presionnan aki lo por stroba nan hopi den nan tarea como mayor. Un antiguo dicho sabí ta declará: “Simpel opresion por haci un hende sabí actua manera un hende loco.”—Eclesiástes 7:7.

“Tempu Crítico, Duru pa Trata Cuné”

Un era di Utopia. Esei tabata loke hopi hende a spera di mira desaroyá den e siglo aki. Imaginá—un fin na presion económico, hamber, secura i guera! Pero ilusionnan asina a keda sin cumpli. Na lugá di esei, e mundu djawe a resultá di ta manera un escritor bíblico a profetisá di dje, aya den e promé siglo E.C. El a skirbi cu den nos dia nos lo enfrentá un “tempu crítico, duru pa trata cuné.” (2 Timoteo 3:1-5) Mayoria mayor lo bai di acuerdo unbes cu e palabranan ei.

Hopi di esnan cu a caba di bira mama of tata ta keda babucá cu e gastunan extremadamente haltu di cria yu den e mundu djawe. Hopi bes, tur dos mayor mester traha pafó di cas djis pa por percurá pa e necesidadnan básico. Gastunan médico, paña, scol, krèsh i asta cuminda i dak tur por contribuí na un ola mensual di recibunan cu ta pone hopi mayor sinti como si fuera nan ta cerca di hoga. E situacion económico ta pone studiantenan di Bijbel corda e profecia den Revelacion cu a predicí un tempu ora hende lo gasta e salario completo di un dia di trabou djis na cumpra e cosnan necesario pa yega pa un solo dia!—Revelacion 6:6.

No por spera pa muchanan comprendé tur e presionnan aki cu mayornan ta enfrentá. No, di naturalesa mes, muchanan tin necesidad i ta hambrá pa haña amor i atencion. I e presion cu nan ta absorbá for dje medionan di comunicacion i for di muchanan di scol, di tin lo último den co’i hunga, paña i aparatonan electrónico hopi bes ta bira presion cu nan ta pone riba e mayornan, pa duna nan loke ta resultá den un lista infinito di cosnan cu nan kier.

Un otro presion riba mayornan, cu ta parce di bira pió den e dianan aki, ta rebeldia. Ta interesante cu Bijbel a profetisá cu un indicacion mas di nos tempu difícil lo ta un prevalencia di yunan desobediente na mayornan. (2 Timoteo 3:2) Ta cierto cu problemanan cu disipliná yu no ta algu nobo. I ningun mayor por hustificá cu nan a maltratá un yu pa su mal comportacion. Pero bo no ta di acuerdo cu awe mayornan tin cu cria yu den henter un cultura di rebeldia? Música popular cu ta fomentá rabia, revolucion i desesperacion; programanan di television cu ta pinta mayornan como bobonan onhandig i muchanan como nan superiornan frescu; películanan cu ta glorificá comportacion riba impulsonan violento—awe muchanan ta ser bombardiá cu influencianan asina. Muchanan cu ta absorbá i ta imitá e cultura aki di rebeldia por pone un presion masha grandi riba nan mayornan.

“Sin Cariño Natural”

Sin embargo, tin un otro aspecto dje mésun profecia antiguo aki, cu ta pronosticá asta mas problema pa e famia djawe. E ta indicá cu un gran cantidad di hende lo ta “sin cariño natural.” (2 Timoteo 3:3) Cariño natural ta loke ta mantené e famia huntu. I asta esnan cu mas ta duda tocante profecia bíblico lo mester bai di acuerdo cu nos tempu a mira un colapso alarmante den bida di famia. Na tur parti di mundu, índicenan di divorcio a aumentá mashá. Den hopi comunidad, famianan cu un mayor soltero of di criansa ta mas comun cu famianan tradicional. Hopi bes mayornan soltero i di criansa ta enfrentá desafio i presionnan special cu ta hacié difícil pa nan mustra e yunan e amor cu nan tin mester.

Pero tin un impacto mas profundo. Hopi dje mayornan djawendia mes a lanta den hogarnan caminda tabatin poco of nada di “cariño natural”—hogarnan desbaratá dor di adulterio i divorcio; hogarnan ruiná dor di frialdad i odio; kisas asta hogarnan caminda abusu verbal, emocional, físico of sexual tabata comun. Lanta den hogarnan asina no solamente ta causa daño na e muchanan, sino por causa daño tambe na e adulto cu nan ta bira. Estadísticanan ta pinta un cuadro scur: tin mas chens cu mayornan cu a ser abusá como mucha lo abusá di nan mes yunan. Den tempu bíblico e hudiunan tabatin un dicho cu ta bisa: “Ta e tatanan ta come druif berde, pero ta djente dje yunan ta coge ril.”—Ezekiel 18:2.

Sin embargo, Dios a bisa su pueblo cu no mester tabata asina. (Ezekiel 18:3) Mester nota un punto importante aki. Ta asina cu tur e presionnan aki riba mayornan ta nificá cu nan no por haci nada otro sino maltratá nan mes yunan? Absolutamente cu no! Si abo ta un mayor i ta luchando cu algun dje presionnan mencioná anteriormente i bo ta preocupá cu si un dia lo bo ta un bon mayor, cobra curashi! Abo no ta un estadística. Bo pasado no ta determiná bo futuro automáticamente.

Na armonia cu e siguransa bíblico cu ta posibel pa mehorá, e buki Healthy Parenting (Cria Yu den un Manera Sano) ta haci e comentario aki: “Si [bo] no dal pasonan deliberá pa actua otro for di bo mes mayornan, e patronchi di bo infancia lo ripití su mes sea cu bo kier of no. Pa kibra e ciclo aki, bo tin cu bira conciente dje patronchinan insaludabel cu bo ta bezig ta laga sigui i siña con pa cambia nan.”

Sí, si ta necesario, bo por kibra e ciclo di abusu di mayor! I bo por enfrentá cu éxito e presionnan cu ta hacié asina difícil pa ta mayor awe. Pero con? Unda bo por siña conocé e normanan mas mihó i mas confiabel pa cria yu den un manera sano? Nos siguiente artículo lo trata e asuntu aki.

[Plachi na página 6]

Bou di presion, algun mayor ta keda sin expresá amor pa cu nan yunan

[Plachi na página 7]

Mayornan mester expresá e amor cu nan yunan tin mester