Esposo i Anciano—Balansando e Responsabilidadnan

‘E superintendente mester ta esposo di un solo esposa.’—1 TIMOTEO 3:2.

1, 2. Pakico e celibato di pastor no ta bíblico?

DEN e promé siglo, cristiannan fiel tabata interesá den balansá nan vários responsabilidadnan. Ora apostel Pablo a bisa cu un cristian cu ta permanecé soltero “lo haci mihó,” e tabata kier men cu un homber asina lo ta den un mihó posicion pa sirbi como un superintendente den e congregacion cristian? E tabata eigenlijk haciendo solteria un rekisito pa ancianonan? (1 Corintionan 7:38) Celibato ta un rekisito pa clero católico. Pero celibato di pastornan ta bíblico? E Iglesianan Ortodox Oriental ta permití nan pastornan di parokia di ta hombernan casá, tog no nan obispunan. Esei ta na armonia cu Bijbel?

² Hopi di Cristo su 12 apostelnan, e miembronan cu a forma e fundeshi dje congregacion cristian, tabata hombernan casá. (Mateo 8:14, 15; Efesionan 2:20) Pablo a skirbi: “Nos tin autoridad pa hiba un ruman muher como esposa, mescos cu e resto dje apostelnan i e rumannan di Señor i Céfas [Pedro], no ta berdad?” (1 Corintionan 9:5) E New Catholic Encyclopedia ta reconocé cu “e ley di celibato ta di orígen eclesiástico” i cu “ministernan dje T[estament] N[obo] no tabata obligá pa warda celibato.” Testigonan di Jehova ta sigui e patronchi bíblico mas bien cu ley eclesiástico.—1 Timoteo 4:1-3.

Ser Anciano i Casá Ta Compatibel

3. Ki echonan bíblico ta mustra cu superintendentenan cristian por ta hombernan casá?

³ En bes di rekerí cu hombernan nombrá como superintendente no mag di ta casá, Pablo a skirbi na Tito: “P’e motibu aki mi a lagá bo na Creta, pa bo por corigí loke tabata defecto i haci nombramentu di anciano [griego, pre·sbyʹte·ros] den stad tras di stad, conforme e ordunan cu mi a duná bo; si tin un homber liber di acusacion, esposo di un solo esposa, teniendo yunan creyente cu no tabata acusá di libertinahe ni ingobernabel. Pasobra un superintendente [griego, e·piʹsko·pos, di unda e palabra “obispu” a sali] mester ta liber di acusacion como mayordomo di Dios.”—Tito 1:5-7.

4. (a) Con nos sa cu matrimonio no ta un rekisito pa superintendentenan cristian? (b) Ki bentaha un ruman homber soltero cu ta un anciano tin?

⁴ Di otro banda, matrimonio no ta un rekisito bíblico pa ancianonan. Jesus a permanecé soltero. (Efesionan 1:22) Pablo, un superintendente sobresaliente den e congregacion cristian di promé siglo, no tabata casá e tempu ei. (1 Corintionan 7:7-9) Awe, tin hopi cristian soltero cu ta sirbi como anciano. Nan estado soltero probablemente ta permití nan mas tempu pa cumpli cu nan debernan como superintendente.

‘E Homber Casá Ta Dividí’

5. Ki echo bíblico rumannan homber casá mester reconocé?

⁵ Ora un homber cristian casa, e mester realisá cu e ta asumiendo responsabilidadnan nobo cu lo exigí su tempu i atencion. Bijbel ta declará: “E homber no-casá ta ansioso p’e cosnan di Señor, con e por gana e aprobacion di Señor. Pero e homber casá ta ansioso p’e cosnan di mundu, con e por gana e aprobacion di su esposa, i e ta dividí.” (1 Corintionan 7:32-34) Den ki sentido e ta dividí?

6, 7. (a) Cua ta un manera den cua un homber casá ta “dividí”? (b) Ki conseho Pablo ta duna cristiannan casá? (c) Con esaki por influenciá un homber su decision pa aceptá un asignacion di trabou?

⁶ Pa cuminsá, un homber casá ta renunciá autoridad riba su mes curpa. Pablo a haci esaki masha cla: “E esposa no ta ehercé autoridad riba su mes curpa, sino su esposo; asina mes, tambe, e esposo no ta ehercé autoridad riba su mes curpa, sino su esposa.” (1 Corintionan 7:4) Algun cu ta pensando pa casa por sinti cu esaki no ta nificá mashá pasobra relacion sexual lo no ta e cos di mas importante den nan matrimonio. Sin embargo, siendo cu Bijbel ta manda cristiannan pa keda limpi promé cu matrimonio, nan no conocé realmente e necesidadnan sexual di nan futuro partner.

⁷ Pablo ta mustra cu asta un pareha cu ‘ta fiha nan mente riba e cosnan di spiritu’ mester tuma na cuenta e necesidadnan sexual di otro. El a consehá cristiannan na Corinto: “Laga e esposo duna su esposa loke ta debí na dje; pero laga e esposa haci mescos tambe cu su esposo. No priva otro di dje, excepto cu consentimentu mutuo pa un tempu señalá, pa boso por dedicá tempu na oracion i por bini huntu atrobe, pa Satanas no sigui tenta boso pa boso falta di dominio propio.” (Romanonan 8:5; 1 Corintionan 7:3, 5) Lamentablemente, tabatin casonan di adulterio ora cu no a sigui e conseho aki. Siendo cu esei ta e caso, un cristian casá mester evaluá asuntunan cuidadosamente promé cu e aceptá un asignacion di trabou cu lo separ’é for di su esposa pa un periodo largu di tempu. E no tin e mésun libertad mas pa move manera ora e tabata soltero.

8, 9. (a) Kico Pablo tabata kier men ora el a bisa cu cristiannan casá ta “ansioso p’e cosnan di mundu”? (b) Kico cristiannan casá mester ta ansioso pa haci?

⁸ Den ki sentido por bisa cu hombernan cristian casá, incluyendo ancianonan, ta “ansioso p’e cosnan di mundu [koʹsmos]”? (1 Corintionan 7:33) Ta masha evidente cu Pablo no tabata papiando dje mal cosnan dje mundu aki, locual tur cristian berdadero mester evitá. (2 Pedro 1:4; 2:18-20; 1 Juan 2:15-17) E Palabra di Dios ta instruí nos “pa rechasá maldad i deseonan mundano [ko·smi·kosʹ] i biba cu sano huicio i husticia i debocion piadoso den e sistema actual di cosnan.”—Tito 2:12.

⁹ P’esei, un cristian casá ta “ansioso p’e cosnan di mundu” den e sentido cu e ta legítimamente preocupá tocante cosnan mundano cu ta parti di un bida casá normal. Esaki ta incluí bibienda, cuminda, paña, recreo—pa no papia mes di un cantidad di otro preocupacionnan si tin yunan. Pero asta pa un pareha sin yu, si nan kier pa e matrimonio tin éxito, tantu esposo como esposa mester ta ansioso pa “gana e aprobacion” di su partner matrimonial. Esaki ta di interes particular pa ancianonan cristian segun cu nan ta balansá nan responsabilidadnan.

Bon Esposo i Tambe Bon Anciano

10. Pa un cristian cualificá como anciano, kico su rumannan i hende pafó dje congregacion mester por observá?

¹⁰ Aunke matrimonio no ta un rekisito pa un homber cristian bira un anciano, si e ta casá, promé cu e ser recomendá pa nombramentu como anciano, e siguramente mester duna evidencia di ta haci esfuerso pa ta un esposo bon i amoroso, miéntras cu e ta ehercé hefatura apropiado. (Efesionan 5:23-25, 28-31) Pablo a skirbi: “Si un homber ta percurando pa alcansá un puesto di superintendente, e ta deseoso di un trabou excelente. Pues, e superintendente mester ta ireprensibel, esposo di un solo esposa.” (1 Timoteo 3:1, 2) Mester ta evidente cu un anciano ta haciendo su máximo esfuerso pa ta un bon esposo, sea su esposa ta un compañero cristian of no. De echo, asta hende pafó dje congregacion mester por ripará cu e ta soru bon pa su esposa i pa su otro responsabilidadnan. Pablo a agregá: “Tambe e mester tin un testimonio excelente di hende djafó, pa asina e no cai den reproche i un las dje Diabel.”—1 Timoteo 3:7.

11. Kico e frase “esposo di un solo esposa” ta implicá, pues ki precaucion ancianonan mester tuma?

¹¹ Naturalmente, e frase “esposo di un solo esposa” ta excluí poligamia, pero e ta implicá tambe fieldad matrimonial. (Hebreonan 13:4) Ancianonan en particular mester ta specialmente cuidadoso ora nan ta yuda rumannan muher den e congregacion. Nan mester evitá di ta nan so ora nan bishitá un ruman muher cu ta den necesidad di conseho i consuelo. Nan lo haci bon pa laga un otro anciano of un sirbidor ministerial compañá nan of asta nan casá, si ta trata di djis un bishita di animacion.—1 Timoteo 5:1, 2.

12. Ki descripcion e esposanan di anciano i sirbidornan ministerial mester trata na cumpli cuné?

¹² Miéntras apostel Pablo tabata mencionando e rekisitonan pa anciano i sirbidornan ministerial, el a incluí aden un palabra di conseho p’e esposanan di esnan cu ta ser considerá pa privilegionan asina. El a skirbi: “Hende muher di igual manera mester ta serio, no calumniador, moderá di custumber, fiel den tur cos.” (1 Timoteo 3:11) Un esposo cristian por contribuí hopi pa yuda su esposa cuadra cu e descripcion ei.

Debernan Bíblico pa cu un Esposa

13, 14. Asta si e esposa di un anciano no ta un compañero Testigo, pakico e anciano mester keda cuné i ser un bon esposo?

¹³ Naturalmente, e conseho aki cu a ser duná n’e esposanan di anciano of sirbidornan ministerial ta sali for dje punto di bista cu e esposanan ei mes ta cristiannan dedicá. Generalmente, esaki ta e caso debí cu cristiannan mester casa “solamente den Señor.” (1 Corintionan 7:39) Pero kico di un ruman homber cu tabata casá caba cu un incrédulo ora el a dedicá su bida na Jehova, of kende su esposa a cai for dje berdad sin cu esei tabata su falta?

¹⁴ Esaki, riba su mes, lo no previnié di ser un anciano. Sin embargo, tampoco lo e hustificá p’e separá for di su casá simplemente pasobra e esposa no ta compartí su creencianan. Pablo a consehá: “Bo ta mará na un esposa? Stop di busca liberacion.” (1 Corintionan 7:27) Mas aleu el a declará: “Si un ruman homber tin un esposa incrédulo, i tog e [esposa] ta cumbiní pa biba cuné, lagu’e [esposo] no bandon’é. Pero si esun incrédulo procedé di bai, lagu’e bai; un ruman homber of un ruman muher no ta den servidumbre bou di circunstancianan asina, sino Dios a yama boso pa pas. Pasobra, esposa, con bo sa cu lo bo no salba bo esposo? Of, esposo, con bo sa cu lo bo no salba bo esposa?” (1 Corintionan 7:12, 15, 16) Asta si su esposa no ta un Testigo, un anciano mester ta un bon esposo.

15. Ki conseho apostel Pedro ta duna esposonan cristian, i kico por ta e consecuencianan si un anciano ta resultá di ta un esposo cu ta neglishá su casá?

¹⁵ Sea su esposa ta un compañero creyente of no, e anciano cristian mester reconocé cu su esposa tin mester di su atencion amoroso. Apostel Pedro a skirbi: “Boso, esposonan, sigui biba di igual manera cu nan [boso esposanan] segun conocimentu, asignando onor na nan manera na un wea mas swak, esun femenino, siendo cu boso tambe ta heredero cu nan dje fabor inmerecí di bida, pa boso oracionnan no ser strobá.” (1 Pedro 3:7) Un esposo cu deliberadamente ta keda sin percurá pa e necesidadnan di su casá ta pone su propio relacion cu Jehova na peliger; e por blokea su acercamentu na Jehova manera “cu un masa di nubia, p’e oracion no pasa dor.” (Lamentacionnan 3:44) Esaki lo por hiba na su descualificacion pa sirbi como un superintendente cristian.

16. Ki punto clave Pablo ta trece dilanti, i con ancianonan mester sinti en cuanto esaki?

¹⁶ Manera a ser mencioná caba, e punto principal di Pablo su argumento ta cu ora un homber casa, e ta renunciá un midí dje libertad cu e tabatin como un homber soltero cu a permitié keda den “sirbishi constante pa Señor sin distraicion.” (1 Corintionan 7:35) Informenan ta mustra cu algun anciano casá no semper tabata balansá ora di razoná riba Pablo su palabranan inspirá. Den nan deseo pa logra loke nan ta sinti cu bon ancianonan mester haci, nan kisas ta neglishá algun di nan debernan di esposo. Algun di nan ta haña cu ta difícil pa nenga un privilegio di congregacion, asta si aceptand’e lo ta obviamente perhudicial den sentido spiritual pa nan esposanan. Nan ta disfrutá dje privilegionan cu ta bai compañá cu matrimonio, pero nan ta dispuesto pa cumpli cu e responsabilidadnan cu ta bai cuné?

17. Kico a sosodé cu algun esposa, i con lo por a evitá esaki?

¹⁷ Siguramente, celo como anciano ta encomendabel. No obstante, un cristian ta balansá si, cumpliendo cu su debernan den e congregacion, e ta neglishá su responsabilidadnan bíblico pa cu su esposa? Miéntras e ta deseá di apoyá esnan den e congregacion, un anciano balansá lo ta interesá tambe den e spiritualidad di su esposa. Algun casá di anciano a bira spiritualmente débil i algun a experenciá “naufragio” spiritual. (1 Timoteo 1:19) Aunke un esposa ta responsabel pa traha pa su propio salbacion, den algun caso e problema spiritual por a ser evitá si e anciano a ‘alimentá i cariciá’ su esposa, “mescos cu Cristo tambe ta haci cu e congregacion.” (Efesionan 5:28, 29) Echo ta cu ancianonan mester ‘presta atencion na nan mes i na henter e tou.’ (Echonan 20:28) Si nan ta casá, esaki ta incluí nan esposa.

‘Tribulacion den Carni’

18. Cua ta algun aspecto dje “tribulacion” cu cristiannan casá ta experenciá, i con esaki por afectá e actividadnan di un anciano?

¹⁸ Tambe e apostel a skirbi: “Si un persona bírgen casa, e hende ei lo no ta cometiendo un picá. Sin embargo, esnan cu ta hacié lo tin tribulacion den nan carni. Pero mi ta spar boso di esei.” (1 Corintionan 7:28) Pablo a deseá di spar esnan cu ta den un posicion di sigui su ehempel di keda soltero, dje ansiedadnan cu inevitablemente ta bini cu matrimonio. Asta pa parehanan sin yu, e ansiedadnan aki por incluí problemanan di salú of dificultadnan financiero i tambe responsabilidadnan bíblico pa cu e mayornan di edad avansá di bo partner. (1 Timoteo 5:4, 8) Un anciano mester aceptá den un forma ehemplar e responsabilidadnan aki, i esaki tin biaha por afectá su actividadnan como un superintendente cristian. Felismente, mayoria anciano ta haciendo un trabou excelente cumpliendo cu tantu nan responsabilidadnan di famia como di congregacion.

19. Kico Pablo tabata kier men ora el a bisa: “Laga esnan cu tin esposa haci como si nan no tin”?

¹⁹ Pablo a agregá: “E tempu cu a keda ta reducí. Di awor padilanti, laga esnan cu tin esposa haci como si nan no tin.” (1 Corintionan 7:29) Naturalmente, mirando loke el a skirbi caba den e capítulo aki n’e corintionan, ta claro cu e no tabata kier men cu cristiannan casá, den un manera of otro mester neglishá nan esposa. (1 Corintionan 7:2, 3, 33) El a mustra loke e tabata kier men, ora el a skirbi: “[Laga] esnan cu ta haci uso dje mundu [sea] como esnan cu no ta us’é plenamente; pasobra e esena dje mundu aki ta cambiando.” (1 Corintionan 7:31) Awendia, asta mas cu den e dia di Pablo of den e dia di apostel Juan, “e mundu ta pasando forbij.” (1 Juan 2:15-17) P’esei, cristiannan casá cu ta sinti e necesidad di haci algun sacrificio den sigui Cristo no por ta exclusivamente absorbá den e goso i privilegionan di matrimonio.—1 Corintionan 7:5.

Esposanan cu un Spiritu di Sacrificio Propio

20, 21. (a) Ki sacrificionan hopi esposa cristian ta dispuesto na haci? (b) Kico un esposa por spera legítimamente di su esposo, asta si e ta un anciano?

²⁰ Mescos cu ancianonan ta haci sacrificionan pa asina beneficiá otro hende, hopi esposa di ancianonan a haci esfuerso pa balansá nan responsabilidadnan den matrimonio cu interesnan vital di Reino. Miles di muhernan cristian ta contentu pa cooperá pa permití nan esposo efectuá nan debernan como superintendente. Jehova ta stima nan pa esaki, i e ta bendicioná e spiritu excelente cu nan ta demostrá. (Filemon 25) No obstante, Pablo su conseho balansá ta mustra cu esposanan di superintendentenan por spera legítimamente un cantidad razonabel di tempu i atencion for di nan esposo. Ancianonan casá tin un obligacion bíblico pa dedicá suficiente tempu na nan esposa pa asina balansá nan responsabilidadnan como esposo i superintendente.

²¹ Pero kico si, ademas di ser un esposo, un anciano cristian ta un tata tambe? Esaki ta aumentá su responsabilidadnan i ta habri dilanti dje un área mas di supervision, manera nos lo mira den e siguiente artículo.

Como Repaso

◻ Ki echonan bíblico ta mustra cu un superintendente cristian por ta un homber casá?

◻ Si un anciano soltero casa, di kico e mester ta conciente?

◻ Den ki maneranan un cristian casá ta “ansioso p’e cosnan di mundu”?

◻ Con hopi esposa di superintendentenan ta demostrá un spiritu excelente di sacrificio propio?

[Plachi na página 17]

Maske un anciano ta ocupá cu actividadnan teocrático, e mester duna su esposa atencion amoroso