Pakico Bo Mester Asistí na Reunionnan Cristian

PA LUNANAN, Rosario, kende ta biba na Sur-América, a disfrutá di un studio di Bijbel cu Elizabeth. Rosario tabata conmoví pa siña tocante e Reino di Dios i con lo e trece condicionnan paradísico riba tera. Sin embargo, ki ora cu Elizabeth a invit’é pa asistí na reunion na Salon di Reino, el a nenga. Rosario a pensa cu lo e por a studia Bijbel na cas i pone na práctica loke e ta bisa, haciendo asina sin asistí na reunion di congregacion. Abo tambe a yega di puntra bo mes si reunionnan cristian realmente ta di beneficio pa bo? Pakico Dios ta haci areglo pa su pueblo reuní huntu?

Ya cu cristiannan den e promé siglo tabata asina diferente for di hende rond di nan, asociacion corecto tabata vital pa nan sobrebibencia. Apostel Pablo a skirbi na un congregacion cristian dje promé siglo: ‘Boso a yega di ta sin culpa i inocente entre un generacion trocí i corcobá, entre cua boso ta briya como iluminadornan den e mundu.’ (Filipense 2:15) E cristiannan tabatin un tempu particularmente difícil den Hudea i tabata na nan cu Pablo a skirbi: “Laga nos considerá un e otro pa incitá otro na amor i obra excelente, no bandonando nos reunimentu huntu, manera algun tin pa custumber, sino animá un e otro, i tantu mas cu boso ta mira e dia yegando cerca.” (Hebreo 10:24, 25) Con nos ta incitá un e otro na amor i obra excelente dor di reuní huntu?

Con Cristiannan Ta Haci Otro “Skerpi”

E palabra griego cu Pablo a usa i cu ta ser traducí como “incitá” literalmente kier men “haci skerpi.” Un proverbio bíblico ta splica con cristiannan ‘ta haci otro skerpi’ ora e ta bisa: “Heru cu heru mes ta haci otro skerpi. Asina un hende ta haci e cara di un otro skerpi.” (Proverbio 27:17; Eclesiastés 10:10) Nos ta manera herment cu mester sleip regularmente. Ya cu nos expresion di amor pa Jehova i tumamentu di decision basá riba nos fe ta nificá ser diferente for dje mundu, constantemente nos tin cu tuma un curso di accion diferente for dje mayoria, na moda di papia.

E esfuerso constante pa ser diferente por haci nos celo pa obra excelente bira stompi. Pero ora nos ta cu otronan cu ta stima Jehova, nos ta haci otro skerpi—nos ta incitá un e otro na amor i obra excelente. N’e otro banda, ora nos ta so, nos tin tendencia di considerá nos mes mas. Ideanan inmoral, egoista of bobo por drenta nos mente. “Un persona cu ta isolá su mes lo busca su mes anhelo egoista; contra tur sabiduria práctico lo e lanta.” (Proverbio 18:1) Esei t’e motibu pakico Pablo a skirbi n’e congregacion den e stad di Tesalónica: “Sigui consolá un e otro i edificá un e otro, net manera boso ta haciendo realmente.”—1 Tesalonicense 5:11.

Ora Rosario a terminá su studio di siñansa bíblico fundamental, ainda e no a asociá cu e congregacion. Pues, incapas pa duna mas yudansa, Elizabeth a stop di bishit’é. Algun luna despues un superintendente biahero a bishitá Rosario i a puntr’é: “Asta ora cada miembro di un famia lo por haña bon cuminda dor di come afó, kico tur miembro lo perde dor di no come huntu na cas?” Rosario a contestá: “Nan lo perde compañerismo di famia.” El a capta e punto i a cuminsá bini reunion regularmente. El a haña nan asina beneficioso cu desde e tempu ei el a asistí na casi tur reunion.

Tendiendo otro hende expresá fe den e mésun cosnan cu bo ta kere den ta animador i mescos tambe pa mira con un fe asina a cambia nan bida. Pablo tabata sa esaki for di experencia personal i el a skirbi n’e congregacion na Roma: “Mi ta anhelá pa mira boso, pa mi por compartí algun don spiritual cu boso afin cu boso por ser hací firme; of, mas bien, pa por tin un intercambio di estímulo entre boso, pa cada un mediante e fe di otro, tantu di boso como di mi.” (Romano 1:11, 12) En realidad, a dura basta aña promé cu Pablo por a bishitá Roma, i ora el a haci’é, tabata como prisonero den man dje romanonan. Pero ora el a mira rumannan di Roma cu a cana mas cu 60 kilometer for dje stad pa bin top’é, “Pablo a gradicí Dios i a cobra ánimo.”—Echo 28:15.

Hañando Alimento Spiritual den Tempu Crítico

Miéntras cu Pablo tabata bou di aresto di cas na Roma, el a skirbi e hebreonan tocante no bandoná e reunimentu di nan mes huntu. E palabranan cu el a agregá tin hopi nificacion pa nos: “I tantu mas cu boso ta mira e dia yegando cerca.” (Hebreo 10:25) Testigonan di Jehova consistentemente a mustra for dje Scritura cu aña 1914 a marca e principio dje tempu di fin dje mundu aki i cu “e dia di huicio i di destruccion di hende malbado” a yega cerca. (2 Pedro 3:7) Di acuerdo cu e buki bíblico di Revelacion, ora e Diabel a ser tirá for di cielu na principio dje tempu di fin, e tabatin gran rabia i “a bai pa haci guera contra e resto . . . kendenan ta warda e mandamentunan di Dios i tin e obra di duna testimonio tocante Jesus.” (Revelacion 12:7-17) P’esei, wardamentu dje mandamentunan di Dios ta specialmente difícil awor; mas motibu ainda pa nos reuní cu compañé creyente. Reunionnan lo yuda nos fortalecé nos fe i nos amor pa Dios afin di resistí e atakenan dje Diabel.

Amor pa Dios i fe no ta manera edificio cu ta permanente una bes cu nan a ser construí. Mas bien, nan ta manera cosnan bibiente cu ta crece lentamente cu alimentacion constante pero cu ta marchitá i muri si nan no haña nutricion. P’esei Jehova ta proveé cuminda spiritual regular pa fortalecé su pueblo. Nos tur mester di tal cuminda, pero di unda nos por ricibi’é cu no ta dje organisacion di Dios i su reunionnan? Ningun caminda.—Deuteronomio 32:2; Mateo 4:4; 5:3.

Jesus a haci un pregunta cu por yuda nos mira con e ta alimentá e congregacion cristian. El a puntra: “Ken realmente ta e esclabo fiel i discreto kende su doño a nombra riba su domésticonan, pa duna nan nan cuminda n’e debido tempu? Felis ta e esclabo ei si su doño yega hañ’é ta haciendo asina.” (Mateo 24:45, 46) Ken Jesus a nombra den e promé siglo pa alimentá su siguidornan, i ken el a haña fielmente ta alimentando nan na su regreso den poder di Reino? Claramente, ningun hende a biba atrabes di tur e siglonan ei. Evidencia ta mustra cu e esclabo ta e congregacion di cristian ungí cu spiritu, mescos cu e nacion di Israel tabata Dios su sirbidor den tempu pre-cristian. (Isaías 43:10) Sí, Jesus ta duna nos alimento spiritual mediante tal cuerpo mundial di cristian ungí cu spiritu, cu awe ta manda alimento spiritual mediante e congregacionnan local di Testigonan di Jehova.

Apostel Pablo a describí mas aleu e provision di Jesus pa un canal di suministro di alimento spiritual: “‘Ora el a subi den haltura el a hiba prisonero; el a duna don den homber.’ . . . El a duna algun como apostel, algun como profeta, algun como evangelisador, algun como wardador i maestro, cu bista rib’e reahuste dje santunan, pa trabou ministerial, p’e edificacion dje curpa di Cristo, te ora nos tur logra alcansá e unidad den fe i den conocimentu exacto dje Yu di Dios, na un homber hecho, n’e midí di estatura cu ta pertenecé n’e plenitud di Cristo.”—Efesio 4:8, 11-13.

Tabata principalmente den e congregacionnan local—na reunionnan—cu e ‘donnan den homber’ aki a edificá e rumannan. Na Antioquía, por ehempel, “Hudas i Silas, ya cu nan mes tabata profeta tambe, a animá e rumannan cu hopi discurso i a fortalecé nan.” (Echo 15:32) Discursonan na encargo di hombernan spiritualmente cualificá awe di igual manera lo alimentá nos fe pa e no marchitá of bira inactivo.

Talbes ta cierto cu nos a haci bon progreso debí n’e yudansa personal di un miembro dje congregacion aunke kisas nos no a cuminsá asistí na reunion ainda. Bijbel ta bisa cu tin un tempu ora bo “mester di un hende pa siña boso for di principio e cosnan elemental dje declaracionnan sagrado di Dios; i boso . . . mester di lechi, no cuminda sólido.” (Hebreo 5:12) Pero un persona no por keda n’e etapa di lechi pa semper. Reunionnan cristian ta percurá un programa continuo di instruccion bíblico diseñá pa tene amor di Dios i fe den dje bibu i tambe pa percurá yudansa práctico den aplicá “tur e conseho di Dios.” (Echo 20:27) Esaki ta mas cu “lechi.” Bijbel ta bisa mas aleu: “Cuminda sólido ta pertenecé na hende maduro, na esnan kende mediante uso tin nan facultadnan mental entrená pa distinguí tantu bon i malu.” (Hebreo 5:14) Na reunion hopi tema ta ser considerá cu kisas no ta parti di un curso básico di instruccion bíblico na cas, manera studio di versículo pa versículo di profecia bíblico importante i consideracion profundo dje manera cu nos por imitá Dios den nos mes bida.

Jehovah Su Recordatorionan—Manera un Bos Bo Tras

Pa medio di studionan di congregacion asina, Jehova ta recordá nos regularmente ki sorto di persona nos mester ta. Tal recordatorionan ta vital. Sin nan nos ta incliná fácilmente na egoismo, orguyo i golosidad. Recordatorionan dje Scritura lo yuda nos disfrutá di relacionnan exitoso cu otro hende i cu Dios mes. “Mi a considerá mi camindanan, pa mi por bolbe mi pianan na bo recordatorionan,” e escritor di Salmo 119:59 a confesá.

Segun cu nos ta asistí regularmente na reunionnan cristian, nos ta experenciá e cumplimentu di Jehova su profecia mediante Isaías, cu ta bisa: “Bo Gran Instructor lo no sconde su mes mas, i bo wowonan mester bira wowonan mirando bo Gran Instructor. I bo mes oreanan lo tende un palabra bo tras bisando: ‘Esaki ta e caminda. Boso cana den dje.’” Jehova ta mira riba nos progreso i ta corigí nos amorosamente si nos dal un paso falsu. (Isaías 30:20, 21; Galatio 6:1) I e ta percurá asta mas yudansa cu esaki.

Ricibiendo Spiritu Santu Mediante e Congregacion

Dor di asistí regularmente na reunionnan cristian cu Testigonan di Jehova, nos ta ser fortalecí mediante e spiritu santu di Dios, cua ta riba su pueblo. (1 Pedro 4:14) Ademas, e superintendentenan cristian den e congregacion a ser nombrá pa spiritu santu. (Echo 20:28) E forsa activo aki di Dios tin un influencia poderoso riba un cristian. Bijbel ta bisa: “E fruta di spiritu ta amor, goso, pas, gran pacenshi, amabilidad, bondad, fe, suavedad, dominio propio.” (Galatio 5:22, 23) Spiritu santu, trahando mediante Dios su organisacion, lo yuda nos tambe pa gana un comprendimentu maraviyosamente claro di loke Jehova tin wardá pa esnan cu ta stim’é. Despues di splica cu hende prominente dje sistema di cosnan aki no por comprendé e propósitonan di Dios, Pablo a skirbi: “Ta na nos cu Dios a revelá nan mediante su spiritu.”—1 Corintio 2:8-10.

Ademas di alimento spiritual fortalecedor-di-fe, e congregacion ta percurá entrenamentu pa esnan cu ta deseá na participá den e actividad principal dje congregacion. Kico esei ta?

Entrenamentu cu e Congregacion Ta Percurá

E congregacion cristian no ta un club social caminda hende ta djis disfrutá di entretenimentu i kisas ta animá un e otro pa hiba un mihó bida. Jesus a comisioná e congregacion pa hiba e bon nobo di Reino na esnan cu ta biba den scuridad spiritual. (Echo 1:8; 1 Pedro 2:9) For dje dia cu el a ser fundá, na Pentecoste di 33 E.C., e tabata un organisacion di predicadornan. (Echo 2:4) Bo a yega di tin e experencia di purba splica un persona e propósitonan di Jehova pero no por a convenc’é? Reunionnan di congregacion ta duna entrenamentu personal den e arte di siña. Dor di studia ehempelnan di Bijbel, nos ta siña con pa establecé un tereno comun, for di cua nos ta razoná, con pa usa e Scritura como base pa argumento lógico i con pa yuda otronan razoná dor di usa pregunta i ilustracion. Abilidadnan asina por yudá bo experenciá e goso inexplicabel di yuda un otro persona comprendé berdad di Bijbel.

Den e mundu desuní i inmoral aki, e congregacion cristian ta un berdadero refugio spiritual. Aunke e ta consistí di hende imperfecto, e ta un haf di pas i amor. P’esei, asistí regularmente na tur su reunionnan i experenciá pa bo mes e berdad dje palabranan dje salmista: “Mira! Ki bon i ki agradabel ta pa rumannan biba huntu den unidad! . . . Jehova a ordená p’e bendicion ta ei, asta bida pa tempu indefiní.”—Salmo 133:1, 3.