Laga Nos Nunca Hala Atras na Destruccion!

“Nos no ta e clase cu ta hala atras te na destruccion.”—HEBREONAN 10:39.

1. Ki circunstancianan a pone apostel Pedro sucumbí na miedu?

E APOSTELNAN lo mester a keda turdí ora nan Doño, Jesus, a bisa nan cu nan tur lo a plama for di otro i bandon’é. Con un cos asina por tabata posibel, net den su ora di mas necesidad? Pedro a insistí: “Aunke hende pone tur e otronan trompecá, tog ami [lo] no [trompecá].” En berdad Pedro tabata un homber balente, yen di curashi. Pero ora nan a arestá i traicioná Jesus, e apostelnan, incluso Pedro, a plama for di otro. Mas despues, ora nan tabata interogá Jesus den e cas di Sumo Sacerdote Caifas, Pedro tabata pará tur anshá den e patio. Segun cu e anochi friu tabata pasa, probablemente Pedro a bin haña miedu cu Jesus i tur esnan asociá cuné lo por a ser ehecutá. Ora algun hende pará ei banda a reconocé Pedro como un di Jesus su socionan íntimo, el a drenta pánico. Tres bes el a desmentí cu e tabatin lasonan cu Jesus. Pedro a asta nenga cu el a conoc’é!—Marco 14:27-31, 66-72.

2. (a) Pakico Pedro su curso miedoso riba e anochi di Jesus su aresto no a nificá cu e tabata di “e clase cu ta hala atras”? (b) Kico mester ta nos determinacion?

² Esei tabata un ora scur den Pedro su bida, un momento cu sin duda el a lamentá p’e resto di su bida. Pero e curso di Pedro e anochi ei a nificá cu e tabata un cobarde? El a nificá cu e tabata di “e clase” cu apostel Pablo a describí despues ora el a skirbi: “Awor nos no ta e clase cu ta hala atras te na destruccion”? (Hebreonan 10:39) Probablemente mayoria di nos lo ta di acuerdo cu Pablo su palabranan no ta aplicá na Pedro. Pakico? Pasobra Pedro su miedu tabata temporal, un caida breve den un bida marcá pa curashi i fe sobresaliente. Mescos tambe, hopi di nos tin momentonan den nos pasado cu nos ta corda cu un tiki bergwensa, momentonan ora miedu a coge nos di sorpresa i a stroba nos di para cu curashi p’e berdad manera nos lo a deseá. (Compará cu Romanonan 7:21-23.) Nos por ta sigur cu e caidanan momentáneo ei no kier men cu nos ta di e clase cu ta hala atras na destruccion. Tog, nos mester ta determiná pa no bira e clase di hende ei nunca. Pakico? I con nos por evitá di bira un persona asina?

Nificacion di Hala Atras na Destruccion

3. Con e profetanan Elías i Jónas a sucumbí na miedu?

³ Ora Pablo a skirbi di “e clase cu ta hala atras,” e no tabata kier men esnan cu kisas ta perde curashi pa un ratu. Pablo sigur tabata sa di Pedro su experencia i di otro casonan similar. Un biaha, Elías, un profeta balente i yen di curashi, a sucumbí na miedu i a hui pa su bida pa motibu di un menasa di morto di parti dje reina malbado Jezabel. (1 Reynan 19:1-4) Profeta Jónas a haña un atake di miedu asta mas serio. Jehova a asign’é p’e biaha bai e stad di Nínive, cu tabata notoriamente violento i malbado. Mesora Jónas a subi un boto rumbo pa Társis, 3.500 kilometer den direccion contrario! (Jónas 1:1-3) Tog, bo no por describí ningun dje dos profetanan fiel aki ni apostel Pedro corectamente como e clase cu ta hala atras. Pakico no?

4, 5. (a) Con e contexto ta yuda nos determiná kico Pablo tabata kier men cu “destruccion” na Hebreonan 10:39? (b) Kico Pablo tabata kier men ora el a bisa: “Nos no ta e clase cu ta hala atras te na destruccion”?

⁴ Ripará e frase completo cu Pablo a usa: “Awor nos no ta e clase cu ta hala atras te na destruccion.” Kico e tabata kier men cu “destruccion”? E palabra griego cu el a usa ta referí tin bes na destruccion eterno. E definicion aki ta cuadra cu e contexto. Pablo a caba di spierta: “Si nos practicá picá boluntariamente despues di a ricibí conocimentu exacto dje berdad, no ta keda ningun sacrificio pa picá mas, sino tin un cierto anticipacion spantoso di huicio i tin un celo ardiente cu ta bai consumí esnan na oposicion.”—Hebreonan 10:26, 27.

⁵ Pues ora Pablo a bisa su compañeronan creyente, “nos no ta e clase cu ta hala atras te na destruccion,” e tabata kier men cu e i su fiel lectornan cristian tabata determiná pa nunca alehá for di Jehova i stop di sirbié. Esei lo por a hiba solamente na destruccion eterno. Hudas Iscariote tabata unu cu a hala atras di e forma aki na destruccion, mescos cu otro enemigunan dje berdad cu a traha contra Jehova su spiritu a propósito. (Juan 17:12; 2 Tesalonicensenan 2:3) Personanan asina ta entre “e cobardenan” cu ta sufri destruccion eterno den e lago simbólico di candela. (Revelacion 21:8) No, hamas nos kier ta e clase di hende ei!

6. Ki curso Satanas e Diabel kier pa nos sigui?

⁶ Satanas e Diabel kier pa nos hala atras na destruccion. Como maestro di “obranan mañoso,” e sa cu hopi bes un curso ruinoso asina ta cuminsá na un manera chikitu. (Efesionan 6:11, nota na pia di página) Si persecucion directo no logra su finnan, e ta busca pa caba cu e fe di cristiannan berdadero usando medionan mas sutil. E kier silenciá Testigonan di Jehova celoso i balente. Laga nos mira ki táctica el a usa contra e cristiannan hebreo na ken Pablo a skirbi su carta.

Con A Pone Preshon Riba Cristiannan pa Nan Hala Atras

7. (a) Kico tabata e historia dje congregacion na Jerusalem? (b) Ki circunstancianan spiritual a existí den e caso di algun di Pablo su lectornan?

⁷ E evidencia ta indicá cu Pablo a skirbi su carta n’e hebreonan rond di 61 E.C. E congregacion na Jerusalem tabatin un historia turbulento. Despues dje morto di Jesus, a lanta un ola feros di persecucion cu a obligá hopi cristian den e stad di plama for di otro. Sin embargo, despues a sigui un periodo di pas cu a permití e cantidad di cristiannan multiplicá. (Echonan 8:4; 9:31) Segun cu añanan a pasa, de bes en cuando a presentá otro persecucion i dificultadnan. Ta parce cu pa e tempu cu Pablo a skirbi e carta n’e hebreonan, un bes mas e congregacion tabata disfrutá di un periodo relatívamente pacífico. Tog tabatin preshon. Casi tres década a pasa desde cu Jesus a pronosticá e destruccion di Jerusalem. Probablemente tabatin algun persona cu a haña cu e fin a tarda demasiado i cu kisas lo e no a bini durante nan bida. Otronan, specialmente esnan mas nobo den e fe, ainda no a yega di haña nan bou di prueba severo i tabata sa masha poco dje necesidad di wanta bou di prueba. (Hebreonan 12:4) Sin duda Satanas a busca pa saca probecho for dje circunstancianan ei. Ki “obranan mañoso” el a usa?

8. Cua actitud hopi hudiu tabatin tocante e congregacion cristian recien establecí?

⁸ E comunidad hudiu na Jerusalem i Hudea a mira e congregacion cristian cu a caba di lanta cu menosprecio. Husgando for dje contenido di Pablo su carta, nos ta haña un idea con e lidernan religioso hudiu arogante i nan siguidónan tabata haci bofon dje cristiannan. Kisas nan lo a bisa algu manera: ‘Ta nos tin e gran tempel den Jerusalem cu t’ei pa siglonan caba! Nos tin un sumo sacerdote noble cu ta sirbi ei, huntu cu su subsacerdotenan. Tur dia ta ofrecé sacrificio ei. Nos tin e Ley cu e angelnan a transmití na Moises i a establecé cu señalnan grandi riba ceru Sínai. E secta nobo aki, e cristiannan aki cu a bira apóstata di hudaismo, nan no tin niun dje cosnan aki!’ E mofa ei a surti efecto? Tabata bisto cu e atakenan aki a molestiá algun cristian hebreo. Pablo su carta a bini net na ora pa yuda nan.

Pakico Nunca Nan No Mester Hala Atras na Destruccion

9. (a) Ki tema ta dominá e carta n’e hebreonan? (b) Den ki sentido cristiannan ta sirbi den un mihó tempel cu esun na Jerusalem?

⁹ Laga nos examiná dos motibu cu Pablo a duna su rumannan aya na Hudea pa nunca hala atras na destruccion. E promé, e superioridad dje sistema cristian di adoracion, ta dominá e carta n’e hebreonan. Atrabes di henter su carta, Pablo a desaroyá e tema aki. E tempel den Jerusalem tabata djis un copia di un realidad muchu mas grandi, Jehova su tempel spiritual, un edificio “cu man no a traha.” (Hebreonan 9:11) E cristiannan ei tabatin e privilegio di sirbi den e areglo spiritual ei pa adoracion puru. Nan a sirbi bou di un mihó pacto, e pacto nobo primintí hopi tempu pasá, cu tabatin un Mediador superior cu Moises, Jesucristo.—Jeremías 31:31-34.

10, 11. (a) Pakico e liña di desendencia di Jesus no ta descualifik’é pa sirbi como Sumo Sacerdote den e tempel spiritual? (b) Den ki maneranan Jesus tabata un Sumo Sacerdote superior na esun cu tabata sirbi n’e tempel den Jerusalem?

¹⁰ Tambe e cristiannan ei tabatin un Sumo Sacerdote muchu mas mihó, Jesucristo. No, e no a bini dje famia di Aron. Mas bien, e tabata un Sumo Sacerdote “n’e manera di Melkísedec.” (Salmo 110:4) Melkísedec, di ken no tin registro di antecedencia, tabata tantu rey di Salem di antigwedad como su sumo sacerdote. Asina el a bira un representacion profético di Jesus, kende su sacerdocio a dependé, no di ningun antepasado humano imperfecto, sino di algu muchu mas grandi—Jehova Dios su mes huramentu. Mescos cu Melkísedec, Jesus ta sirbi no solamente como Sumo Sacerdote sino tambe como Rey, unu cu lo no muri nunca.—Hebreonan 7:11-21.

¹¹ Ademas, distinto dje sumo sacerdote n’e tempel na Jerusalem, Jesus no tabatin nodi ofrecé sacrificio aña tras aña. Su sacrificio tabata su mes bida perfecto, cu el a ofrecé una bes pa semper. (Hebreonan 7:27) Tur e sacrificionan ei ofrecé n’e tempel tabata solamente sombra of representacion di loke Jesus a ofrecé. Su sacrificio perfecto a percurá pa tur hende cu ehercé fe, haña berdadero pordon di picá. Conmovedor tambe ta e comentarionan di Pablo mustrando cu e Sumo Sacerdote aki ta e mésun Jesus cu e cristiannan na Jerusalem a conocé. E tabata humilde, amabel, i unu cu por “compadecé cu nos debilidadnan.” (Hebreonan 4:15; 13:8) E cristiannan ungí ei tabatin e prospecto di sirbi como Cristo su subsacerdotenan! Con nan por a ni sikiera pensa di hala atras n’e cosnan “débil i miserabel” di hudaismo corumpí?—Galationan 4:9.

12, 13. (a) Ki segundo motibu Pablo a duna pa no hala atras nunca? (b) Pakico e registro di pasado dje cristiannan hebreo lo a animá nan pa nunca hala atras na destruccion?

¹² Como si fuera esei no tabata basta, Pablo a duna e hebreonan un di dos motibu pa nunca hala atras na destruccion—nan mes registro di awante. El a skirbi: “Sigui corda e dianan cu a pasa den cua, despues cu boso a ser iluminá, boso a wanta un lucha grandi bou di sufrimentu.” Pablo a corda nan cu nan tabata ‘exhibí manera den un teater’ na reproche i tribulacion. Algun di nan a ser encarcelá; otronan a sinti pa esnan cu tabata den prizon i a yuda nan. Sí, nan a mustra un fe i perseverancia ehemplar. (Hebreonan 10:32-34) Pero pakico Pablo a pidi nan pa “sigui corda” experencianan doloroso asina? Esei lo no tabata un desanimacion?

¹³ Al contrario, dor di ‘corda e dianan cu a pasa’ e hebreonan lo a cordá con Jehova a sostené nan bou di prueba. Cu su yudansa, ya nan a resistí hopi dje atakenan di Satanas. Pablo a skirbi: “Dios no ta inhustu p’e lubidá boso trabou i e amor cu boso a mustra pa su nomber.” (Hebreonan 6:10) Sí, Jehova a corda tur nan obranan fiel, wardando nan den su memoria sin límite. Esei ta haci nos cordá Jesus su spiertamentu pa warda tesoro den shelu. Ningun ladron no por horta e tesoronan aki; ni mot ni frus no por caba cu nan. (Mateo 6:19-21) De facto, ta solamente si un cristian hala atras na destruccion e tesoronan aki por ser destruí. Esei lo dispidí cualkier tesoro cu el a warda den shelu. Esta un motibu poderoso Pablo a duna e cristiannan hebreo pa nunca sigui un curso asina! Pakico tira tur nan añanan di sirbishi fiel afó? Lo ta corecto i muchu mas mihó pa sigui wanta.

Pakico Nunca Nos No Mester Hala Atras na Destruccion

14. Ki desafionan nos ta enfrentá cu ta similar na esnan cu e cristiannan di promé siglo a enfrentá?

¹⁴ Awe cristiannan berdadero tin e mésun motibunan poderoso pa no hala atras. Di promé, laga nos corda ki un bendicion nos tin den e forma puru di adoracion cu Jehova a duna nos. Mescos cu e cristiannan di promé siglo, nos ta biba den un tempu cu miembronan dje religionnan mas popular ta ridiculisá nos i ta haci mofa di nos, señalando orguyosamente na nan edificionan religioso impreshonante i na nan tradicionnan antiguo. Ma Jehova ta sigurá nos cu e ta aprobá nos forma di adoracion. De facto, nos ta disfrutá di bendicionnan awe cu e cristiannan di promé siglo no tabatin. Kisas bo ta puntra: ‘Con esei por ta?’ Al fin i al cabo, nan tabata na bida ora e tempel spiritual a cuminsá funcioná. Cristo a bira su Sumo Sacerdote ora el bautisá na 29 E.C. Algun di nan a mira e Yu di Dios haci milager. Asta despues di su morto tabatin mas milager. Pero manera Bijbel a predicí, cu tempu e donnan ei a caba.—1 Corintionan 13:8.

15. Awe cristiannan berdadero ta biba durante e cumplimentu di ki profecia, i kico esei ta nificá pa nos?

¹⁵ Sin embargo, nos ta biba durante un cumplimentu significativo dje profecia di tempel extenso di Ezekiel capítulo 40 pa 48.a Asina, nos a mira e restoracion dje areglo di Dios pa adoracion puru. A haci e tempel spiritual ei limpi di tur forma di contaminacion i idolatria religioso. (Ezekiel 43:9; Malakías 3:1-5) Pensa riba e bentahanan cu e limpiesa aki a duna nos.

16. Cua tendencia desanimante e cristiannan di promé siglo a enfrentá?

¹⁶ Durante e promé siglo, futuro a mustra scur p’e congregacion cristian organisá. Jesus a predicí cu lo ta como si fuera un otro hende a bin sembra mal yerba den un cunucu di trigu nobo plantá, i haci e trigu casi indistinguibel for dje mal yerba. (Mateo 13:24-30) I ta asina a sosodé. Pa fin di promé siglo, tempu cu apostel Juan di edad avansá tabata actuando como e último frena pa corupcion, apostasia tabata florecé caba. (2 Tesalonicensenan 2:6; 1 Juan 2:18) No hopi tempu despues di morto dje apostelnan un clero separá a lanta, cu a oprimí e tou i cu tabata bisti pañanan distintivo. Apostasia a plama manera candela den yerba secu. Ki desanimador pa cristiannan fiel! Nan a mira con un forma corumpí di adoracion a dominá e areglo pa adoracion puru recien establecí. Esaki a desaroyá ménos cu un siglo despues cu Cristo a funda e congregacion.

17. Den ki sentido e congregacion cristian dje tempu actual a dura mas cu esun dje promé siglo?

¹⁷ Awor, wak un contraste aki. Awe, ya caba adoracion puru a dura mas cu e periodo te ora e apostelnan a muri. For di dia e promé edicion dje revista aki a ser publicá aya na 1879, Jehova a bendicioná nos cu un adoracion mas i mas puru. Jehova i Cristo Jesus a drenta e tempel spiritual na 1918 cu e propósito di hacié limpi. (Malakías 3:1-5) Desde 1919, e areglo pa adorá Jehova Dios a bira cada bes mas refiná. Nos comprendimentu di profecia i principio di Bijbel a bira mas cla. (Proverbionan 4:18) Na ken e mérito ta bai? No na simpel hende imperfecto. Ta Jehova so, cu su Yu como Cabes dje congregacion, por a protehá Su pueblo for di corupcion durante e tempu corumpí aki. P’esei, laga nos no keda sin gradicí Jehova nunca cu el a permití nos participá den adoracion puru awe. I laga nos ta firmemente determiná pa nunca hala atras na destruccion!

18. Cua motibunan nos tin pa nunca hala atras na destruccion?

¹⁸ Mescos cu e cristiannan hebreo ei, nos tin un di dos motibu pa rechasá un curso di hala atras den cobardia: nos mes registro di awante. Sea nos a cuminsá sirbi Jehova den añanan recien of ta haciendo esei fielmente pa décadanan caba, nos a traha un registro di obranan cristian. Hopi di nos a sufri persecucion, sea encarcelacion, prohibicion, brutalidad of pérdida di propiedad. Hopi mas a enfrentá oposicion di famia, mofa, bofon i indiferencia. Nos tur a wanta, continuando den nos fiel sirbishi na Jehova apesar dje desafio i pruebanan di bida. Dor di haci esei, nos a traha un registro di perseverancia cu Jehova lo no lubidá, un mangasina di tesoro den shelu. Siguramente anto, esaki no ta tempu pa hala atras n’e sistema bieu corupto cu nos a laga atras! Pakico dispidí tur nos trabou duru? Esaki ta specialmente e caso awe, awor cu ta falta “mashá poco tempu” promé cu e fin yega.—Hebreonan 10:37.

19. Kico nos lo considerá den nos siguiente artículo?

¹⁹ Sí, laga nos keda determiná pa “nos no ta e clase cu ta hala atras te na destruccion”! Mas bien, laga nos ta “e clase cu tin fe.” (Hebreonan 10:39) Con nos por haci sigur cu nos ta cuadra cu e descripcion ei, i con nos por yuda compañeronan cristian haci mescos? Nos siguiente artículo lo considerá e asuntu aki.

[Nota]

Bo Ta Corda?

◻ Kico kier men hala atras te na destruccion?

◻ Ki preshonnan tabata pisa riba e cristiannan hebreo na ken Pablo a skirbi su carta?

◻ Cua motibunan pa no hala atras na destruccion Pablo a duna e hebreonan?

◻ Cua motibunan nos tin pa keda determiná pa nunca hala atras na destruccion?

[Plachinan na página 15]

E echo cu Pedro a cai den miedu no a nificá cu e tabata di “e clase cu ta hala atras te na destruccion”