² Hende ku ta parti di e mundu di Satanas tambe ta karga un ke otro speransa, pero nan ta duda si un dia nan soño lo bira realidat. Por ehèmpel, kisas miónes di hende ku sa kumpra brièchi ta spera di gana premio mayó un dia, pero nan no por ta sigur di esei. En kambio, loke nos ta spera sí ta algu sigur; e ta basá riba fe. Fe ta “e konfiansa firme” den nos speransa kristian. (Heb. 11:1) Pero kisas bo ta puntra bo mes: ‘Kon mi konfiansa por bira mas firme? I ki benefisio mi ta haña ora mi tin un fe fuerte den nos speransa?’

3. Riba kiko fe kristian ta basá?

³ Hende imperfekto no ta nase ku fe ni e no ta algu ku ta bini di su mes. Pa un hende por kultivá fe, e mester laga e spiritu santu di Dios obra den su kurason. (Gal. 5:22) Beibel no ta bisa ku Yehova tin fe òf ku e tin ku kultiv’é, pasobra e ta todopoderoso i e ser mas sabí den universo, i nada no por strob’é di kumpli ku su propósito. Nos Tata selestial ta asina sigur ku su promesanan lo kumpli ku pa é ya nan a kumpli kaba. P’esei el a bisa: “E palabranan akí a bira realidat!” (Lesa Revelashon 21:3-6.) Fe kristian ta basá riba e echo ku Yehova ta “e Dios fiel,” kende semper ta hasi loke e ta primintí.—Deu. 7:9.

SIÑA FOR DI EHÈMPELNAN DI FE DI PASADO

4. Ki speransa sirbidónan di Dios ku a biba promé ku Kristu tabatin?

⁴ E buki di Hebreonan kapítulo 11 ta menshoná 16 hòmber i muhé ku tabatin un fe fuerte. Bou di inspirashon, e eskritor di e buki akí a skirbi ku Dios a duna nan i hopi di su otro sirbidónan “un bon testimonio pa motibu di nan fe.” (Heb. 11:39) Nan tur tabatin “e konfiansa firme” ku e “simia” primintí di Dios lo a bini pa pone fin na e rebelion di Satanas i kumpli ku Yehova su propósito original. (Gén. 3:15) E fiel sirbidónan akí a muri promé ku e “simia” primintí, Hesukristu, a habri kaminda pa hende haña oportunidat di bai shelu. (Gal. 3:16) Pero danki na Yehova su promesanan ku semper ta kumpli, nan lo resusitá pa biba den Paradeis riba tera komo hende perfekto.—Sal. 37:11; Isa. 26:19; Osé. 13:14.

7. Kiko Yehova ta proveé ku ta yuda nos kultivá un fe fuerte, i kiko nos tin ku hasi?

⁷ Yehova a duna nos su Palabra, Beibel, pa yuda nos mantené nos fe fuerte. Pa nos por ta felis i haña éksito, nos mester lesa Beibel riba un base regular; si ta posibel, tur dia. (Sal. 1:1-3; lesa Echonan 17:11.) Meskos ku e sirbidónan di Yehova ku a biba promé ku Kristu, awe nos tambe tin ku sigui meditá riba e promesanan di Dios i kumpli ku su rekisitonan. Ademas, Yehova ta bendishoná nos ku kuminda spiritual na abundansia mediante “e esklabo fiel i prudente.” (Mat. 24:45) Pues, ora nos ta balorá loke Yehova ta siña nos mediante e kuminda spiritual ku e ta proveé, nos lo ta manera su sirbidónan di pasado ku tabatin un fe fuerte, kendenan tabatin un “konfiansa firme” den e speransa di e Reino.