Cristo a Odia Maldad—Abo També?

“Bo a stima husticia, i a odia maldad. P’sei Dios, bo Dios, a ungíbo cu e azeta di hubileo mas cu bo socionan.”—HEBREO 1:9.

1 . Además di stima husticia, kico mas ta un necesidad pa tur berdadero sirbidor di Jehova Dios?

BERDADERO sirbidor di Jehova Dios ta stimé cu tur nan curazón, alma, mente, i forza. (Marco 12:30) Nan kier haci e curazón di Jehova alegrá, manteniendo nan integridad. (Proverbio 27:11) Pa nan haci esei, nan mester stima no solamente husticia sino també nan mester odia maldad. Nan Ehemplar, Jesucristo, siguramente a haci esei. Tabata skirbí tocante dje: “Bo a stima husticia, i a odia maldad.”—Hebreo 1:9.

2. Kico ta ser incluí den maldad?

² Kico ta maldad? Maldad ta picá, manera apóstol Juan a mustra ora el a skirbi: “Tur hende cu ta practica picá també ta practica maldad, i p’sei picá ta maldad.” (1 Juan 3:4) Hende malbado no ta “restringí ni controlá pa ley.” (Webster’s Ninth New Collegiate Dictionary) Maldad ta inclui tur loke ta malu, perverso, inmoral, corrupto, i desonrado. Un bista di mundo ta mústranos cu maldad ta desenfrená awe como nunca na antes. No cabe duda cu nos ta biba den e “tempo crítico” cu apóstol Pablo a profetiza den 2 Timoteo 3:1-5. Den bista di tanto maldad, ta ki excelente cu nos ta ser mandá pa odia tur maldad! Por ehempel, nos ta ser bisá: “Ai boso amante di Jehova, odia loke ta malu.” (Salmo 97:10) Di igual manera, nos ta leza: “Odia loke ta malu, i stima loke ta bon.”—Amós 5:15.

Tres Clase di Odio

3-5. Menciona e tres manera cu e palabra “odia” ta ser usá den e Palabra di Dios.

³ Kico kier men odia? Den e Palabra di Dios, “odia” ta ser usá di tres manera distinto. Tin odio cu malicia ta produci i cu ta purba di perhudica loke e ta atacá. Hende cristian mester evita tal clase di odio. Esei ta e clase di odio cu a impulsa Caín pa mata Abel, su ruman husto. (1 Juan 3:12) Esei també ta e clase di odio cu lider religioso tabatin pa Jesucristo.—Mateo 26:3, 4.

⁴ Además, e palabra “odia” ta ser usá den e Scritura den e sentido di stima menos. Por ehempel, Jesús a bisa: “Si hende ta bini cerca mi i no ta odia su tata i mama i esposa i yiunan i ruman homber i muher, sí, i asta su mes alma, nan no por bira mi disípel.” (Lucas 14:26) Claramente, Jesús kier men simplemente stima eseinan menos cu nos ta stimé. Jacob ‘a odia Lea,’ pero realmente, el a stimé menos cu el a stima Raquel.—Génesis 29:30, 31.

⁵ Anto tin e nificacion dje palabra “odia” den locual nos ta specialmente interesá aki. E tin e idea di tene tanto sintimento intenso di repugnancia of aborrecimento fuerte pa un persona of algo cu nos ta evita di tene nada cu ber cu tal persona of cos. Den Salmo 139 esei ta ser mencioná como “odio completo.” David a bisa ei: “Mi no ta odia esnan cu ta odiábo intensamente, O Jehova, i mi no ta sinti repugnancia pa esnan cu ta rebela contra bo? Mi ta ódianan cu un odio completo. Nan a bira pa mi berdadero enemigo.”—Salmo 139:21, 22.

Pakico Nos Mester Odia Maldad

6, 7. (a) Pakico nos mester odia maldad principalmente? (b) Menciona un segundo motibo fuerte pa nos odia maldad.

⁶ Pakico nos mester odia maldad? Un motibo ta pa nos tene respet propio i un bon concenshi. Dje manera ei so nos por tene un bon relacion cu nos husto i amoroso Tata celestial, Jehova Dios. David a pone un ehempel excelente en cuanto esei, manera nos por mira den un lezamento di Salmo 26. Por ehempel, el a bisa: “Mi a odia e congregacion di malechor, i mi no ta sinta hunto cu hende malbado.” (Salmo 26:5) Nos amor pa Dios i husticia mester motivános pa tene indignacion husto—sí, odio—pa tur loke ta maldad desde su punto di bista, incluyendo echo di maldad di hende cu ta desobedece i ta odia Jehova. Además, nos mester odia maldad pa motibo dje reproche cu e ta trece riba e nomber di Dios.

⁷ Un otro motibo pakico e pueblo di Jehova Dios mester odia maldad ta cu e ta mashá peligroso i perhudicial. Sembramento pa carni, locual kier men sembramento di maldad, lo tene cua resultado? Pablo a adverti: “No sea gañá: hende no por tene mofa di Dios. Pasobra kico cu hende sembra, lo e cosechá esei també; pasobra ken cu sembra cu nan carni na bista lo cosechá corrupcion di nan carni, pero ken cu ta sembra cu e spiritu na bista lo cosechá bida eterna dje spiritu.” (Galatio 6:7, 8) Pues, nos mester deseá di no tene absolutamente nada cu ber cu maldad. Berdaderamente, nos tin cu odia tur maldad pa nos mes bienestar i trankilidad mental.

Hende cu ta Odia Maldad

8. Ken a pone e mihor ehempel den odiamento di maldad, segun cu cua texto ta mustra?

⁸ Den su odio di maldad, Dios ta pone e mihor ehempel pa tur su creacion inteligente. E ta keda hustamente indigná cu maldad, i su Palabra ta bisa: “Tin seis cos cu Jehova en berdad ta odia; sí, siete ta cosnan detestable pa su alma: wowo halzá, lenga falso, i man cu ta drama sanger inocente, un curazón cu ta fabricá proyecto perhudicial, pia cu tin purá pa corre cerca maldad, testigo falso cu ta lanza mentira, i ken cu ta manda contencion entre rumanan.” Nos ta leza també: “E temor di Jehova kier men odia maldad. Halzamento propio i orguyo i e mal camina i boca perverso mi a odia.” (Proverbio 6:16-19; 8:13) Además, nos ta ser bisá: “Ami, Jehova, ta stima husticia, ta odia ladronicia hunto cu inhusticia.”—Isaías 61:8.

9, 10. Con Jesús a mustra cu el a odia maldad?

⁹ Jesucristo a imita su Tata den su odio di maldad. P’sei nos ta leza: “Bo a stima husticia, i a odia maldad. P’sei Dios, bo Dios, a ungíbo cu e azeta di hubileo mas cu bo socionan.” (Hebreo 1:9) Jesús a pone ehempel pa nos den tal clase di odio. El a demonstra su odio pa maldad denunciando hende cu a practiqué boluntariamente—lider religioso falso. Bez tras bez, el a denunciánan como hipócrita. (Mateo, capítulo 23) Na un otro ocasion Jesús a bísanan: “Boso ta di boso tata e Diabel, i kier cumpli cu deseo di boso tata.” (Juan 8:44) Jesús a demonstra su odio pa maldad asta te ne grado cu el a usa forza fisical, na dos ocasion el a haci e tempel limpi di hipócrita religioso golós.—Mateo 21:12, 13; Juan 2:13-17.

¹⁰ Jesús també a demonstra su odio di maldad i picá kedando absolutamente liber di nan. P’sei, e por a wel puntra opositor di dje: “Cua di boso por probámi culpable di picá?” (Juan 8:46) Jesús tabata “leal, sin engaño, incontaminá, separá for di pecador.” (Hebreo 7:26) Confirmando esei, Pedro a skirbi cu Jesús no a “comete ningun picá, ni engaño no a wordu hayá den su boca.”—1 Pedro 2:22.

11. Menciona ehempel bíblico cu nos tin di hende imperfecto cu a odia maldad.

¹¹ Sin embargo, Jesús tabata un homber perfecto. Nos tin ehempel bíblico di hende imperfecto cu berdaderamente a odia maldad? Sigur cu sí! Por ehempel, Moisés i otro levita a demonstra mashá odio pa idolatría, dunando e castigo di morto na rond di 3.000 idólatra den obedencia ne mandamento di Jehova. (Éxodo 32:27, 28) Finehás a demonstra mashá odio pa maldad ora el a mata dos fornicador cu lanza.—Número 25:7, 8.

Expresando Odio pa Maldad

12. (a) Con nos por demonstra nos odio di maldad? (b) Menciona algun manera práctico di evita pensamento malu.

¹² Pasando na nos tempo, con nos por demonstra nos odio pa maldad? Door di controla nos pensamento, palabra, i accion. Nos tin cu cultiva e costumber di pensa riba cosnan edificante ora nos mente no ta ocupá cu trabao riba man. Si ta sosode cu nos no por drumi anochi, nos por tin un inclinacion di haci pensamento negativo, tal como pensa riba keho of entrega na fantasía sexual. Nunca permiti lugar pa tal cosnan, sino establece e costumber di practica pensamento beneficioso. Por ehempel, purba di memorizá texto bíblico, e nuebe felicidad, i e nuebe fruta di spiritu. (Mateo 5:3-12; Galatio 5:22, 23) Bo por menciona e nomber dje diesdos apóstol? Bo conoce e Diez Mandamento? Cua ta e siete congregacion cu a recibi mensahe den Revelacion? Memorizando cantica di alabanza també ta yúdanos tene nos mente fihá riba loke ta berdadero, di interés serio, husto, decente, amable, di bon fama, virtuoso, i digno di alabanza.—Filipense 4:8.

13. E odio di maldad por hácinos odia cua clase di papiamento?

¹³ Además, nos ta mustra cu nos ta odia maldad ora nos ta evita tur papiamento sushi. Hopi hende di mundo ta gusta conta i scucha chasco sushi, pero hende cristian no mester keda incliná di sikiera scúchanan. Mas bien, nos mester aparta i evita di participa den cualkier conbersacion cu ta rebaha te na nivel baho asina. Si nos no por aparta, nos por lo menos por mustra cu nos expresion di cara cu nos ta odia tal papiamento. Nos tin cu obedece e sigiente conseho excelente: “No laga ningun palabra putrí sali foi boso boca, sino tur palabra cu ta bon pa edificacion conforme cu e necesidad, pa duna loke ta favorable na oyentes.” (Efesio 4:29) Nos no mag contaminános papiando loke ta impuro ni scuchando na dje.

14. Cua proteccion odio di maldad por dúnanos en cuanto costumber di negoshi i empleo?

¹⁴ Nos odio di maldad també mester ta dirigí contra tur costumber pecaminoso. Odio di maldad por yúdanos evita e trampa di haci compromiso cuné. Hende berdaderamente cristian no ta practica picá. (Compara cu 1 Juan 5:18.) Por ehempel, nos mester odia tur costumber desonrado di negoshi. Awe, hopi Testigo di Jehova ta poní bao di presion pa haci cosnan desonrado pa nan empleador pero nan ta nenga di hacié. Hende cristian asta ta keda dispuesto pa perde nan trabao en bez di haci algo cu ta viola nan concenshi entrená bíblicamente. Además, nos també kier demonstra nos odio di maldad door di no viola ley di tráfico i no defraudá ora nos mester paga belasting of derecho di duana.—Echo 23:1; Hebreo 13:18.

Odia Impureza Sexual

15. E creacion di hende cu instinto fuerte di casa ta cumpli cu cua propósito excelente?

¹⁵ Como hende cristian, nos mester odia specialmente tur impureza cu ta toca asunto sexual. Den su creacion di humanidad, dunando nan instinto fuerte di casa, Dios a cumpli cu dos propósito excelente. El a haci percuracion sigur cu e raza humano lo no perece, i també a haci percuracion sumamente amoroso pa felicidad. Asta hende cu ta pober, sin educacion, of sin bentaha di otro manera por haya mashá felicidad den relacion matrimonial. Sin embargo, Jehova Dios a pone límite den locual hende por disfruta di tal relacion. Hende mester respeta tal límite cu Dios a declara.—Génesis 2:24; Hebreo 13:4.

16. Nos mester tene cua actitud tocante diverticion i costumber sexualmente impuro?

¹⁶ Si nos ta odia maldad, nos lo evita expresamente tur costumber sexual impuro i diverticion inmoral. P’sei nos lo evita tur buki, revista, i curant moralmente cuestionable. Di igual manera, si nos ta odia maldad, nos lo no wak ningun presentacion impuro pa bista, sea na television, den cine, of den teater. Si nos ta haya cu un programa ta inmoral, nos mester ta conmoví pa paga e television un bez of tene e curashi di sali for dje teater. Di igual manera, odio di maldad ta hácinos vigila contra tur música cu tin palabra of ritmo cu ta instiga pasion. Nos lo no busca conocimento di asunto inmoral sino keda ‘mucha chikito en cuanto maldad, pero hende hecho den nos facultad di comprendimento.’—1 Corintio 14:20.

17. Cua conseho Colosense 3:5 ta duna cu por yúdanos keda limpi moralmente?

¹⁷ Nos ta ser consehá mashá apropiadamente: “P’sei, mata miembro di boso curpa cu ta riba tera en cuanto fornicacion, impureza, apetit sexual.” (Colosense 3:5) No cabe duda cu medida fuerte di nos parti ta necesario pa nos keda determiná di permanece moralmente limpi. En cuanto e verbo griego traducí “mata” den Colosense 3:5, The Expositor’s Bible Commentary ta bisa: “E ta ­sugeri pa nos no simplemente dominá of controlá malecho i actitud. Nos tin cu eliminánan, completamente exterminá e moda bieu di biba. ‘Mata totalmente’ por expresa su forza. . . . Tanto e nificacion dje verbo como e forza dje tempo di dje ta sugeri un accion vigoroso i doloroso di determinacion personal.” P’sei, nos mester evita pornografía como si fuera un maleza peligroso, contagioso, i fatal, pasobra esei ta loke e tá moral i spiritualmente. Cristo a expresa un idea similar ora el a bisa kita man, pia, of asta wowo si e ta hácinos trompicá.—Marco 9:43-48.

Odia Religion Falso i Apostasía

18. Con nos por expresa nos odio pa maldad religioso?

¹⁸ Anto, també, mescos cu Jesús a demonstra su odio pa maldad denunciando hende religioso hipócrita, asina Testigo di Jehova djawe ta demonstra nan odio pa tur maldad religioso hipócrita. Di ki manera? Door di plama literatura bíblica cu ta desenmascará Babilonia e Grandi mustrando loke e realmente tá, un prostituta religioso. Si nos berdaderamente ta odia maldad religioso hipócrita, nos lo keda francu denunciando Babilonia e Grandi, e imperio mundial di religion falso. Nos ta haci esei pe beneficio di hende di curazón onrado cu el a ciega i a tene den esclabitud spiritual. Te na grado cu nos ta berdaderamente odia e maldad di Babilonia e Grandi, te ne mesun grado nos lo ser celoso participando den tur rasgo dje sirbishi di Reino.—Mateo 15:1-3, 7-9; Tito 2:13, 14; Revelacion 18:1-5.

19. Con nos mester considera hende apóstata, i pakico?

¹⁹ E obligacion di odia maldad ta aplicá també na tur actividad di hende apóstata. Nos actitud tocante hende apóstata mester ta mescos cu e actitud di David, cu a declara: “Mi no ta odia esnan cu ta odiábo intensamente, O Jehova, i mi no ta sinti repugnancia pa esnan cu ta rebela contra bo? Mi ta ódianan cu un odio completo. Nan a bira pa mi berdadero enemigo.” (Salmo 139:21, 22) Hende apóstata djawe a adopta e mesun doel cu e “homber malbado,” e clero di cristiandad. (2 Tesalonicense 2:3) P’sei, como testigo leal di Jehova, nos absolutamente no tin nada en común cu nan. Siendo imperfecto, nos curazón por fácilmente tene tendencia di ser crítico di nos rumanan. Como hende individual, esnan dje “esclabo fiel i prudente” ta hende imperfecto. (Mateo 24:45-47) Pero, e grupo ta fiel i prudente. Hende apóstata ta probecha di error of loke ta parce error cu e rumanan cu ta hiba e delantera ta haci. Nos siguridad ta di evita propaganda apóstata como si fuera veneno, locual e berdaderamente tá.—Romano 16:17, 18.

20, 21. Con nos por duna un resumen dje motibo pa odia maldad?

²⁰ Nos a yega di mira cu e mundo ta yen di maldad, locual ta sinónimo cu picá. No ta suficiente pa nos stima husticia; nos també tin cu odia maldad. Algun hende cu a ser expulsá for dje congregacion cristian por a kere cu nan a stima husticia, pero nan no a odia maldad suficientemente. Nos a yega di mira també pakico nos mester odia maldad. Nos no por tene un bon concenshi i respet propio amenos cu nos ta hacié. Además, maldad kier men siendo desleal na Jehova Dios. I maldad ta hácinos cosechá fruta mashá amarga—miseria, corrupcion, i morto.

²¹ Nos a yega di tuma na cuenta també con nos ta demonstra cu nos ta odia maldad. Nos ta haci esei door di no tene absolutamente nada cu ber cu ningun sorto di desonradez, inmoralidad sexual, of apostasía. Siendo cu nos kier participa den e vindicacion di Jehova Dios i nos kier haci su curazón alegrá, nos no solamente tin cu stima husticia i keda ocupá den su sirbishi, sino també odia maldad, mescos cu nos Lider i Comandante, Jesucristo.

Con Bo ta Contestá?

◻ Con e Scritura ta usa e palabra “odia”?

◻ Menciona algun bon motibo pa nos odia maldad.

◻ Cua ehempel excelente nos tin di hende cu a odia maldad?

◻ Con nos por demonstra nos odio pa maldad?

[Plachi na página 8]

Jesús a haci e tempel limpi pasobra el a odia maldad

[Plachi na página 10]

Si nos ta odia maldad, nos lo evita diverticion sexualmente inmoral