-
Kiko Beibel Ta Bisa Tokante Sèks?Bo Por Disfrutá di Bida pa Semper!—Kurso di Beibel Interaktivo
-
-
LÈS 41
Kiko Beibel Ta Bisa Tokante Sèks?
Hopi hende ta sinti nan mes inkómodo pa papia tokante sèks. Pero ora Beibel ta papia tokante sèks, e ta papia di dje na un manera habrí i respetuoso. Loke Beibel ta bisa tokante sèks ta benefisiá nos. Esei no ta nada straño pasobra Beibel ta bini di Yehova, nos Kreador. Anto Yehova sa kiko ta mihó pa nos. Yehova ta bisa nos kiko nos tin ku hasi pa agrad’é i kiko lo yuda nos disfrutá di bida pa semper.
1. Kiko ta Yehova su punto di bista tokante sèks?
Sèks ta un bunita regalo di Yehova. Yehova ke pa un hòmber i un muhé ku ta kasá ku otro disfrutá di e regalo ei. Sèks no solamente ta permití un pareha haña yu, sino tambe e ta permití nan demostrá nan amor i kariño na otro i ta laga nan sinti e plaser ku esei ta trese kuné. P’esei, Beibel ta bisa: “Alegrá huntu ku bo esposa ku ta ku bo for di bo hubentut.” (Proverbionan 5:18, 19) Yehova ta ferwagt pa ora un pareha kristian kasa, nan keda fiel na otro. P’esei, nunka nan lo pensa pa kometé adulterio.—Lesa Hebreonan 13:4.
2. Kiko ta inmoralidat seksual?
Beibel ta bisa ku hende ku ta kometé fornikashon, òf inmoralidat seksual, “lo no risibí e Reino di Dios.” (1 Korintionan 6:9, 10) E eskritornan ku a skirbi buki di Beibel na griego a usa e palabra pornéia pa referí na inmoralidat seksual. E palabra pornéia ta inkluí (1) relashon seksual entre dos hende ku no ta kasá ku otro,a (2) homoseksualidat i (3) relashon seksual ku bestia. Ora nos ta “apstené di fornikashon,” nos ta hasi Yehova Dios kontentu i ta benefisiá nos mes.—1 Tesalonisensenan 4:3.
KIKO MAS NOS POR SIÑA?
Haña sa kon bo por evitá inmoralidat seksual i kon lo bo benefisiá ora bo keda moralmente limpi.
3. Hui di inmoralidat seksual
Yósef, un sirbidó fiel di Dios di pasado, a nenga di tene relashon seksual ku un muhé ku a pidié pa drumi kuné. Lesa Génesis 39:1-12. Despues, analisá e siguiente preguntanan:
Kiko a motivá Yósef pa hui bai for di e muhé?—Wak versíkulo 9.
Bo ta kere ku Yósef a hasi loke ta korekto? Dikon bo ta pensa esei?
Kon un hóben awe por imitá Yósef i hui di inmoralidat seksual? Pasa e VIDIO.
Yehova ke pa nos rechasá tur práktika inmoral. Lesa 1 Korintionan 6:18. Despues, analisá e siguiente preguntanan:
Ki situashon por hiba un hende na kometé inmoralidat seksual?
Kon bo por hui di inmoralidat seksual?
4. Bo por resistí e tentashon pa kometé inmoralidat seksual
Ki ora por bira difísil pa resistí e tentashon pa kometé inmoralidat seksual? Pasa e VIDIO. Despues, analisá e siguiente pregunta:
Kiko e ruman hòmber den e vidio a hasi ora el a realisá ku algun kos ku e tabata pensa i hasi por a strob’é di keda fiel na su kasá?
Tin biaha, asta kristian fiel ta lucha kontra pensamentu robes. Kiko bo por hasi pa evitá ku bo ta keda pensa riba kos inmoral? Lesa Filipensenan 4:8. Despues, analisá e siguiente preguntanan:
Ki tipo di kos nos mester pensa riba dje?
Ora nos ta lesa Beibel i ta keda okupá den sirbishi di Yehova, kon esei por yuda nos resistí tentashon pa kometé piká?
5. E normanan di Yehova ta benefisiá nos
Yehova sa kiko ta mihó pa nos. Yehova ta bisa nos kon pa keda moralmente limpi i kiko ta e benefisionan ora nos hasi esei. Lesa Proverbionan 7:7-27 òf pasa e VIDIO. Despues, analisá e siguiente preguntanan:
Kon bini e hóben a hañ’é den un situashon peligroso?—Wak Proverbionan 7:7-9.
Segun Proverbionan 7:23 i 26, inmoralidat seksual por tin konsekuensia serio. Ki problema nos por evitá ora nos keda moralmente limpi?
Si nos keda moralmente limpi, kon esei lo yuda nos disfrutá di bida pa semper?
Tin hende ta pensa ku loke Beibel ta bisa tokante homoseksualidat no ta amoroso. Pero, Yehova ta un Dios di amor i e ke pa tur hende disfrutá di bida pa semper. Anto pa nos por biba pa semper, nos tin ku biba segun su normanan. Lesa 1 Korintionan 6:9-11. Despues, analisá e siguiente pregunta:
Segun e teksto akí, ta deseo homoseksual so Dios ta haña malu?
Pa agradá Dios, nos tur mester hasi kambio. E esfuerso ei ta bale la pena? Lesa Salmo 19:8, 11. Despues, analisá e siguiente preguntanan:
Bo ta kere ku e normanan moral di Yehova ta difísil pa kumpli kuné? Dikon sí, òf dikon nò?
Yehova a yuda hopi hende pa obedesé su leinan moral i e por yuda abo tambe
LOKE HENDE SA BISA: “Dos hende por hasi sèks basta nan ta stima otro.”
Kiko lo bo por bisa un hende ku bisa esei?
RESÚMEN
Sèks ta un regalo di Yehova. Yehova ke pa un hòmber i un muhé ku ta kasá ku otro disfrutá di relashon seksual.
Repaso
Ki práktika ta kai bou di inmoralidat seksual?
Kiko lo yuda nos evitá inmoralidat seksual?
Ora nos ta biba segun Yehova su normanan moral, kon esei ta benefisiá nos?
MAS INFORMASHON INTERESANTE
Wak dikon Dios ke pa un hòmber i un muhé kasa promé ku nan biba huntu.
“Kiko Beibel Ta Bisa Tokante Bibamentu Huntu Sin Kasa?” (artíkulo riba jw.org)
Haña sa dikon e echo ku Beibel ta bisa ku homoseksualidat ta malu no ta nifiká ku nos mester odia hende homoseksual.
Wak kon e leinan di Dios ku tin di haber ku sèks ta protehá nos.
Lesa e artíkulo “Nan A Trata Mi ku Dignidat” pa wak kiko a motivá un hòmber ku tabata homoseksual pa hasi kambio den su bida pa agradá Dios.
“Beibel Ta Kambia Bida di Hende” (E Toren di Vigilansia di 1 di aprel 2011, na spañó)
a Esaki ta inkluí un variedat di práktika i no ta referí na relashon seksual so, sino tambe na, por ehèmpel, sèks oral i anal i karisiamentu di un persona su órganonan seksual.
-
-
Kiko Beibel Ta Bisa Tokante Bida Soltero i Bida Kasá?Bo Por Disfrutá di Bida pa Semper!—Kurso di Beibel Interaktivo
-
-
LÈS 42
Kiko Beibel Ta Bisa Tokante Bida Soltero i Bida Kasá?
Den algun kultura, hende ta pensa ku si bo no kasa, bo no por ta felis. Pero, no ta tur hende kasá ta felis i no ta tur hende soltero ta infelis. Beibel ta bisa ku tantu bida soltero komo bida kasá ta un regalo di Yehova.
1. Kiko ta algun benefisio di ta soltero?
Beibel ta bisa: “Esun ku kasa ta hasi bon, pero esun ku keda sin kasa lo hasi mihó.” (Lesa 1 Korintionan 7:32, 33, 38.) Den ki sentido un persona soltero “lo hasi mihó” si e no kasa? Kristian soltero no tin e responsabilidat di pèrkurá pa un kasá. Pues, generalmente, nan tin mas libertat. Algun kristian por hasi mas den sirbishi pa Yehova. Por ehèmpel, nan por biaha pa un otro pais pa prediká e bon notisia. Mas importante ainda, nan tin mas tempu pa fortalesé nan amistat ku Yehova.
2. Kiko ta algun benefisio ora ku un hòmber i un muhé ta kasá legalmente?
Bida kasá, meskos ku bida soltero, tin vários benefisio. Beibel ta bisa ku “dos ta mihó ku un.” (Eklesiástes 4:9) Esaki spesialmente ta e kaso ora ku un pareha kristian ta apliká prinsipio di Beibel den nan matrimonio. Ora un pareha kasa legalmente, nan ta primintí ku semper nan lo stima, respetá i balorá otro. P’esei, hopi biaha, pareha kasá ta sinti nan mes mas sigur den nan matrimonio ku pareha ku ta djis biba huntu. Ademas, matrimonio por laga e yunan lanta den un ambiente mas sigur.
3. Kiko ta Yehova su punto di bista tokante matrimonio?
Ora Yehova a kasa e promé pareha, el a bisa: “Un hòmber lo laga su tata i su mama, i lo e uni ku su esposa.” (Génesis 2:24) Yehova ke pa un esposo i un esposa keda huntu i stima otro pa restu di nan bida. Yehova ta permití divorsio solamente ora un persona den e matrimonio kometé adulterio. Den un kaso asina, Yehova ta duna e kasá inosente e derecho di skohe si e ke divorsiá di su kasá òf nò.a (Mateo 19:9) Yehova no ta permití poligamia, esta, pa un kristian ta kasá ku mas ku un persona.—1 Timoteo 3:2.
KIKO MAS NOS POR SIÑA?
Wak kon bo por ta felis i kon bo por hasi Yehova felis, sea ku bo ta soltero òf kasá.
4. Hasi bon uso di e tempu ku bo ta soltero
Hesus a konsiderá ser soltero komo un don, òf regalo. (Mateo 19:11, 12) Lesa Mateo 4:23. Despues, analisá e siguiente pregunta:
Kon Hesus a usa su bida komo soltero pa sirbi su Tata i pa yuda otro hende?
Un kristian ku no ta kasá por ta felis ora e usa su bida komo soltero meskos ku Hesus. Pasa e VIDIO. Despues, analisá e siguiente pregunta:
Kon un kristian soltero por hasi bon uso di e tempu ku e ta soltero?
Bo tabata sa?
Beibel no ta duna un edat mínimo pa un hende por kasa. Sinembargo, Beibel ta animá un persona pa e warda pa kasa te ora ku e “pasa e flor di hubentut.” Durante e tempu ei, deseo seksual ta fuerte i esei por stroba un hóben di tuma bon desishon.—1 Korintionan 7:36.
5. Skohe bon ora di skohe un kasá
Un di e desishonnan di mas importante ku lo bo tuma den bida ta di skohe un persona pa kasa kuné. Lesa Mateo 19:4-6, 9. Despues, analisá e siguiente pregunta:
Dikon un kristian no mester kore kasa?
Beibel por yuda bo haña sa ki ta algun kualidat ku un hende mester tin pa e ta un bon kasá. E kos di mas importante ta pa bo buska un kasá ku ta stima Yehova.b Lesa 1 Korintionan 7:39 i 2 Korintionan 6:14. Despues, analisá e siguiente preguntanan:
Komo kristian, dikon nos mester kasa solamente ku un hende ku tin e mesun kreensianan ku nos?
Kon bo ta kere Yehova lo sintié si nos skohe pa kasa ku un hende ku no ta stim’é?
Si pone dos bestia ku ta hopi diferente for di otro bou di e mesun yugo, tur dos lo sufri. Di mes manera, un kristian ku kasa ku un hende ku no ta sirbi Yehova lo hañ’é ku hopi problema
6. Mira matrimonio manera Yehova ta mir’é
Den Israel di antigwedat, algun hòmber tabata divorsiá di nan kasá pa motibu egoista. Lesa Malakías 2:13, 14, 16. Despues, analisá e siguiente pregunta:
Dikon Yehova ta odia divorsio ku no tin base bíbliko?
Adulterio i divorsio ta kousa hopi sufrimentu pa e kasá inosente i pa e yunan
Pasa e VIDIO. Despues, analisá e siguiente pregunta:
Si bo ta kasá ku un hende ku no ta sirbi Yehova, kiko bo por hasi pa boso matrimonio ta felis?
7. Kumpli ku Yehova su leinan tokante matrimonio
Kisas un persona mester hasi hopi esfuerso pa kumpli ku e leinan di Yehova tokante matrimonio.c Pero, Yehova ta bendishoná hende ku ta hasi e esfuerso ei. Pasa e VIDIO.
Lesa Hebreonan 13:4. Despues, analisá e siguiente preguntanan:
Bo ta kere ku e leinan di Yehova tokante matrimonio ta rasonabel? Dikon sí, òf dikon nò?
Yehova ta ferwagt pa hende ku ta sirbié registrá nan matrimonio i divorsio, komo ku esei ta algu ku gobièrnu den mayoria di pais ta eksigí. Lesa Tito 3:1. Despues, analisá e siguiente pregunta:
Si bo ta kasá, bo ta sigur ku bo matrimonio ta legal i ta ser rekonosé pa gobièrnu?
SI UN HENDE PUNTRA: “Dikon un pareha mester kasa? Nan no por djis biba huntu?”
Kiko lo bo kontestá?
RESÚMEN
Bida kasá i bida soltero ta regalo di Yehova. Tantu hende kasá komo hende soltero por tin un bida felis i satisfecho ora nan ta biba di akuerdo ku Yehova su boluntat.
Repaso
Kon un persona por hasi bon uso di e tempu ku e ta soltero?
Dikon Beibel ta bisa ku un kristian mester kasa solamente ku un hende ku tin e mesun kreensianan kuné?
Segun Beibel, kiko ta e úniko base pa divorsio?
MAS INFORMASHON INTERESANTE
Kiko ta nifiká kasa solamente “den Señor”?
“Pregunta di Lektor” (E Toren di Vigilansia di 1 di yüli 2004)
Wak dos vidio kòrtiku ku por yuda bo tuma bon desishon ora ta trata di namoramentu i matrimonio.
Wak dikon un ruman hòmber ta pensa ku loke Yehova a dun’é ta muchu mas balioso ku kualke kos ku e mester a sakrifiká.
Kiko ta algun kos ku un hende mester tene kuenta kuné promé ku e pensa pa divorsiá òf separá?
“Onra Dios Su Areglo di Matrimonio” (E Toren di Vigilansia di desèmber 2018)
b Den algun kultura, ta e mayornan ta skohe un kasá pa nan yu. Ora esei ta e kaso, un mayor amoroso ta buska un persona ku ta stima Yehova i no djis un persona ku tin sèn òf posishon importante den komunidat.
c Si bo ta bibando ku un persona ku bo no ta kasá kuné, ta keda na abo si bo ta kibra bo relashon ku e persona ei òf si bo ta kasa kuné.
-