Sea Vigilante i Sea Diligente!

“P’esei sigui vigilá, pasobra boso no sa ni e dia ni e ora.”—MATEO 25:13.

1. Kico apostel Juan tabata spera cu anhelo?

DEN e último diálogo den Bijbel, Jesus a primintí: “Mi ta bini lihé.” Su apostel Juan a contestá: “Amen! Bini, Señor Jesus.” E apostel no tabatin duda cu Jesus lo a bini. Juan tabata entre e apostelnan cu a puntra Jesus: “Na ki tempu e cosnan aki lo ta, i kico lo ta e señal di bo presencia [na griego, pa·rou·sí·a] i dje conclusion dje sistema di cosnan?” Sí, Juan a anhelá cu confiansa p’e futuro presencia di Jesus.—Revelacion 22:20; Mateo 24:3.

2. Pa loke ta e presencia di Jesus, kico ta e situacion den e iglesianan?

² Un confiansa asina ta algu raro awendia. Hopi iglesia tin un doctrina oficial tocante ‘binida’ di Jesus, pero poco di nan miembronan ta ègt sper’é. Nan ta biba como si fuera Jesus no ta cerca di bini. E buki The Parousia in the New Testament (E Parousia den e Testament Nobo) ta bisa: “E speransa di Parousia tin masha poco nificacion den e bida, pensamentu i trabou di iglesia. . . . E urgencia intenso cu cua iglesia mester cumpli cu su tareanan di repentimentu i di proclamacion dje evangelio como misionero, a bira débil, si e no ta completamente perdí.” Pero no pa tur hende!

3. (a) Kico cristiannan berdadero ta pensa tocante e pa·rou·sí·a? (b) Kico specífico nos lo considerá awor?

³ Jesus su berdadero disipelnan ta spera ansiosamente e fin dje mal sistema di cosnan actual. Miéntras cu nos ta haci esei lealmente, nos tin cu mantené e actitud corecto pa cu tur loke ta enbolbí den Jesus su presencia i actua di acuerdo cu esei. Esaki lo permití nos ‘wanta te na fin i ser salbá.’ (Mateo 24:13) Segun cu Jesus tabata duna e profecia cu nos ta haña den Mateo capítulo 24 i 25, el a duna conseho sabí cu nos por aplicá pa nos beneficio eterno. Capítulo 25 ta contené comparacionnan cu probablemente bo conocé, incluso esun tocante dies bírgen (e bírgennan sabí i esnan bobo) i e comparacion dje talentonan. (Mateo 25:1-30) Con nos por saca beneficio for dje ilustracionnan ei?

Sea Vigilante, Manera e Cincu Bírgennan!

4. Kico ta e esencia dje comparacion dje bírgennan?

⁴ Kisas lo bo kier lesa atrobe e comparacion dje bírgennan na Mateo 25:1-13. E marco di circunstancia ta un casamentu hudiu masha bunita, caminda e bruidegom ta bai cas dje bruid su tata pa compañá e bruid bini su cas (of cas di su tata). Un procesion asina lo por incluí músico i cantante, i su ora di yega lo no ta conocí precis. Den e comparacion, dies bírgen a warda te anochi lat riba yegada dje bruidegom. Cincu di nan a cometé e bobedad di no trece suficiente zeta di lampi i pues nan tabatin cu bai i cumpra mas. E otro cincunan a haci co’i sabí i a trece extra zeta den botter di manera cu nan por a bolbe yena nan lampi si tabata necesario durante e wardamentu. E cincunan aki so tabata presente i cla ora e bruidegom a yega. P’esei, a permití nan so drenta e fiesta. Ora e cincu bírgennan bobo a regresá, tabata muchu lat pa nan drenta.

5. Ki textonan ta tira lus riba e nificacion figurativo dje comparacion dje bírgennan?

⁵ Por saca afó cu hopi aspecto dje comparacion aki ta simbólico. Por ehempel, e Scritura ta papia di Jesus como un bruidegom. (Juan 3:28-30) Jesus a compará su mes cu yu di un rey pa ken nan a prepará un fiesta di matrimonio. (Mateo 22:1-14) I Bijbel ta compará Cristo cu un esposo. (Efesionan 5:23) Ta interesante pa nota cu aunke Bijbel ta describí cristiannan ungí otro caminda como e “bruid” di Cristo, e comparacion no ta papia di un bruid. (Juan 3:29; Revelacion 19:7; 21:2, 9) Pero sí e ta papia di dies bírgen, i otro caminda e ungínan ta ser compará cu un bírgen primintí den matrimonio na Cristo.—2 Corintionan 11:2.a

6. Ki exhortacion Jesus a duna ora el a concluí e comparacion dje bírgennan?

⁶ Banda dje detayenan ei i cualkier aplicacion profético, tin naturalmente principionan excelente cu nos por siña for dje comparacion aki. Por ehempel, ripará cu Jesus a termin’é cu e palabranan: “P’esei sigui vigilá, pasobra boso no sa ni e dia ni e ora.” Pues e comparacion ta transmití e necesidad pa cada un di nos vigilá, pa ta alerto p’e binidero fin dje sistema malbado aki. E fin aki ta bini sin duda, maske nos no por señalá un fecha. En coneccion cu esaki, tuma nota dje actitud cu e dos gruponan di bírgen a manifestá.

7. Den ki sentido cincu dje bírgennan den e comparacion a resultá di ta bobo?

⁷ Jesus a bisa: “Cincu di nan tabata bobo.” Esei tabata pasobra nan no a kere cu e bruidegom tabata biniendo? Nan tabata otro caminda buscando placer? Of nan a ser engañá? Nada di esei. Jesus a bisa cu e cincunan aki “a sali pa contra cu e bruidegom.” Nan tabata sa cu e tabata biniendo, i nan kier a tuma parti, asta participá, den e “fiesta di casamentu.” Pero, nan tabata suficiente prepará? Nan a warda basta ratu riba dje, te “meianochi,” pero nan no tabata prepará pa su yegada ki ora cu esei lo tabata—sea mas promé of mas despues di loke nan a spera inicialmente.

8. Con cincu dje bírgennan den e comparacion a resultá di ta discreto?

⁸ E otro cincunan—esnan cu Jesus a yama discreto—tambe a bai cu lampi cendé, sperando yegada dje bruidegom. Nan tambe tabatin cu warda, pero nan tabata “discreto.” E palabra griego traducí como “discreto” por transmití e sentido di ser “prudente, sensibel, sabí den práctica.” E cincunan aki a proba cu nan tabata discreto dor di trece botter cu extra zeta pa yena nan lampinan bek si tabata necesario. Realmente, nan tabata asina decididu pa ta prepará p’e bruidegom cu nan no kier a parti nan zeta cu otro. Un vigilancia asina no tabata ekibocá, ya cu ora e bruidegom a yega nan tabata presente i completamente prepará. Esnan aki cu “tabata cla a drenta cuné den e fiesta di casamentu; i a cera e porta.”

9, 10. Kico ta e punto dje comparacion dje bírgennan, i ki preguntanan nos mester haci nos mes?

⁹ Jesus no tabata dunando les di bon comportacion na fiesta di casamentu, ni e no tabata dunando conseho tocante parti loke bo tin cu otro. Su punto tabata: “P’esei sigui vigilá, pasobra boso no sa ni e dia ni e ora.” Puntra bo mes: ‘Di berdad mi ta alerto pa loke ta trata Jesus su presencia?’ Nos ta kere cu awor Jesus ta reina den shelu, pero con enfocá nos ta riba e realidad cu ‘pronto e Yu di hende lo bini riba nubia di shelu cu poder i gran gloria’? (Mateo 24:30) Pa “meianochi,” yegada dje bruidegom sigur tabata mas cerca cu ora e bírgennan a sali pa encontr’é. Den e mésun manera, yegada dje Yu di hende pa destruí e mal sistema actual ta mas cerca cu tempu nos a cuminsá anhelá su binimentu. (Romanonan 13:11-14) Nos a mantené nos vigilancia, siendo asta mas alerto segun cu e tempu ei ta yega mas cerca?

¹⁰ Pa obedecé e mandamentu “sigui vigilá” ta rekerí vigilancia constante. Cincu bírgen a laga nan zeta caba i a bai pa cumpra mas. Den e mésun manera awe un cristian por ser distraí di manera cu e no ta completamente prepará p’e yegada inminente di Jesus. Esei a sosodé cu algun cristian dje promé siglo. E por sosodé cu algun awe tambe. P’esei, laga nos puntra nos mes: ‘Esei ta sosodiendo cu mi?’—1 Tesalonicensenan 5:6-8; Hebreonan 2:1; 3:12; 12:3; Revelacion 16:15.

Sea Diligente Segun cu e Fin Ta Acercá

11. Cua comparacion Jesus a duna siguientemente, i e tabata similar na kico?

¹¹ Den su siguiente comparacion, Jesus a haci mas cu urgi su siguidónan pa ta alerto. Despues di a conta dje bírgennan sabí i esnan bobo, el a relatá e ilustracion dje talentonan. (Lesa Mateo 25:14-30.) Den hopi sentido esaki ta parce su comparacion anterior dje minanan cu Jesus a duna pasobra hopi hende “tabata imaginá nan cu e reino di Dios lo a manifestá su mes unbes.”—Lucas 19:11-27.

12. Kico ta esencia dje comparacion dje talentonan?

¹² Den e comparacion dje talentonan, Jesus a conta di un homber cu, promé cu el a haci un biahe pa estranheria, a manda yama tres esclabo. El a confia unu cu cincu talento, un otro cu dos, i e último cu un so—“cada un segun su mes abilidad.” Probablemente, esaki a nificá un talento di plata, un montante establecí cu e tempu ei tabata bal loke un obrero lo a gana den 14 aña, cu ta bastante placa! Ora e homber a regresá, el a laga e esclabonan duna cuenta di loke nan a haci durante e ‘tempu largu’ cu e tabata afó. E promé dos esclabonan a dòbel e balor di loke a confia na nan. El a bisa “bon hací,” a primintí cada un mas responsabilidad i a concluí: “Drenta den e goso di bo doño.” E esclabo cu un talento so a pretendé cu e doño tabata sumamente exigente, i p’esei e no a haci uso probechoso dje talento. El a sconde e placa, sin sikiera deposit’é cerca e bankeronan pa gana interes. E doño a yam’é “malbado i floho,” pasobra el a traha contra interes di su doño. Consecuentemente, a kita e talento for di dje, i a sak’é afó caminda “lo tin su yoramentu i su mordementu riba djente.”

13. Con Jesus a resultá di ta manera e doño den e comparacion?

¹³ Un bes mas, nos por comprendé detayenan di esaki den un sentido simbólico. Por ehempel, Jesus, kende a ser representá p’e homber cu a biaha pa estranheria, lo a bandoná su disipelnan, bai shelu i spera un tempu largu te ora el a ricibí poder como rey.b (Salmo 110:1-4; Echonan 2:34-36; Romanonan 8:34; Hebreonan 10:12, 13) Pero atrobe nos por percibí un les of principio mas amplio cu nos tur tin deber di aplicá den nos bida. Kico esei ta?

14. E comparacion dje talentonan ta enfatisá ki necesidad vital?

¹⁴ Sea nos speransa ta bida inmortal den shelu of bida eterno riba un tera paradísico, ta bisto for di Jesus su comparacion cu nos mester participá plenamente den actividadnan cristian. De facto, nos por resumí e mensahe dje comparacion aki den un palabra: diligencia. E apostelnan a establecé e patronchi for di Pentecoste di aña 33 E.C. padilanti. Nos ta lesa: “Cu hopi otro palabra [Pedro] a duna testimonio cabal i a sigui exhortá nan, bisando: ‘Salba boso for dje generacion perverso aki.’” (Echonan 2:40-42) I el a haña resultado excelente pa su esfuersonan! Ora otronan a djoin e apostelnan den e obra cristian di predicá, nan tambe tabata diligente, cu e bon nobo ‘aumentando den henter e mundu.’—Colosensenan 1:3-6, 23; 1 Corintionan 3:5-9.

15. Den ki manera special nos mester ta aplicando e punto principal dje comparacion dje talentonan?

¹⁵ Tene na mente cu e contexto dje comparacion aki ta un profecia tocante Jesus su presencia. Nos tin confirmacion amplio cu Jesus su pa·rou·sí·a ta andando i pronto lo alcansá un culminacion. Corda e coneccion cu Jesus a haci entre “e fin” i e trabou cu cristiannan tin cu haci: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Cu esaki na mente, ki sorto di esclabo nos ta parce? Puntra bo mes: ‘Lo tin motibu pa concluí cu mi ta manera e esclabo cu a sconde loke tabata confiá na dje, tal bes miéntras e tabata percurá pa su mes interesnan personal? Of ta bisto cu mi ta manera esnan cu tabata bon i fiel? Mi ta totalmente determiná pa aumentá interesnan dje Doño na tur ocasion?’

Vigilante i Diligente Durante Su Presencia

16. Ki mensahe e dos comparacionnan cu nos a considerá tin pa bo?

¹⁶ Sí, banda di nan nificacion figurativo i profético, e dos comparacionnan aki ta presentá un animacion cla cu ta bini for dje boca di Jesus mes. Su mensahe ta esaki: Sea vigilante; sea diligente, foral ora bo ta mira e señal di Cristo su pa·rou·sí·a. Esei ta awor. Pues, nos ta realmente vigilante i diligente?

17, 18. Kico disipel Santiago a consehá relacioná cu e presencia di Jesus?

¹⁷ Jesus su mitar ruman, Santiago, no tabata riba e ceru di Olijfi pa tende Jesus su profecia; pero despues el a siña di dje, i claramente el a capta su importancia. El a skirbi: “P’esei, ehercé pacenshi, rumannan, te n’e presencia di Señor. Mira! E cunukero ta sigui spera fruta precioso dje tera, eherciendo pacenshi cuné te ora e haña e yobida trempan i e yobida lat. Boso tambe ehercé pacenshi; haci boso curason firme, pasobra e presencia di Señor a yega cerca.”—Santiago 5:7, 8.

¹⁸ Despues cu Santiago a duna garantia cu Dios lo husga desfaborablemente esnan cu ta malusá nan rikesa, el a urgi cristiannan pa no ser impaciente miéntras nan ta spera riba Jehova pa actua. Un cristian impaciente lo por bira vengativo, como si fuera e mes tin cu corigí e malunan cu hende cometé. Pero esei no mag sosodé, pasobra e tempu di huicio lo yega sigur. Manera Santiago a splica, e ehempel di un cunukero ta ilustrá esei.

19. Ki sorto di pacenshi un cunukero israelita por a ehercé?

¹⁹ Un cunukero israelita cu a planta simia tabatin cu warda, promé p’e spruit, despues p’e mata crece, i finalmente p’e cosecha. (Lucas 8:5-8; Juan 4:35) Durante e lunanan ei, tabatin tempu i kisas motibu pa algun ansiedad. E yobidanan trempan lo a bini i nan lo tabata abundante? Kico dje yobidanan mas despues? Insecto of tormenta lo a caba cu e matanan? (Compará cu Joël 1:4; 2:23-25.) No obstante, por lo general un cunukero israelita por a confia den Jehova i e ciclonan natural cu el a establecé. (Deuteronomio 11:14; Jeremías 5:24) E pacenshi dje cunukero lo por a nificá realmente expectativa sigur. Den fe e tabata sa cu loke e tabata warda lo a bini. Lo el a bini di berdad!

20. Con nos por demostrá pacenshi na armonia cu Santiago su conseho?

²⁰ Miéntras un cunukero lo por tabatin algun conocimentu di ki tempu e cosecha lo ta, e cristiannan di promé siglo no por a calculá na ki tempu Jesus su presencia lo ta. Pero lo el a bin sigur. Santiago a skirbi: “E presencia [na griego, pa·rou·sí·a] di Señor a yega cerca.” Tempu cu Santiago a skirbi e palabranan ei, ainda no tabatin evidencia na gran escala, of mundial, dje señal di Cristo su presencia. Pero awor sí e evidencia t’ei! Pues, kico mester ta nos sintimentu den e periodo aki? En realidad e señal ta visibel. Nos ta mir’é. Nos por bisa cu siguransa: ‘Mi ta mira e señal cumpli.’ Nos por bisa cu confiansa: ‘Nos ta den e presencia di Señor, i su culminacion ta tras di porta.’

21. Nos ta absolutamente determiná pa haci kico?

²¹ Ya cu esei ta e caso, nos tin motibu specialmente fuerte pa tuma na pechu e lesnan fundamental di Jesus su dos comparacionnan cu nos a trata i aplicá nan. El a bisa: “P’esei sigui vigilá, pasobra boso no sa ni e dia ni e ora.” (Mateo 25:13) Awor sin duda ta e tempu pa nos ta celoso den nos sirbishi cristian. Laga nos mustra tur dia den nos bida cu nos ta comprendé Jesus su punto. Laga nos ta vigilante! Laga nos ta diligente!

[Nota]

Bo Ta Corda?

◻ Ki mensahe clave bo a saca for dje comparacion dje bírgennan sabí i esnan bobo?

◻ Pa medio dje comparacion dje talentonan, ki conseho fundamental Jesus ta ofrecé bo?

◻ Den ki sentido bo pacenshi ta relacioná cu e pa·rou·sí·a mescos cu esun di un cunukero israelita?

◻ Pakico e tempu cu nos ta biba aden ta specialmente excitante i exigente?

[Plachi na página 23]

Ki les bo ta siña for dje comparacion dje bírgennan i esun dje talentonan?