E Punto di Bista Biblico

Ta Importá Dios—Con Bo Bistí i Areglo Personal Ta?

“Mescos cu e indice ta duna e contenido dje buki, . . . asina e aparencia exterior i paña, di un hende homber of muher, ta duna nos un idea dje spiritu.”—Dramaturgo ingles, Philip Massinger.

DEN siglo tres E.C., escritor eclesiástico Tito Clemente a bin cu un lista largu di regla en cuanto bistí i areglo personal. Tabata prohibí pa usa accesorio i telanan luhoso of colorido. Hende muher no tabatin mag di pinta cabei ni “smer nan cara cu e inventonan seductor di ingeniosidad astuto,” esta “pinta cara.” A instruí hombernan pa feita cabes debí cu “un cabes sin cabei . . . ta haci un homber mustra serio i dignificá,” pero e no tabatin mag di kita su barba, pasobra esei “ta duna e cara un dignidad i autoridad paternal.”a

Siglonan mas despues e lider protestant Johannes Calvijn a pone leynan na vigor cu ta specificá e color i tipo di paña cu su siguidónan tabatin mag di bisti. Hende a desaprobá uso di hoya i kanchi, i un hende muher lo por a bai cerá pa a peña su cabei “inmoralmente haltu.”

Opinionnan extremo asina, cu lidernan religioso a defendé den transcurso di añanan, a pone hopi individuo sincero puntra: Di berdad ta importá Dios kico mi ta bisti? E ta desaprobá cierto moda of e uso di makiahe? Kico Bijbel ta siña?

Un Asuntu Personal

Ta interesante cu Juan 8:31, 32 ta declará cu Jesus a bisa su disipelnan: “Si boso permanecé den mi palabra, . . . boso lo conocé e berdad, i e berdad lo haci boso liber.” Sí, e berdadnan cu Jesus a siña hende tabata intencioná pa libra nan for dje carganan opresivo creá dor di tradicion i siñansanan falsu. Nan a ser diseñá pa refrescá esnan cu ta “afaná i cargá.” (Mateo 11:28) Ni Jesus ni su Tata, Jehova Dios, no tin ningun deseo di controlá bida di hende te n’e grado cu hende no por tuma ningun iniciativa ni ehercé nan mes facultad di razoná mas den asuntunan personal. Jehova kier pa nan bira hende maduro cu “mediante uso tin nan facultadnan perceptivo entrená pa distinguí tantu loke ta bon i loke ta malu.”—Hebreonan 5:14.

Di manera cu Bijbel no ta duna ningun ley detayá en cuanto bistí i areglo personal of e uso di cosmética. E único indicacion ta algun rekisito specífico di bistí cu e Ley di Moises a imponé riba e hudiunan, i cu tabata intencioná pa yuda nan mantené nan mes separá dje nacionnan rond di nan i di nan influencia inmoral. (Númeronan 15:38-41; Deuteronomio 22:5) Pa cristiannan, bistí i areglo personal ta básicamente un asuntu di gustu personal.

Sin embargo, esei no kier men cu Dios no ta wori kico nos ta bisti of cu ‘kico cu ta, ta bon.’ Al contrario, Bijbel ta duna guia razonabel cu ta reflehá e punto di bista di Dios riba bistí i areglo personal.

“Cu Modestia i Sano Huicio”

Apostel Pablo a skirbi cu muhernan cristian mester “dorna nan mes cu bistí bon areglá, cu modestia i sano huicio, no cu moda di flegtmentu di cabei i oro of perla of bistí mashá costoso.” Asina tambe Pedro ta consehá pa nan no “laga [nan] adorno ser esun di flegtmentu externo di cabei i bistimentu di adorno di oro.”—1 Timoteo 2:9; 1 Pedro 3:3.

Acaso Pedro cu Pablo ta bisando cu muher i hombernan cristian no mag haci nada pa mehorá nan aparencia? Absolutamente cu no! Echo ta cu Bijbel ta haci mencion di homber i muhernan fiel cu a usa hoya of zeta cosmético i perfume. Promé cu el a mira Rey Asuero, Ester a pasa dor di un régimen extenso di beyesa, enbolbiendo zetanan perfumá i masashi. I Josef tabata bistí cu paña di linen fini i un cadena di oro.—Génesis 41:42; Exodo 32:2, 3; Ester 2:7, 12, 15.

E frase “sano huicio,” cu Pablo a usa, ta yuda nos comprendé e amonestacion. E palabra griego original ta duna e idea di ser moderá i di tin dominio propio. E ta implicá cu bo tin un pensamentu sobrio di bo mes, sin hala indebido atencion na bo mes. Otro traduccionnan di Bijbel ta usa pa e palabra aki “discretamente,” “sensitivo,” “refiná” of “cu freno propio.” E cualidad aki ta un rekisito importante pa ancianonan cristian.—1 Timoteo 3:2.

Pues, ora e Scritura ta bisa cu nos bistí i areglo personal mester ta modesto i bon areglá, e ta animá nos pa evitá cualkier estilo extremo cu lo por ofendé otro hende i trece reproche riba nos reputacion i esun dje congregacion cristian. En bes di hala atencion na nan aparencia via adorno físico, esnan cu ta profesá di ta adorá Dios, mester desplegá sano huicio i pone e énfasis riba “e persona secreto di curason den e bistí incoruptibel dje spiritu ketu i suave.” Segun Pedro, esaki “ta di gran balor den bista di Dios.”—1 Pedro 3:4.

Cristiannan ta “un exhibicion teatral pa e mundu.” Nan tin cu ta conciente dje impresion cu nan ta duna otronan, foral dor cu nan tin e mandamentu di predicá e bon nobo. (1 Corintionan 4:9; Mateo 24:14) P’esei, nan lo no kier laga nada, ni nan aparencia, distraé otronan di scucha n’e mensahe vital ei.—2 Corintionan 4:2.

Aunke estilonan ta varia hopi di un lugá pa otro, Bijbel ta ofrecé nos un guia claro i razonabel cu ta permití nos scoge sabiamente. Tanten cu hende tene nan mes na e principionan aki, Dios ta duna nan amorosamente tur e libertad pa expresá nan gustu personal den e manera cu nan ta scoge pa bisti i areglá nan mes.

[Nota]