Bo Tin un Punto di Bista Piadoso di Bebida Alcohólico?

ROND di 20 aña pasá, arkeólogonan a coba saca un edificio trahá di bloki di lodo cerca e pueblo di Urmia, Iran. Nan a haña den dje un poron di cerámica cu, segun científiconan, ta miles di aña bieu, datando te n’e tempu ora algun dje promé-promé poblacionnan a establecé nan mes ei. Recientemente, nan a usa e último tecnologia pa analisá e poron. Científiconan a keda sorprendí pa haña den dje e evidencia kímico di mas bieu di trahamentu di biña.

Bijbel tambe ta establecé claramente cu desde tempu antiguo tabatin consumo di biña, cerbes i otro bebidanan alcohólico. (Génesis 27:25; Eclesiástes 9:7; Nahum 1:10) Mescos cu otro alimento, Jehova ta duna nos como individuo e chens di scoge—bebe bebida alcohólico of no. Hopi biaha Jesus a bebe biña cu su cuminda. Juan Bautista a abstené di alcohol.—Mateo 11:18, 19.

Bijbel ta prohibí bebementu di mas. Buracheria ta un picá contra Dios. (1 Corintionan 6:9-11) Na armonia cu esaki, Testigonan di Jehova no ta permití ningun persona cu bira buraché no-repentí pa permanecé den e congregacion cristian. Personanan den e congregacion cu ta scoge pa bebe bebida alcohólico mester haci esei cu moderacion.—Tito 2:2, 3.

Un Punto di Bista No-Piadoso

Hopi hende awe no tin un punto di bista piadoso di bebida alcohólico. Ta fácil pa mira cu Satanas ta promoviendo e mal uso dje producto antiguo aki. Por ehempel, den algun pais di Sur Pacífico, ta un custumber pa hende homber bini huntu pa bebe gran cantidad di un bebida fermentá trahá na cas. E ocasionnan aki por dura vários ora i ta tuma lugá frecuentemente—hopi hende homber ta entregá nan mes den e exceso aki diariamente. Algun ta consider’é simplemente parti dje cultura. Tin biaha nan ta bebe cerbes i licor na lugá di—of huntu cu—e bebida local trahá na cas. Hopi biaha esei ta resultá den buracheria.

Den un otro pais den Laman Pacífico, bo no ta tende casi di consumo moderá di alcohol di parti di hende homber. Como un regla general, ora nan bebe nan ta bebe pa bira burachi. Típicamente, riba dia di cobra un grupo di homber ta bini huntu i cumpra vários caha di cerbes, cada un conteniendo 24 botter. Nan ta stop di bebe solamente ora e cerbes caba. Como resultado, buracheria público ta na ordu di dia.

Bebidanan fermentá, manera biña di palma i otro cerbes local, tradicionalmente ta ser usá den paisnan africano. Segun tradicion den algun comunidad mester ofrecé alcohol ora ta entretené huéspednan. Ta un custumber p’e anfitrion hospitalario percurá mas bebida cu su bishitante por bebe. Den un área e custumber ta pa pone 12 botter di cerbes dilanti cada bishitante.

Hopi compania hapones ta organisá biahenan den bus pa nan empleadonan. Nan ta bai cu gran cantidad di bebida alcohólico huntu cu nan, i ta duna dispensacion pa buracheria. Algun dje biahenan di placer aki di compania ta dura dos of tres dia. Segun e revista Asiaweek, na Hapon, “for di cultivador di aros te políticonan ricu, e midí di un homber su hombresa tabata tradicionalmente e volúmen di licor cu e por manda abou.” Tendencianan similar ta ser observá den otro paisnan asiático. Asiaweek ta declará cu “sur koreanonan awor ta bebe mas bebida alcohólico pa persona cu bebedónan di cualkier otro caminda na mundu.”

Paranda di bebementu a bira un custumber extenso na campusnan di universidad na Merca. Segun The Journal of the American Medical Association, “mayoria bebedónan parandero no ta considerá nan mes hende cu tin problema cu bebementu.”a Esaki no mester ta un sorpresa pasobra den hopi pais medionan di comunicacion ta promové bebementu como un actividad aventuroso, ‘in’ i sofisticá. Hopi biaha e propaganda aki ta dirigí specíficamente riba hóbennan.

Na Inglatera, bebementu di cerbes a bira dobel durante un periodo di 20 aña i e consumo di licor sterki a bira tres bes mas tantu. Bebedónan ta cuminsá mas yong, i mas hende muher ta bebe. Tendencianan similar ta ser observá den paisnan oosteuropeo i latinoamericano. Esaki ta ser resaltá dor di tasanan aumentante di alcoholismo i accidentenan fatal di tráfico relacioná cu alcohol. Claramente, tin un aumento obvio den abusu di alcohol rond mundu.

Cuantu Ta Muchu Hopi?

E punto di bista bíblico di bebida alcohólico ta balansá. Na un banda, e Scritura ta bisa cu biña ta un don for di Jehova Dios “cu ta haci e curason di hende mortal alegrá.” (Salmo 104:1, 15) N’e otro banda, ora Bijbel ta condená bebementu di mas e ta usa e expresionnan “bebementu di mas,” “demasiado biña, paranda, partidonan di bebementu,” ‘entregá na hopi biña,’ i siendo “sclabisá na hopi biña.” (Lucas 21:34; 1 Pedro 4:3; 1 Timoteo 3:8; Tito 2:3) Pero cuantu ta “hopi biña”? Con un cristian por determiná loke ta encerá un punto di bista piadoso di bebida alcohólico?

No ta difícil pa reconocé buracheria. Su consecuencianan ta ser describí den Bijbel cu e palabranan: “Ken tin ai? Ken tin inkietud? Ken tin pleitu? Ken tin preocupacion? Ken tin herida sin motibu? Ken tin wowo dòf? Esnan cu ta keda un tempu largu cu e biña, esnan cu ta drenta en busca di biña mesclá. . . . Bo propio wowonan lo mira cosnan straño, i bo propio curason lo papia cosnan perverso.”—Proverbionan 23:29-33.

Demasiado alcohol por causa confusion, halucinacion, inconciencia i otro trastornonan mental i físico. Bou di influencia di alcohol, un persona por perde control riba su comportacion, causando daño na su mes of na otronan. Ta conocí cu burachénan ta enbolbé nan mes den conducta ridículo, ofensivo of inmoral.

Bebementu te n’e punto di buracheria, cu su consecuencianan mencioná ariba, ta definitivamente muchu hopi bebementu. Sin embargo, un persona por manifestá un falta di moderacion sin desplegá tur e señalnan típico di buracheria. Pues, bo por discutí sin fin riba e pregunta di si un hende a bebe muchu hopi of no. Unda e liña entre moderacion i exceso ta?

Protehá Bo Abilidadnan di Pensa

Bijbel no ta fiha límitenan dor di duna porciento di concentracion di alcohol den sanger of un otro midí. E capacidad dje curpa pa tolerá alcohol ta varia di un persona pa otro. Sin embargo, principionan di Bijbel ta aplicá na tur cristian i por yuda nos desaroyá un punto di bista piadoso di bebida alcohólico.

Jesus a bisa, e promé mandamentu ta pa “stima Jehova bo Dios cu henter bo curason i cu henter bo alma i cu henter bo mente.” (Mateo 22:37, 38) Alcohol tin un efecto directo riba e mente, i bebementu di mas lo interferí cu bo obedencia na e mandamentu di mas grandi aki. E por interferí seriamente cu bon huicio, abilidad di resolvé problema, dominio propio i otro funcionnan importante dje mente. E Scritura ta spierta nos: “Protehá sabiduria práctico i abilidad di pensa, i nan lo resultá di ta bida pa bo alma i encanto pa bo garganta.”—Proverbionan 3:21, 22.

Apostel Pablo ta suplicá cristiannan: “Presentá boso curpa como un sacrificio bibu, santu, aceptabel na Dios, un sirbishi sagrado cu boso facultad di razoná.” (Romanonan 12:1) Un cristian lo ta “aceptabel na Dios” si e ta bebe alcohol te n’e punto di renunciá su “facultad di razoná”? Generalmente, un bebedó inmoderá su curpa gradualmente ta cuminsá tolerá mas alcohol. E por sinti cu—p’e—su bebementu ta bou dje drempel di buracheria. Sin embargo, e por wel ta desaroyando un dependencia insaludabel riba alcohol. Un persona asina por presentá su curpa como “un sacrificio bibu, santu?”

Cualkier cantidad di alcohol cu ta perhudicá bo “sabiduria práctico i abilidad di pensa” como un cristian ta demasiado alcohol pa bo.

Kico Ta Forma Bo Punto di Bista di Alcohol?

Un cristian mester evaluá si su actitud pa cu bebementu ta ser influenciá dor di tendencia actual of tradicion. Ora ta toca bebida alcohólico, abo siguramente lo no kier tuma bo decisionnan basá riba tendencia cultural of propaganda di medionan di comunicacion. Ora di evaluá bo propio actitud, puntra bo mes, ‘Mi actitud pa cu bebementu ta ser influenciá pa loke ta aceptabel den e comunidad? Of mi bebementu ta ser dirigí dor di principionan bíblico?’

Aunke Testigonan di Jehova no ta contra custumbernan di cultura, nan ta realisá cu Jehova ta odia hopi custumber cu ta ser ampliamente aceptá awe. Algun comunidad ta consentí cu aborto, transfusion di sanger, homosexualidad of poligamia. Sin embargo, cristiannan ta actua na armonia cu Dios su punto di bista dje cosnan aki. Sí, un punto di bista piadoso lo motivá un cristian pa odia e custumbernan ei sin importá si nan ta aceptabel den e cultura of no.—Salmo 97:10.

Bijbel ta papia di “e boluntad dje nacionnan,” cu ta incluí “demasiado biña” i “partidonan di bebementu.” E término “partidonan di bebementu” ta transmití e idea di reunionnan cu tabata ser organisá cu e propósito specífico pa bebe gran cantidad di alcohol. Ta parce cu den tempu bíblico algun cu tabata orguyoso di nan supuesto abilidad pa bebe hopi bebida sin sinti su efectonan a purba superá otronan den bebementu, of nan a purba mira ken por a bebe mas tantu. Apostel Pedro ta referí na e clase di conducta aki como un “estado baho di corupcion” den cua cristiannan repentí no ta participá mas.—1 Pedro 4:3, 4.

Lo ta razonabel pa un cristian adoptá e punto di bista cu tanten cu e no bira burachi, no ta importá realmente unda, ki ora of cuantu el a bebe? Nos por puntra, Esei ta un punto di bista piadoso? Bijbel ta bisa: “Sea cu boso ta come of ta bebe of ta haci cualkier otro cos, haci tur cos p’e gloria di Dios.” (1 Corintionan 10:31) Kisas no ta tur den un grupo di homber cu ta bini huntu pa bebe gran cantidad di alcohol den público ta bira burachi, pero nan conducta lo trece gloria na Jehova? Bijbel ta spierta: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.”—Romanonan 12:2.

Evitá di Trompecá Otronan

Interesantemente, hopi biaha net e culturanan cu ta tolerá bebementu di mas ta desaprob’é ora un bebedó pisá ta pretendé di ta un homber di Dios. Den un comunidad chikitu den Sur Pacífico, un observador a bisa: “Mi ta admirá boso. Boso ta predicá e berdad. Pero e problema cu nos ta mira ta cu boso hombernan ta bebe muchu alcohol.” Segun informe, e individuonan no tabata bira burachi, pero e detaye ei no tabata asina bisto pa hopi hende den e comunidad. Observadornan por a concluí fácilmente cu mescos cu mayoria otro hende cu ta participá den sesionnan di bebementu, e Testigonan tambe ta bira burachi. Un minister cristian cu ta participá den sesionnan largu di bebementu por mantené un bon reputacion i cumpli cu su ministerio público cu frankesa di expresion?—Echonan 28:31.

Un informe for di un pais europeo ta indicá cu tin biaha algun ruman homber i muher ta yega Salon di Reino cu un holó fuerte di alcohol den nan rosea. Esaki a molestiá e concenshi di otronan. Bijbel ta spierta: “Ta bon pa no come carni ni bebe biña ni haci nada cu ta trompecá bo ruman.” (Romanonan 14:21) Un punto di bista piadoso di bebida alcohólico lo impulsá un cristian maduro pa ta sensitivo p’e concenshi di otronan, asta si esei ta nificá abstené for di alcohol bou di algun circunstancia.

Cristiannan Ta Inekibocablemente Diferente

Lamentablemente, den hopi manera e mundu aki a ofendé Jehova dor di malusá e bon cosnan cu el a duna humanidad, incluyendo bebida alcohólico. Cada cristian dedicá mester haci esfuerso pa evitá e puntonan di bista no-piadoso cu ta prevalecé. Asina hende lo por mira “e distincion entre un hustu i un malbado, entre un cu ta sirbi Dios i un cu no a sirbié.”—Malakías 3:18.

Ora ta toca bebida alcohólico, e “distincion” entre Testigonan di Jehova i e mundu mester ta inekibocabel. Bebementu di bebida alcohólico no ta central den bida di cristiannan berdadero. Nan no ta experimentá cu e límitenan di cuantu alcohol nan curpa por tuma, yegando peligrosamente na rand di buracheria; ni nan no ta permití bebida alcohólico perhudicá of den cualkier manera stroba nan di sirbi Dios cu henter nan alma i cu un mente cla.

Como grupo, Testigonan di Jehova tin un punto di bista piadoso di bebida alcohólico. Kico di abo? Cada un di nos por conta riba Jehova su bendicionnan segun cu nos ta sigui e instruccion bíblico “pa rechasá maldad i deseonan mundano i biba cu sano huicio i husticia i debocion piadoso den e sistema actual di cosnan aki.”—Tito 2:12.

[Nota]

[Kuadro/Plachi na página 28]

Scucha Bo Sernan Kerí

Un bebedó inmoderá hopi biaha ta e último pa realisá cu e tin un problema. Famianan, amigunan i ancianonan cristian no mester vacilá pa ofrecé yudansa na sernan kerí cu ta falta moderacion. N’e otro banda, si personanan stimá ta expresá inkietud riba bo custumber di bebe alcohol, probablemente nan tin bon motibu pa esei. Tuma loke nan ta bisa na consideracion.—Proverbionan 19:20; 27:6.